Skip to content

NDP ᐱᕕᒃᓴᖃᖅᐳᑦ ᐊᓯᔾᔩᓂᕐᒧᑦ, ᐊᑏ ᐊᑐᓚᐅᕈᒃ

ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ

NDP–ᑯᑦ ᐅᓗᕆᐊᓇᖅᑐᒦᑉᐳᑦ ᐊᑕᐅᓯᕐᒥ-ᑲᒪᓇᖅᑐᓕᕆᓂᕐᒥ-ᑲᑎᒪᕕᒡᔪᐊᕐᓂᐅᔪᒥ ᐅᑭᐅᖅᑕᖅᑐᒥ, ᒫᓐᓇᓕᓴᒥ ᐳᓚᕋᕐᓂᐅᓚᐅᖅᑐᒥ ᓯᕗᓕᖅᑎᖓᓐᓂ ᔮᒡᒦᑦ ᓯᖕᒧᑦ ᐃᓕᓐᓂᐊᕐᓂᐅᓂᐊᕈᓂ.

ᓯᖕ ᐳᓚᕋᓚᐅᖅᑎᓪᓗᒍ ᐃᖃᓗᖕᓄᑦ ᑕᖅᑭᐅᑉ ᐱᒋᐊᕐᓂᐸᓗᐊᓂ ᐱᕕᒃᓴᖃᓚᐅᖅᐳᖅ ᐅᖃᓪᓚᖃᑎᖃᕐᓂᕐᒥ ᐃᓚᖏᓐᓄᑦ ᐊᒥᓱᓄᑦ ᐊᑲᐅᙱᓕᐅᕈᑕᐅᔪᓄᑦ ᓄᓇᕗᒻᒥᐅᑦ ᓵᙵᖃᑦᑕᖅᑕᖏᓐᓂ ᐊᒻᒪ ᖃᓄᐃᓕᐅᕐᓂᖃᕐᓂᐊᕐᒪᖔᑦ, ᑭᓯᐊᓂ ᓂᕈᐊᓚᐅᖅᐳᖅ ᐅᖃᐅᓯᖃᕐᓂᕐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᖏᔫᓪᓗᓂ ᐊᑲᐅᙱᓕᐅᕈᑕᐅᕗᖅ ᑕᒪᑦᑕ ᓵᙵᔭᑦᑎᓐᓂ ᐅᓪᓗᒥ, ᑭᓯᐊᓂ ᑕᐃᒃᑯᐊ ᐊᒃᑐᐃᓂᐅᔪᑦ ᐊᖏᒡᓕᒋᐊᒃᑲᓐᓂᐅᔭᖅᐳᑦ ᐅᑭᐅᖅᑕᖅᑐᒥ, ᑭᓯᐊᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓄᓇᕐᔪᐊᓕᒫᒥ ᐊᑲᐅᙱᓕᐅᕈᑕᐅᕗᖅ ᑲᓇᑕᐅᑉ ᐱᓕᕆᓇᓱᒋᐊᖃᖅᑕᖓᓐᓂ ᐃᓗᐃᑦᑑᓗᑎᒃ.

ᐊᑲᐅᙱᓕᐅᕈᑕᐅᕗᖅ ᓄᓇᕗᒻᒥ ᐃᒃᐱᒋᑦᑎᐊᖅᑕᖓᓂ, ᐃᓱᒪᒋᓇᒍ ᓱᓕᓂᐅᔪᒥ "ᐅᓄᙱᓐᓂᖅᓴᐅᔪᓂ 10–ᓂ ᐃᓄᖕᓂ ᓴᖅᑭᑦᑐᖃᓚᐅᕐᓂᖓᓂ" ᑐᓵᔭᖅᑐᖅᖢᑎᒃ ᐅᖃᓪᓚᒃᑎᓪᓗᒍ (ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ, ᑎᓯᐱᕆ 16–ᒥ ᑎᑎᕋᖅᑕᐅᓚᐅᖅᑐᒥ, NDP ᓯᕗᓕᖅᑎᖓ ᓯᖕ 'ᓴᙱᓂᖅᓴᒥ' ᒪᓕᒐᖃᖁᔨᕗᖅ ᐱᓕᕆᓂᕐᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ).

ᖃᓄᐃᙱᑦᑎᐊᖅᐳᖅ ᓯᖕ ᐃᖃᓗᖕᓄᐊᓚᐅᕐᓂᖓᓂ, ᑕᑯᔭᕆᐅᖅᖢᓂ ᓄᓇᖃᖅᑎᐅᔪᓂ ᐊᒻᒪ ᐊᔾᔨᓕᐅᖅᑕᐅᓂᕐᒧᑦ ᐱᕕᒃᓴᖃᑦᑎᐊᕐᓂᖓᓂ ᐊᑐᖅᖢᓂ ᐅᕕᓂᐅᔭᕐᒥ ᑕᖅᓴᓕᖕᒥ ᕿᓯᓕᖕᒥ ᖁᓕᑦᑕᐅᔭᕐᒥ, ᑭᓯᐊᓂ ᐅᓇ ᐱᕕᒃᓴᐅᔪᓐᓇᓚᐅᖅᐳᖅ ᓯᖕᒧᑦ ᑭᐅᓂᕐᒥ ᐊᑲᐅᙱᓕᐅᕈᑕᐅᔪᓂ ᐊᖏᔪᕐᔪᐊᒥ ᐊᔪᙱᓐᓂᖃᖅᐳᖅ ᐊᒃᑐᐃᓂᕐᒧᑦ.

ᐃᓱᒪᒋᔭᐅᓪᓗᓂ ᓵᓚᖃᓚᐅᖅᑐᓂ ᓕᐳᕈᒃᑯᓐᓂ ᐅᔾᔨᕈᓱᒃᑎᑦᑎᓂᖓᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᒥᒃᓵᓄᑦ. ᐱᔭᕆᐊᖃᖅᐳᑦ NDP–ᑯᑦ 24–ᖑᔪᓂ ᐃᒃᓯᕙᐅᑕᖏᓐᓂ – ᐃᓚᖃᖅᑐᒥ ᒫᓐᓇᓕᓴᒥ ᓂᕈᐊᖅᑕᐅᓚᐅᖅᑐᒥ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᓚᒋᔭᐅᔪᒥ ᒧᒥᓛᖅ ᖃᖅᑲᖅ – ᑎᒍᒥᐊᕐᓂᕐᒧᑦ ᐊᔪᙱᓐᓂᐅᔪᒥ, ᑭᖑᓪᓕᖅᐹᖑᔪᒥ ᐅᒃᑐᐱᕆᒥ ᒐᕙᒪᑐᖃᒃᑯᑦ ᓂᕈᐊᕐᓂᕆᓚᐅᖅᑕᖓᓂ ᓴᖅᑭᑎᑦᑎᓚᐅᖅᐳᖅ ᐃᒃᓯᕙᐅᑕᑭᓐᓂᖅᓴᐅᓪᓗᑎᒃ ᒐᕙᒪᐅᔪᓄᑦ.

ᑭᓯᐊᓂ ᖃᓄᐃᒻᒪᑦ ᓄᖅᑲᑐᐃᓐᓇᕐᓂᕐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᖃᓄᐃᓕᐅᕐᓂᐅᔪᒧᑦ? ᓄᓇᕗᒻᒥᐅᑦ ᐱᔭᕆᐊᖃᓛᑦᑎᐊᖓᓂ ᐊᓯᓕᒫᖏᓐᓄᑦ, ᒫᓐᓇᐅᔪᒥ ᖃᓄᐃᓕᐅᕐᓂᐅᔪᒥ ᐃᒡᓗᒃᓴᖃᕐᓂᕐᒧᑦ, ᓂᕿᒃᓴᖃᑦᑎᐊᕐᓂᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ ᐊᒻᒪ ᓇᓕᐊᑐᐃᓐᓇᓂ ᖃᔅᓯᒐᓚᖕᓂ ᐊᑲᐅᙱᓕᐅᕈᑕᐅᔪᓂ ᐊᒃᑐᐃᒐᔪᒃᑐᓂ ᓄᓇᕗᒻᒥᐅᓂ ᐱᓗᐊᕐᓂᖅᓴᐅᔪᒥ ᐊᓯᖏᓐᓂ ᑲᓇᑕᒥᐅᑕᐅᔪᓄᑦ.

ᐃᒻᒥᓂᒃ ᐊᒻᒪ ᑲᑎᒪᔨᐅᖃᑎᖏᓐᓂ ᐋᖅᑭᑦᑎᐊᖅᓯᒪᕐᔪᐊᖅᐳᑦ ᑎᒍᒥᐊᕐᓂᕐᒧᑦ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ ᔭᔅᑎᓐ ᑐᕉᑑᑉ ᐃᓯᒐᖏᓐᓂ ᐃᑭᑦᑐᒧᑦ ᑖᒃᑯᐊ NDP-ᑯᑦ ᑎᒍᒥᐊᕐᒪᑕ ᓇᓕᒧᑎᑦᑎᓂᕐᒥ ᐊᔪᙱᓐᓂᐅᔪᒥ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓐᓂ.

ᑕᐅᑐᒃᑕᑐᐊᖃᑲᐃᓐᓇᕈᓂ ᐅᑯᓂᖓ ᐱᔭᕆᐊᖃᓪᓚᕆᒃᑐᓂ ᓄᓇᕗᒻᒥᐅᓄaᑦ, ᓇᓗᓇᐃᖅᓯᓂᖃᓚᐅᙱᓚᖅ ᐱᕕᒃᓴᖃᕐᓂᐅᔪᒥ ᐅᖃᐅᓯᖃᕐᓂᕐᒧᑦ ᐳᓚᕋᖅᑎᓪᓗᒍ ᓄᓇᕘᑉ ᐊᖓᔪᖅᑳᖃᕐᕕᖓᓂ.

ᓯᖕ ᐅᖃᓚᐅᖅᐳᖅ ᖃᓄᖅ ᐊᖏᖅᑕᐅᑎᓐᓇᓱᐊᖅᑕᖓᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᒪᓕᒐᒃᓴᖅ ᐋᖅᑭᒃᓱᐃᓇᔭᕐᓂᖓᓂ "ᐋᖅᑭᒋᐊᖅᑕᐅᔪᒧᑦ ᑮᓇᐅᔾᔭᒃᓴᓂᐅᔪᒧᑦ" ᑐᓂᓯᓂᕐᒥ ᐃᖅᑲᓇᐃᔮᒃᓴᑦᑎᐊᕙᖕᓂ ᐊᒻᒪ ᒥᒃᖠᒋᐊᖅᑎᑦᑎᓂᕐᒧᑦ ᐊᑭᖓᓂ ᐆᒪᓇᓱᐊᕐᓂᕐᒧᑦ ᓴᖅᑭᑎᑕᐅᓂᖓᓂ ᐆᒻᒪᖅᑯᑎᓄᑦ–ᐊᑐᑦᑎᐊᕐᓂᖅᓴᐅᔪᓂ ᐊᖏᕐᕋᓂᑦ.

ᐅᓇ ᐱᐅᕗᖅ, ᑭᓯᐊᓂ ᐱᓕᕆᕐᔪᐊᒃᑲᓐᓂᕆᐊᖃᖅᐳᑦ ᐅᖃᐅᓯᐅᓂᕐᒥ ᐃᓕᓐᓂᐊᕐᓂᕐᒥ ᐊᒻᒪ ᐱᓕᒻᒪᒃᓴᕐᓂᕐᒧᑦ ᐸᕐᓇᐃᓂᕐᒧᑦ ᓴᓇᔨᓂᑦ ᐆᒧᖓ ᐱᑕᖃᑐᐃᓐᓇᕆᐊᓕᖕᒥ ᓯᕗᓂᒃᓴᒧᑦ, ᐅᖃᐅᓯᖃᙱᓪᓗᓂ ᐸᖕᒥᐅᓗᐊᕐᓂᐅᔪᓄᑦ, ᐊᑮᑦᑐᖃᕐᔪᐊᕐᓂᐅᔪᓄᑦ, ᕿᕐᓂᖅᑕᒥ ᐅᖁᖕᓂ ᐊᒻᒪ ᑕᒪᐃᑎᒍᑦ ᐱᑕᖃᙱᓗᐊᕐᓂᖓᓂ ᐃᒡᓗᑦᑎᐊᕙᐅᔪᓂ. ᖃᓄᕐᓕ ᐊᖏᖅᑎᑦᑎᓇᓱᐊᖅᐸ ᓴᓇᓂᕐᒧᑦ "ᐆᒻᒪᖅᑯᑎᓂ ᐊᑐᑦᑎᐊᕐᓂᖅᓴᐅᔪᓂ" ᐊᖏᕐᕋᓂ ᐃᒡᓗᒃᓴᖃᙱᓗᐊᖅᑎᓪᓗᒍ ᒫᓐᓇᐅᔪᒥ?

ᐊᒻᒪᓗ ᖃᓄᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᒪᓕᒐᒃᓴᖓ ᐊᒃᑐᐃᓂᐊᖅᐸ ᐅᔭᕋᖕᓂᐊᕐᓂᕐᒧᑦ ᐱᓕᕆᓂᕐᔪᐊᖑᔪᒥ, ᐱᕈᖅᐸᓪᓕᐊᖏᓐᓇᖅᑐᒥ ᓄᓇᕗᒻᒥ ᐊᕐᕌᒍᒐᓴᓄᑦ ᐊᒻᒪ ᑐᓂᓯᓂᕐᒥ ᐱᕕᒃᓴᖃᕐᔪᐊᕐᓂᐅᔪᓂ ᓄᓇᕗᒻᒥᐅᓄᑦ?

ᓱᓕᓂᐅᔪᖅ ᐊᒥᓱᑦ ᓄᓇᕗᒻᒥᐅᑦ ᐊᑐᖅᐳᑦ ᐊᔪᖅᓴᕐᔪᐊᖅᑐᑎᑐᑦ ᓄᓇᓂᑦ ᖃᓄᐃᓐᓂᐅᔪᓄᑦ ᐃᓗᐊᓂ ᑲᓇᑕᐅᑉ ᑭᒡᓕᖏᓐᓂᑦ ᐱᐅᙱᕐᔪᐊᖅᐳᖅ. ᑐᖅᖢᓛᓪᓗᐊᖅᐳᖅ ᐃᒃᓯᕙᐅᑕᕆᔭᐅᔪᓄᑦ ᑲᓇᑕᐅᑉ ᒪᓕᒐᓕᐅᕐᕕᖓᓐᓄᑦ.

ᒫᓐᓇ ᐃᓄᐃᑦ ᑐᖁᕙᓪᓕᐊᕗᑦ ᐊᓂᖅᑎᕆᓂᕐᒧᑦ ᑐᖅᖢᖓᓂ ᐊᐃᑦᑐᐃᓐᓇᖅᑐᓂᑦ, ᐳᕙᒡᓗᖕᓂᕐᒥ ᐊᒻᒪ ᖁᐃᖅᓱᕐᔪᐊᕐᓇᖅᑐᒥ – ᐋᓐᓂᐊᕐᓂᐅᔪᓂ ᐱᑕᖃᒐᔪᙱᕕᒡᔪᐊᖅᑐᓂ ᐊᓯᓕᒫᖏᓐᓂ ᑲᓇᑕᒥ. ᐊᑐᕆᐊᖃᓲᖑᕗᑦ ᐃᒪᕐᒥ ᖃᓛᖅᑎᑕᐅᖁᔭᐅᓂᐅᔪᓂ, ᐃᒻᒥᓃᕐᓂᕐᒧᑦ ᑐᐊᕕᕐᓇᖅᑐᒥ ᐊᒻᒪ ᐅᑕᖅᑭᔪᓂ ᐱᓕᕆᐊᒃᓴᕈᓘᔮᓗᖕᓂ ᐊᓯᖏᓐᓂᑦ.

ᖃᖅᑲᖅ ᒫᓐᓇᓕᓴᒥ ᐅᖃᐅᓯᖃᓚᐅᖅᐳᖅ ᐊᒥᓱᓂ ᐅᑯᓇᓂ ᐊᑲᐅᙱᓕᐅᕈᑕᐅᔪᓂ ᐅᖃᓪᓚᒃᑎᓪᓗᒍ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓐᓂ ᐊᒻᒪ ᐊᐱᕆᓪᓗᓂ, "ᖃᖓ ᒐᕙᒪᒃᑯᑦ ᓇᖏᖅᓯᓂᐊᖅᐸᑦ," ᑭᓯᐊᓂ NDP–ᑯᑦ ᐃᒻᒥᖕᓂᒃ ᓇᖏᖅᓯᓂᐊᖅᐸᑦ ᐊᒻᒪ ᓇᓕᒧᓕᖅᑎᑦᑎᓗᑎᒃ ᐊᔪᙱᓐᓂᕆᔭᖏᓐᓂ ᐅᕙᓂ ᐃᒃᓯᕙᐅᑕᑭᓐᓂᖅᓴᐅᓪᓗᑎᒃ ᒐᕙᒪᐅᔪᓄᑦ ᐊᒻᒪ ᑭᐅᓗᑎᒃ ᐊᑯᓂᐅᔪᒥ ᐱᓕᕆᐊᖑᐊᓂᒃᓯᒪᙱᑦᑐᓂ ᐊᑲᐅᙱᓕᐅᕈᑕᐅᔪᓂ ᓄᓇᕗᒻᒥ?

ᑕᐃᒪᐃᒃᑯᓂ, ᓯᖕ ᓂᐱᖅᑯᖅᑐᓗᓂ ᐅᖃᓪᓚᓪᓗᐊᖅᐳᖅ ᐊᒻᒪ ᑐᑭᓯᓇᑦᑎᐊᕐᓗᓂ ᓄᓇᕗᒻᒥᐅᑦ ᓈᓚᑦᑎᐊᕐᓂᐊᕐᒪᑕ.