Skip to content

10,000-ᓂᒃ ᐃᑲᕐᕋᓂᒃ ᐱᐊᓂᒃᓯᔪᖅ ᓇᓗᓇᐃᒃᑯᑕᖅᑖᖅᖢᓂᓗ

ᐃᓕᓴᖅᑎᓂᒃ ᐃᑲᔪᖅᑎᐅᓚᐅᖅᓯᒪᔪᖅ, ᒋᐳᕆᐊᓕ ᐅᓛᔪᒃ, ᐊᔪᐃᓐᓇᖅᑕᐅᓪᓗᓂ ᐃᓚᒥᓄᑦ, ᐊᑎᓕᐅᓚᐅᖅᓯᒪᓐᓂᕐᒪᑦ ᒥᑐᐹᖕᒥ ᒎᓗᓂᒃ ᐅᔭᕋᓐᓂᐊᕐᕕᐊᓂ ᐊᖁᑎᐅᓂᕐᒥᒃ ᐳᐊᕆᔭᐅᑎᕐᔪᐊᓂᒃ ᐅᓯᑲᖅᑕᐅᑎᓂᒃᓗ ᓄᓇᒃᑰᔫᓂᒃ 2012-ᒥ.

ᒌᐳᕆᐊᓕ ᐅᓛᔪᒃ, ᑕᓕᖅᐱᐊᓂ, ᑕᑯᒃᓴᐅᔪᖅ ᐅᕙᓂ ᐃᓕᓴᖃᑎᒥᓂᒃ ᐱᖃᑎᖃᖅᖢᓂ ᕆᓴᑦ ᕼᐋᕕᒥᒃ, ᒪᔪᕋᓕᖅᑎᓪᓗᒍ ᐃᓕᓴᕐᕕᖕᒥᓄᑦ ᐋᓂᑯ ᐄᒍᓪᑯᑦ ᐅᔭᕋᓐᓂᐊᕐᕕᐊᓂ ᐅᔭᕋᓐᓂᐊᖅᑎᐅᓂᕐᒥᒃ ᐃᓕᓴᓚᐅᕐᒪᑦ ᒥᑐᐹᖕᒃ ᒎᓗᓂᒃ ᐅᔭᕋᓐᓂᐊᕐᕕᐊᓂ 2012-ᒥ ᐊᒻᒪᓗ ᒫᓐᓇ ᓱᖏᐅᑎᓯᒪᑦᑎᐊᓕᖅᖢᓂᒋᑦ ᑕᒪᐃᑕ ᐅᔭᕋᓐᓂᐊᕐᕕᐊᓂ ᓴᓇᖅᑯᑎᓕᒫᑦ.

ᐅᑭᐅᑦ ᐱᖓᓲᔪᖅᑐᑦ ᓈᓯᒪᓕᖅᑎᓪᓗᒋᑦ, ᑕᕝᕙᓂ ᐅᔭᕋᓐᓂᐊᕐᕕᖕᒥ ᐅᐱᒋᔭᐅᑦᑎᐊᓕᖅᑐᖅ ᐱᐊᓂᒃᓯᓯᒪᓕᕐᒪᑦ ᖃᐅᔨᒪᔭᐅᒋᐊᓕᖕᓂᒃ - ᐊᖁᑎᐅᓪᓗᓂ RH120 ᐳᐊᕆᔭᐅᑎᕐᔪᐊᒥᒃ ᐊᖁᑎᐅᓂᕐᒥᒃ, ᑕᐃᒪᓐᓇ ᐅᖃᐅᓯᕆᓚᐅᖅᑕᖓ ᐃᓕᓴᐃᔨᖓᑕ ᒌᐳᕆᐊᓕ ᐋᓐᑐᐊᓐ ᑰᑏ, ᑕᐃᒪᓐᓇ “ᐊᖏᓂᖅᐹᖑᓪᓗᓂ ᐱᔭᕆᑐᓂᖅᐹᖑᔪᖅ ᓴᓇᖅᑯᑎᓂ ᓄᓇᕐᔪᐊᒥ ᐅᔭᕋᓐᓂᐊᖅᑎᒃᑯᓐᓂ.”

“ᒌᐳᕆᐊᓕ ᓯᕗᓪᓕᖅᐹᓂ ᐃᓄᖕᓂ ᐃᓚᐅᖃᑕᐅᓕᖅᑐᖅ ᐃᖅᑲᓇᐃᔭᑎᒋᔭᐅᔪᓂ ᐅᔭᕋᓐᓂᐊᖅᑎᒃᑯᓐᓄᑦ ᖁᑦᑎᖕᓂᖅᐹᒥᒃ ᐃᓕᓴᕈᑎᒥᒃ ᐱᐊᓂᒃᓯᓯᒪᓕᕐᒪᑦ - ᑖᓐᓇ ᐃᓕᓴᕈᑎ ᐋᕿᒃᓱᖅᑕᐅᓯᒪᔪᖅ ᐅᔭᕋᓐᓂᐊᖅᑎᓄᑦ ᒥᑐᐹᖕᒥ ᐃᖅᑲᓇᐃᔭᖅᑎᖏᓐᓄᑦ ᐱᕙᓪᓕᐊᑎᑦᑎᔨᓄᑦ, ᐃᑲᔪᖅᓴᕈᑕᐅᓇᓱᐊᖅᖢᓂ ᐃᓄᖕᓂᒃ ᐃᖅᑲᓇᐅᔭᖅᑎᓂᒃ ᐊᔪᖏᓴᕈᒪᔪᓂᒃ ᐊᔾᔨᒌᖏᑦᑐᓂᒃ ᐅᔭᕋᓐᓂᐊᕐᕕᓂ ᓴᓇᖅᑯᑎᓂᒃ,” ᐅᖃᕆᓪᓗᓂ ᑰᑏ.

ᐅᓛᔪᒃ ᐊᖁᑎᐅᒋᐊᒃᓴᖅ ᖁᕕᐊᒋᔭᖓ ᐅᓯᑲᖅᑕᐅᑎᕐᔪᐊᓂᒃ ᓄᓇᒃᑰᔫᓂᒃ, ᐅᖃᕆᓪᓗᓂ, ᐊᒻᒪᓗ ᑕᐃᒪᓐᓇ ᐱᒋᐊᓚᐅᖅᓯᒪᔪᖅ ᓯᕗᓪᓕᖅᐹᒥ ᓯᑕᒪᓂᒃ ᐱᓇᓱᐊᕈᓯᕐᓂᒃ ᐃᓕᓴᖅᖢᓂ ᐊᖁᑎᐅᓂᕐᒥᒃ ᓄᓇᒃᑰᔫᒥᒃ ᐊᖁᓚᐅᖅᓯᒪᖏᑦᑎᐊᖅᖢᓂ. ᑭᖑᓂᖓᓂ ᐅᓯᑲᖅᑕᐅᑎᒥᒃ ᓄᓇᒃᑰᔫᒥᒃ Class 3 ᐃᑲᕐᕋᓂᒃ 1000 ᐱᐊᓂᒃᓯᒋᐊᖃᖅᖢᓂ. 2-ᑕᐅᓴ ᐃᑲᕐᕋᐃᑦ ᓈᑎᓪᓗᒋᑦ, ᐊᕐᕌᒍᑎᓪᓗᒍ ᐅᔭᕋᓐᓂᐊᕐᕕᖕᒥ ᐃᖅᑲᓇᐃᔭᓕᖅᖢᓂ, ᐅᓛᔪᒃ ᓇᓗᓇᐃᒃᑯᑕᖅᑖᓚᐅᖅᑐᖅ ᐊᖁᑎᐅᓂᕐᒥᒃ ᐅᓯᑲᖅᑕᐅᑎᕐᔪᐊᒥᒃ Class 2-ᖑᖅᖢᓂ. ᐊᓱᐃᓛᒃ, ᓇᓗᓇᐃᒃᑯᑕᖅᑖᒃᑲᓐᓂᕆᓪᓗᓂ Class 1-ᒥᒃ ᐊᒻᒪᓗ ᓄᒃᑎᖅᖢᓂ ᐃᖅᑲᓇᐃᔮᒥᒍᑦ ᐊᔪᓕᖅᑐᖃᖅᐸᑦ ᑭᖑᓪᓕᖅᑎᐅᒍᓐᓇᖅᓯᓪᓗᓂ ᓇᓕᐊᖕᓂᑐᐃᓐᓇᖅ ᐊᔪᓕᖅᑐᖃᖅᐸᑦ ᐊᖁᑎᒋᔭᐅᔪᓂ ᐅᕿᖏᑦᑐᓂ ᓄᓇᒃᑰᔫᕐᔪᐊᓂ, ᒪᑯᓇᓂ ᐳᐊᕆᔭᐅᑎᓂ.

“ᐅᔭᕋᓐᓂᐊᕐᕕᓂ ᐃᓕᓴᕈᑎ ᐱᒋᐊᖓᕈᑕᐅᖕᒪᑦ ᐃᓯᕋᑖᖅᑐᓄᑦ ᖃᓄᐃᑦᑐᓂᒃ ᐃᓕᓴᕈᒪᖕᒪᖔᕐᒥᓂᒃ ᖃᐅᔨᓚᐅᖏᓐᓂᖏᓐᓂ ᐅᓯᑲᖅᑕᐅᑎᓕᕆᓂᕐᒧᑦ ᑎᑭᖢᒍ ᒫᓐᓇ ᒌᐳᕆᐊᓕᐅᑉ ᓇᔪᒐᕆᓕᖅᑕᖓᓄᑦ ᐊᖁᑎᓂᒃ ᐃᓇᖏᖅᑎᐅᔪᓐᓇᖅᓯᖕᒪᑦ ᐊᔪᓕᖅᑐᖃᕌᖓᑦ,” ᐅᖃᕆᓪᓗᓂ ᑖᓂᐊᓕ ᕼᐅᓐ, ᐅᓛᔫᑉ ᐃᓕᓴᐃᔨᒋᓚᐅᖅᑕᖓ.

“ᒌᐳᕆᐊᓕ ᐊᖁᑎᐅᒍᓐᓇᖅᓯᔪᖅ ᐊᐅᓚᐅᓯᕆᔨᐅᓪᓗᓂᓗ ᑕᒪᐃᓐᓂᓕᒫᑲᓴᒃ ᐊᐅᓚᐅᑎᖃᖅᑐᓂᒃ ᐅᔭᕋᓐᓂᐊᕐᕕᑦᑎᓐᓂ, ᐊᓯᖏᓐᓂᒃ ᐃᑰᑕᕈᑎᕐᔪᐊᑦ, ᐅᓯᑲᖅᑕᖅᑎᓕᒫᓂ.”

ᑭᖑᓂᖓᓂᒃ ᓇᓗᓇᐃᒃᑯᑕᖅᑖᓚᐅᕐᓗᓂ ᐅᑕᖅᑭᔪᖅ ᐃᓇᖏᖅᑎᐅᓂᐅᑉ Class 3 ᐱᓂᐊᕐᒥᔭᖓ 2000-ᓂᒃ ᐃᑲᕐᕋᓂᒃ ᓈᓯᒍᓂ, ᑭᖑᓂᖓᒍᑦ ᐃᓇᖏᖅᑎᒻᒪᕆᐅᓕᕐᓗᓂ Class 2, ᓱᓕᒃᑲᓐᓂᖅ 2000 ᐃᑲᕐᕋᐃᑦ ᓈᒃᒥᒃᐸᑕ. ᑕᒪᐃᑕ ᐃᓕᓵᓂᒃᐸᓪᓕᐊᔭᓂ ᐱᐊᓂᒃᐸᒋᑦ ᐊᑐᓂ ᓄᑖᓂᒃ ᓄᓇᒃᑰᔫᕐᔪᐊᓂᒃ ᐊᖁᑎᐅᔪᓐᓇᖅᓯᓂᐊᖅᑐᖅ, ᒪᑯᓂᖓ ᓯᖃᓪᓕᑎᕈᑎᓂᒃ ᐳᐊᕆᔭᐅᑎᕐᔪᐊᓂᒃᓗ. ᑕᐃᒪᓐᓇᓴᐃᓐᓇᖅ ᐊᑐᓂ ᓇᓗᓇᐃᒃᑯᑕᖅᑖᕈᑎᒋᓗᓂᒋᑦ Class 1-ᒥᒃ ᐊᒻᒪᓗ, ᐊᓱᐃᓛᒃ, ᐅᓛᔪᒃ ᓇᓗᓇᐃᒃᑯᑕᖅᑖᓕᓚᐅᖅᐳᖅ ᒫᓐᓇ ᐳᐊᕆᔭᐃᔨᓂ  ᐅᑕᖅᑭᔪᓂ ᐊᖁᑎᓂ ᐃᓚᐅᓕᖅᖢᓂ.

ᐊᓱᐃᓛᒃ ᑕᕝᕙ ᒌᐳᕆᐊᓕ ᐳᐊᕆᔭᖅᑎᓂ ᐅᑕᖅᑭᔪᓂ ᐃᓚᐅᓕᕐᒪᑦ ᐊᔪᖏᓴᖅᑕᐅᖏᓐᓇᖅᑐᖅ ᓱᖏᐅᓴᖅᖢᓂᒋᓪᓗ ᑕᒪᐃᓐᓂᒃ ᐊᖁᑎᐅᕕᒋᔪᓐᓇᖅᑕᖏᑦ, ᐊᖏᔪᐊᓗᒃ ᐅᓯᑲᖅᑕᐅᑎ 992, ᐳᐊᕆᔭᐅᑎᕐᔪᐊᖅ PC1250, 385-ᓗ ᐊᒻᒪᓗ ᑖᓐᓇ RH120,” ᐅᓂᒃᑳᕆᓪᓗᓂ ᕼᐃᐅᓐ.

ᑕᐃᒪᖓᓂᑦ ᐅᓛᔪᒃ ᒪᔪᕋᕌᖓᒥ ᖁᓛᓂ ᐊᖁᑎᖃᕐᕕᖃᕐᒪᑦ ᑖᓐᓇ ᓄᓇᒃᑰᔪᕐᔪᐊᖅ RGH120-ᒥᒃ ᐅᓯᑲᖅᑕᐅᑎᓕᒃ, ᐊᔪᖏᓴᕆᐊᖃᓚᐅᖅᑕᖓ 10,000-ᓂᒃ ᐃᑲᕐᕋᓂᒃ ᓇᓗᓇᐃᒃᑯᑕᖅᑖᓚᐅᕐᓇᓂ.

“ᑲᔪᓯᑦᑎᐊᓚᐅᕐᓂᖓᓄᑦ ᒌᐳᕆᐊᓕᐅᑉ ᐱᐊᓂᒋᐊᓕᖏᓐᓄᑦ 2012-ᒥᑦ … ᐃᓅᓯᓕᒫᒥᓂ ᐃᖅᑲᓇᐃᔮᕆᔪᓐᓇᖅᑕᒥᓂᒃ ᐃᓕᓵᓂᒃᓯᒪᓕᖅᑐᖅ ᑕᐃᒫᑎᒋ ᓯᕕᑭᑎᒋᔪᒥ ᐱᐊᓂᒃᖢᓂᒋᑦ, ᐊᖏᕐᕋᒥᓂ ᐃᓚᒥᓄᑦ ᐃᓅᔪᑎᖃᖅᑎᑦᑎᔨᐅᓕᖅᐳᖅ ᑕᒪᐃᓐᓄᑦ ᐃᓚᓕᒫᒥᓄᑦ,” ᐅᖃᕆᓪᓗᓂ ᕼᐆᐊᓐ.

ᐅᓛᔪᒃ ᐊᖏᓚᐅᖅᑐᖅ. ᐃᖅᑲᓇᐃᔭᕆᐊᖃᑦᑕᖅᑐᖅ ᒪᕐᕉᒃ ᐱᓇᓱᐊᕈᓰᒃ ᓈᒑᖓᑕ ᑕᐅᖅᓰᖃᑦᑕᖅᖢᓂ, ᐃᒪᓐᓇ ᐊᖏᕐᕋᖅᓯᒪᓕᕌᖓᑦ ᐊᕐᕕᐊᒥ ᐊᖏᕐᕋᓯᐅᑎᓂᒃ ᑲᒪᔪᓐᓇᖅᓯᖃᖅᑕᕐᒪᑦ “ᐊᖑᓇᓱᒋᐊᕈᓐᓇᖅᖢᓂ, ᐅᒥᐊᖅᑐᕈᓐᓇᖅᖢᓂ, ᐃᖃᓗᓐᓂᐊᕈᓐᓇᖅᖢᓂᓗ,” ᐅᖃᕆᓪᓗᓂ, ᐃᓚᓪᓗᓂᒎᖅ ᖃᑕᖑᑎᒌᑦ ᐊᓯᕙᖅᓯᒪᖃᑦᑕᖅᑐᑦ ᓄᓇᒧᑦ ᑕᒪᓐᓇ ᐱᐅᔪᖅ ᐱᒻᒪᕆᐅᓪᓗᓂᓗ ᑕᒪᑐᒪᓂ ᐊᑯᓐᓂᖓᓂ ᐊᖏᕐᕋᖅᓯᒪᓂᕐᒥᓂ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ.

“ᐃᓛᓐᓂᒃᑯᑦ ᐊᒃᓱᕈᕐᓇᓚᐅᓲᖅ ᐅᕙᓐᓄᑦ ᐃᓚᒃᑲ ᕿᒪᒋᐊᒃᓴᖅ - (ᒪᕐᕈᒃ) ᐃᕐᓃᒃᑲ, (ᒪᕐᕈᒃ) ᐸᓃᒃᑲ, ᐊᐃᑉᐸᕋᓗ,” ᐅᖃᕆᓪᓗᓂ, ᐃᓚᓪᓗᓂᐅᒃ ᐅᑭᐅᒃᑯᑦᑕᐅᖅ ᐃᓛᓐᓂᒃᑯᑦ ᐅᓪᓗᓕᒫᒥᒃ ᐊᔪᓕᖅᓯᒪᓚᐅᓱᖑᓪᓗᑕ ᐅᔭᕋᕐᓂᐊᕐᕕᖕᒥ ᓯᓚᓗᒃᑳᖓᑦ.

“ᑖᓐᓇ ᐊᒃᓱᕈᕐᓇᕐᓂᖅᐹᖅ,” ᐊᖏᕐᕋᖅᓯᖅᖢᓂ “ᑭᓯᐊᓂᓕ ᐃᖅᑲᓇᐃᔮᖓᒎᖅ ᖁᕕᐊᖏᔭᖓ ᐊᖁᑎᐅᓪᓗᓂ ᐊᖏᔫᑎᓂᒃ ᓄᓇᒃᑯᔫᓂᒃ.”

ᐅᓚᔫᑉ ᕿᓚᓈᕆᔭᖓ ᓴᓇᕕᖕᒥ ᐊᖓᔪᖅᑳᖑᕆᐊᒃᓴᖅ, ᐃᓕᓴᐃᖃᑦᑕᕈᓐᓇᖅᓯᓂᐊᕐᒪᑦ ᐃᑲᔪᖅᓴᖅᑎᐅᓗᓂᓗ ᐊᓯᒥᓂᒃ ᐃᓕᓴᖅᐸᓪᓕᐊᔪᓂᒃ ᐃᖅᑲᓇᐃᔮᒃᓴᒥᓂᒃ ᐊᒻᒪᓗ ᓴᓇᔨᓂᒃ ᐊᐅᓚᑦᑎᔨᐅᓗᓂ.

ᑲᔪᓯᑦᑎᐊᖏᓐᓇᕐᒪᑦ ᐃᖅᑲᓇᐃᔮᖓ ᑕᐃᒪᓐᓇ ᐱᒃᑯᒥᓇᒥᐊᖅᑐᖅ ᐃᒻᒥᓄᑦ, ᒪᓕᒐᓱᐊᕋᒪ ᐊᑖᑕᒪ ᐊᑐᖅᓯᒪᔭᖓᓂᒃ. ᐊᑖᑕᖓ ᐅᕿᖏᑦᑐᓂᒃ ᓄᓇᒃᑰᔫᓂᒃ ᕼᐊᒪᓚᒃᑯᓐᓄᑦ ᖁᑎᐅᕙᓚᐅᖅᓯᒪᖕᒥᖕᒪᑦ ᐅᑭᐅᓂᒃ 35-ᓂᒃ ᐅᖓᑖᓄᓪᓗ.

“ᐊᒃᓱᕈᕐᓗᓂ ᑭᓯᐊᓂᓕ ᐱᓇᓱᐊᖏᓐᓇᕐᓗᒍ ᐊᔪᕈᓐᓃᕐᓇᖅᑐᖅ ᑕᐃᒪᐃᑦᑐᒥ ᐃᖅᑲᓇᐃᔮᖃᖅᖢᓂ ᐱᒃᑯᒥᒋᔭᕐᓄᑦ ᑎᑭᓐᓇᓱᐊᕐᖢᓂ. ᓇᓗᓇᖏᑦᑐᖅ ᑕᒪᑦᑕ ᖃᓄᑐᐃᓐᓇᖅ ᐱᒃᑯᒥᒋᔭᑦᑎᓐᓂᒃ ᐊᒃᓱᕉᑎᒋᓗᒋᑦ ᐱᔪᓐᓇᕋᑦᑕ.” ᐅᖃᕆᓪᓗᓂ ᐅᓛᔪᒃ.