ᐅᖃᖅᑐᖃᖃᑦᑕᖅᓯᒪᓕᖅᐳᖅ ᐊᐱᖁᑎᖃᖅᖢᑎᒃ ᐃᖕᒥᓃᖅᑕᐃᓕᑎᑦᓯᓂᕐᒧᑦ ᐱᓱᒍᑕᐅᕙᒃᑐᑦ ᐊᓯᖏᓪᓗ ᑕᒪᒃᑯᐊ ᖃᓄᐃᓕᐅᕈᑕᐅᕙᒃᑐᑦ ᐃᑲᔪᕋᓱᐊᕈᑕᐅᑉᓗᑎᒃ ᓱᕙᓕᑭᐊᖑᖃᑦᑕᕐᓂᖏᓐᓄᑦ.
ᑕᒪᒃᑯᐊ ᐅᒃᐱᕈᓱᓗᐊᖏᑦᑐᑦ ᐃᑲᔪᕐᓂᖃᖃᑦᑕᕐᓂᖏᓐᓄᑦ ᑕᐃᒪᓐᓇ ᐅᔾᔨᖅᑐᕈᑕᐅᒋᐊᖃᕐᓂᖓᓄᑦ ᐃᓱᒪᖏᑉᐳᑦ ᐃᖕᒥᓃᖃᑦᑕᕐᓂᖅ ᓄᓇᕗᒥ, ᖃᐅᔨᒪᓕᐊᓂᒃᑲᑉᑕᒎᖅ, ᐊᒻᒪ ᐊᓯᖏᓐᓂᒃ ᐱᓕᕆᐊᖃᕐᓂᖅᓴᐅᒋᐊᖃᕋᑉᑕ ᐃᑲᔪᕐᓂᖃᓪᓚᕆᖕᓂᐊᖅᑐᓂᒃ ᐃᑲᔪᕈᑎᒃᓴᓂᒃ ᐃᓄᖕᓄᑦ.
ᖄᖓᒍᑦ, ᑕᐃᒪᓐᓇ ᑐᑭᖃᖅᐳᖅ, ᖁᕕᐊᓇᖅᖢᓂᓗ ᑕᐅᑐᒃᖢᒋᑦ ᐃᓄᐃᑦ ᐃᑲᔪᕋᓱᐊᖅᑐᑦ ᐃᓅᖃᑎᒥᖕᓂᒃ ᓄᓇᓕᖕᓂᒥᐅᖃᑎᒥᓂᒃ, ᑭᓯᐊᓂ ᑕᒪᒃᑯᐊ ᐱᓱᒍᑕᐅᕙᒃᑐᑦ ᑲᑎᒍᑕᐅᕙᒃᑐᑦ ᐊᓯᖏᓪᓗ ᖃᓄᐃᓕᐅᕈᑕᐅᕙᒃᑐᑦ ᓄᓇᓕᖕᓂ ᓱᕙᓕᑭᐊᖑᖃᑦᑕᕐᓂᕋᖅᑕᐅᑎᓪᓗᒋᑦ ᓱᓕᖏᑉᐳᖅ ᑕᒪᓐᓇ.
ᖃᐅᔨᕚᓪᓕᖅᑎᑦᓯᓇᓱᐊᕐᓗᓂ ᐅᒃᑯᐃᖅᓯᕙᒃᐳᑦ ᑐᓴᐅᒪᑎᑎᒍᑎᓂᒃ, ᑕᑯᒃᓴᐅᑎᑦᓯᓕᖅᖢᑎᒡᓗ ᑕᐃᒪᓐᓇ ᐱᐅᖏᑦᑐᖅ ᐋᖅᑭᒃᓱᖅᑕᐅᒋᐊᖁᑉᓗᒍ ᐅᓗᕆᐊᓇᕐᓂᖓᓂ.
ᑕᐃᒪᓐᓇ ᕿᕐᓂᖅᑐᐊᓗᐃᑦ ᓄᓇᖓᓐᓂ ᐅᖃᐅᓯᕆᔭᐅᔪᑐᖃᒃᓴᐅᒐᓗᐊᖅᑎᓪᓗᒍ, ᐊᒥᓱᓂᒃ ᐃᓕᖁᓯᖃᐅᖅᑐᑦ ᐅᖃᐅᓯᕆᖃᑦᑕᕐᒥᔭᖓᑦ, ᑕᐃᒪᓐᓇ ᓄᓇᓕᖕᓂᒥᐅᑕᓗᒃᑖᑦ ᐱᕈᖅᓴᐃᒋᐊᖃᕐᓂᖏᓐᓄᑦ ᓄᑕᕋᒥᒃ.
ᑕᒪᓐᓇ ᐅᖃᐅᓯᑐᖃᖅ ᐱᔾᔪᑎᖃᖅᐳᖅ ᐱᓕᕆᖃᑎᒌᒋᐊᖃᕐᓂᖏᓐᓄᑦ ᓄᓇᓖᑦ ᓴᓂᓕᒥᐅᑕᕇᑦ, ᐳᑭᖅᑕᓕᑦ, ᑐᒃᓯᐊᖅᑎᑎᔨᑦ, ᐃᓕᓐᓂᐊᖅᑎᑎᔨᑦ, ᐃᖃᐃᓕᓴᐅᑎᓂᒃ ᐱᓐᖑᐊᕈᑎᓂᒃ ᐃᓕᓐᓂᐊᖅᑎᑎᔨᑦ, ᐅᓇᑕᖅᑐᒃᓴᖑᐊᓛᑦ ᒍᕈᒐᐃᑦ ᓯᕗᓕᖅᑎᖏᑦ, ᐊᓯᖏᓪᓗ.
ᐊᓯᐊᒍᑦ ᐱᒋᐊᕐᓗᒍ, ᐱᓕᕆᖃᑎᒌᒋᐊᖃᖅᐳᑦ ᒪᒃᑯᒃᑐᑦ ᐊᐅᓚᑎᑕᐅᑦᓯᐊᕐᓗᑎᒃ, ᖃᓄᐃᓕᐅᕈᑎᖃᖅᑎᑕᑦᓯᐊᕐᓗᑎᒡᓗ; ᑕᐃᒪᑐᖅ ᑕᒪᒃᑯᓂᖓ ᑕᒻᒪᖅᓴᐃᒍᑎᓕᕆᖏᓪᓗᑎᒃ ᐊᑐᖅᑕᐅᓗᒃᑖᕆᕙᒃᖢᑎᒍᓗ ᑕᒪᓐᓇ, ᐱᓗᐊᖅᑐᒥᒃ ᐅᑉᓗᒥᐅᓕᖅᑐᖅ.
ᑕᐃᒪᓐᓇ ᐱᓕᕆᓪᓗᕆᒃᓴᕆᐊᖃᖅᐳᒍᑦ ᐊᑐᖅᑕᐅᖏᓕᖅᑎᓐᓂᐊᕈᑎᒍ ᐃᖕᒥᓃᖃᑦᑕᕐᓂᖅ. ᐊᒻᒪ, ᒥᑭᔫᒐᓗᐊᖅᐸᑦ ᐊᖏᔫᒐᓗᐊᖅᐸᑦ ᐱᓱᒃᑎᑎᔪᑦ ᖁᕕᐊᓱᒃᑎᑦᓯᔪᓪᓗ ᐃᓅᓂᕐᒥᒃ ᓴᓐᖏᓕᖅᑎᑎᖕᒪᑦ, ᐃᓚᖓᒍᑦ ᓄᓇᓕᖕᓂ ᐊᑭᒋᐊᖅᓯᒪᖁᑉᓗᒋᑦ.
ᑕᐃᒪ ᐃᖕᒥᓃᖅᑐᖃᕌᖓᑦ ᑭᕙᓪᓕᕐᒥ, ᑕᒪᕐᒥᒃ ᐊᒥᓱᑦ ᐅᖁᒪᐃᒃᓴᓕᖃᑦᑕᖅᐳᑦ, ᑲᑉᐱᐊᓱᒃᖢᑎᒡᓗ ᐃᖕᒥᓃᖃᑦᑕᕐᓂᕐᒥᒃ, ᐊᒻᒪ ᖁᕕᐊᓱᖏᔾᔪᑎᖃᖅᖢᑎᒃ ᓄᖅᑲᖅᑎᑦᓯᓇᓱᐊᖅᖢᑎᒃ ᑕᒪᑐᒥᖓ.
ᑭᓯᐊᓂᓗ ᑕᒪᓐᓇ ᓱᓕᑦᓯᐊᖅᖢᑕ ᐊᑭᒋᐊᕈᑎᒋᖃᑦᑕᓕᑕᐃᓐᓇᖅᐸᕗᑦ ᐅᑭᐅᓂ ᖁᓕᐅᓯᒪᓕᖅᑐᓂ, ᐊᒃᓱᕈᕐᓇᕐᓂᐊᕐᓂᖓᓗ ᓇᓗᓇᓚᐅᖏᑦᖢᓂ ᐊᑯᓂ ᐱᕈᖅᑎᓯᒪᓕᕋᑉᑎᒍ ᓄᓇᑉᑎᓐᓂ.
ᑐᓴᖅᑕᐅᒍᒪᖃᑦᑕᖏᑉᐳᖅ, ᑭᓯᐊᓂ ᐃᖕᒥᓃᖃᑦᑕᕐᓂᖅ ᓱᖏᐅᑎᔭᐅᕙᓪᓕᐊᑐᐃᓐᓇᓚᐅᕋᓗᐊᖅᖢᓂ ᑕᐃᒪᓐᓇ ᓄᓇᓕᖕᓂᒥᐅᑦ ᓂᑉᐱᐊᕙᓪᓕᐊᓕᖅᐳᑦ.
ᐊᔪᕐᓇᖏᓐᓂᖅᓴᐅᑉᓗᓂ ᓄᓇᓕᖕᓂᒥᐅᑦ ᓴᓗᒪᔪᒥᒃ ᓄᑖᒥᒃ ᐱᒋᐊᕈᑎᖃᕆᐊᖃᓕᖅᐳᑦ, ᑕᒪᕐᒥᒃ ᐊᑕᐅᓯᕐᒧᑦ ᑐᕌᕐᓗᑎᒃ ᓄᑦᓲᑎᖏᓪᓗᑎᒃ.
ᑭᓯᐊᓂ ᑲᑉᐱᐊᓇᖅᑐᖅ ᐃᑎᖕᒥᖏᑦ ᑐᓗᖅᓯᒪᑦᓯᐊᓕᖅᐳᑦ ᐃᑎᔪᒥᒃ, ᑲᑉᐱᐊᓇᖅᓯᕙᓪᓕᐊᑐᐃᓐᓇᖅᖢᓂᓗ ᑲᑉᐱᐊᓱᒃᑎᑦᓯᐊᓂᖅᓯᒪᓕᕋᓗᐊᖅᖢᓂ.
ᓄᓇᓕᖕᓂ ᐃᓚᖏᓐᓂ, ᐅᓇᑕᕐᓂᖏᑦ ᑕᒪᑐᒥᖓ ᐊᒥᓱᐃᖅᑕᕐᓗᑎᒃ ᖁᒡᕕᐅᖃᑦᑕᕐᓂᐊᖅᐳᑦ ᓵᓚᒃᓴᓚᐅᖏᓐᓂᕐᒥᖕᓂ ᑲᑉᐱᐊᓇᖅᑐᒥᒃ, ᐃᓚᖏᑦ ᑲᔪᓯᑐᐃᓐᓇᕆᐊᖃᕐᒪᑕ ᐊᓯᐊᓄᑦ ᕿᕕᐊᖅᓯᒪᑎᓪᓗᑕ. ᑕᐃᒪᓐᓇ ᒪᑭᑉᐸᓪᓕᐊᖏᓐᓇᖃᑦᑕᕐᒪᑦ ᑕᐃᒪᓐᓇᐃᓕᐅᖅᖢᓂ.
ᑭᓯᐊᓂ ᐱᕙᓪᓕᐊᕗᒍᑦ, ᖃᐅᔨᒪᕗᖓᓗ ᖃᖓᑭᐊᒃ ᓵᓚᒃᓴᕐᓂᐊᕋᑉᑕ ᑲᑉᐱᐊᓇᖅᑐᒥᒃ, ᐱᓗᐊᖅᑐᒥᒃ ᑕᒪᒃᑯᓄᖓ ᖃᓄᐃᓐᓂᐊᕐᓂᕐᒧᑦ ᖃᐅᔨᒪᖏᑦᑐᓄᑦ.
ᑕᐃᒪ ᐃᕆᐊᓛᖃᑦᑕᕆᐊᖃᖅᐳᒍᑦ ᖁᕕᐊᓱᒍᑎᖃᕐᓗᑕ ᐃᓅᓯᕐᒥᒃ, ᑕᐃᒪᓐᓇ ᖃᐅᒪᑎᑦᓯᖏᓐᓇᕋᓱᐊᕐᓗᑕ ᑲᑉᐱᐊᓇᖅᑐᖅ ᑕᑲᒃᐸᓪᓕᐊᓂᐊᕐᒪᑦ ᖃᐅᔨᕚᓪᓕᖅᑎᑦᓯᖃᑦᑕᕆᐊᖃᖅᐳᒍᑦ ᐅᖃᐅᓯᕇᓐᓇᖅᐸᒡᓗᒍᓗ, ᖃᐅᔨᑎᑦᓯᒑᖓᑉᑕᓗ ᐃᓄᖕᓂᒃ ᑕᒪᓐᓇ ᓄᖅᑲᖅᑎᑕᐅᖁᒐᑉᑎᒍ, ᑕᐃᒪᓐᓇ ᖃᒡᓕᕚᓪᓕᖃᑦᑕᖅᐳᒍᑦ ᐱᓇᓱᐊᖅᑕᑉᑎᓐᓄᑦ.
ᑕᐃᒪᓐᓇ ᖃᖓᒥᐊᖅ ᐱᓱᖃᑕᐅᔪᓐᓇᖅᐳᖓ.