Peewee Canucks Hᐊᑭᖅᑎᐊᓛᑦ ᓵᓚᒃᓴᖅᑐᑦ ᕕᓂᐲᒃᒥ

ᑕᒪᕐᒥᒃ ᐱᖓᓱᑦ ᑭᕙᓪᓕᕐᒥᐅᑕᑦ ᓄᑲᖅᖡᑦ Canucks ᐱᙳᐊᖅᑎᖏᑦ ᐱᙳᐊᑦᑎᐊᖅᑐᐊᓘᓚᐅᖅᑐᑦ ᕕᓂᐲᒃᒥ Hᐊᑭᕕᒡᔪᐊᖅᑎᓪᓗᒋᑦ ᒫᑦᓯ 22-ᒥ 24-ᒧᑦ, ᑭᓯᐊᓂ ᐃᓚᖓ ᐱᙳᐊᖃᑎᒌᒃᑎᐅᔪᑦ ᓵᓚᒃᓴᕐᓂᖃᓚᐅᖅᑐᑦ: Peewee-ᖑᔪᑦ.

“ᐱᙳᐊᑐᐊᕌᖓᑕ ᐱᖃᑎᖏᑦ ᐱᙳᐊᖃᑎᒋᔭᖏᑦ ᓵᓚᐅᓗᐊᓕᕌᖓᑕ ᓄᖅᑲᖅᑎᑕᐅᑐᐃᓐᓇᖃᑦᑕᓚᐅᖅᑐᑦ Hᐊᑭᖅᑐᑦ ᑭᓯᐊᓂ ᐊᑕᐅᓯᖅ ᐱᙳᐊᕐᓂᕆᔭᖓ ᑲᔪᓰᓐᓇᓚᐅᖅᑐᖅ, ᐱᖓᔪᖓ, ᑭᓯᐊᓂ ᐊᓯᖏᑦ ᐱᙳᐊᕐᓂᕆᔭᖏᑦ 8-0-ᖑᖃᑦᑕᓚᐅᖅᑐᑦ,” ᑕᐃᒪᓐᓇ ᐅᖃᖅᖢᓂ ᒋᓕᓴᓐ ᐅᒃᐸHᐅᐊᖅ, ᒥᐊᓂᖅᓯᔨᒋᔭᐅᖃᑕᐅᔪᖅ.
“ᑭᖑᓪᓕᖅᐹᒃᑯᓪᓘᓐᓃᑦ ᐱᙳᐊᖃᑎᒋᒐᑉᑎᒍᑦ ᓵᓚᒃᓴᓗᐊᓕᕋᑉᑕ ᓄᖅᑲᖅᑎᑕᐅᑐᐃᓐᓇᓚᐅᖅᑐᒍᑦ.”
ᑭᕙᓪᓕᕐᒥ ᓄᑲᖅᖡᑦ Canucks ᒥᑭᓂᖅᓴᑦ ᐱᐊᓂᒃᐸᓪᓕᐊᓕᖅᑎᓪᓗᒋᑦ ᓵᓚᐅᓚᐅᖅᑐᑦ ᐊᒻᒪᓗ Bantam-ᖑᔪᑦ ᐱᙳᐊᖅᑏᑦ “ᐊᒃᓱᕈᕐᓇᖅᑐᒃᑯᑦ ᓵᓚᐅᓂᖃᓚᐅᖅᑐᑦ ᑭᖑᓪᓕᖅᐹᒃᑯᑦ ᐱᙳᐊᓕᖅᖢᑎᒃ,” ᑕᐃᒪᓐᓇ ᐅᖃᖅᖢᓂ.
ᐊᓯᖏᑦ ᐱᙳᐊᖅᑏᑦ ᒪᓂᑑᐸᒥᐅᑕᐅᓂᖅᓴᐅᓚᐅᖅᑐᑦ ᐊᒻᒪᓗ ᐃᖅᑭᓖᑦ ᓄᓇᙱᓐᓂᕐᒥᐅᑕᐅᑉᓗᑎᒃ ᕕᓂᐲᒃ ᖃᓂᒋᔭᖓᓂᒃ.
ᑭᕙᓪᓕᕐᒥ ᐱᙳᐊᖅᑏᑦ ᓂᕈᐊᖅᑕᐅᓚᐅᖅᑐᑦ ᑲᖏᖅᖠᓂᕐᒥᐅᑕᐅᔪᒧᑦ ᑕᐃᕕᑎ ᑲᓛᒃᒧᑦ, ᑕᐃᒪᓐᓇ ᐅᖃᖅᖢᓂ ᐅᒃᐸHᐅᐊᖅ.
“ᑕᐃᕕᑎ ᑲᓛᒃ ᐊᑐᓚᐅᖅᑐᖅ ᑲᖏᖅᖠᓂᕐᒥ Hᐊᑭᕕᒡᔪᐊᖅᑎᓪᓗᒋᑦ ᓇᓗᓇᐃᔭᐃᓂᕐᒧᑦ ᑭᒃᑯᑦ ᓂᕈᐊᖅᑕᐅᓂᐊᕐᒪᖔᑕ, ᑕᒪᕐᒥᒃ ᐱᙳᐊᖅᑏᑦ ᑕᐅᑐᖃᑦᑕᖅᖢᓂᒋᑦ ᖃᓄᖅ ᐱᙳᐊᔪᑎᒋᖕᒪᖔᑕ ᓂᕈᐊᖅᖠᖅᖢᓂ 15-ᓂᒃ ᐱᙳᐊᖅᑎᓂᒃ ᑕᒪᐅᙵᐅᓂᐊᖅᑐᓂᒃ Hᐊᑭᕕᒡᔪᐊᖅᑐᓄᑦ,” ᑕᐃᒪᓐᓇ ᐅᖃᖅᖢᓂ ᐅᒃᐸHᐅᐊᖅ.
ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᓇᓂᓯᔪᓐᓇᓚᐅᙱᑦᑐᑦ ᑲᓛᒃᒥᒃ ᑐᓴᒐᒃᓴᖅ ᓴᖅᑭᑎᑕᐅᓂᐊᓕᖅᑎᓪᓗᒍ ᑭᓯᐊᓂ ᖃᕆᑕᐅᔭᒃᑯᑦ ᑎᑎᕋᖅᓯᒪᔪᒃᑯᑦ ᑲᓛᒃ ᖁᔭᓐᓇᒦᕐᓂᕋᓚᐅᖅᑐᖅ ᐱᙳᐊᖅᑎᓂᒃ ᐃᑲᔪᖅᓯᒪᔪᓂᒃ ᑮᓇᐅᔭᑎᒍᑦ – ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, Hᐊᑭ ᓄᓇᕗᒃᑯᓐᓂᒃ, ᑲᖏᖅᖠᓂᕐᒥ Hᐊᒻᓚᒋᔭᐅᔪᒥᒃ, ᑳᒻ ᐃᐊ ᑎᖕᒥᓲᓕᕆᔨᒃᑯᓐᓂᒃ ᐊᒻᒪᓗ Eskimo Point Lumber Supply ᓂᐅᕕᕐᕕᖕᒥᒃ – ᐊᒻᒪᓗ ᑕᒪᓐᓇ ᐱᙳᐊᕐᓂᐅᕙᒃᑐᖅ ᐃᒪᓐᓇ ᑕᐃᑉᓗᓂᐅᒃ “ᖁᕕᐊᒋᔭᐅᑦᑎᐊᖅᓯᒪᓂᖓᓄᑦ” ᐊᐅᓚᑕᐅᓯᒪᔪᖅ.
“Hᐊᑭ ᐅᑭᐅᒃᑯᑐᐃᓐᓇᖅ ᐱᙳᐊᖅᑕᐅᔪᓐᓇᐃᓪᓕᖕᒪᑦ,” ᑕᐃᒪᓐᓇ ᑎᑎᕋᖅᖢᓂ. “ᐱᕈᖅᐸᓪᓕᐊᑎᑦᑕᕆᐊᓕᒃ ᐅᑭᐅᓗᒃᑖᒃᑯᑦ ᐅᑭᐅᑉ ᐃᓗᐊᓂ ᑕᖅᑭᓗᒃᑖᒃᑯᑦ. ᐊᔪᕈᓐᓃᖅᓴᖃᑦᑕᕐᓗᑎᒃ ᑭᓯᐊᓂ ᐊᐅᔭᓗᒃᑖᖅ ᐱᙳᐊᖅᑎᕗᑦ ᐊᖑᒻᒪᑎᔪᒪᒃᐸᑕ ᓄᓇᕐᔪᐊᕐᒥ Hᐊᑭᖅᑎᕐᔪᐊᓂᒃ.”

ᐊᔭᐅᖅᑐᐃᓚᐅᕐᒥᔪᖅ ᑮᓇᐅᔭᖅᑖᒃᑲᓐᓂᕆᐊᖃᕐᓂᖏᓐᓄᑦ ᐱᙳᐊᖅᑎᑯᓗᐃᑦ ᐃᑲᔪᖅᑐᖅᑕᐅᒃᑲᓐᓂᕈᓐᓇᖁᑉᓗᒋᑦ ᐊᒻᒪᓗ ᐃᓕᓐᓂᐊᒃᑲᓐᓂᕈᓐᓇᖁᑉᓗᒋᑦ. “ᑕᒪᓐᓇ Hᐊᑭᕐᓂᕐᒧᑐᐃᓐᓇᐅᙱᒻᒪᑦ,” ᑕᐃᒪᓐ ᐅᖃᖅᖢᓂ. “ᑕᒪᓐᓇ ᐃᓅᓯᕐᒧᑦ ᐊᓯᔾᔩᓯᒪᔪᓐᓇᕐᒪᑦ ᐱᕕᒃᓴᕆᔭᐅᑦᑎᐊᖅᑐᖅ.”
ᐅᒃᐸHᐅᐊᖅ ᐅᖃᖅᖢᓂ Peewee ᐱᙳᐊᖅᑎᖏᒡᒎᖅ ᖁᕕᐊᓱᒃᑐᒻᒪᕆᐊᓘᓚᐅᖅᑐᑦ ᓵᓚᒃᓴᕋᒥᒃ ᐊᒻᒪᓗ ᑕᐅᑐᒃᖢᒋᑦ ᑕᐃᑲᓃᑦᑕᕆᐊᖃᕐᓂᖏᑦ ᓇᓗᓇᔮᙱᓕᖅᖢᑎᒃ, ᐱᖓᔪᒋᔭᖓᓂᒃ ᐅᐸᒍᑎᓯᒪᓕᕐᒪᑕ.
ᐸᕐᓇᒃᓯᒪᓂᐊᖅᑐᑦ ᐅᑎᒃᑲᓐᓂᕈᓐᓇᖁᑉᓗᒋᑦ ᐊᕐᕌᒍ.
“ᑕᐃᒪᓐᓇ Hᐊᑭᕕᒡᔪᐊᖅᑐᑦ ᐱᐅᔪᒻᒪᕆᐊᓘᓲᑦ ᐊᒥᓱᑦ ᑕᐅᑐᒋᐊᖅᑐᖅᓯᒪᕙᒃᖢᑎᒃ, ᐃᑲᔪᖅᑐᐃᔭᖅᑐᖅᑐᑦ ᐊᓕᐊᓇᐃᑉᐸᒃᑐᑦ ᐊᒻᒪᓗ ᐃᖢᐊᙱᓕᐅᕈᑎᖃᙱᖦᖢᓂ,” ᑕᐃᒪᓐᓇ ᐅᖃᖅᖢᓂ ᐅᒃᐸHᐅᐊᖅ.” ᐊᐅᓪᓛᑦᑎᐊᖅᑐᐊᓘᓚᐅᖅᑐᖅ, ᑕᐃᒪᓐᓇ ᐅᖃᕈᓐᓇᖅᑐᖓ.”