ᑕᐃᒪ ᕼᐋᑭᕐᔪᐊᖅᑐᓂ ᑲᔪᓯᖏᓐᓇᖅᐸᑕ ᑕᐃᒪᓐᓇᐃᓕᐅᖅᓯᒪᓂᖏᑦ ᐅᑉᓗᒥᒧᑦ ᑎᑭᑦᖢᒍ, ᐊᒻᒪ ᑖᒃᑯᐊ Las Vegas Golden Knights ᐃᓚᐅᑎᑕᐅᓂᐊᕐᒪᑕ ᐱᓐᖑᐊᕐᔪᐊᖃᑕᐅᓂᕐᒧᑦ ᓯᕗᓪᓕᖅᐹᒥ ᐊᖏᒡᓕᒋᐊᑕᐅᓚᐅᖅᖢᑎᒃ ᐱᓐᖑᐊᖅᑎᖏᑦ, NHL−ᑯᓐᓂᒃ ᓇᖕᒥᓂᖃᖅᑐᑦ ᐊᒃᓱᕈᖅᑎᑦᓯᑐᐃᓐᓇᕆᐊᖃᖅᐳᑦ ᐊᐅᓚᑦᓯᔨᒥᖕᓂᒃ ᑕᐃᒪᓐᓇ ᐱᓐᖑᐊᕐᓂᐊᖅᑐᑦ ᑕᑯᒃᓴᐅᑎᑕᐅᓂᖅᓴᐅᖁᑉᓗᒋᑦ ᐸᕐᓇᒍᑎᖃᓚᐅᕐᒪᑕ ᑖᒃᑯᓂᖓᑦᓴᐃᓐᓇᖅ.
ᑖᒃᑯᐊ The Knights, ᖃᐅᔨᑎᑦᓯᕗᑦ NHL−ᑯᓐᓂ ᐱᓐᖑᐊᖅᑎᖏᑦ ᐱᕐᔪᐊᖑᒋᐊᖃᖏᒻᒪᑕ ᑲᔪᓯᑦᓯᐊᕐᓂᐊᕐᓗᑎᒃ.
ᑭᓯᐊᓂ, ᖃᓄᑎᒋ ᐱᓐᖑᐊᖃᑕᐅᑎᒋᓂᐊᕐᓂᖏᑦ ᖃᐅᔨᓂᐊᖅᐳᒍᑦ ᑭᓯᐊᓂ.
ᐅᑭᐅᓕ ᖁᓕᐅᓯᒪᓕᖅᑐᓂ, ᐱᓐᖑᐊᖅᑎᑦ ᑕᒪᒃᑯᐊ ᓲᕐᓗ Pittsburgh Penguinsᓂ ᐱᓐᖑᐊᖅᑎᑦ ᑕᒪᒃᑯᐊ Sidney Crosby, Evgeni Malkin ᐊᒻᒪ Phil Kessel, ᑖᒃᑯᐊᓗ Chicago Black Hawks ᐱᓐᖑᐊᖅᑎᖃᖅᖢᑎᒃ Jonathan Toews, Marian Hossa ᐊᒻᒪ Patrick Kane, ᐊᒻᒪᓗᒃᑕᐅᖅ ᑖᒃᑯᐊ Anaheim Ducks ᓯᕗᓕᖅᑎᑦᓯᐊᕙᖃᖅᖢᑎᒃ ᑖᒃᑯᓂᖓ ᒪᕐᕉᖕᓂᒃ Ryan Getzlaf ᐊᒻᒪ Corey Perry ᓵᓚᒃᓴᖃᑕᐅᓯᒪᑉᓗᑎᒃ ᐊᑎᖏᑦ ᑎᑎᕋᖅᑕᐅᓯᒪᑉᓗᑎᒃ ᓯᑲᓐᓕ ᑲᑉᒧᑦ.
ᑕᒪᒃᑯᐊ ᖄᖏᖅᑕᐅᓇᓱᐊᕐᓗᑎᒃ ᐊᒃᓱᕈᕆᐊᖃᕐᓂᐊᖅᐳᑦ, ᑭᓯᐊᓂ ᑖᒃᑯᐊ Golden Knights ᐃᓚᐅᓚᐅᐱᓪᓚᖕᓂᐊᖅᑐᒃᓴᐅᕗᑦ ᐊᑕᐅᓯᐊᕐᓗᑎᒃ ᒪᕐᕈᐃᖅᑕᕐᓗᑎᒡᓘᓐᓃᑦ ᐱᓐᖑᐊᖃᑕᐅᓗᑎᒃ, ᐃᓱᒪᒃᓴᖅᓯᐅᕈᑕᐅᓂᐊᖅᐳᕐᓗ ᐊᓯᖏᓐᓄᑦ ᑕᐱᕇᓄᑦ ᖃᓄᐃᓕᐅᕆᐊᖃᕐᓂᐊᕐᓂᕐᒧᑦ ᕼᐋᑭᕐᔪᐊᖅᑐᖃᓕᕐᒥᒃᐸᑦ ᑭᑐᓪᓗ ᐃᓚᐅᓂᐊᕐᓂᖏᓐᓄᑦ.
ᐊᒻᒪ, ᑕᒪᒃᑯᓄᖓ ᐃᓱᒪᔪᓄᑦ ᖃᐅᔨᒪᔭᐅᕐᔪᐊᖅᑐᖅᑕᖃᕆᐊᖃᕐᓂᖓᓄᑦ ᓴᓐᖏᔫᓂᐊᕐᓗᓂ NHL−ᑯᑦ ᐱᓐᖑᐊᕐᓂᖏᓐᓂ, ᐅᖃᕈᒪᕗᖓ ᑕᓐᓇ Alexander Ovechkin, Nicklas Backstrom ᐊᒻᒪ Washington Capitals ᐊᔪᖏᑦᑐᐊᓗᖕᓂᒃ ᐱᖃᖏᒃᑲᓗᐊᖅᖢᑎᒃ ᐊᔪᖏᖃᑕᐅᓯᒪᕗᑦ.
ᑖᒃᑯᐊ The Knights ᐱᓐᖑᐊᖅᑎᑖᖅᓯᒪᖕᒪᑕ ᐊᔪᖏᑦᑐᓂᒃ ᐊᔪᖏᓐᓂᖅᓴᓂᒡᓗ ᒎᓕᖃᑦᓯᐊᖅᖢᑎᒡᓗ ᓴᐳᔾᔨᔨᖃᑦᓯᐊᖅᖢᑎᒡᓗ.
ᐊᒻᒪ. ᖃᐅᔨᒪᒋᐊᖃᖅᐳᒍᑦ, ᐃᓚᒋᔭᐅᖃᑕᐅᔪᑦ ᓴᐳᔾᔨᓂᕐᒧᑦ, ᓯᕗᓕᖅᑎᑦ ᒪᕐᕉᒡᓘᓐᓃᑦ, ᓄᒃᑎᖅᑕᐅᓂᐊᖅᐳᑦ NHL ᑭᐴᑎᓕᖅᐸᑕ.
ᑕᐃᒪ, ᐊᐅᓚᑦᓯᔨᖓᑦ, George McPhee ᐱᓕᕆᑦᓯᐊᓚᐅᖅᐳᖅ ᑲᑎᑦᓯᓚᐅᕐᒪᑦ ᑖᒃᑯᓂᖓ Golden Knightsᓂᒃ.
ᑕᐃᒪᓘᓐᓃᑦ, McPhee ᐊᖓᔪᖄᑉ ᑐᖏᓕᕆᓚᐅᖅᐸᖓ ᑐᑭᒧᐊᒃᑎᑎᔨᐅᓪᓗᓂᓗ ᕼᐋᑭᕐᓂᕐᒧᑦ ᐊᐅᓚᑕᐅᔪᓂᒃ Vancouver Canucks ᑯᓐᓄᑦ ᐊᕕᒃᑐᖅᑕᐅᓯᒪᔪᒃᑯᑦ ᓵᓚᒃᓴᐅᑎᖃᓚᐅᖅᖢᑎᒃ 1994-ᒥ ᓯᑖᓐᓕ ᑲᑉ ᑭᖑᓪᓕᖅᐹᒥ ᐱᓐᖑᐊᖅᑕᐅᓕᖅᑎᓪᓗᒍ ᑭᓯᐊᓂ ᓵᓚᒋᔭᐅᓕᓚᐅᖅᖢᑎᒃ New York Rangersᑯᓐᓄᑦ.
ᑖᒃᑯᐊ Washington Capitals ᐱᓐᖑᐊᖃᑕᐅᓚᐅᖅᓯᒪᒋᕗᑦ ᐊᑕᐅᓯᐊᖅᖢᑎᒃ ᓯᑖᓐᓕ ᑲᑉᑖᕋᑐᓱᐊᖅᑎᓪᓗᒋᑦ 1997-ᒥ ᐊᐅᓚᑦᓯᔨᖃᖅᖢᑎᒃ McPhee−ᒥᒃ, 8-ᖏᖅᑕᖅᖢᑎᒃ 40 ᐅᖓᑖᓄᓪᓘᓐᓃᑦ ᓵᓚᒃᓴᖃᑕᐅᓯᒪᑉᓗᑎᒃ 7−ᑖᓚᐅᖅᖢᑎᒃ Southeast Division ᐱᓐᖑᐊᕐᔪᐊᖅᑎᓪᓗᒋᑦ McPhee ᐊᐅᓚᑦᓯᔨᐅᑉᓗᓂ.
McPhee ᐱᓐᖑᐊᖅᑎᑖᓚᐅᖅᓯᒪᑉᓗᓂ Alex Ovechkin ᑖᒃᑯᓄᖓ Capitalsᑯᓐᓄᑦ, ᑭᓯᐊᓂ ᑕᒪᒃᑯᐊ ᐊᔪᖏᑦᓯᐊᖅᑐᑦ Washingtonᑯᓐᓂ ᐊᕐᕌᒎᓯᒪᓕᖅᑐᓂ − Ovechkin, Jaromir Jagr, Sergei Gonchar, Peter Bondra, Michael Nylander, ᐊᓯᖏᓪᓗ – ᓵᓚᒃᓴᖅᑎᒍᓐᓇᓚᐅᖏᒻᒪᒋᑦ Capitalsᑯᑦ ᓯᑕᓐᓕ ᑲᑉᒥᒃ, ᓱᓕ ᐅᑉᓗᒥ ᓵᓚᒃᓴᕈᒪᓯᒪᒐᓗᐊᖅᑎᓪᓗᒋᑦ.
ᑕᐃᒪᖃᐃ McPhee ᖃᐅᔨᓯᒪᓕᖅᐸᖃᐃ ᐊᔪᖏᑦᓯᐊᖅᑐᐃᓐᓇᕐᓂᒃ ᐱᓐᖑᐊᖅᑎᑦᓯᒋᐊᖃᖏᓐᓂᕐᒥᓄᑦ ᑕᐃᑉᓱᒪᓂ ᐊᐅᓚᑦᓯᔨᐅᓚᐅᖅᓯᒪᑉᓗᓂᑎᑐᑦ Washingtonᑯᓐᓄᑦ ᐊᑐᖅᑕᐅᓚᐅᖅᑐᓂᒃ?
ᑕᐃᒪ McPhee ᐱᓐᖑᐊᕐᔪᐊᖅᑎᑦᓯᓂᐊᕈᓂ Knightsᑯᓐᓂᒃ ᓯᑕᓐᓕ ᑲᑉᑯᓐᓂ, ᑕᓐᓇ , Marc-Andre Fleury ᐊᒃᓱᕈᕆᐊᖅᐸᑦ, ᓂᐱᖃᖅᐸᓪᓗ, ᐊᒥᓱᑦ NHL−ᑯᓐᓂ ᐱᓐᖑᐊᕐᔪᐊᖅᑎᑦ ᖁᔭᓐᓇᒦᑐᐃᓐᓇᕆᐊᖃᖅᐳᑦ ᐊᑎᓕᐅᓚᐅᕐᒪᑕ ᐊᑯᓂ ᐱᓐᖑᐊᖃᑕᐅᓂᐊᖅᖢᑎᒃ ᒫᓐᓇ ᐱᓐᖑᐊᕐᕕᒋᔭᒥᖕᓄᑦ.
ᐊᓯᖏᑦ, ᑕᒪᒃᑯᐊ New York Islander ᑯᓐᓂ John Tavares, ᐃᓐᖏᑐᐃᓐᓇᕆᐊᖃᖅᐳᑦ ᑐᓗᕐᓂᕐᒧᑦ ᐃᓐᖏᐅᓯᒥᒃ ᑖᓐᓇ NHL−ᑯᓐᓄᑦ ᐊᐅᓚᑦᓯᔨ ᒥᒃᖠᒋᐊᖅᑎᑦᓯᓕᖅᐸᑦ ᑖᒃᑯᓂᖓ ᐃᖕᒥᒃᑰᕐᓂᖏᓐᓄᑦ.
ᑕᐃᒪᓐᓇ ᐊᓯᔾᔨᕈᑕᐅᑦᓯᐊᕈᓐᓇᖅᑐᒃᓴᐅᕗᖅ. ᑕᐃᒪᓐᓇ ᐃᒡᓚᕐᓇᕐᓂᐊᖅᖢᓂᓗ?
ᐊᒻᒪ ᑕᑯᓐᓇᖅᑕᐅᓂᐊᖅᑐᒃᓴᐅᑉᓗᓂ ᑐᕌᓐᑐ ᒥᐳᓖᕝᑯᑦ ᐊᑎᓕᐅᓚᐅᕐᓂᕐᒥᖕᓂᒃ ᐱᓐᖑᐊᖅᑎᒥᒃ Connor McDavid ᐅᑭᐅᓄᑦ 8−ᓄᑦ ᐊᑭᓕᖅᑕᐅᓂᐊᖅᖢᓂ $100-ᒥᓕᔭᓐᑖᓚᓂᒃ, ᐊᒻᒪ ᑕᒪᒃᑯᐊ ᐱᓐᖑᐊᖅᑎᖏᑦ ᓲᕐᓗ William Nylander, Mitch Marner ᐊᒻᒪ Auston Matthews ᐅᖃᕋᔭᖅᖢᑎᒃ ᐋᒃᑲ, ᐱᓐᖑᐊᖅᑎᑦ Montreal Canadiensᑯᑦ ᐃᖢᐊᖏᔾᔪᑎᖃᕐᓂᐊᕐᒪᑕ ᑳᓐᑐᕌᒃᑕᐅᓯᒪᓂᖏᓐᓄᑦ ᒎᓕ Carey Price ᐅᑭᐅᓄᑦ 8−ᓄᑦ ᐊᕐᕌᒍᑕᒫᑦ ᐊᑭᓕᖅᑐᖅᑕᐅᓂᐊᖅᖢᓂ $10.5 ᒥᓕᔭᓐᑖᓚᓂᒃ ᐊᑯᓂ ᖃᓄᐃᓕᐅᓚᐅᖅᓯᒪᖏᑦᖢᓂ ᓱᓕ.
ᖁᕕᐊᓇᓚᐅᖅᖢᓂᓗ ᑕᐅᑐᒃᖢᒋᑦ ᐊᒥᓱᖑᕆᐊᖅᑕᐅᓂᖏᑦ Golden Knights ᓵᓚᒃᓴᖃᑦᑕᓕᕐᒪᑕ, ᐃᓚᐅᓂᐊᖅᑐᒃᓴᐅᑉᓗᑎᒡᓗ ᓵᓚᒃᓴᐅᑎᖃᕐᓂᕐᒧᑦ ᓯᑕᓐᓕ ᑲᑉᓕᖅᐸᑕ.
ᐃᓱᒪᓇᓚᐅᖏᑉᐳᑦ ᑕᒪᓐᓇ?