Skip to content

EDITORIAL: ᐃᓱᓕᑦᑎᓂᖅ ᐃᓅᖃᑎᒥᒃ ᐊᑭᕋᖅᑐᕐᓂᖅ ᐊᔾᔨᒋᙱᓐᓂᕐᒧᑦ ᑐᑭᓯᐅᒪᖃᑎᒌᖕᓂᒃᑯᑦ

ᑕᐃᒪᓐᓇᑎᑐᑦ ᐊᒥᓱᓄᑦ ᐱᕙᓪᓕᐊᑎᓯᒪᔪᓂ ᓄᓇᐅᔪᓂ ᑲᓇᑕ ᐃᓯᖅᐸᓪᓕᐊᕗᖅ ᐱᓕᕆᓂᐅᔪᒥ ᐃᒻᒥᖕᓂᒃ–ᐃᖅᑲᐅᒪᓂᕐᒧᑦ ᑎᑭᐅᑎᑎᓪᓗᒍ ᐅᖃᐅᓯᐅᔪᓂ ᐃᓅᖃᑎᒥᒃ ᐊᑭᕋᖅᑐᕐᓂᖅ ᐊᔾᔨᒋᙱᓐᓂᕐᒧᑦ ᐃᓗᐊᓂ ᑭᒡᓕᒋᔭᖏᓐᓄᑦ ᒪᓕᒃᑐᒥ ᓄᓇᕐᔪᐊᓕᒫᒥ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᔪᓂᑦ ᑐᖁᑕᐅᓂᐅᓚᐅᖅᑐᒥ ᔪᐊᔾ ᕗᓗᐊᐃᑦᒧᑦ ᐊᒡᒐᐅᔪᓂ ᒥᓂᐋᐳᓕᔅ ᐸᓖᓯᒃᑯᓐᓄᑦ.

ᑕᐃᒃᑯᓄᖓ ᑕᑯᓇᓱᒍᒪᓇᔭᖅᑐᓄᑦ ᐊᒥᓱᐊᓗᖕᓂ ᐆᒃᑑᑎᑕᖃᖅᐳᖅ ᑕᒻᒪᕐᓂᐅᔪᓂ ᑲᓇᑕᐅᑉ ᐊᑐᖅᐸᓚᐅᖅᑕᖏᓐᓂ, ᐱᓗᐊᖅᑐᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᐊᒃᑐᐃᓂᐅᔪᑦ ᓱᓕ ᐃᒃᐱᒋᔭᐅᕙᒃᑐᓂ ᐅᑭᐅᖅᑕᖅᑐᒥ ᒫᓐᓇᐅᔪᒥ.

ᑕᐃᒪᙵᓂ ᓯᕗᓪᓕᖅᐸᐅᔪᓂ ᐱᓕᕆᓂᐅᔪᓂ ᐅᑭᐅᖅᑕᖅᑐᒥ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ, ᐊᒥᓱᓂ ᐅᓂᒃᑲᐅᓯᑕᖃᖅᓯᒪᕗᖅ ᐃᒃᓯᓐᓇᖅᑕᐅᓂᕐᒧᑦ, ᐱᑦᑎᐊᖅᑕᐅᙱᓐᓂᐅᔪᒥ ᐊᒻᒪ ᐃᓱᒪᒋᔭᐅᙱᓐᓂᐅᔪᒥ ᑭᒡᒐᖅᑐᐃᔪᓂ ᑕᐃᒃᑯᓄᖓ ᐃᒻᒥᖕᓂᒃ ᐃᓕᓯᓯᒪᔪᓂᑦ ᐸᖅᑭᔨᐅᔪᓄᑦ ᐃᓄᖕᓂ.

ᐊᑕᐅᓯᖅ ᑐᓴᐅᒪᔭᐅᕐᔪᐊᖅᑐᒥ ᐱᐅᙱᓐᓂᐅᔪᒥ ᑲᒪᒋᔭᖃᕐᓂᐅᔪᒥ ᐳᕙᒡᓗᖕᓂᕐᒥ ᐊᐃᑦᑐᐃᖃᑦᑕᐅᑎᓯᒪᓂᕐᒥ ᐋᓐᓂᐊᒥᒃ ᕿᑎᖅᐸᓯᐊᓂ-1900–ᖏᓐᓂ, ᐱᔪᓐᓇᕐᓂᕆᔭᐅᔪᑦ ᐊᒥᓱᓂ ᐃᓄᖕᓂ ᐃᓱᒪᒋᔭᐅᓚᐅᙱᓐᓂᖓᓂ ᖃᐅᔨᓴᖅᑕᐅᓪᓗᑎᒃ ᐊᖏᖅᑕᐅᓂᖃᕐᓇᑎᒃ, ᐊᒥᓱᓂ ᐱᓕᕆᓂᐅᔪᓂ ᐊᐅᓪᓚᖅᑎᑕᐅᓪᓗᑎᒃ ᖃᓪᓗᓈᑦ ᓄᓇᖓᓐᓄᑦ ᐅᖃᐅᔾᔨᓚᐅᕐᓇᑎᒃ ᐃᓚᖏᓐᓂ ᐅᕝᕙᓘᓐᓃᑦ ᐊᑎᖃᙱᑦᑐᓂ ᐃᓗᕕᖅᓯᓂᐅᔪᓂ.

ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐃᖃᓗᖕᓄᐊᓚᐅᖅᐳᖅ ᐊᕐᕌᒎᓚᐅᖅᑐᒥ ᑐᓂᓯᔭᖅᑐᖅᖢᓂ ᑕᐃᔅᓱᒪᓂᐅᓚᐅᖅᑐᒧᑦ ᒪᒥᐊᓐᓂᐅᔪᒥ ᐃᒃᓯᓐᓇᖅᑕᐅᓯᒪᓂᖏᓐᓄᑦ ᐊᒻᒪ ᐱᑦᑎᐊᖅᑕᐅᙱᓐᓂᐅᔪᓄᑦ ᐃᓄᖕᓄᑦ, ᓱᑯᓇᒃᑕᐅᑐᐃᓐᓇᓕᖅᖢᓂ ᐱᔾᔪᑎᖃᙱᑦᑐᒥ ᐊᐱᖅᑯᑕᐅᔪᓄᑦ ᐊᓯᖏᓐᓄᑦ ᐊᑲᐅᙱᓕᐅᕈᑕᐅᔪᓂ ᖃᓪᓗᓈᑦ ᓄᓇᖓᓐᓂ ᐅᖃᐅᓯᒃᓴᓕᕆᔨᐅᔪᓄᑦ, ᓴᖅᑭᑎᑦᑎᓪᓗᓂ ᐊᑲᖅᓴᙱᕐᔪᐊᕐᓂᐅᔪᒥ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓᓐᓂ ᓇᑖᓐ ᐆᐱᑦᒧᑦ.

"ᐃᓄᐃᑦ ᐱᓪᓚᕆᐅᕗᑦ. ᐅᓇ ᐅᓂᒃᑳᖅᑐᐊᖅ ᐱᓪᓚᕆᐅᕗᖅ. ᑲᓇᑕᒥ ᐅᓂᒃᑳᖅᑐᐊᖑᕗᖅ. ᐃᓕᓴᖅᓯᕗᖓ ᐊᓯᖏᓐᓂ ᐅᓂᒃᑳᖅᑕᖃᕐᓂᖓᓂ ᐱᓪᓚᕆᐅᒋᕗᑦᑕᐅᖅ, ᑭᓯᐊᓂ ᑕᐃᒪᑐᖅ, ᓯᕗᓂᒃᓴᐅᔪᒥ, ᐃᒃᐱᒍᓱᖕᓂᖅᓴᐅᓂᖃᕐᓂᐊᕐᓂᖓᓂ ᑐᓂᔭᐅᔪᒥ ᐃᓂᐅᔪᒧᑦ ᐊᒻᒪ ᖃᖓᐅᓂᖓᓂ, ᐊᒻᒪᓗ ᐃᓄᐃᑦ ᐅᓂᒃᑳᖅᑐᐊᖏᓐᓂ ᐅᓂᒃᑳᖅᑕᐅᓪᓗᐊᕐᓂᖏᓐᓂ," ᐅᖃᐅᔾᔨᓚᐅᖅᐳᖅ ᑐᓴᒐᒃᓴᓕᐅᖅᑎᐅᔪᓂ ᑕᐃᔅᓱᒪᓂ.

ᑕᐃᑲᓂᑦᑕᐃᓐᓇᖅ ᐅᖃᐅᓯᖃᕐᓂᖃᓚᐅᖅᐳᖅ ᐃᓱᒪᒋᔭᖃᙱᓐᓂᐅᔪᒥ ᐊᒻᒪ ᐸᖅᑭᓂᖃᙱᓐᓂᐅᔪᒥ ᐃᓄᖕᓄᑦ ᐊᑲᐅᙱᓕᐅᕈᑕᐅᔪᓄᑦ ᑎᒍᒥᐊᖅᑕᐅᔪᓂ ᐊᖏᓂᖅᓴᐅᔪᒥ ᑲᓇᑕᒥᐅᑕᓄᑦ ᐊᑯᓂᒻᒪᕆᐊᓗᖕᒥ.

ᐊᓯᒋᔭᖓᓂ ᐊᒃᓱᕈᕐᓂᐅᔪᒥ ᐊᑐᕐᓂᐅᔪᒥ ᒫᓐᓇᓕᓴᐅᔪᒥ ᑲᓇᑕᒥ ᐸᓖᓯᒃᑯᓐᓂ ᑎᒍᔭᐅᓂᐅᔪᒥ ᑭᙵᕐᓂ ᐋᖓᔮᖅᑐᒥ ᐊᖑᒻᒥ ᐊᐳᖅᑕᐅᓚᐅᖅᑎᓪᓗᒍ ᓄᓇᓯᐅᑎᐅᑉ ᐹᖓᓂ ᐃᖏᕐᕋᔪᒥ ᐸᓖᓯᒃᑯᑦ ᓄᓇᓯᐅᑎᖓᓐᓂ ᓄᖅᑲᖅᑎᑦᑎᓇᓱᐊᕐᓂᕐᒥ ᓯᕗᓂᐊᓂ ᐊᓯᖏᓐᓂ ᐸᓖᓯᐅᔪᓂ ᑲᑐᔾᔭᐅᑎᓪᓗᒍ. ᐅᓇ ᐊᑐᖅᑕᐅᓂᐅᔪᖅ ᐊᑕᐅᓯᐅᕗᖅ ᐅᖃᐅᓯᐅᔾᔮᙱᑦᑐᒥ ᐊᒥᓱᓄᑦ ᑲᓇᑕᒥᐅᑕᓄᑦ ᖃᓪᓗᓈᑦ ᓄᓇᖓᓐᓂ ᐊᒻᒪ ᑕᑯᒃᓴᐅᑎᑦᑎᕗᖅ ᐃᓚᖏᓐᓂ ᐊᔾᔨᒌᙱᑎᑕᐅᓂᐅᔪᓂ ᖃᓄᖅ ᐃᓄᐃᑦ ᐱᓕᕆᐊᖑᕙᖕᓂᖏᓐᓂ ᐅᕙᓂ ᑲᓇᑕᐅᔪᒥ.

ᐃᓱᓕᑦᑎᓂᖅ ᐃᓅᖃᑎᒥᒃ ᐊᑭᕋᖅᑐᕐᓂᖅ ᐊᔾᔨᒋᙱᓐᓂᕐᒧᑦ ᐱᖃᕆᐊᖃᕋᔭᖅᐳᖅ ᑐᑭᓯᐅᒪᖃᑎᒌᖕᓂᐅᔪᒥ. ᐃᓄᐃᑦ ᓈᓚᖃᑎᒌᒋᐊᖃᕐᓂᐊᖅᐳᑦ ᐃᒻᒥᖕᓄᑦ ᐊᒻᒪ ᐅᖃᐅᓯᖃᕐᓗᑎᒃ ᐊᑐᕐᓂᑯᖏᓐᓂ ᐱᕈᖅᓴᐃᔪᓐᓇᕐᓂᕐᒧᑦ ᐊᖏᓂᖅᓴᐅᔪᒥ ᑐᑭᓯᐅᒪᓂᐅᔪᒥ ᐃᒻᒥᖕᓂᑦ.

ᑕᐃᒪᐃᑉᐸᓪᓕᐊᓕᕇᖅᐳᖅ ᐃᖃᓗᖕᓂ ᖁᑦᑎᒃᑐᒥ ᐃᓕᓐᓂᐊᕐᕕᑐᐊᖓᓐᓂ ("ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᒪᒃᓴᖅᓯᐅᕆᕗᑦ ᐃᓕᓐᓂᐊᖅᑎᐅᔪᓂ ᑎᒥᐅᔪᓂ ᐊᔾᔨᒌᙱᓐᓂᐅᔪᓂᑦ," ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ, ᔭᓄᐊᕆ 13–ᒥ ᑎᑎᕋᖅᑕᐅᓂᑯ) ᐊᖓᔪᒃᖠᐅᔪᑦ ᐃᓕᓐᓂᐊᖅᑎᐅᔪᑦ ᐊᓯᖏᓐᓂ ᐃᓕᓐᓂᐊᖅᑎᑦᑎᑎᓪᓗᒋᑦ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪ ᐃᒻᒥᖕᓂᑦ ᐃᓕᑦᑎᓪᓗᑎᒃ ᐃᓅᓯᕐᒥ ᖃᓪᓗᓈᑦ ᓄᓇᖓᓐᓂ. ᓈᓚᖕᓂᖅ ᐊᒻᒪ ᐃᓕᑦᑎᓂᖅ ᐃᒻᒥᖕᓂᑦ ᐃᓅᓯᓕᒫᒥᒃ ᐱᓇᓱᐊᕐᓂᐅᔭᕆᐊᖃᕐᓂᐊᖅᐳᖅ.

ᑲᓇᑕᒥᐅᑕᐅᓪᓗᑕ ᓴᓇᔭᕆᐊᖃᖅᐳᒍᑦ ᐅᑯᓂᖓ ᐃᑳᕐᕕᐅᔪᓂ ᐊᒻᒪ ᑲᒪᒋᔭᖃᑦᑎᐊᕐᓂᕐᒥ ᐊᖏᓂᖅᓴᐅᔪᒥ ᑐᑭᓯᐅᒪᓂᐅᔪᒥ ᐊᒃᓱᕈᕈᑕᐅᔪᓄᑦ ᐊᓯᖏᓐᓄᑦ, ᑭᓯᐊᓂᑦᑕᐅᖅ ᓴᙱᒃᑎᒋᐊᖅᓯᓗᑕ ᑭᒡᒐᖅᑐᖅᑕᐅᒐᔪᙱᑦᑐᓂ ᓂᐱᐅᔪᓂᑦ.

ᐃᖏᕐᕋᓂᐅᔪᖅ ᑳᖏᓚᐅᙱᓐᓂᖓᓂ, ᑲᓇᑕ ᐱᕕᒃᓴᖃᕆᐊᖃᖅᐳᑦ ᐃᒻᒥᖕᓂᒃ ᐱᐅᓯᒋᐊᖅᑎᑦᑎᓂᕐᒧᑦ ᐊᒻᒪ ᐱᓕᕆᑦᑎᐊᒃᑲᓐᓂᕐᓗᑎᒃ, ᐱᔭᕆᐊᖃᖅᑎᑦᑎᓇᔭᖅᑐᒥ ᑕᒪᒃᑭᓗᒃᑖᖑᔪᑎᒍᑦ ᐃᖅᑲᐅᒪᓂᕐᒧᑦ ᐊᒻᒪ ᐱᓕᕆᑦᑎᐊᒃᑲᓐᓂᕐᓂᕐᒧᑦ.