ᔭᐃᑯᑉ ᑑᑕᓕᒃ ᐅᑭᐅᖃᖅᐳᖅ 11−ᓂ ᐊᒻᒪ ᐊᑐᖅᓯᒪᓕᖅᐳᖅ 50−ᓂ ᐱᓚᒃᑐᖅᑕᐅᓂᐅᔪᓂᑦ.
ᐃᓅᓚᐅᖅᓯᒪᕗᖅ ᐱᒻᒪᕆᐅᔪᒥ ᕿᒥᕐᓗᖃᖅᖢᓂ, ᐱᑎᑦᑎᓲᒥ ᓴᓂᒻᒧᑦ ᓴᖑᖓᓂᐅᔪᒥ ᕿᒥᕐᓗᖓᒍᑦ. ᖃᔅᓯᒐᓴᖕᓂ ᑐᓄᐊᒍᑦ ᐱᓚᒃᑐᖅᑕᐅᓯᒪᓂᖓᓂ ᐋᖅᑭᒃᓯᓯᒪᕗᖅ ᓈᒻᒪᒃᑐᒥ ᖃᓄᐃᓐᓂᖓᓂ ᐱᓱᒍᓐᓇᖅᓯᓪᓗᓂ ᐃᑲᔪᖅᑕᐅᓇᓂ, ᐅᖃᓚᐅᖅᐳᖅ his ᐊᓈᓇᖓ, ᓗᐊᕆ ᑑᑕᓕᒃ ᕿᙳᓐ.
ᐋᓂᐊᖃᕐᓂᖓᓄᑦ ᐊᒃᓱᕈᕈᑎᒋᓯᒪᔭᖏᓐᓄᑦ, ᔭᐃᑯᑉ ᓱᓕ ᐆᒻᒪᕆᒃᐳᖅ.
“ᖃᓄᐃᙱᑉᐳᖓ,” ᐅᖃᓚᐅᖅᐳᖅ.
ᐊᐱᕆᔭᐅᒐᒥ ᑭᓱᒧᑦ ᓴᙱᓂᖃᕐᓂᖓᓂ, ᑭᐅᓚᐅᖅᐳᖅ, “ᐃᓚᓕᒫᒃᑲᖃᐃ ᑲᑎᙵᓪᓗᑎᒃ.”
ᐊᓈᓇᖓ ᑲᒪᓲᖑᕗᖅ ᓴᐱᓕᕈᓐᓇᙱᓐᓂᖓᓂ.
“ᖁᕕᐊᓱᑦᑎᐊᖅᑐᖅ. ᑲᒪᑎᑦᑎᓲᖑᔪᖅ ᐊᒥᓱᐊᓗᖕᓂ ᐃᓄᖕᓂ ᖃᓄᐃᓐᓂᕆᔭᖓᓄᑦ ᐊᒻᒪ ᖃᓄᖅ ᑭᓱᑐᐃᓐᓇᑦᑎᐊᒥ ᑲᒪᒋᔭᖃᓲᖑᓂᖓᓂ,” ᐅᖃᓚᐅᖅᐳᖅ. “ᓴᙱᔫᓪᓗᓂ ᐊᖑᑕᐅᕗᖅ. ᖃᐅᔨᒪᕐᔪᐊᖅᐳᖅ. ᐃᓕᓐᓂᐊᖃᑎᒥᓂᑦ ᐃᑲᔪᓲᖑᕗᖅ ᐃᑲᔪᖅᑕᐅᔭᕆᐊᖃᕌᖓᑕ.”
ᓘᒃᑖᑦ ᖃᐅᔨᒪᓚᐅᙱᓚᑦ ᔭᐃᑯᑉ ᐆᒪᔪᓐᓇᕐᓂᐊᕐᓂᖓᓂ ᐃᓅᑎᓪᓗᒍ, ᓗᐊᕆ ᐃᖅᑲᐅᒪᕗᖅ. ᐋᓐᓂᐊᕕᖕᒥ ᐊᓂᔪᓐᓇᓚᐅᙱᓚᖅ ᑭᓯᐊᓂ ᑕᖅᑭᖃᑲᓴᓕᖅᑎᓪᓗᒍ 7−ᓂ ᐊᒻᒪ ᓯᕗᓪᓕᖅᐹᖓᓂ ᐊᒥᓱᓂ ᐱᓚᒃᑕᐅᓂᖃᓚᐅᖅᐳᖅ ᑕᖅᑭᖃᓕᖅᑎᓪᓗᒍ 18−ᓂ.
“(ᑕᐃᔅᓱᒪᓂ) ᖃᐅᔨᒪᓚᐅᙱᑦᑐᑦ ᓄᑭᖃᕈᓐᓇᐃᔾᔨᓂᐊᕐᓂᖓᓂ ᓯᕗᓪᓕᖅᐹᒥ ᐱᓚᒃᑕᐅᓂᖓᓂ. ᑕᑯᒃᓴᐅᑎᑦᑎᓚᐅᖅᐳᖅ ᑭᓇᓕᒫᒧᑦ ᓴᙱᔫᓪᓗᓂ ᐊᖑᑕᐅᓂᖓᓂ… ᐅᕙᑦᑎᓐᓂ ᓴᙱᑎᑦᑎᒋᕗᖅ,” ᐅᖃᓚᐅᖅᐳᖅ.
ᐊᒥᓱᐊᓗᐃᑦ ᐱᓚᒃᑐᖅᑕᐅᓂᖏᑦ ᐃᐊᑦᒪᓐᑕᓐᒥ ᐱᐅᓯᒋᐊᖅᑎᑦᑎᓯᒪᕗᖅ ᐱᐅᓂᖓᓂ ᐃᓅᓯᖓᓐᓂ, ᐅᖃᓚᐅᖅᐳᖅ. ᑲᐃᓪᓗᐊᕈᑎᒥ ᐊᑐᖅᐸᓚᐅᖅᐳᖅ ᐊᕐᕌᒍᒐᓴᐅᓚᐅᖅᑐᓂ ᑭᓯᐊᓂ ᐊᑐᕆᐊᖃᕈᓐᓃᖅᑐᖅ
“ᐊᕐᕌᒍᒐᓴᓂ, ᐊᔪᕐᓇᕈᓐᓃᖅᐸᓪᓕᐊᓕᓚᐅᖅᐳᖅ,” ᐅᖃᓚᐅᖅᐳᖅ. “ᐱᓱᒍᓐᓇᖅᑐᖅ. ᓇᒧᙵᐅᕈᓘᔭᓲᖅ, ᑭᓯᐊᓂ ᑕᖃᓴᕋᐃᓐᓂᖅᓴᖅ ᖃᓄᐃᙱᑦᑐᓂ ᓱᕈᓯᕐᓂᑦ… ᖃᐅᔨᑎᑦᑎᓲᖅ ᐅᕙᑦᑎᓐᓂ ᑕᖃᐃᖅᓯᕆᐊᖃᓕᕌᖓᒥ.”
ᓗᐊᕆᐅᑉ ᐊᓈᓇᖓ, ᑎᕇᓴ, ᐃᒡᓗᖃᖅᑐᖅ ᐃᒡᓗᑦ ᒪᕐᕉᖕᓂ ᖃᓂᒋᔭᖓᓂ ᑕᓗᕐᔪᐊᕐᒥ, ᐸᖅᑭᓚᐅᖅᐳᖅ ᔭᐃᑯᑉᒥ ᑕᒪᕐᒥᒐᓚᖕᓂ ᐱᒋᐊᓕᓵᖅᑎᓪᓗᒍ ᐃᓅᓯᖓᓐᓂ ᓗᐊᕆ ᐸᖅᑭᔭᕆᐊᖃᓚᐅᕐᒪᑦ ᐊᓯᖏᓐᓂ ᑎᓴᒪᓂ ᕿᑐᙵᒥᓂᑦ. ᓗᐊᕆᐅᑉ ᐅᐃᖓᑕ ᐊᓈᓇᕕᓂᖓ ᐃᑲᔪᖃᑦᑕᓚᐅᕆᕗᖅ ᐃᓚᒌᖑᔪᓂ ᐱᓕᕇᓐᓇᕐᓂᖏᓐᓄᑦ, ᐃᓚᒋᐊᖅᓯᓚᐅᖅᐳᖅ.
“ᑭᒃᑯᓕᒫᑦ ᐅᕙᑦᑎᓐᓂ ᐃᑲᔪᖅᓯᒪᕗᑦ ᐃᕐᓂᖓᓂ. ᐃᑲᔪᖅᓯᕐᔪᐊᕐᓂᖅᑕᖃᖅᐳᖅ,” ᐅᖃᓚᐅᖅᐳᖅ. “ᐊᑐᖅᓯᒪᕐᔪᐊᖅᓯᒪᕗᒍᑦ. ᑭᓱᓕᒫᑦ ᐊᔪᕐᓇᕐᔪᐊᓚᐅᖅᐳᑦ ᑭᓯᐊᓂ ᓇᓂᓰᓐᓇᖅᐸᓚᐅᖅᐳᒍᑦ ᐱᓕᕇᓐᓇᕐᓂᕐᒧᑦ.”
ᑎᕇᓴ ᐅᐱᒋᕙᖓ ᔭᐃᑯᑉ ᓴᙱᓂᖓᓂ, ᐃᓄᑦᑎᐊᕙᐅᓂᖓᓂ ᐊᒻᒪ ᖃᐅᔨᒪᕐᒧᐊᕐᓂᖓᓂ.
“ᐅᐱᒋᕐᔪᐊᖅᑕᕋ. ᐱᕈᓗᐊᓚᐅᙱᑦᑐᖅ (ᑎᒥᒥᒍᑦ), ᑭᓯᐊᓂ ᖃᕋᓴᖓ ᐱᕈᓚᐅᖅᐳᖅ ᐊᒻᒪ ᖃᐅᔨᒪᕐᔪᐊᓕᖅᑐᖅ ᒪᒃᑯᒃᖢᓂ ᐊᖑᑕᐅᓪᓗᓂ, ᐊᒻᒪ ᑲᒪᒋᔭᖃᑦᑎᐊᒃᑳᓗᒃ,” ᐅᖃᓚᐅᖅᐳᖅ. “ᐅᖃᐅᓯᕐᓂ ᐊᑐᓲᖑᕗᖅ ᑐᑭᓯᐊᙱᑦᑎᐊᖅᑕᓐᓂ ᑭᓯᐊᓂ ᑭᓇᑐᐃᓐᓇᒧᑦ ᐅᓂᒃᑲᐅᔾᔭᐅᒐᒪ ᖃᓄᖅ ᑐᑭᖃᕐᓂᖏᓐᓂ.”
ᑎᕇᓴ ᐃᓚᒋᐊᖅᓯᓚᐅᕆᕗᖅ ᐃᓕᓐᓂᐊᖃᑎᖏᑦ ᑲᒪᓇᖅᑐᒥ ᓈᒻᒪᒃᓴᖅᓯᒪᕗᖅ ᔭᐃᑯᑉᒥ.
“ᖁᔭᓕᕐᔪᐊᖅᓯᒪᕗᒍᑦ. ᐃᓕᓐᓂᐊᓕᓵᖅᑎᓪᓗᒍ ᐊᓯᖏᑦ ᓱᕈᓰᑦ ᐅᔾᔨᖅᓱᑦᑎᐊᓚᐅᖅᐳᑦ ᐊᒻᒪ ᐃᔪᕆᔭᐅᕙᙱᖦᖢᓂ,” ᐅᖃᓚᐅᖅᐳᖅ ᑎᕇᓴ. “ᐱᑦᑎᐊᖅᑕᐅᒃᑲᒻᒪᕆᐊᓗᒃ.”
ᔭᐃᑯᑉ ᐅᖃᓚᐅᖅᐳᖅ ᐊᓕᐊᓇᐃᒋᔭᖓ ᐃᓕᓐᓂᐊᕆᐊᖅᖢᓂ ᐊᒻᒪ ᐱᓗᐊᖅᑐᒥ ᓇᐃᓴᐅᓯᕆᓂᕐᒥ ᐊᓕᐊᓇᐃᒋᑦᑎᐊᖅᑕᖓ. ᖃᖓᑕᓲᖅᑎᐅᔪᒪᔪᖅ ᐃᓐᓇᕈᕈᓂ, ᐃᓚᒋᐊᖅᓯᓚᐅᖅᐳᖅ.
ᔭᐃᑯᑉ ᐱᓚᒃᑕᐅᕕᒃᓴᖃᖅᓯᒪᙱᑦᑐᖅ ᒫᓐᓇᐅᔪᒥ, ᑭᓯᐊᓂ ᐊᓯᔾᔨᑐᐃᓐᓇᕆᐊᓕᒃ.
“ᐅᑕᖅᑭᑐᐃᓐᓇᖅᐳᒍᑦ ᐊᒻᒪ ᖃᐅᔨᓗᑕ ᖃᓄᖅ ᑕᑯᔭᐅᕕᒃᓴᖏᓐᓂ ᖃᓄᐃᓐᓂᖏᓐᓂ,” ᓗᐊᕆ ᐅᖃᓚᐅᖅᐳᖅ.
ᑎᕇᓴ ᖃᔅᓰᖅᓱᒐᓚᒃᖢᓂ ᐅᓂᒃᑳᕆᓚᐅᖅᐳᖅ ᓯᕗᓪᓕᐅᔪᓂ ᐱᓚᒃᑐᖅᑕᐅᓂᖏᓐᓂ “ᑲᑉᐱᐊᓇᖅᑐᒻᒪᕆᐅᓂᖏᓐᓂ.”
“ᑭᓯᐊᓂ ᐱᓚᒃᑐᐃᓕᐅᔪᑦ, ᖃᐅᔨᒪᖕᒪᑕ ᖃᓄᐃᓕᐅᕐᓂᖏᓐᓂ. ᐅᒃᐱᕆᑦᑎᐊᖅᑕᕗᑦ ᐊᒥᓱᐊᓗᖕᓂ ᐱᓚᒃᑐᖅᑕᐅᓚᐅᖅᑎᓪᓗᒍ,” ᐅᖃᓚᐅᖅᐳᖅ, ᑭᓯᐊᓂ ᐃᓚᒋᐊᖅᓯᓚᐅᖅᐳᖅ ᖁᖓᓯᖓ ᓱᓕ ᓴᖑᖓᓂᖓᓂ. “ᖃᓄᐃᓕᐅᖅᑕᐅᔪᓐᓇᙱᒻᒪᑦ ᖁᖓᓯᖓ ᑭᓯᐊᓂ ᕿᒥᕐᓗᖓ ᓴᕕᕋᔭᓕᖅᓯᒪᖕᒪᑦ ᑐᑭᓕᐊᕐᓂᖅᓴᐅᓕᖅᐳᖅ ᐃᓱᒪᒋᓚᐅᖅᑕᑦᑎᓐᓂ ᑐᑭᓕᐊᕐᓂᕆᓂᐊᕋᓱᒋᓇᑎᒍᑦ.”
ᐃᓚᐅᖃᑕᐅᓯᒪᕐᔪᐊᖅᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᐱᓕᕆᔾᔪᓯᐅᔪᒥ, ᓗᐊᕆ ᐅᖃᓚᐅᖅᐳᖅ ᐊᑐᕐᓂᑯᖏᑦ ᐱᐅᔫᒐᔪᒃᐳᑦ, ᐃᓚᒌᑦ ᐅᖓᓯᒃᑲᓗᐊᖅᑎᓪᓗᒋᑦ ᐃᓅᓕᓴᕐᓂᕐᒧᑦ ᖃᐅᔨᒪᔭᐅᕐᔪᐊᕐᓂᐅᔪᓂ ᔭᐃᑯᑉ ᐱᔭᕆᐊᖃᓚᐅᕐᓂᖓᓐᓂ.
“ᐊᔪᕐᓇᖅᑐᒻᒪᕆᐊᓘᕗᖅ ᓄᓇᖃᖅᖢᓂ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔾᔪᓯᐊᓂ,” ᐅᖃᓚᐅᖅᐳᖅ. “ᑭᓯᐊᓂ, ᐄ, ᐱᓕᕆᔾᔪᓯᐅᔪᖅ ᐅᕙᑦᑎᓐᓄᑦ ᐱᐅᕐᔪᐊᖅᓯᒪᕗᖅ… ᓱᖏᐅᑎᓯᒪᑦᑎᐊᕐᒪᑕ ᔭᐃᑯᑉᒥ.”