Skip to content

IN MY VIEW: ᖃᓄᐃᓕᐅᕈᑎᒋᔪᓐᓇᖅᑕᕗᑦ

ᐊᒃᓱᕈᕐᓇᐅᑎᓪᓗᒍ ᖃᐅᔨᒪᙱᖦᖢᑕᓗ ᖃᓄᐃᓐᓂᐃᓪᓚᑦᑖᕐᓂᐊᕐᒪᖔᑦᑕ, ᐃᓗᑐᔪᒧᑦ ᕿᓂᕐᓗᑕ ᓇᓂᓯᓗᑕᓗ ᖃᓄᐃᑦᑑᓂᑦᑎᓐᓂᒃ ᖃᓄᐃᓕᐅᕈᓐᓇᕐᓂᑦᑎᓐᓂᒡᓗ. ᖃᐅᔨᒪᑦᓯᐊᕋᑦᑕ ᖃᓄᐃᓕᐅᕆᐊᒃᓴᖅ, ᐅᔾᔨᕈᓱᒃᖢᑕᓗ, ᑐᑭᓯᐅᒪᓪᓗᑕᓗ, ᓴᓐᖏᓂᖃᖅᖢᑕᓗ, ᖃᓄᐃᑕᐅᓚᐅᕐᓗᑕ ᒪᑭᑲᐅᑎᒋᔪᓐᓇᖅᖢᑕᓗ ᐊᒻᒪ ᐊᓯᖏᓐᓂᒡᓗ ᐊᖏᓂᖅᓴᓂᒃ ᐱᓕᕆᐊᖃᖅᓯᒪᓪᓗᑕ ᐅᐱᓐᓇᖅᑐᓂᒃ.

ᑕᒪᓐᓇ ᐱᕙᓪᓕᐊᑎᒋᐊᖃᖅᐸᕗᑦ ᐃᓅᖃᑎᑦᑎᓪᓗ ᑕᐃᒪᓐᓇᐃᓕᐅᖅᑎᖃᑦᑕᕐᓗᒋᑦ. ᑕᒪᓐᓇ ᐃᓄᐃᑦ ᖃᐅᔨᒪᔭᑐᖃᖏᑦ ᒪᓕᒐᐃᑦ ᑐᓐᖓᓂᖃᕐᒪᑕ ᖃᓄᐃᓕᐅᕈᑎᒋᓯᒪᔭᑦᑎᓐᓂᒃ. ᑕᒪᒃᑯᐊ ᐅᖃᐅᓯᕆᖏᓐᓇᖅᐸᒃᖢᒋᓪᓗ ᐅᖃᐅᓯᕆᖃᑦᑕᐃᓐᓇᕆᐊᖃᖅᐸᕗᓪᓗ; ᐅᐱᒋᔭᖃᕐᓂᖅ ᐃᓅᖃᑎᑦᑎᓐᓂᒃ, ᐱᖃᓐᓇᕇᖕᓂᖅ ᑲᒪᑦᓯᐊᕐᓂᖅ ᐃᓅᖃᑎᖕᓂᒃ; ᐅᒃᐱᕐᓂᖃᑦᓯᐊᕐᓂᖅ ᒪᑐᐃᖔᕐᓗᓂ, ᑐᓐᖓᓇᕐᓗᓂ ᐃᓚᐅᑎᑦᓯᓗᓂᓗ ᐃᓅᖃᑎᒥᓂᒃ; ᐱᔨᑦᓯᕋᕐᓂᖅ ᐱᖃᖅᑎᑦᓯᓂᖅ ᐃᓚᔮᒥᓂᒃ ᐊᒻᒪ/ᓄᓇᓕᖕᓂᒥᐅᖃᑎᒥᓂᒃ; ᐃᓱᒪᓕᐅᕈᑎᖃᕐᓂᖅ ᐊᖏᖃᑎᒌᒃᓯᒪᓗᓂ; ᐱᔪᓐᓇᖅᓯᓂᖅ ᐊᔪᙱᓴᖃᑦᑕᕐᓗᓂ, ᐊᒃᓱᕈᕐᓂ ᐱᒍᒪᔭᒥᒃ, ᐊᒻᒪ ᐱᓕᕆᐊᖃᕐᓂᖅ; ᐱᓕᕆᖃᑎᒌᖕᓂᖅ ᐊᑕᐅᓯᕐᒥᒃ ᐱᓇᓱᐊᕐᓗᓂ; ᓄᑖᓂᒃ ᐊᑐᖃᑦᑕᕐᓂᖅ ᑭᓱᑐᐃᓐᓇᕐᓂᒃ ᐊᑐᕈᓐᓇᕐᓂᖅ ᐱᓕᕆᐊᖃᕈᓐᓇᕐᓂᖅ ᐆᒃᑐᕐᓗᒋᑦ ᐊᒻᒪ; ᐅᐱᒋᔭᖃᕐᓂᖅ ᐊᒻᒪ ᑲᒪᑦᓯᐊᕐᓂᖅ ᓄᓇᒥᒃ, ᐆᒪᔪᓂᒃ ᐊᒻᒪ ᐊᕙᑎᒥᐅᑕᑦᑎᓐᓂᒃ.

ᐃᓱᒪᒋᔭᒃᑯᑦ, ᐊᒥᓱᐃᖅᑕᖅᖢᑕ ᓴᐱᓕᑲᐅᑎᒋᖃᑦᑕᕋᑦᑕ ᐅᐃᒪᓕᖅᖢᑕᓗ ᐊᒻᒪ ᐃᒪᐃᓕᖓᓕᖅᖢᑕ, ᐱᒋᐊᖅᑎᑦᓯᓚᐅᕐᓗᑕ ᐊᓯᑦᑎᓐᓂᒃ ᐃᒻᒥᓂᒃ ᐱᓕᕆᐊᕆᓕᕐᓗᒍ ᐱᒐᔪᒃᐳᒍᑦ. ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᒪᓕᒐᐃᑦ ᐅᖃᖅᓯᒪᖕᒪᑕ ᑐᑭᓯᓇᑦᓯᐊᖅᑐᒥᒃ, "ᐱᓕᕆᖃᑎᒌᒃᑐᒍᑦ ᐊᑕᐅᓯᕐᒥᒃ ᐱᓇᓱᐊᖅᖢᑕ." ᐃᓄᐃᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᑦ ᐃᓄᑑᔾᔨᔪᓐᓇᖏᒻᒪᑕ. ᑕᐃᒪᓐᓇ ᐱᒋᐊᖓᕐᓂᕐᒥᒃ ᑕᐃᒪᐃᓯᒪᓪᓗᑎᒡᓗ.

ᑕᐃᒪ ᐃᓱᒪᒋᓗᒋᑦ ᐅᒥᖕᒪᐃᑦ ᖃᐅᔨᒪᕗᒍᑦ ᐊᒥᓲᓪᓗᓂ ᓴᓐᖏᓐᓇᕐᓂᖅᓴᐅᖕᒪᑦ. ᑕᐃᒪᓐᓇ ᐅᒥᖕᒪᒃᑎᑐᑦ ᐊᖕᒪᓗᒃᓯᓪᓗᓂ ᑲᑉᐱᐊᓇᖅᑐᒦᓕᕌᖓᑕ ᑕᐃᒪᓐᓇ ᓴᓐᖏᓂᖏᑦ ᓱᕋᒃᑕᐅᔪᓐᓇᖏᓚᑦ. ᑕᐃᒫᒃᑕᐅᖅ ᑕᐃᒪᓐᓇ ᐅᔾᔨᖅᑐᕆᐊᖃᖅᖢᓂ ᑕᐃᒪᐃᓐᓇᖅᐳᖅ; ᐊᔾᔨᐅᖏᑦᑐᓂᒃ ᐱᑕᕋᑦᑕ ᖃᓄᐃᒍᑎᖃᕈᓐᓇᖅᖢᑕᓗ ᐊᔾᔨᐅᖏᑦᑐᒥᒃ. ᐃᓄᖁᑎᕗᑦ ᓇᓂᑐᐃᓐᓇᖅ ᓄᓇᑦᑎᓐᓂ ᓄᓇᖃᕐᒪᑕ ᑎᑭᑕᐅᔪᓐᓇᕋᓗᐊᖅᖢᑎᒃ ᖃᖓᑕᔫᒃᑯᑦ ᑭᓯᐊᓂ ᐊᑭᖃᖅᖢᓂᓗ ᑮᓇᐅᔭᓂᒃ.

ᐅᖃᐱᓗᖕᓂᕐᒥᒃ ᐱᔾᔪᑎᖃᖏᑦᑐᖓ, ᑐᑭᓯᐅᒪᖁᔨᑐᐃᓐᓇᖅᑐᖓ ᖃᓄᐃᖃᑦᑕᕐᒪᖔᑦᑕ ᑕᒫᓂ ᐅᓪᓗᑕᒫᑦ ᓄᓇᑦᑎᓐᓂ. ᐃᖅᑲᐃᑎᑦᓯᒋᐊᕐᓗᖓ ᑕᐃᑦᓱᒪᓂ 1950-ᓂ ᐊᒻᒪ 1960-ᓂ, ᖃᖓᑕᔫᖃᖅᐸᓚᐅᖅᐳᒍᑦ DC-4 ᐊᒻᒪᓗ DC-6–ᓂᒃ ᐃᖃᓗᒃᑑᑦᓯᐊᒧᑦ ᑎᑭᖃᑦᑕᓚᐅᖅᓯᒪᔪᓂᒃ ᑕᖅᑭᑕᒫᑦ. ᑐᒃᓯᐊᕐᕕᖕᒥ ᑎᑎᖃᕐᓂᐊᕐᕕᖃᖅᑎᑕᐅᓚᐅᖅᓯᒪᓪᓗᑎᒃ ᐊᑯᓐᓂᖓᓂᓗ ᓯᕿᖑᔭᐅᑉ 1:30 ᐅᓐᓄᐊᒃᑯᑦ 3:30 ᑎᑭᖦᖢᒍ ᐃᓄᐃᑦ ᑎᑎᖅᑲᓂᒃ ᐊᐃᒃᖠᖅᑐᑦ ᓱᕈᓯᖅᓯᐅᑎᓂᒃ ᑎᑭᑕᐅᒑᖓᒥᒃ ᑮᓇᐅᔭᒃᓴᓂᒃ, ᐃᑦᑐᖅᓯᐅᑎᓂᒡᓗ ᓇᒃᓯᐅᓯᐊᕌᖓᒥᒡᓗ ᑎᑭᓴᓚᐅᖅᑕᒥᖕᓂᒃ Eaton's ᓂᐅᕕᕐᕕᑉ ᑎᑭᓴᐃᕕᖏᓐᓂᑦ.

ᑕᐃᒪ, ᐅᖃᕋᓱᐊᖅᐳᖓ ᓄᖅᑲᓚᐅᑲᒡᓗᓯ ᕿᓂᕐᓗᓯᓗ ᓴᓐᖏᓂᖅᓴᒥᒃ ᑕᐃᒪᓐᓇ ᐃᓂᒎᑎᖃᕈᓐᓇᖅᐳᓯ.