Skip to content

EDITORIAL: ᖃᓄᐃᒻᒪᑦ ᐃᓄᐃᑦ ᑲᑎᖅᓱᖅᑕᐅᕙᓪᓕᐊᔪᓄᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐅᔭᕋᖕᓂᐊᕐᓂᕐᒧᑦ ᐱᒻᒪᕆᐅᒍᓱᖕᓂᖏᓐᓂ

ᑲᑉᐱᕼᐃᓕᖅᑑᖅ ᒎᓗᒧᑦ ᐅᔭᕋᖕᓂᐊᕐᕕᒃ ᓄᓇᕗᒻᒥ ᒫᓐᓇᓕᓴᐅᔪᒥ ᐱᔭᐅᓚᐅᖅᐳᖅ ᓴᐃᓃᓯᓂ ᒎᓗᒧᑦ ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᒥ Shandong ᒎᓗᒧᑦ ᐅᔭᕋᖕᓂᐊᕐᓂᕐᒧᑦ.
ᑲᓇᑕᐅᑉ ᐃᑲᔪᕈᑎᒃᓴᓄᑦ ᐱᓕᕆᔨᕐᔪᐊᖏᓐᓂ ᐊᐅᓚᑕᐅᕐᔪᐊᖅᑎᓪᓗᒍ ᑲᑕᖕᓂᐅᔪᒥ ᓄᕙᒡᔪᐊᕐᓇᖅ-19–ᒧᑦ ᐊᓯᐊᓂ ᓄᓇᒥᙶᖅᑐᒥ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᕐᔪᐊᖑᔪᓄᑦ ᐊᖅᓵᖅᓯᓯᒪᕗᑦ ᑲᑉᐱᕼᐃᓕᖅᑑᕐᒥ TMAC ᐃᑲᔪᕈᑎᒃᓴᓂ ᐊᑭᑦᑎᐊᕙᐅᔪᒃᓴᐅᔪᒧᑦ, ᐃᓱᒪᒋᓇᒍ ᐸᓴᓇᖅᑐᒥ ᖃᖓᐅᓂᖓᓂ, ᓴᖅᑭᑎᑦᑎᔪᒥᒃ ᑖᒻ ᕼᐅᕗᕐ, ᐃᓯᒻᒥᖅᑐᐃᔨ ᓄᓇᑦᓯᐊᕐᒥ ᐊᒻᒪ ᓄᓇᕗᒻᒥ ᓇᖕᒥᓂᖅ ᐃᖅᑲᓇᐃᔭᕐᕕᓕᖕᓂ ᐅᔭᕋᖕᓂᐊᕐᕕᖕᓂᑦ, ᐅᖃᐅᓯᕆᓯᒪᕙᖓ "ᑐᓴᒐᒃᓴᑦᑎᐊᕙᐅᓂᖓᓂ ᑭᒃᑯᓕᒫᓄᑦ."

ᑕᒪᕐᒥᓕᒫᑦ ᖁᕕᐊᓱᙱᓚᑦ ᑭᓯᐊᓂ ᓂᐅᕕᖅᑕᐅᓂᐅᔪᖅ ᓴᖅᑭᑎᑦᑎᓯᒪᖕᒪᑦ ᑲᓇᑕᒥ ᑭᐅᓗᖕᓂᐅᔪᒥ ᐅᑭᐅᖅᑕᖅᑐᒥ ᐃᒻᒥᓂᒃ ᐊᐅᓚᔪᓐᓇᕐᓂᖏᓐᓂ ᐊᒻᒪ ᑲᓇᑕᐅᑉ ᐱᓕᕆᖃᑎᖃᕐᓂᖓᓂ ᓴᐃᓇᒥ.
ᓄᓇᕐᔪᐊᒥ ᐱᓕᕆᖃᑎᒌᖕᓂᐅᔪᓄᑦ ᑲᑎᒪᔨᕐᔪᐊᖑᔪᓄᑦ ᑎᑎᕋᖅᐸᒃᑐᑦ, ᒐᕙᒪᑐᖃᒃᑯᓐᓂ ᐃᓚᒋᔭᐅᔪᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐊᒻᒪ CSIS ᑐᑭᒧᐊᒃᑎᑦᑎᔨᐅᓚᐅᖅᑐᖅ ᖃᐅᔨᓴᖅᓯᒪᕗᑦ ᐊᑲᐅᙱᓕᐅᕈᑕᐅᔪᒥ ᐊᒻᒪ ᒫᓐᓇᓕᓴᒥᑦᑕᐅᖅ ᕋᐃᓚᓐ ᔮᓐᓴᓐ, ᔭᓗᓇᐃᕝᒥ ᒪᓕᒐᓕᐅᖅᑎᐅᖃᑕᐅᔪᖅ ᓄᓇᑦᓯᐊᕐᒥ ᒪᓕᒐᓕᐅᖅᑎᖏᓐᓂ.

"ᓴᐃᓇ ᑕᑯᔪᒪᓂᖃᙱᑦᑎᐊᖅᐳᖅ ᓄᓇᒥᙶᖅᑐᓂ ᐱᑕᖃᒐᔪᙱᕕᒡᔪᐊᖅᑐᓂ ᓴᕕᕋᔭᖕᓂ ᐱᕙᓪᓕᐊᑎᑕᐅᓂᖏᓐᓂ ᐅᕝᕙᓘᓐᓃᑦ ᐅᔭᕋᖕᓂᐊᕐᕕᖕᒥ ᐊᑭᑦᑐᕋᐅᑎᓂᖏᓐᓂ ᓇᖕᒥᓂᕆᔭᖏᓐᓂ ᑕᕝᕗᖓ ᑎᑭᐅᑎᒍᓂ...ᑲᓇᑕ ᑮᓇᐅᔾᔭᒃᓴᓂᕐᒧᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑎᖃᓪᓚᕆᒃᑯᑎᒃ ᐊᒻᒪ ᑐᓂᓯᓗᑎᒃ ᐅᑭᐅᖅᑕᖅᑑᑉ ᓄᓇᖃᖅᑳᖅᓯᒪᔪᓄᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑕᐅᔪᓂ ᑐᑭᖃᑦᑎᐊᖅᑐᒥ ᐊᑭᑐᔫᑎᓂᑦ, ᑕᐃᒫᒃ ᓇᖕᒥᓂᖃᕈᓐᓇᕋᔭᖅᐳᒍᑦ ᓇᖕᒥᓂᖅ ᐃᑲᔪᕈᑎᒃᓴᑦᑎᓐᓂ ᓄᓇᐅᓗᑕ," ᐅᖃᓚᐅᖅᐳᖅ ᔮᓐᓴᓐ ᖃᕋᓴᐅᔭᑎᒍᑦ ᑭᐅᓂᕐᒧᑦ ᑎᑎᕋᖅᑕᐅᓯᒪᔪᒥ "ᓴᐃᓃᓯᓂ ᓇᖕᒥᓂᖃᕐᓂᐅᔪᓂ ᓄᓇᕘᑉ ᐃᑲᔪᕈᑎᒃᓴᖏᓐᓂ ᓴᖅᑭᑎᑦᑎᕗᖅ ᐊᑲᐅᙱᓐᓂᐅᔪᒥ," ᒪᐃ 25–ᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ.

ᔮᓐᓴᓐ, ᐅᒃᐱᕈᓱᒃᐳᒍᑦ, ᓇᓚᐅᑦᑎᑦᑎᐊᖅᐳᖅ.

ᐅᔭᕋᖕᓂᐊᕐᓂᖅ ᐅᑭᐅᖅᑕᖅᑐᒥ ᑕᒪᐃᑎᒍᑦ ᐱᖃᙱᓚᖅ ᓈᒻᒪᒃᑐᒥ ᐃᓄᖕᓄᑦ ᑲᑎᖅᓱᖅᑕᐅᕙᓪᓕᐊᔪᓄᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ.

ᐅᔭᕋᖕᓂᐊᕐᓂᖅ ᑭᒡᒐᖅᑐᐃᕗᖅ ᐊᖏᔪᒻᒪᕆᐊᓗᖕᒥ ᐱᕕᒃᓴᖃᕐᓂᐅᔪᒥ ᐃᓄᖕᓄᑦ ᐱᓕᕆᖃᑕᐅᓂᖏᓐᓂ ᐱᕙᓪᓕᐊᑎᑕᐅᓂᖓᓂ ᐱᓕᕆᐊᖑᔪᒥ ᓄᓇᖓᓐᓂ. ᒐᕙᒪᑐᖃᒃᑯᑦ ᐅᖃᓕᒫᓚᐅᕈᑎᒃ ᑏᓂ ᓯᖃᓪᓕᓂ ᐊᒻᒪ ᐃᒻᒥᓂᒃ ᐃᓕᓗᑎᒃ ᐃᑲᔪᖅᓱᐃᓂᕐᒧᑦ ᐃᓄᖕᓄᑦ–ᓇᖕᒥᓂᕆᔭᐅᔪᓄᑦ ᐱᕙᓪᓕᐊᑎᑦᑎᓂᕐᒧᑦ ᑎᒥᖁᑕᐅᔪᓂ, ᐊᓯᐊᒎᕈᑎᖃᕈᓐᓇᕋᔭᓚᐅᖅᐳᖅ ᓂᐅᕕᐊᒃᓴᖃᕐᓂᕐᒥ ᐱᕕᒃᓴᖅᓯᐅᖅᑎᐅᔪᓂ ᓴᐃᓃᓯᓂ-ᒐᕙᒪᒃᑯᓐᓂ-ᐃᑲᔪᖅᓯᖅᑕᐅᔪᓂ SD ᒎᓗᒧᑦ.

ᐱᐅᒋᓗᒍ ᐋᒃᑲᓘᓐᓃᑦ, ᑲᓇᑕ ᐃᑲᔪᕈᑎᒃᓴᐅᕗᖅ ᓄᓇᐅᓪᓗᓂ ᑭᓯᐊᓂ ᑕᒪᒃᑭᐅᒪᔪᒥ ᐱᔪᓐᓇᙱᑦᑑᔮᖅᐳᖅ ᐅᕝᕙᓘᓐᓃᑦ ᓈᒻᒪᒃᑐᒥ ᐃᒻᒥᓂᒃ ᐃᓕᓯᔪᒪᙱᓚᑦ ᐊᐅᓚᑦᑎᓂᕐᒧᑦ ᐅᑯᓂᖓ ᐃᑲᔪᕈᑎᒃᓴᐅᔪᓂᑦ.

ᑐᑭᓯᓇᑦᑎᐊᖅᑐᒥ Wet'suwet'en ᐱᓂᕐᓗᕐᔪᐊᕐᓂᐅᓚᐅᖅᑐᒥ ᐳᕆᑎᔅ ᑲᓚᒻᐱᐊᒥ, ᐱᖅᑯᓯᕆᙱᑖᓄᑦ ᐱᐅᓯᖃᓕᖅᑎᑕᐅᓂᕐᒥ ᒐᕙᒪᐅᔪᓂ ᐊᑑᑎᖃᑦᑎᐊᖅᑐᒥ ᑲᒪᒋᔭᖃᙱᓚᑦ ᓄᓇᖃᖅᑳᖅᓯᒪᔪᓄᑦ ᒐᕙᒪᐅᔪᓄᑦ. ᑐᑭᓯᓇᑦᑎᐊᖅᑐᒥ ᐋᔩᖃᑎᖃᕐᓂᐅᔪᒥ ᐱᓕᕆᑦᑎᐊᙱᓐᓂᖃᓚᐅᖅᑎᓪᓗᒍ ᒐᕙᒪᑐᖃᒃᑯᓐᓄᑦ, ᐱᑕᖃᐃᓐᓇᖅᑐᒥ ᐱᑕᖃᙱᓗᐊᕐᓂᖃᖅᐳᖅ ᑐᑭᓯᐅᒪᓂᑦᑎᐊᕙᐅᔪᒥ ᐃᑲᔪᕈᑎᒃᓴᓄᑦ ᐱᕙᓪᓕᐊᑎᑦᑎᓂᐅᔪᒥ ᑲᓇᑕᓕᒫᒥ.

ᑲᓇᑕᓕᒫᒥ ᑲᑎᙵᓂᐅᔪᒥ ᖃᖓᓕᒫᑦᑎᐊᕐᒥ ᐊᑦᑎᓛᖑᕗᖅ ᐊᒻᒪ ᐊᔪᕐᓇᙱᓚᖅ ᑕᑯᓂᕐᒧᑦ ᐃᑲᔪᕈᑎᒃᓴᓄᑦ ᐱᕙᓪᓕᐊᑎᑕᐅᓂᖓᓂ ᐆᒻᒪᑎᖓᓃᓐᓂᖓᓂ ᐊᑲᐅᙱᓕᐅᕈᑕᐅᔪᒥ.
ᓱᓪᓗᑯᑖᓂ ᐅᐸᒃᑕᐅᑦᑕᐃᓕᒪᑎᑕᐅᓪᓗᑎᒃ ᐳᕆᑎᔅ ᑲᓚᒻᐱᐊᒥ, ᐊᕕᓐᓂᕐᒧᑦ ᐃᑲᔪᖅᓱᐃᓂᕐᒧᑦ ᒪᓂᓴᕐᓂᐅᔪᓂ ᐋᓪᐴᑕᒥ ᐅᖅᓱᐊᓗᖕᒧᑦ ᐱᑕᖃᙱᓗᐊᕐᓂᖓᓂ ᕿᓂᕐᓂᕐᒧᑦ ᐅᑭᐅᖅᑕᖅᑐᒥ, ᑲᓇᑕ ᐊᒻᒪᓗ ᑲᑎᒪᔨᕐᔪᐊᖏᑦ ᓇᓕᒧᓕᖅᑎᑦᑎᔪᓐᓇᙱᑦᑑᔮᖅᐳᑦ ᐅᑯᓇᓂ ᐊᕙᑎᓕᕆᓂᕐᒧᑦ ᑲᒪᒋᔭᖃᕐᓂᕐᒥ ᐊᒻᒪ ᐱᕙᓪᓕᐊᑎᑦᑎᓂᕐᒧᑦ ᑲᓇᑕᒥ ᑮᓇᐅᔾᔭᒃᓴᕐᓂᐅᔪᒥ.

ᐅᓇ ᑕᒃᓯᕐᓂᐅᔪᖅ ᓇᓗᓕᖅᓯᒪᓂᐅᔪᒥ ᓴᔪᒃᑎᑕᐅᕐᔪᐊᓚᐅᖅᐳᖅ ᑲᑎᖅᓱᖅᑕᐅᕙᓪᓕᐊᔪᓄᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᔨᓕᐅᖅᑎᓂ ᐅᒃᐱᕈᓱᖕᓂᐅᔪᒥ ᑲᓇᑕᒥ ᐊᒻᒪ ᒫᓐᓇ ᐅᔭᕋᖕᓂᐊᕐᓂᕐᒧᑦ ᓄᓇᓕᐅᔪᑦ ᖃᓱᓂᖃᓕᖅᐳᑦ ᐊᒃᓱᓪᓘᓐᓃᑦ ᑭᓇᑐᐃᓐᓇᖅ ᑲᑎᖅᓱᖅᑕᐅᕙᓪᓕᐊᔪᓄᑦ ᑮᓇᐅᔭᓂᒃ ᑐᖅᑯᖅᑕᐅᓯᒪᓂᓕᐅᕐᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ, ᑲᒻᐸᓂᐅᒐᓗᐊᖅᐸᑦ ᐊᐅᓚᑕᐅᔪᒥ ᓈᓚᒃᑕᐅᔭᕆᐊᖃᓪᓚᕆᒃᑐᒥ ᑭᓱᓕᒫᓂᒃ ᐃᓄᓕᒫᓄᑦ ᓇᖕᒥᓂᕆᔭᐅᓂᖏᓐᓂ ᐅᖃᐅᔾᔨᔨᐅᔪᒧᑦ.

ᐅᓗᕆᐊᓇᕐᓂᖃᖅᐳᖅ ᑕᒪᒃᑭᐅᒪᔪᓄᑦ ᐆᒪᙵᑦ ᐱᓕᕆᓂᐅᔪᒥ: ᐅᓗᕆᐊᓇᕐᓂᖓᓂ ᐱᓕᕆᓂᐅᔪᒥ ᖃᓄᐃᓕᐅᕐᓂᖃᙱᑦᑎᐊᖅᑐᒥ ᐊᒻᒪᓗ ᑕᒪᒃᑭᓗᒃᑖᖅ ᐃᖅᑲᓇᐃᔮᖑᔪᓄᑦ ᐅᑭᐅᖅᑕᖅᑐᕐᒥᐅᓄᑦ ᐱᑕᖃᕈᓐᓃᕐᓂᖏᓐᓂ ᐊᒻᒪ ᐅᓗᕆᐊᓇᕐᓂᐅᔪᑦ ᐱᐅᙱᑦᑐᒥ ᓄᓇᕐᔪᐊᒥ ᐱᓕᕆᔨᐅᔪᒥ ᐱᖃᑕᐅᓕᕐᓂᖓᓂ ᑲᓇᑕᐅᑉ ᐃᑲᔪᕈᑎᒃᓴᓂ ᐊᒻᒪ ᐅᑭᐅᖅᑕᖅᑐᒥ ᐃᒻᒥᓂᒃ ᐊᐅᓚᔪᓐᓇᕐᓂᖏᓐᓂ.
ᐃᒪᐃᑦᑑᔮᖅᐳᖅ ᐅᑭᐅᖅᑕᖅᑐᖅ ᕿᒪᒃᑕᐅᓚᐅᕐᓂᖓᓂ ᐃᓱᒪᖅᓱᕐᓂᖃᕐᓇᑎᒃ.