ᐅᓄᓛᖑᔪᓂ ᐃᓱᓕᑦᑎᔪᓂ ᐃᓕᓐᓂᐊᕐᕕᐊᕈᓯᐅᔪᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓐᓂ ᐃᓕᓐᓂᐊᕐᕕᖓᓐᓂ ᑭᕙᓪᓕᕐᒥᙶᓚᐅᖅᐳᑦ ᑕᒪᑐᒪᓂ ᐊᕐᕌᒎᔪᒥ 87-ᓂ ᐃᓕᓐᓂᐊᖅᑏᑦ ᒫᓐᓇᓕᓴᒥ ᐃᓕᓴᕆᔭᐅᓚᐅᖅᐳᑦ ᑎᑭᐅᑎᔪᓐᓇᕐᓂᖏᓐᓄᑦ.
ᐊᕐᕕᐊᕐᒥᐅᑕᖅ ᑕᐃᕋ ᓱᓗᒃ ᐃᓚᒋᔭᐅᖃᑕᐅᓚᐅᖅᐳᖅ ᓯᕗᓂᐊᓂ-ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᕈᑎᑦ ᕿᔪᓕᕆᓂᕐᒧᑦ ᐃᓕᓐᓂᐊᖅᑎᐅᖃᑕᐅᔪᓄᑦ. ᑲᔪᖏᖅᓴᖅᑕᐅᓚᐅᖅᐳᖅ ᐃᓕᑦᑎᓂᖓᓐᓂ ᐱᓕᕆᐊᖑᓂᐅᔪᒥ ᐃᑲᔪᕐᓂᕐᒧᑦ ᐃᓄᖕᒥ ᖃᓂᒋᔭᖓᓄᑦ.
"ᐊᑖᑕᒐ ᐃᒡᓗᑖᓚᐅᖅᐳᖅ ᖃᔅᓯᐊᕐᔪᖕᓂ ᐊᕐᕌᒎᓕᖅᑐᓂ ᑭᓱᓕᒫᓂᒃ ᓄᑖᙳᖅᑎᕆᔭᕆᐊᖃᖅᑐᒥ ᑕᐃᒪᓐᓇ ᐃᓕᓐᓂᐊᕆᐊᓕᓚᐅᖅᐳᖓ ᓄᑖᙳᕆᐊᖅᑎᑦᑎᔪᓐᓇᕐᓂᐊᕋᒪ ᐅᕙᓐᓂᒃ ᐊᑭᓖᙱᖔᕐᓗᑕ ᑕᐅᓯᓐ-ᖏᓐᓂ ᑮᓇᐅᔭᓂᑦ ᐃᒡᓗᓕᕆᔨᒃᑯᓐᓄᑦ ᓄᑖᙳᕆᐊᖅᑎᑕᐅᓂᖓᓄᑦ," ᓱᓗᒃ ᐅᓂᒃᑳᓚᐅᖅᐳᖅ.
ᐊᓈᓇᖓ ᐃᒻᒥᓂᒃ-ᐃᓕᑎᖦᖢᓂ ᕿᔪᓕᕆᔨᐅᕗᖅ, ᑕᐃᒪᓐᓇ ᓱᓗᒃ ᐱᔪᒪᓚᐅᖅᐳᖅ ᐊᔪᙱᓐᓂᐅᔪᓂ ᐊᓈᓇᒥᑑᕈᒪᓪᓗᓂ.
ᐃᓕᓐᓂᐊᓕᓚᐅᖅᐳᖅ ᓯᑎᐱᕆᒥ ᐊᒻᒪ ᐱᔭᕇᓚᐅᖅᐳᖅ ᐊᐃᑉᕆᓕᒥ. ᒫᓐᓇ ᕿᓂᓕᖅᐳᖅ ᐃᓕᓯᒪᓂᕐᒧᑦ ᐱᓕᕆᐊᒥᓂᒃ ᐸᐃᑉᐹᖁᑎᖃᖅᑐᒥ ᕿᔪᓕᕆᓂᕐᒧᑦ ᑲᑎᖅᓱᐃᔪᓐᓇᕐᓂᐊᕐᒪᑦ ᐃᑲᕐᕋᓂ ᐃᖅᑲᓇᐃᔭᖅᓯᓐᓈᕐᓗᓂ ᓅᑦᑐᓐᓇᕐᓂᐊᕐᒪᑦ ᒪᕐᕈᖓᓄᑦ ᐊᕐᕌᒎᔪᒧᑦ. ᑐᕌᒐᒃᓴᖓ ᐱᔭᕇᖅᓯᓂᕐᒧᑦ ᐊᕐᕌᒍᓂ ᑎᓴᒪᓂ ᐱᓕᒻᒪᒃᓴᕐᓂᐅᔪᒥ ᐊᒻᒪ ᐱᓗᓂ ᐊᐅᐸᖅᑐᒥ ᓇᓗᓇᐃᒃᑯᑕᐅᔪᒥ ᕿᔪᓕᕆᓂᕐᒧᑦ.
ᖄᖏᖅᓯᒪᓕᖅᑐᒥ ᑕᖅᑭᒐᓴᓄᑦ ᑕᑯᓂᖃᓚᐅᖅᐳᖅ ᓴᓇᓪᓗᓂ ᕿᔪᓕᕆᕝᕕᖕᒥ ᐊᑐᑐᐃᓐᓇᖅᖢᓂ ᐊᒡᒐᒧᑦ ᑎᒍᒥᐊᖅᑕᐅᓲᓄᑦ ᓴᓇᕐᕈᑎᓂᒃ, ᐃᓕᓯᓯᒪᕗᖅ ᐃᒡᓗᕋᓛᑉ ᓴᓂᕋᖏᓐᓂ ᐃᓚᖃᖅᖢᓂ ᐃᓕᓐᓂᐊᖃᑎᒥᓂᑦ, ᐊᒻᒪ ᐅᓗᓕᐅᖅᓯᒪᕗᖅ.
ᐱᔭᕇᖅᓯᒪᑦᑎᐊᖅᖢᓂ ᐱᒋᐊᕈᑕᐅᔪᒥ ᐊᕐᕌᒍᖓᓂ, ᐅᖃᓚᐅᖅᐳᖅ ᖃᔅᓯᐊᕐᔪᖕᓂ ᐊᕐᓇᓂ ᐊᖏᕐᕋᖓᓂ ᓄᓇᖓᓐᓂ ᐅᐸᒃᑐᐃᓚᐅᖅᐳᑦ ᐊᐱᕆᔭᖅᑐᖅᖢᑎᒃ ᖃᓄᖅ ᑐᒃᓯᕋᕐᓂᕐᒧᑦ ᐱᓕᕆᐊᖑᔪᒧᑦ.
"ᑲᒪᓚᐅᖅᐳᖓ ᐊᕐᓇᒃᑲᓐᓂᕐᓂ ᐱᔪᒪᓂᖃᕈᒪᓂᖏᓐᓂ ᐱᓕᕆᓂᐅᔪᒥᑦ," ᐅᖃᓚᐅᖅᐳᖅ.
ᐃᓕᓐᓂᐊᕐᕕᐅᔪᒥ ᑕᒪᑐᒪᓂ ᐊᕐᕌᒎᔪᒥ, ᐃᓚᐅᕝᕕᐅᓛᖑᓚᐅᖅᑐᖅ ᐱᓕᕆᐊᖑᔪᒥ ᐅᖁᒪᐃᑦᑐᓄᑦ ᐊᖁᑎᐅᔪᓄᑦ ᐳᓪᓚᓕᖕᒥ ᓄᖅᑲᕈᑎᖃᖅᑐᒥ ᐃᓕᓐᓂᐊᕐᓂᐅᔪᖅ, 12-ᖑᔪᓂ ᐃᓕᓐᓂᐊᖅᑎᓂᑦ ᐱᔭᕇᖅᓯᓚᐅᖅᑐᓄᑦ. 11-ᖑᔪᓂ ᐃᓚᐅᖃᑕᐅᔪᓂ ᐱᔭᕇᖅᓯᓚᐅᖅᐳᑦ ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᕈᑎᑦ ᐃᒡᓗᕐᔪᐊᓂ ᐋᖅᑭᐅᒪᑎᑦᑎᔨᐅᔪᒧᑦ ᐱᓕᕆᐊᖑᔪᒥ. ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᕐᓂᖅ ᐸᐃᑉᐹᖅᑖᕐᓂᕐᓄᑦ 10-ᓄᑦ ᐃᓕᑦᑎᔨᐅᔪᓅᓚᐅᖅᐳᑦ ᐱᖓᓱᒃᑲᓐᓃᑦ ᑎᑭᐅᑎᔪᓐᓇᓚᐅᖅᐳᑦ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᕐᓂᖅ ᐃᓱᓕᑦᑎᓂᕐᓄᑦ. 9-ᓂ ᐃᓕᓐᓂᐊᖅᑎᓂᑦ ᐱᓕᒻᒪᒃᓴᓚᐅᖅᐳᑦ ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᕈᑎᒧᐊᓚᐅᖅᐳᑦ ᐅᖅᓱᐊᓗᖕᒧᑦ ᐅᖅᑰᓴᐅᑎᒧᑦ ᐱᓕᕆᓂᐅᔪᒥ ᐱᓕᕆᔨᐅᔪᓄᑦ. 8 ᐱᔭᕇᖅᓯᓚᐅᖅᐳᑦ ᑎᑎᕋᕐᕕᖕᒥ ᐊᓪᓚᕝᕕᓕᕆᓂᕐᒧᑦ ᐸᐃᑉᐹᖅᑖᕐᓂᕐᒧᑦ ᐱᓕᕆᐊᖑᔪᒥ 8-ᑲᓐᓂᕐᓂ ᐃᓚᐅᖃᑕᐅᓪᓗᑎᒃ ᐱᒋᐊᕐᓂᐅᔪᒥ ᐅᔭᕋᖕᓂᐊᕐᓂᕐᒧᑦ ᐱᓕᒻᒪᒃᓴᕐᓂᐅᔪᒥ.
ᖃᔅᓯᒐᓚᖕᓂ ᐊᓯᖏᓐᓂ ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᕈᑎᓄᑦ ᐊᒻᒪ ᓯᕗᓂᐊᓂ-ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑭᒡᓕᐅᔪᓄᑦ ᐱᓕᕆᐊᖑᔪᓂ ᐊᑐᐃᓐᓇᐅᑎᑕᐅᓚᐅᖅᐳᑦ ᐊᕐᕌᒎᓚᐅᖅᑐᒥ ᑭᕙᓪᓕᕐᒥ ᐃᓕᓐᓂᐊᕐᕕᖓᓂ.
