Skip to content

'ᒪᑐᐊᑦ ᓱᒃᑲᐃᒃᑎᑦᑎᒋᐊᑐᐃᓐᓇᕆᐊᖃᖅᐳᑦ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ–19–ᒥ,' ᐅᖃᖅᐳᖅ ᓄᓇᕘᑉ ᖁᑦᑎᓛᖓᓂ ᓘᒃᑖᖅ

ᐊᑯᓂᐅᔪᒃᑯᑦ, ᑐᓴᒐᒃᓴᒃᑲᓐᓂᕐᓂ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ–19–ᒥ ᓴᖅᑭᑉᐸᓪᓕᐊᓂᐊᖅᐳᑦ. ᖄᖏᖅᓯᐸᓗᓕᖅᑐᓂ ᐱᓇᓱᐊᕈᓯᕐᓂ ᒪᕐᕉᖕᓂ, ᓄᓇᕘᑉ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᖓ ᐅᖃᓚᐅᖅᐳᖅ ᒪᑐᐊᑦ ᐊᑑᑎᖃᑐᐃᓐᓇᕐᓂᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔨᐅᔪᓄᑦ ᐊᒻᒪ ᐃᓄᖕᓄᑦ, ᖁᐃᖅᓱᖅᐸᒃᑐᓄᑦ. ᐊᐃᑉᐹᓂ ᑐᓴᒐᒃᓴᓕᐊᖑᔪᒥ, ᓘᒃᑖᖅ ᒪᐃᑯᓪ ᐹᑐᓴᓐ ᑕᐅᑐᙳᐊᖅᑎᑦᑎᓚᐅᖅᐳᖅ ᐊᑐᖅᑕᐅᓂᖓᓄᑦ ᒪᑐᐊᓕᑦ ᑐᙵᕕᖃᖅᑐᒥ ᓄᑖᖑᔪᓂ ᑕᑯᒃᓴᐅᑎᑕᐅᓂᐅᔪᓂ.

ᓄᑖᖑᔪᖅ ᐊᑐᖁᔭᐅᓇᔭᖅᑐᒥ ᐊᑐᕐᓂᕐᒧᑦ ᖃᓪᓗᓈᖅᑕᒥ ᒪᑐᐊᓂᑦ ᖃᓄᐃᓐᓂᐅᔪᓂ ᓄᕙᒡᔪᐊᕐᓇᖅ–19–ᒥ ᐱᑕᖃᕐᓂᖓᓂ ᐊᒻᒪ ᐅᖓᓯᒌᒋᐊᖃᕐᓇᐅᔪᒥ ᐊᒻᒪ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᓂ ᐊᔪᕐᓇᕋᔭᕐᓂᖓᓂ ᑕᐃᒪᐃᑦᑕᕆᐊᒃᓴᖅ.

ᐃᖃᓗᖕᓂᕐᒥᐅᑕᖅ ᒪᐃᒃ ᒦᓴ ᐊᓕᔭᖅ ᐊᑐᖅᐳᖅ ᒪᑐᐊᕐᒥ ᐱᔾᔪᑎᖃᖅᑐᒧᑦ ᓄᕙᒡᔪᐊᕐᓇᖅ–19–ᒥ ᐃᓱᒫᓘᑕᐅᔪᓄᑦ. ᐊᑐᕐᓗᓂ ᖃᓪᓗᓈᖅᑕᒥ ᒪᑐᐊᕐᒥ ᓴᐳᔾᔨᓯᒪᓂᖃᙱᓚᖅ ᐃᓄᖕᒥ ᐱᓂᖓᓂ ᓄᕙᒡᔪᐊᕐᓇᖅ–19–ᒥ, ᑭᓯᐊᓂ ᓱᒃᑲᐃᒡᓕᒋᐊᖅᑎᑦᑎᑐᐃᓐᓇᕆᐊᖃᖅᐳᖅ ᐊᐃᑦᑐᐃᓂᖓᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓂᑦ, ᐅᖃᖅᐳᖅ ᓄᓇᕗᒻᒥ ᖁᑦᑎᓛᖓᓂ ᓘᒃᑖᖑᔪᖅ.

ᑭᓯᐊᓂ, ᐊᑐᕐᓂᕐᒥ ᒪᑐᐊᕐᒥᑦ ᓴᐳᔾᔨᓯᒪᓲᖑᙱᓚᖅ ᐃᓄᖕᒥ ᐱᓂᖓᓂ ᓄᕙᒡᔪᐊᕐᓇᖅ–19–ᒥ, ᓇᓗᓇᐃᖅᓯᓚᐅᖅᐳᖅ ᐹᑐᓴᓐ.
"ᒪᑐᐊᕐᒥ ᐊᑐᕈᒪ, ᐅᕙᓐᓂ ᓴᐳᔾᔨᓯᒪᓲᖑᙱᓚᖅ ᐱᓂᓐᓂ ᐃᓄᖕᓂ ᖃᓂᒋᔭᓐᓂᑦ. ᐱᑎᑦᑎᖔᓲᖑᕗᖅ ᐊᐃᑦᑐᐃᑦᑕᐃᓕᓂᕐᒧᑦ ᓄᕙᒡᔪᐊᕐᓇᖅ–19–ᒥ ᑕᐃᒪᐃᑦᑐᖃᕐᓂᕈᒪ," ᐅᖃᓚᐅᖅᐳᖅ ᓘᒃᑖᖅ.

"ᒪᑐᐊᕐᓂᑦ ᓴᖅᑭᑎᑦᑎᖁᙱᓚᕗᑦ ᓱᓕᙱᑦᑐᒥ ᐊᒃᑐᖅᑕᐅᑦᑕᐃᓕᒪᓇᓱᒋᓗᑕ," ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐃᓄᐃᑦ ᐳᐃᒍᓪᓗᐊᙱᓚᑦ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᒥ ᐊᒻᒪ ᐊᒡᒐᒥᓂᑦ ᐅᐊᓴᖃᑦᑕᕐᓂᕐᒧᑦ.

ᐊᓯᐊᒍᑦ ᐅᖃᕐᓗᓂ, ᖃᓪᓗᓈᖅᑕᒥ ᒪᑐᐊᖅ ᐊᑐᖅᑕᐅᓪᓗᐊᖅᐳᖅ ᐃᓚᒋᔭᐅᓗᓂ ᐊᓯᖏᓐᓄᑦ ᐅᔾᔨᖅᓱᑦᑎᐊᕐᓂᐅᔪᓄᑦ ᓲᕐᓗ ᐊᒡᒐᒥᓂᑦ ᐅᐊᓴᖃᑦᑕᕐᓂᕐᒧᑦ ᐊᒻᒪ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᒥ, ᐃᓇᖏᕈᑕᐅᙱᓪᓗᓂ ᑖᒃᑯᓄᖓ.

"ᐱᐅᓂᖅᐹᖓᓂ, ᒪᑐᐊᑦ ᐊᑕᐅᓯᐅᓪᓗᓂ ᐃᓚᒋᔭᐅᕗᖅ ᖃᔅᓯᒐᓚᖕᓂ ᐃᓄᐃᑦ ᐱᓕᕆᓪᓗᐊᖅᑕᖏᓐᓂ ᓱᒃᑲᐃᒃᑎᒋᐊᖅᓯᓂᕐᒧᑦ ᐅᕝᕙᓘᓐᓃᑦ ᓄᖅᑲᖅᑎᑦᑎᓂᕐᒧᑦ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ–19–ᒥ," ᐅᓂᒃᑳᓚᐅᖅᐳᖅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᖓ.

ᒫᓐᓇᐅᔪᒥ "ᓴᙱᒃᑎᑉᐸᓪᓕᐊᔪᒥ ᑕᑯᒃᓴᐅᓂᖃᕐᓂᐅᔪᒥ" ᐃᓚᖏᑦ ᐃᓄᐃᑦ ᐊᐃᑦᑐᐃᕙᓪᓕᐊᓂᖏᓐᓂ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᓂ ᓴᖅᑭᑦᑐᖃᓚᐅᖅᑳᕋᓂ ᐋᓐᓂᐊᕈᑕᐅᖃᑦᑕᖅᑐᓄᑦ, ᐅᖃᓚᐅᖅᐳᖅ ᐹᑐᓴᓐ. ᐅᑯᐊ ᐃᓄᐃᑦ ᐅᖃᐅᓯᐅᕙᒃᐳᑦ ᓯᕗᓂᐊᓂ ᐋᓐᓂᐊᕈᑕᐅᖃᑦᑕᖅᑐᓄᑦ.

ᐃᓄᖕᒥ ᐱᖃᕐᓂᕋᖅᑕᐅᒃᐸᑦ ᓄᕙᒡᔪᐊᕐᓇᖅ–19–ᒥ, ᐅᐸᒃᓯᒪᓚᐅᖅᑕᖏᓐᓂ ᖃᐅᔨᓇᓱᐊᕐᓂᖓᓂ ᐱᔾᔪᑕᐅᔪᓄᑦ, ᐊᒥᓱᓂ ᐱᔪᓐᓇᕐᓂᖃᕐᓂᐅᔪᑦ ᑭᖑᒻᒧᑦ ᖃᐅᔨᓇᓱᐊᓲᖑᕗᑦ ᐃᑲᕐᕋᓄᒃ 48–ᓄᑦ ᐃᓄᒃ ᓯᕗᓪᓕᕐᒥ ᑕᑯᒃᓴᐅᓂᖃᓕᕈᓂ ᐋᓐᓂᐊᕈᑕᐅᖃᑦᑕᖅᑐᓄᑦ.

"ᑕᐃᒫᒃ ᐱᕙᓪᓕᐊᑎᑦᑎᓕᕈᕕᑦ ᐋᓐᓂᐊᕈᑕᐅᖃᑦᑕᖅᑐᓄᑦ ᕿᑎᖅᑰᒥ 10-ᖓᓂ ᐅᑎᕋᔭᖅᐳᒍᑦ ᐊᐃᑉᐹᓄᑦ 8–ᖓᓂ ᐊᒻᒪ ᐱᒋᐊᓕᕐᓗᑕ ᐅᐸᒃᓯᒪᓚᐅᖅᑕᖏᓐᓂ ᖃᐅᔨᓇᓱᐊᕐᓂᖓᓂ ᑕᐃᑲᙵᓂ," ᐅᓂᒃᑳᓚᐅᖅᐳᖅ ᐹᑐᓴᓐ.

ᐃᓄᐃᑦ ᓴᖅᑭᔮᕐᕕᐅᔪᕕᓂᕐᓄᑦ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ ᐊᒻᒪ ᐱᓂᕋᖅᑕᐅᓗᑎᒃ ᑭᓯᐊᓂ ᐋᓐᓂᐊᕈᑕᐅᖃᑦᑕᖅᑐᓄᑦ ᓴᖅᑭᑦᑐᖃᓚᐅᕐᓇᓂ ᑕᐃᔭᐅᕗᑦ ᐋᓐᓂᐊᕈᑕᐅᖃᑦᑕᖅᑐᓂ ᑕᑯᒃᓴᐅᓂᖃᙱᑦᑐᒥ.

ᒫᓐᓇᐅᔪᒥ, ᓇᓕᐊᑐᐃᓐᓇᓂ ᐋᓐᓂᐊᕈᑕᐅᖃᑦᑕᖅᑐᓂ ᑕᑯᒃᓴᐅᓂᖃᙱᑦᑐᒥ ᐃᓄᐃᑦ ᐊᐃᑦᑐᐃᓲᖑᕗᑦ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ "ᓇᓗᓇᕐᓂᖅᓴᐅᓂᖓᓂ," ᐅᖃᓚᐅᖅᐳᖅ ᐹᑐᓴᓐ.

ᐊᐱᖅᑯᑕᐅᔪᖅ ᓱᓕ ᐱᑕᖃᖅᐳᖅ ᖃᓄᑎᒋ ᓄᕙᒡᔪᐊᕐᓇᖅ–19–ᒥ ᐊᒥᓱᓄᑦ ᖃᓂᒻᒪᓐᓇᐅᔪᖅ ᐊᐅᓚᑕᐅᕗᖅ ᑕᐃᒃᑯᓄᖓ ᐊᔾᔨᒌᙱᑦᑐᓂ ᖃᓄᐃᑉᐸᓪᓕᐊᓂᐅᔪᓂ ᐊᐃᑦᑐᖅᑕᐅᓂᖓᓂ, ᐅᖃᓚᐅᖅᐳᖅ ᓄᓇᕗᒻᒥ ᖁᑦᑎᓛᖓᓂ ᓘᒃᑖᖓ.

"ᑕᐅᑐᒃᑕᑐᐊᖃᑲᐃᓐᓇᑐᐃᓐᓇᕈᑦᑕ ᐋᓐᓂᐊᕈᑕᐅᖃᑦᑕᖅᑐᓂ ᑕᑯᒃᓴᐅᓂᖃᖅᑐᒥ ᐊᐃᑦᑐᐃᓂᐅᔪᒥ, ᑲᒪᒋᔭᖃᕋᔭᖅᑐᒃᓴᐅᕗᒍᑦ ᓴᖅᑭᕐᔪᐊᕐᓂᐅᔪᒥ ᑭᓯᐊᓂ ᐊᑯᓂᐅᒃᑲᓐᓂᕋᔭᖅᑐᒃᓴᐅᕗᖅ. ᑲᒪᒋᔭᖃᕈᑦᑕ ᓯᕗᓂᐊᓂ ᐋᓐᓂᐊᕈᑕᐅᖃᑦᑕᖅᑐᓄᑦ ᐊᒻᒪ ᐋᓐᓂᐊᕈᑕᐅᖃᑦᑕᖅᑐᓂ ᑕᑯᒃᓴᐅᓂᖃᖅᑐᒥ, ᐱᕕᒃᓴᖃᑦᑎᐊᕐᓂᖅᓴᐅᓇᔭᖅᐳᒍᑦ ᓄᖅᑲᖅᑎᑦᑎᓂᕐᒥ ᖁᕝᕙᖅᐸᓪᓕᐊᓂᐅᔪᒥ ᕿᓚᒻᒥᐅᓂᖅᓴᒥ," ᐅᖃᓚᐅᖅᐳᖅ ᐹᑐᓴᓐ.

ᒫᓐᓇᐅᔪᒥ ᓄᓇᕗᒻᒧᑦ ᓇᐃᓴᐃᓂᐅᔪᒥ ᓄᕙᒡᔪᐊᕐᓇᖅ–19–ᒧᑦ ᖃᓄᐃᓐᓂᐅᔪᓂ ᓱᓕ ᐱᑕᖃᙱᓚᖅ.





Pop-up banner image