Skip to content

EDITORIAL: ᐋᔩᖃᑎᒌᖕᓂᖅ ᐱᒻᒪᕆᐅᕗᖅ ᐃᓕᓐᓂᐊᕐᕕᖕᓂ ᒪᑐᐃᖅᓯᒃᑲᓐᓂᕐᓂᕐᒥ

ᐅᐱᓐᓇᖅᐳᓯ ᑕᒪᒃᑭᓗᒃᑖᖑᔪᓯ ᐃᓱᓕᑦᑎᔪᓯ 2020−ᒥ! ᑎᑭᐅᑎᑲᓴᑦᑎᐊᖅᐳᖅ ᐊᒃᓱᕈᕐᓇᕐᔪᐊᖅᑐᒥ ᐃᖏᕐᕋᓂᐅᔪᒥ ᐊᒥᓱᓄᑦ ᐃᓕᓐᓂᐊᖅᑎᓄᑦ ᐊᓂᒎᑎᔭᕆᐊᒃᓴᖅ ᑭᖑᓪᓕᖅᐹᖓᓂ ᐊᕐᕌᒍᖓᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐊᒃᓱᕈᕐᓇᖅᑑᔪᒥ ᖃᓄᐃᓐᓂᐅᔪᒥ. ᑭᓇᑐᐃᓐᓇᖅ ᓂᕆᐅᓚᐅᙱᓚᑦ ᓄᕙᒡᔪᐊᕐᓇᖅ-19−ᒥ ᓴᔪᒃᑎᑦᑎᓂᕐᒥ ᓄᓇᕐᔪᐊᒥ ᑕᐃᒪᓐᓇᕐᔪᐊᑎᒋᐊᓗᒃ ᐊᒻᒪ ᖃᔅᓯᐊᕐᔪᐃᑦ ᐃᒃᐱᒋᕐᔪᐊᓚᐅᖅᐸᖓ ᓄᓇᕗᒻᒥ ᐃᓕᓐᓂᐊᖅᑎᐅᔪᓄᑦ. ᐱᔭᕇᖅᓯᓇᓱᐊᖅᖢᑎᒃ ᐃᓕᓐᓂᐊᒐᒃᓴᓂ ᖃᕋᓴᐅᔭᑎᒍᑦ ᐃᓕᓐᓂᐊᕐᓂᐅᔪᒥ ᖃᕋᓴᐅᔭᑰᕈᑕᐅᔪᓂ ᐊᑐᕐᓂᖃᑦᑎᐊᖏᓐᓇᐅᔭᙱᑦᑐᒥ ᐅᕝᕙᓘᓐᓃᑦ ᑎᑎᖅᑲᒃᑯᕕᒃᑰᖅᑎᑦᑎᓂᕐᒥ ᐃᓕᓐᓂᐊᖅᑎᓄᑦ ᐱᓕᕆᐊᒃᓴᖏᓐᓂ, ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᑕᖅᑭᐅᔪᓂ ᐅᒃᐱᕈᓱᖕᓂᐅᔪᓂ ᐃᓕᓐᓂᐊᖅᑎᓂᑦ ᐊᒃᓱᕈᖅᑎᑕᐅᓯᒪᕗᑦ ᐊᒻᒪ ᐊᒥᓱᑦ ᐱᓕᕆᑦᑎᐊᕈᓐᓇᓚᐅᖅᐳᑦ.

ᐱᒻᒪᕆᕐᔪᐊᖑᕗᖅ ᐃᓕᓐᓂᐊᕐᓂᐅᔪᒥ ᒪᒃᑯᖕᓂᖅᓴᐅᔪᓄᑦ ᐱᐅᓯᖃᑎᒌᖑᔪᓂᑦ ᐸᖅᑭᔭᐅᑦᑎᐊᕐᓂᖏᓐᓂ ᐊᒻᒪ ᐅᐱᒋᔭᐅᕐᔪᐊᕐᓂᖏᓐᓂ ᐱᒻᒪᕆᐅᓂᖏᓐᓂ. ᐃᓕᓐᓂᐊᖅᑎᑦ ᐃᓚᐅᖃᑕᐅᔪᓂ ᐊᒻᒪ ᐃᓚᐅᔪᓂ ᐅᓪᓗᒥ ᓯᕗᓕᐅᖅᑎᐅᓂᐊᖅᐳᑦ ᖃᐅᒃᐸᐅᓂᐊᖅᑐᒧᑦ ᐊᒻᒪᓗ ᐊᔾᔨᒋᙱᑕᖏᓐᓂ ᐱᓕᕆᓂᖃᕐᓂᐊᖅᐳᑦ ᓴᓇᓂᕐᒥ ᐱᓕᕆᑦᑎᐊᒃᑲᓐᓂᐅᔭᖅᑐᒥ ᐊᒻᒪ ᒫᓐᓇᒨᓕᖓᔪᒥᒃ ᓄᓇᕗᒻᒥ.

ᐱᓕᕆᑦᑎᐊᕈᓐᓇᕐᓂᐅᔪᖅ ᐃᓕᓐᓂᐊᖅᑎᓂᑦ ᒪᓕᖕᓂᖃᑐᐃᓐᓇᙱᓚᖅ ᐱᓕᕆᓂᖏᓐᓄᑦ ᐃᓕᖅᑯᓯᖃᑦᑎᐊᕋᓱᖕᓇᕐᓂᕐᒥᑐᐊᖅ, ᑭᓯᐊᓂᑦᑕᐅᖅ ᐊᑐᐊᒐᓕᐅᖅᑎᓂᑦ ᐊᒻᒪ ᓂᕈᐊᖅᑕᐅᓯᒪᔪᓄᑦ ᓯᕗᓕᐅᖅᑎᓂᑦ ᑲᒪᒋᔭᖃᖅᑐᓂ ᐃᓕᓐᓂᐊᕐᓂᓕᕆᓂᕐᒥ

ᐱᒻᒪᕆᕐᔪᐊᖑᕗᖅ ᐃᓕᓐᓂᐊᕐᓂᓕᕆᔨᒃᑯᓐᓂ ᒥᓂᔅᑕᖓ ᑕᐃᕕᑦ ᔪᐊᓇᓯ ᐊᒻᒪᓗ ᐱᓕᕆᕝᕕᖓ ᐱᓕᕆᑦᑎᐊᕐᓂᖏᓐᓂ ᑐᑭᓯᓇᑦᑎᐊᖅᑐᒥ ᐊᒻᒪ ᓱᓕᑦᑎᐊᖅᑐᒥ ᐸᕐᓇᐅᑎᒥᒃ ᒪᑐᐃᖅᓯᒃᑲᓐᓂᕐᓂᐅᔪᒥ ᐃᓕᓐᓂᐊᕐᕕᓂᑦ ᐊᒻᒪᓗ ᓇᓗᓇᐃᖅᓯᓂᕐᒥ ᐃᓕᓐᓂᐊᖅᑏᑦ ᖁᑦᑎᖕᓂᖅᐹᒥ ᐱᐅᓂᐅᔪᒥ ᐃᓕᓐᓂᐊᕐᓂᐅᔪᒥ ᐊᔪᕐᓇᙱᓐᓂᖓᓂ ᐃᓱᒪᒋᓇᒍ ᖃᓄᐃᓐᓂᐅᔪᓄᑦ.

ᒫᓐᓇᒧᑦ ᑎᑭᖦᖢᒍ, ᑕᐃᓐᓇ ᐸᕐᓇᐅᑎ ᐱᑕᖃᖅᑑᔮᙱᓚᖅ ᑎᑎᕋᕐᕕᐅᔪᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄ (DEA). ᐃᒃᓯᕙᐅᑕᕆᔭᐅᔪᖅ ᐃᖃᓗᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᑕᒡ ᕘᒃᒪᓐ, ᑎᑎᕋᖅᓯᒪᒻᒪᕆᒃᐳᖅ ᑎᑎᖅᑲᒥᒃ ᔪᐊᓇᓯᒧᑦ ᐅᖃᐅᓯᖃᖅᖢᓂᐃᓱᒫᓘᑎᕐᔪᐊᖑᔪᓂ.”

ᐱᓕᕆᕝᕖᑦ ᐃᓱᒪᔫᔮᖅᐳᑦ ᑕᒪᒃᑭᑦ ᐃᓕᓴᐃᔨᐅᔪᑦ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑐᓴᒐᒃᓴᖃᕆᐊᖃᙱᓐᓂᖏᓐᓂ ᐱᔾᔪᑎᖃᖅᑐᒥ ᐱᓕᕆᕝᕕᐅᑉ ᐸᕐᓇᐅᑎᖏᓐᓂ ᒪᑐᐃᖅᓯᒃᑲᓐᓂᕐᓂᕐᒧᑦ ᐃᓕᓐᓂᐊᕐᕕᐅᔪᓄᑦ,” ᕘᒃᒪᓐ ᑎᑎᕋᓚᐅᖅᐳᖅ.

ᒫᓐᓇᒧᑦ ᑎᑭᖦᖢᒍ ᑐᑭᓯᐅᒪᓂᖃᒐᓛᒃᐳᖅ ᑭᓱᑐᐃᓐᓇᐃᑦ ᒪᑐᐃᕐᓂᐊᕐᓂᖏᓐᓂᑕᐃᒪᐃᒐᔪᖕᓂᐅᔪᒥ.”

ᐅᖃᐅᓯᒃᓴᓕᐊᑦ ᐃᖃᓗᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂ ᒪᑐᐃᖅᓯᒃᑲᓐᓂᕐᓂᕐᒧᑦ ᐸᕐᓇᐅᑎᖏᑦ ᑐᓂᔭᐅᓚᐅᖅᐳᑦ ᐱᓇᓱᐊᕈᓯᐸᓗᖕᓂ 6-ᓂ ᖄᖏᖅᓯᒪᓕᖅᑐᓂ ᑭᐅᔪᖃᓚᐅᕐᓇᓂ ᔪᐊᓇᓯᐅᑉ ᐱᓕᕆᕝᕕᖓᓐᓂ.

ᔪᓚᐃᒦᓕᕇᖅᖢᑕ, ᐅᓇ ᑭᐅᓂᖃᙱᓐᓂᐅᔪᖅ ᐊᐃᑦᑖᖑᕗᖅ ᐊᒻᒪᓗ ᓲᕐᓗ ᓄᓇᕗᒻᒥ ᒐᕙᒪᒃᑯᑦ ᑐᐊᕕᕋᓱᓗᐊᖅᐳᑦ ᑎᑭᐅᑎᑎᓪᓗᒍ ᐃᓕᓐᓂᐊᖅᑎᓂᑦ ᐅᑎᕐᓂᖏᓐᓂ ᐃᓕᓐᓂᐊᕐᕕᐊᕈᓯᕐᓄᑦ. ᐸᕐᓇᐅᑎᑕᖃᕈᓂ ᐱᖠᕆᐊᖑᕙᓪᓕᐊᔪᒥ, ᐅᖃᐅᓯᖃᒃᓴᖅᑖᒃᑲᓐᓂᕆᐊᖃᖅᐸᑕ ᐅᕝᕙᓘᓐᓃᑦ ᐊᑯᓂᐅᒃᑲᓐᓂᒐᓛᒃᑐᒥ ᐱᔭᕆᐊᖃᖅᐸᑕ, ᐅᖃᑐᐃᓐᓇᓚᐅᕆᑦᑎ. ᓂᐱᖃᙱᓐᓂᐅᔪᖅ ᓂᐱᖅᑯᖅᑐᕐᔪᐊᖅᐳᖅ ᖃᓄᐃᓕᖓᓂᖓᓂ ᐱᓕᕆᕝᕕᐅᔫᑉ ᐋᔩᖃᑎᒌᖑᔪᓄᑦ ᐸᕐᓇᒍᑎᖓᓄᑦ.

ᐸᕐᓇᐅᑎᒥᒃ ᐋᖅᑭᒃᑕᐅᓯᒪᔪᖃᓕᕇᖅᐳᖅ ᓄᓇᑦᓯᐊᕐᒥ ᐊᒻᒪᓗᑦᑕᐅᖅ ᔫᑳᓐᒥ. ᐊᒃᓱᕈᕐᓂᐅᔪᓂ ᓵᙵᔭᐅᔪᓂ ᓄᓇᕗᒻᒥ ᐊᔾᔨᒋᙱᕐᔪᐊᖅᐸᖓᑦ ᑕᐃᒃᑯᓇᓂ ᓴᓂᓕᖏᓐᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ, ᑭᓯᐊᓂ ᐋᔩᖃᑎᖃᕐᓂᖅ ᐊᖓᔪᖅᑳᖑᔪᓄᑦ, ᐃᓕᓐᓂᐊᖅᑎᓄᑦ ᐊᒻᒪ ᐃᓕᓴᐃᔨᓄᑦ ᐱᒋᐊᖅᓯᒫᓂᒃᐳᖅ.

ᑐᐊᕕᐊᕆᔭᐅᓗᐊᖅᑐᒥ ᒪᑐᐃᖅᓯᒃᑲᓐᓂᕐᓂᐅᔪᒥ ᐅᖃᖃᑎᖃᓚᐅᙱᑦᑐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓂ ᐅᕝᕙᓘᓐᓃᑦ ᑐᐊᕕᐊᖑᓗᐊᕋᓱᐊᖅᑐᓂ ᑎᑭᐅᑎᑐᐃᓐᓇᕆᐊᖃᖅᐳᖅ ᐱᔨᑦᑎᕋᕐᓂᕐᒥ ᓱᔪᐃᓂᐅᔪᒥ ᐃᓕᓐᓂᐊᖅᑎᓂᑦ ᓄᓇᕐᔪᐊᖓ ᑯᔾᔭᖅᑎᑕᐅᕌᓂᓚᐅᖅᑐᓂ ᐊᐅᓚᑦᑎᓇᓱᐊᕐᓂᕐᒧᑦ ᐊᒥᓱᓄᑦ ᖃᓂᒻᒪᓐᓇᐅᔪᒧᑦ.

ᐱᓕᕆᑦᑎᐊᕈᓐᓇᕐᓂᐅᔪᒥ ᐃᓕᓐᓂᐊᖅᑎᐅᔪᓄᑦ ᐅᓪᓗᒥ ᑐᑭᖃᖅᐳᖅ ᖃᐅᒪᓂᖅᓴᐅᔪᒥ ᓯᕗᓂᒃᓴᐅᔪᒥ ᑕᒪᒃᑭᓄᑦ ᐅᑭᐅᖅᑕᖅᑐᒥ.