Skip to content

Hyper-T ᓱᒃᑲᓴᕆᐊᓪᓚᒃᑐᖅ

ᐋᑕᒻ ᑕᓄᔭᖅ, ᐊᒥᓱᓄᑦ ᑕᐃᔭᐅᖃᑦᑕᖅᑐᖅ Hyper-T-ᒥᒃ, ᓱᒃᑲᓴᕖᖓᓕᕐᒪᑦ. ᒪᓐᓇᒧᑦ ᑎᑭᓱᒍ ᓄᐃᑦᑎᓯᒪᓕᖅᑐᖅ ᓯᑕᒪᓂᒃ ᓂᐱᓕᐊᕕᓂᕐᒥᓂᒃ ᑕᒪᑐᒪᓂ ᓯᑕᒪᓂ ᑕᖅᑭᓂ, ᑲᑎᓱᒋᑦ ᒫᓐᓇᒧᑦ ᑎᑭᓱᒍ 7-ᖑᖅᑐᑦ ᓂᐱᓕᐊᕕᓂᖏᑦ ᓇᖕᒥᓂᖅ ᐊᑎᖃᕐᕕᒋᓪᓗᓂᒋᑦ.

ᒧᒥᒻᒫᕐᒥ ᐃᓐᖏᖅᑎ "Hyper-T"-ᒥᒃ ᑕᐃᔭᐅᔪᖅ ᐋᑕᒻ ᑕᓄᔭᖅ ᐃᒡᓗᓕᒑᕐᔪᖕᒥᐅᖅ ᓴᖅᑭᑦᑎᓚᐅᕐᒪᑦ ᓯᑕᒪᓂᒃ ᓄᑖᓂᒃ ᑕᕐᕆᔭᐅᑎᓕᐊᕆᓯᒪᔭᒥᓂᒃ ᑕᑯᒃᓴᐅᑎᑕᐅᓚᐅᕐᒪᑕ ᐊᐅᓚᔫᓕᐊᕆᔭᐅᔪᓂ ᒪᕐᕉᖕᓂ, Iqaluit: The Movie ᐊᒻᒪᓗ The Grizzlies. ᒪᓐᓇ ᓂᐱᓕᐅᕆᓕᖅᑐᖅ ᑕᕐᕆᔭᒐᒃᓴᒥᒃ ᓴᖅᑭᓐᓂᐊᑕᒥᓂᒃ ᑕᒪᑐᒪᓂ ᐅᑭᐅᑦᑎᓐᓂ ᐃᓱᓕᓕᖅᐸᑦ.ᒪᕐᕉᖕᓂᒃ ᐊᐅᓚᔫᓕᐅᕈᑕᐅᓯᒪᓕᕆᓪᓗᓂ - The Grizzlies ᐊᒻᒪᓗ Iqaluit: The Move-ᒥ - ᐊᑐᖅᓯᒪᓕᕐᒪᑕ ᑎᑕᐅᓯᖏᓐᓂᒃ ᐊᐅᓚᔪᖓᑕ ᓂᐱᖓᓂ.

ᐊᒻᒪᓗᑦᑕᐅᖅ ᒫᓐᓇ ᐋᕿᒃᓱᐃᓕᕐᒥᔪᖅ ᓯᕗᓪᓕᖅᐹᒥᒃ ᓂᐱᓕᐅᕐᓂᐊᖅᑐᖅ ᑎᑕᐅᓯᕐᒥᓂᒃ, ᕿᓚᓈᕆᔭᖃᕋᒥ ᑭᖑᓪᓕᕐᒥ ᓄᓇᖃᖅᑳᖅᑐᑦ ᐃᓕᑕᕆᔭᐅᓕᖅᐸᑕ ᑎᑕᒃᑏᑦ ᐱᑎᑕᐅᔪᒪᓛᕈᒪᓪᓗᓂ ᐃᓕᑕᕆᔭᐅᔪᑎᒥᒃ ᑕᐃᒃᑯᓇᖓᑦ.
ᑖᒃᑯᐊ ᒫᓐᓇ ᐱᕙᓪᓕᐊᑎᑕᖏᑦ ᓱᒃᑲᐃᑦᑐᒥᒃ ᐱᒋᐊᖓᐅᓯᖃᔪᔪᑦ. ᐊᕐᕌᒍᖃᓕᖅᖢᓂ 32-ᓂᒃ, ᑕᓄᔭᖅ ᑎᑕᐃᓐᓇᐅᔭᖅᐸᖕᒪᑦ ᒪᒃᑯᒃᑑᓚᐅᕐᓂᕐᒥᓂᑦ. ᒫᓐᓇᕋᑖᖅ ᐊᑭᑐᔪᓂᒃ ᓂᐱᓕᐅᕈᑎᓂᒃ ᓂᐅᕕᓚᐅᕐᒪᑦ ᐊᔾᔨᓕᐅᕈᑎᖃᖅᑐᓂᒃ ᓴᓇᖅᑯᑎᒋᓂᐊᖅᑕᒥᓂᒃ ᓇᖕᒥᓂᖅ ᑎᑕᐅᓯᕐᒥᓂᒃ, ᐊᔾᔨᓕᐅᖅᓯᒪᔭᒥᓂᒃ ᓴᓇᓂᐊᕋᒥ ᐃᖃᓗᖕᓂ, ᐊᖏᕐᕋᕆᓕᖅᑕᒥ.
“ᓇᖕᒥᓂᖅ ᐃᒃᐱᒋᖃᑦᑕᕋᒪ ᑎᑕᐅᓯᕋ ᐱᐅᒋᓪᓗᒍ. ᑭᓯᐊᓂᓕ ᑎᑕᐅᓯᕋ ᖃᐅᔨᒪᔭᐅᓗᐊᓚᐅᖏᒻᒪᑦ ᐊᒥᓲᓂᖅᓴᓄᑦ ᓈᓚᒃᑕᐅᖃᑦᑕᖁᒐᒃᑯ. ᑕᐃᒪ ᑕᕐᕆᔭᐅᑎᓕᐊᕆᔪᒪᓕᓚᐅᖅᑕᒃᑲ ᑎᑕᐅᓯᒃᑲ … ᖃᐅᔨᒪᒐᒪ ᑎᑕᐅᓯᕋ ᖁᕕᐊᓇᕐᓂᖓᓂᒃ ᐊᓯᓐᓄᑦ ᑐᓵᔭᐅᖁᒐᒃᑯ.” ᐅᖃᕆᓪᓗᓂ ᑕᕐᕆᔭᐅᑎᓕᐊᕕᓂᕐᒥᓂᒃ ᐅᓂᒃᑳᖅᖢᓂ, ᐱᔭᐅᔪᓐᓇᖅᑐᒥᒃ ᖃᕆᑕᐅᔭᒃᑯᑦ YouTube-ᒥ.
ᓇᖕᒥᓂᖅ ᐊᔾᔨᓕᐅᕆᓪᓗᓂ ᓂᐱᓕᐅᖅᖢᓂᓗ, ᐊᓯᖏᑦ ᒫᓐᓇᕋᑖᖅ ᓴᖅᑭᑕᐅᑲᐃᓐᓇᖅᑐᑦ ᐊᑕᐅᓯᖅ ᑕᐃᒪᑐᐊᖅ, ᑕᑯᓛᕆᕙᒋᑦ - ᑐᑭᓕᒃ "I will see you again." ᓇᖕᒥᓂᖅ ᐋᕿᒃᓱᖅᓯᒪᔭᖓ ᐱᖃᑎᒋᓪᓗᒍ ᔪᐊᑕᓐ ᑰᓂᖅ.
ᑕᓄᔭᖅ ᑐᕌᖅᑕᖅᖢᓂ ᓂᖓᐅᒪᐅᑎᒥᓂᒃ ᐃᓐᖏᖃᑦᑕᕐᒪᑦ. ᐃᓚᖏᑦ ᐱᓯᓕᐊᖏᑦ ᕿᒃᓴᒍᑎᒋᓯᒪᔭᖏᓐᓂᒃ ᐅᓂᒃᑳᖅᖢᑎᒃ ᐃᒻᒥᓃᖅᑐᕕᓂᕐᓂᒃ, ᐃᒥᐊᓗᓗᐊᖃᑦᑕᖅᑐᓂᒃ ᐊᒻᒪᓗ ᐊᓯᖏᓐᓂᒃ ᐃᓅᓯᕐᓂᒃ ᓱᕋᐃᔪᓂᒃ. ᐱᓯᓕᐊᕆᓯᒪᔭᖏᑦ ᐅᓂᒃᑳᖅᑐᑦ ᐃᓅᓯᕐᒥᓂᒃ ᐊᑐᕐᓂᑯᒥᓂᒃ, ᐅᖃᕆᓪᓗᓂ. ᐃᓚᖏᑦ ᐋᓐᓂᕐᓇᒻᒪᕆᒃᑐᑦ ᐱᓯᖏᑦ ᐊᓱᐃᓛᒃᓕ ᓄᓇᕗᒥᐅᓄᑦ ᒫᓐᓇ ᐱᐅᒋᔭᐅᖃᑦᑕᕐᒪᑕ, ᓇᓗᓇᖏᑦᑐᖅ ᐊᒥᓱᓄᑦ ᓂᐅᕕᖅᑕᐅᖃᑦᑕᓕᖅᑐᑦ ᓂᐱᖁᑎᖏᑦ.
“ᒪᒃᑯᒃᑐᐃᑦ, ᖃᐅᔨᒪᔭᒃᑲ ᐊᒃᓱᕈᖅᓯᒪᖕᒪᑕ ᐃᓱᒪᒃᑯᑦ ᐅᕙᑦᑎᑐᑦ ᐃᒥᐊᓗᓕᓵᖅᖢᑎᒃ ᐅᐃᕆᓯᒪᓚᐅᕐᒥᖕᒪᑕ ᐅᕝᕙᓘᓐᓃᑦ ᐊᖓᔪᖅᑳᖏᑦ ᐃᒥᐊᓗᒃᑎᐅᓐᓂᕐᒪᑕ ᐅᕝᕙᓘᓐᓃᑦ ᓇᖕᒥᓂᖅ ᐊᒃᓱᕉᑎᖃᖅᑐᑦ ᐃᓱᒪᒥᒍᑦ ᓯᕘᕋᓪᓗᑎᒃ ᐃᒻᒥᓃᕈᒪᖃᑦᑕᖅᓯᒪᖕᒪᑕ ᑕᐃᒪᓐᓇ ᑐᓴᖃᑦᑕᖅᓯᒪᒐᒪ ᒪᒃᑯᒃᑑᖃᑎᓐᓂᑦ,” ᐅᖃᕆᓪᓗᓂ. “ᐅᖃᐅᔭᐅᖃᑦᑕᕋᒪ ᐱᓯᓕᐊᓐᓂᒃ ᐃᒃᐱᒍᓱᒃᖢᑎᒃ ᓈᓚᖃᑦᑕᕐᓂᕋᖅᑐᓂᒃ, ᑐᑭᓯᓪᓗᑎᒃ ᖃᓄᖅ ᐅᖃᕋᓱᐊᕐᓂᓐᓂᒃ ᐃᓐᖏᖅᖢᒍ ᐃᓚᖏᑦ ᑖᒃᑯᓄᖓ ᐱᐅᖅᓱᐅᕆᔭᐅᔪᑎᖃᕐᓂᕋᖃᑦᑕᕐᒪᑕ ᐃᓅᔪᑎᖃᕐᓂᕋᖃᑦᑕᕐᒪᑕ.”
ᑕᐃᓱᒪᓂ ᐃᓚᐅᖃᑕᐅᓪᓗᓂ ᓄᓇᕗᑦ ᓯᕗᓂᒃᓴᕗᒃᑯᓐᓂ ᐋᑐᕚᒥ ᐅᑭᐅᖑᓚᐅᖅᑐᑦ ᖁᓖᑦ ᐅᖓᑖᓂ, ᑕᓄᔭᖅ ᑎᑕᐅᓯᕐᒥᓂᒃ ᐋᕿᒃᓱᐃᓕᖅᑐᕕᓂᖅ ᐃᖏᖅᖢᒋᑦ ᓱᒃᑲᓕᓴᕐᓂᖏᑦ ᕿᓚᐅᔭᖅᑎᒧᑦ ᒪᓕᒃᓱᒋᑦ ᒫᓐᓇ ᐃᓅᔪᓐᓃᖅᓯᒪᓕᖅᑐᒧᑦ ᑐᓗᒃ ᕼᐊᕕᐅᔭᕐᒧᑦ ᖁᕐᓗᖅᑐᒥᐅᒧᑦ, ᑖᓱᒧᖓ ᐊᔪᐃᓐᓇᖅᑕᐅᓐᓂᕐᒪᑦ ᑲᔪᓯᑎᑦᑎᓇᓱᐊᖁᔭᐅᓪᓗᓂ ᑎᑕᐅᓯᕐᒥᓂᒃ.
“ᒪᒃᑯᒃᖢᖓ ᓇᖕᒥᓂᖅ ᐊᔪᖏᓐᓂᓐᓂᒃ ᐅᒃᐱᕆᓗᐊᔪᖏᓐᓇᒪ ᑕᐃᓱᒪᓂ ᑎᑕᐅᓯᕐᓂᒃ ᖁᕕᐊᒋᔭᖃᕋᓗᐊᖅᖢᖓ ᐊᑐᓗᐊᔪᖏᓐᓇᒃᑭᑦ,” ᐃᖅᑲᐅᒪᔭᒥᓂᒃ ᐅᓂᒃᑳᓚᐅᖅᑐᖅ. “ᑕᑯᓚᐅᖅᓯᒪᓐᓂᖏᒃᑯᒃᑯ ᑕᐃᓱᒪᓂ (ᕼᐊᕕᐅᔭᖅ), ᑎᑕᐅᓯᕐᓂᒃ ᐃᓐᖏᕈᓯᕐᓂᒃᓗ ᓱᕙᓕᑭᐊᖃᕋᔭᖅᑐᖓ ᓱᓕ … ᐊᑐᕐᓂᖃᓗᐊᕋᓱᒋᔪᖏᓐᓇᒃᑭᑦ ᐃᓅᓯᓐᓂ ᐅᕝᕙᓘᓐᓃᑦ ᖃᐅᒪᓂᖏᑦ ᑕᑯᓐᓂᖏᓐᓇᑭᑦ ᓱᓕ ᑕᐃᓐᓇ ᑲᑎᒋᐅᓚᐅᕐᓇᒍ.”
ᒪᑯᐊ ᐊᖏᔫᑎᐊᓗᐃᑦ ᒫᓐᓇ ᖃᓪᓗᓈᑎᑐᑦ ᒧᒥᖅᑎᐅᓪᓗᑎᒃ ᑎᑕᒃᑏᑦ Tupac-ᑯᑦ, Eminem-ᑯᓪᓗ ᑐᓴᕋᓐᓈᖅᐸᔪᒐᒃᑭᑦ ᐃᔾᔪᐊᖅᖢᒋᑦ ᐃᓐᖏᐅᔭᖅᐸᒃᖢᖓ ᐋᕐᑭᒃᓱᐃᓕᔪᔪᖓ ᓇᖕᒥᓂᖅ ᓂᐱᓕᐅᖃᑦᑕᖅᖢᖓ ᐱᓯᖏᓐᓂᒃ ᐃᓐᖏᖅᖢᖓ ᐃᓄᒃᑎᑐᑦ, ᒪᓐᓇ ᓂᐱᓕᐊᕆᔭᓐᓂ ᑐᓵᔭᒃᓴᐅᔪᖅ ᑕᐃᔭᓐᓂᒃ ᐅᒡᒍᐊᖅᐳᖓᒥ, "I'm sorry."
“ᓇᖕᒥᓂᖅ ᐱᖅᑯᓯᕐᓂᒃ ᒪᓕᒃᓗᑎᑦ, ᓇᖕᒥᓂᖅ ᐃᓅᓯᕐᓂᒃ ᑕᑯᒃᓴᐅᑎᑦᑎᓗᑎᑦ ᑕᒫᓂ ᓄᓇᓯᓐᓂ ᐱᖅᑯᓯᖅᑎᑐᑦ ᐊᑐᖅᖢᑎᑦ, ᒪᒃᑯᒃᑐᓄᑦ ᑕᒫᓂᕐᒥᐅᓄᑦ ᐅᕙᑦᑎᓐᓄᑦ ᐃᒃᐱᖕᓇᕐᓂᖃᕐᓂᐊᖅᓴᐅᖕᒪᑦ ᑕᕐᕆᔭᖅᖢᒍ,” ᐅᖃᕆᓪᓗᓂ.
Hyper-T ᑕᐃᒪ ᐃᓱᒪᒃᑯᑦ ᐸᕐᓇᒃᓯᒪᓕᖅᑐᖅ ᐅᑎᕐᓂᐊᕋᓱᒋᓪᓗᓂ ᓂᐱᓕᐅᕐᕕᖕᒥᓄᑦ ᐊᐅᔭᖅ ᐊᒻᒪᓗ ᓂᐱᓕᐊᕆᓯᒪᔭᒥᓂᒃ ᓱᓕᒃᑲᓐᓂᖅ ᓴᖅᑭᑦᑎᔪᓐᓇᕐᓂᕋᖅᖢᓂ ᑕᒪᑐᒪᓂ ᐅᑭᐅᑦᑎᓐᓂ ᐃᓱᓕᓚᐅᖏᓐᓂᖓᓂ.
ᐃᓛᖏᓚᒃ ᓯᕗᓂᖓᓂ ᐅᑭᐅᓂ ᐊᔪᖅᓴᕐᓇᓚᐅᖅᑑᒐᓗᐊᖅ, ᑭᓯᐊᓂᓕ ᖁᕕᐊᓱᒃᑐᖅ ᑕᐃᒪᖓᓂᑦ ᑎᑕᐅᓯᕐᓂᒃ ᓱᓕ ᓴᓇᕙᓪᓕᐊᖏᓐᓇᕐᒪᑦ, ᐊᒻᒪᓗ ᐅᑭᐅᖅᑕᖅᑐᒥᐅᑦ ᑎᑕᐅᓯᖏᑦ ᐅᓄᕐᓂᖅᓴᓄᑦ ᑐᓴᕋᓐᓈᖅᑕᐅᖃᑦᑕᓕᖅᖢᑎᒃ ᓄᓇᕐᔪᐊᒥ.
“ᓇᖕᒥᓂᖅ ᐅᕙᓐᓂᒃ ᐃᓕᓴᖅᓯᒪᔪᖓ ᐊᓯᓐᓂᒃ ᐃᓕᓴᖅᑎᒃᓴᖃᓚᐅᖏᓐᓇᒪ ᑕᒪᑐᒥᖓ ᐱᒋᐊᓕᖅᑎᓗᖓ. ᐊᒃᓱᕈᕐᓇᓚᐅᖅᑐᖅ ᐅᕙᓐᓄᑦ ᐅᑭᐅᓂ ᒪᕐᕉᖕᓂ ᓯᕗᓂᖓᓂ. ᒫᓐᓇᕋᑖᑦᑎᐊᖅ ᓇᖕᒥᓂᖅ ᑕᕐᕆᔭᐅᑎᓕᐅᖃᑦᑕᓕᕐᒪᑕ ᑎᑕᒃᑏᑦ ᐃᓐᖏᑦᑏᓪᓗ ᐃᓄᐃᑦ ᒧᒥᖅᑏᑦ ᓄᓇᕕᒃᒥ ᓄᓇᕗᒥᓗ.” ᐅᖃᕆᓪᓗᓂ. “ᐱᓗᐊᖑᐊᖅᑐᒥᒃ ᐊᖏᕐᕋᖃᖅᖢᓂ ᓄᓇᕗᒥ, ᑎᑕᒃᑏᑦ ᐃᓐᖏᖅᑏᓪᓗ ᓇᖕᒥᓂᖅ ᑕᕐᕆᔭᐅᑎᓕᐅᑲᑕᓗᐊᖏᒻᒪᑕ ᓴᓇᔭᒥᓂᒃ ᓄᓇᕗᒥ, ᒪᓐᓇ ᐱᕈᖅᓴᕙᓪᓕᐊᓕᑕᐃᓐᓇᕐᒪᑕ ᐱᓯᕐᒥᓂᑦ ᐃᓅᔪᑎᖃᕈᓐᓇᖅᓯᔪᑦ ᐃᓐᖏᑦᑏᑦ ᒪᑯᐊ ᑭᓕ ᕗᕇᓱ ᑕᐃᔭᐅᓚᐅᖅᑎᓪᓗᒍ ᓂᐱᓕᐊᒥᓄᑦ ᔫᓄᒃᑯᓐᓂᑦ ᑲᓇᑕᒥ ᐊᒻᒪᓗ ᔨᐅᕆ ᑳᓐᔅᑯᑦᑕᐅᖅ Jerry Cans ᔫᓄᒃᑯᓐᓄᑦ ᑕᐃᔭᐅᓯᒪᔪᑦ ᐱᐅᓂᖅᐹᖑᖃᑕᐅᓪᓗᑎᒃ ᐊᓱᐃᓛᒃ ᓄᓇᕐᔪᐊᓕᒫᒥ ᐳᓚᕋᕈᓐᓇᖅᓯᔪᑦ ᓈᓚᒃᑕᐅᒋᐊᖅᑐᕐᓗᑎᒃ.”
ᑕᑯᒃᑲᓐᓂᕈᒪᒍᕕᑦ Hyper-T ᐱᓯᖏᓐᓂᒃ ᑎᑕᐅᓯᕐᓂᒃ ᑕᕐᕆᔭᐅᑎᓕᐊᕕᓂᖏᓐᓂᒃ ᐅᑯᓇᓂ ᑕᑯᔪᓐᓇᖅᑐᑎᑦ:

https://youtu.be/h8PLoum755A

https://youtu.be/J8Pht7iW1iA

https://youtu.be/T6zH704W3eI