ᐃᓄᐃᑦ ᐅᑭᐅᖅᑕᖅᑐᒥ ᖃᐅᔨᒪᓗᐊᖅᐳᑦ ᐋᓐᓂᐊᕐᓂᐅᔪᒥ, ᐋᓐᓂᖅᓯᒪᓂᕐᒥ, ᓂᙵᒃᓯᒪᓂᕐᒥ ᐊᒻᒪ ᐊᓯᖏᓐᓂ ᐃᒃᐱᒋᔭᐅᓂᐅᔪᓂ ᓇᒡᓕᒋᔭᒥ ᐊᓯᐅᑎᓪᓗᒍ ᐃᒻᒥᓃᕐᓂᕐᒧᑦ. ᑲᓇᑕᐅᑉ ᐅᑭᐅᖅᑕᖅᑐᖓ ᖁᑦᑎᓛᖑᔪᒥ ᐅᓄᕐᓂᖃᖅᐳᖅ ᐃᒻᒥᓃᕐᓂᕐᒥᑦ ᑕᒪᒃᑭᓗᒃᑖᒥ ᑲᓇᑕᒥ.
ᐃᒻᒥᓃᕐᓂᖅ ᐊᑲᐅᙱᓕᐅᕈᑕᐅᓚᐅᖅᓯᒪᙱᓚᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑕᐃᔅᓱᒪᓂᑐᖃᖅ – ᒫᓐᓇᐅᓕᖅᑐᒥ ᐊᓯᔾᔨᖅᓯᓯᒪᕗᖅ ᐃᓄᖁᑎᑦᑎᓐᓂ, ᓵᙵᓲᖑᓕᖅᐳᑦ ᐊᒥᓱᓂ ᐊᒃᓱᕈᕐᓂᐅᔪᓂ ᐃᓄᒃᐳᑦ ᐊᒻᒪ ᐃᓕᖅᑯᓯᕗᑦ ᓵᙵᓚᐅᖅᓯᒪᙱᑕᖏᓐᓂ, ᐃᓚᖃᖅᑐᒥ ᐃᒥᐊᓗᒃ, ᓱᓐᓂᕈᑕᐅᓲᓂᑦ ᓱᐴᖅᑐᒐᕐᓂ ᐊᒻᒪ ᐃᖅᑲᓇᐃᔮᖃᙱᓐᓂᐅᔪᒧᑦ.
ᓄᓇᕗᒻᒥᐅᑦ ᓴᙱᔫᓪᓗᑎᒃ ᐃᓅᕗᑦ, ᑕᑯᒃᓴᐅᑎᑕᐅᓯᒪᕗᖅ ᐊᕐᕌᒍᒐᓴᓂ ᐃᓄᐃᑦ ᐃᓕᖅᑯᓯᖓ ᐱᔪᓐᓇᖅᐳᖅ ᐊᒻᒪ ᖄᖏᐅᑎᔪᓐᓇᕐᓂᖓᓂ ᐊᒥᓱᓂ ᐊᒃᓱᕈᕈᑕᐅᔪᓂ ᐃᓄᒃᐳᑦ ᓵᙵᕙᖕᓂᖏᓐᓂ ᒫᓐᓇᐅᔪᒥ.
ᓯᑎᐱᕆ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᑕᖅᑭᐅᕗᖅ, ᐊᒻᒪ ᐃᓴᒃᓯᒪᒋᑦ ᐃᓅᓯᕐᒧᑦ ᐱᓱᖕᓂᐅᔪᓂ ᐱᓕᕆᐊᖑᓚᐅᖅᐳᑦ ᓄᓇᓕᖕᒥᐅᑕᐃᑦ ᓇᖏᖃᑎᒌᒃᖢᑎᒃ ᑕᑯᒃᓴᐅᑎᑦᑎᓂᕐᒧᑦ ᐃᑲᔪᖅᓱᐃᓂᖏᓐᓂ ᐃᒻᒥᖕᓄᑦ ᐊᒻᒪᓗ ᑕᐃᒃᑯᓄᖓ ᐊᒃᓱᕉᓴᒃᑐᓄᑦ.
“ᑕᐃᒪ ᑕᐃᒪᐃᒃᑲᓐᓂᖁᔨᔪᓐᓃᖅᑐᒍᑦ” ᐅᖃᐅᓯᒃᓴᐅᓚᐅᖅᐳᖅ ᓄᓇᓕᐅᔪᖅ ᖁᕐᓗᖅᑑᒥ ᓇᒃᓯᐅᔾᔨᓚᐅᕐᓂᖏᓐᓂ.
ᐋᖅᑭᒃᓱᖅᑕᐅᓪᓗᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᐅᔪᒥ, ᐃᓄᒋᐊᖕᓂᐅᔪᓂ 50–ᐸᓗᖕᓂ ᐱᓱᓚᐅᖅᐳᑦ ᓄᓇᓕᒃᑎᒍᑦ ᒪᕐᕉᖕᓂ ᖃᑦᑎᕆᔨᒃᑯᑦ ᓄᓇᓯᐅᑎᖏᓐᓂ ᒪᓕᒃᖢᑎᒃ. ᐱᓱᖕᓂᖅ ᐃᓱᓕᓚᐅᖅᐳᖅ ᐱᙳᐊᕐᕕᖕᒥ ᑳᐱᑐᖅᑎᑕᐅᓪᓗᑎᒃ, ᑏ ᐊᒻᒪ ᑕᒧᓗᒐᒃᓴᓂ ᐸᕐᓇᐃᔭᐅᓚᐅᖅᑐᓂ ᐱᙳᐊᖅᑐᓕᕆᔨᒃᑯᓐᓂ.
ᐅᖃᐅᓯᐅᓂᐅᔪᖅ ᒪᓕᒃᑐᒥ ᐅᓐᓄᖓᓂ “ᓯᕗᒻᒧᑦ ᐃᖏᕐᕋᓂᐅᔪᒥ” ᐸᕐᓇᒃᑕᐅᓯᒪᓚᐅᖅᐳᖅ ᐃᓱᓕᓐᓂᐊᖅᖢᓂ ᓇᒃᓯᐅᔾᔨᓂᖏᓐᓂ ᐸᐃᑉᐹᒥ ᓴᓇᓯᒪᔪᓂ ᖃᐅᒻᒪᖅᑯᑎᓂᑦ, ᑭᓯᐊᓂ ᖃᐅᒻᒪᖅᑯᑎᑦ ᑎᑭᓚᐅᙱᒻᒪᑕ ᑕᐃᔅᓱᒧᖓ ᐅᓐᓄᖓᓄᑦ, ᐅᔭᖅᑲᓂ–ᐃᒋᑦᑎᓂᐅᔪᒥ ᐊᑎᖃᖅᑐᓂ ᐊᓯᐅᔨᔭᐅᓯᒪᔪᓄᑦ ᓇᒡᓕᒋᔭᖏᓐᓂ ᑎᑎᕋᖅᓯᒪᓪᓗᑎᒃ ᐅᔭᖅᑲᓄᑦ, ᐱᓕᕆᐊᖑᖔᓚᐅᖅᐳᖅ ᐃᓇᖏᖅᓯᓪᓗᓂ ᖃᐅᒻᒪᖅᑯᑕᐅᔪᓂ ᐊᐅᓪᓚᖅᑎᑦᑎᓂᐅᔪᓂ. ᐃᓄᑐᖃᕐᒥ ᑐᒃᓯᐊᖅᑐᖃᓚᐅᖅᐳᖅ ᐃᓄᐃᑦ ᐃᒋᑦᑎᓚᐅᖅᑳᕋᑎᒃ ᐅᔭᖅᑲᒥᓂᑦ ᑰᖕᒧᑦ ᓴᒃᑯᐃᑦᑎᓂᕐᒧᑦ ᐃᓱᒪᒋᔭᐅᓂᐅᔪᒥ ᓯᕗᒻᒧᑦ ᐃᖏᕐᕋᓂᐅᔪᒥ.