1999–ᒥ 2004–ᒧᑦ ᑲᒥᓴᓇᐅᔪᖅ ᓄᓇᕗᒻᒥ ᐄᕙ ᐋᕆᐊᖅ ᐱᔨᑦᑎᕋᓚᐅᖅᐳᖅ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᓂᕐᒥ ᐊᒻᒪ ᐅᓪᓗᒥ ᐸᓂᖓ ᑳᓖᓐ ᐋᕆᐊᖅ ᑎᒍᒥᐊᖅᐳᖅ ᑕᐃᔅᓱᒥᖓ ᐃᓂᐅᔪᒥ. ᑕᒪᒃᑭᑦ ᑕᑯᕗᑦ ᐃᓄᒃᑎᑐᒻᒥ ᐊᓐᓂᕆᔭᐅᔭᕆᐊᖃᕐᓂᖓᓂ ᐊᒻᒪ ᓴᐳᔾᔭᐅᓯᒪᓂᖓᓂ.
ᓄᓇᕗᑖᕐᓂᕐᒥ ᐃᒻᒥᓄᑦ 1999–ᒥ ᑕᑯᕙᖓᑦ ᐊᖏᔪᒥ ᖃᓄᐃᓐᓂᐅᓂᖓᓂ ᐃᑲᔪᕐᓂᕐᒧᑦ ᐸᐸᑦᑏᓐᓇᕐᓂᕐᒧᑦ ᐃᓄᐃᑦ ᐅᖃᐅᓯᕐᒥᑦ.
"ᐱᒻᒪᕆᕐᔪᐊᖑᕗᖅ, ᐃᓕᖅᑯᓯᕗᑦ ᐊᒻᒪ ᐅᖃᐅᓯᓕᕆᓂᕐᒧᑦ, ᐊᒻᒪ ᖃᐅᔨᒪᕕᑦ ᖃᓄᐃᒻᒪᑦ? ᓄᓇᕗᑖᕐᓂᕐᒥ, ᓄᓇᕗᑖᓚᐅᖅᐳᑦ ᐱᔾᔪᑎᖃᖅᖢᓂ ᐃᓕᖅᑯᓯᑦᑎᓐᓂ ᐊᒻᒪᓗ ᐅᖃᐅᓯᑦᑎᓐᓄᑦ, ᑕᐃᒪᓐᓇ ᐆᒥᖓ ᐱᐅᕐᔪᐊᖅᑐᒥ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᖃᖅᐳᒍᑦ ᑕᐃᔭᐅᔪᒥ ᓄᓇᕗᒻᒥ, ᐃᓕᓴᖅᓯᓂᐅᕗᖅ ᑭᓇᐅᓂᑦᑎᓐᓂ," ᐅᖃᓚᐅᖅᐳᖅ ᐄᕙ.
ᐄᕙ ᐃᓚᐅᖃᑕᐅᓚᐅᖅᐳᖅ ᐋᖅᑭᒃᓱᐃᓂᐅᔪᒥ ᐃᓄᐃᑦ ᐅᖃᐅᓯᓕᕆᓂᕐᒧᑦ ᓴᐳᔾᔨᓯᒪᓂᕐᒧᑦ ᒪᓕᒐᕐᒥ ᐊᒻᒪᓗ ᐅᖃᐅᓯᕐᓄᑦ ᐃᓕᓴᕆᔭᐅᓯᒪᔪᓄᑦ ᒪᓕᒐᕐᓂ ᓄᓇᕗᒻᒥ ᐊᒻᒪᓗ ᐸᓂᖓ ᐃᖅᑲᐅᒪᕗᖅ ᐊᒃᓱᕈᖅᖢᓂ ᐱᓕᕆᓂᐅᓚᐅᖅᑐᒥ ᐱᓕᕆᓂᐅᔪᒧᑦ 1999–ᒥ.
ᒪᓕᒐᓕᐊᖑᔪᓄᑦ ᐱᔪᓐᓇᕐᓂᐅᔪᓂ ᐅᕗᖓ ᓴᐳᔾᔨᓯᒪᓂᕐᒧᑦ ᐃᓄᐃᑦ ᐃᓕᖅᑯᓯᖓᓐᓂ ᐊᒻᒪᓗ ᐅᖃᐅᓯᓕᕆᓂᕐᒧᑦ ᐊᑕᐅᓯᐅᓪᓗᓂ ᓴᙱᓂᐅᖃᑕᐅᕗᖅ ᐃᓄᖕᓄᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᖃᕐᓂᕐᒧᑦ.
"ᓄᓇᕗᑖᖅᑎᑕᐅᓚᐅᖅᐳᑦ ᓴᙱᓂᖃᕐᓂᐊᕐᒪᑦ ᐃᓄᐃᑦ ᒪᓕᒐᓕᐊᖏᓐᓂ, ᓴᙱᓂᖅᓴᒥ ᓂᐱᖃᕐᓂᕐᒧᑦ ᐊᑐᕐᓂᕐᒧᑦ ᐅᖃᐅᓯᑦᑎᓐᓂ," ᐃᓚᒋᐊᖅᓯᓚᐅᖅᐳᖅ ᑳᓖᓐ. "ᐅᐱᒍᓱᒃᐳᖓ ᐆᒥᖓ ᐊᑐᕐᓂᖃᕐᓂᐊᕐᓂᓐᓂ ᐊᒻᒪᓗ ᐅᖃᐅᓯᖃᕐᓂᕐᒧᑦ ᐊᓈᓇᒪ ᑎᑭᐅᑎᓯᒪᔪᓐᓇᖅᓯᒪᔭᖏᓐᓂ."
ᐱᓕᕆᓂᖅᑕᖃᕐᔪᐊᖅᓯᒪᑎᓪᓗᒍ ᒪᓕᒐᓕᐊᓕᕆᓂᕐᒧᑦ ᓴᐳᔾᔨᓯᒪᓂᕐᒧᑦ ᐃᓄᒃᑎᑐᒻᒥ, ᐱᓕᕆᐊᒃᓴᖃᕐᔪᐊᖅᐳᑦ ᓱᓕ ᐊᖏᕐᕋᐅᑉ ᐃᓗᐊᓂ.
ᐄᕙ ᐊᒻᒪ ᐃᓚᖏᑦ ᓅᓚᐅᖅᑎᓪᓗᒋᑦ ᐃᒃᐱᐊᕐᔪᖕᒥ ᐃᖃᓗᖕᓄᑦ ᐃᓕᓴᖅᓯᓚᐅᖅᐳᖅ ᖃᓪᓗᓈᑎᑐᑦ ᐃᒫᓪᓚᕆᒃ ᐅᖃᐅᓯᐅᓚᐅᖅᐳᖅ ᐊᑐᖅᑕᐅᒐᔪᒃᑐᒥ ᐊᖓᔪᖅᑳᖃᕐᕕᖕᒥ ᐃᓕᓐᓂᐊᕐᕕᐅᔪᓂ, ᑕᐃᒫᒃ ᐆᒃᑐᕋᖅᐸᓚᐅᖅᐳᖅ ᐃᓚᖏᓐᓂ ᐊᖏᕐᕋᖓᓂ, ᓴᓂᕐᕙᐃᕙᒃᖢᓂ ᐃᓄᒃᑎᑐᑦ ᐅᖃᓪᓚᖕᓂᕐᒥ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒥ ᐃᓚᖏᓐᓂ ᓯᕗᓪᓕᕐᒥ ᐅᖃᐅᓯᕆᔭᖓᓐᓂ.
"ᓴᓇᓚᐅᖅᐳᒍᑦ ᐆᒃᑐᕋᕐᓂᐅᔪᒥ ᐊᖏᕐᕋᒥ, ᐱᓇᓱᐊᕈᓯᐅᑉ ᓄᙳᐊᓂᑕᒫᒥ ᐅᖃᓪᓚᒋᐊᖃᓚᐅᖅᐳᒍᑦ ᓇᖕᒥᓂᖅ ᐅᖃᐅᓯᑦᑎᓐᓂ ᐃᒡᓗᑦᑎᓐᓂ, ᑕᒪᓐᓇ ᓴᙱᒃᑎᕐᔪᐊᖅᓯᓚᐅᖅᐳᖅ ᐅᖃᐅᓯᑦᑎᓐᓂ ᐱᓂᕐᒥ ᐊᒻᒪ ᐊᑐᕐᓂᕐᒥ. ᑕᐃᒪᐃᖁᔨᓇᔭᖅᐳᖓ ᐆᒃᑐᕋᐅᑕᐅᓂᖓᓂ ᐃᑲᔪᕐᓂᖃᕈᓐᓇᕋᔭᖅᑐᒥ ᐃᓚᖏᓐᓄᑦ ᐊᓯᖏᓐᓂ ᐃᓚᒌᖑᔪᓄᑦ."
ᐱᕈᖅᓴᔭᐅᑎᓪᓗᒍ, ᑳᓖᓐ "ᐱᕈᓚᐅᖅᐳᖅ ᖃᐅᔨᒪᓂᖓᓂ ᖃᓄᖅ ᐱᒻᒪᕆᐅᓂᖓᓂ ᐅᖃᐅᓯᖓᓂ, ᐊᒻᒪᓗ ᓴᙱᓂᖃᕐᓂᖓᓂ ᐊᖏᕐᕋᖓᓂ.
"ᕿᑐᕐᙵᖃᓕᖅᑎᓪᓗᖓ ᐅᔾᔨᕆᓚᐅᖅᐳᖓ ᖃᓄᖅ ᐱᒻᒪᕆᐅᓂᖓᓂ ᐊᒻᒪᓗ ᓇᓗᓇᐃᖅᓯᓂᕐᒧᑦ ᐊᓯᖏᓄᑦ ᓴᓂᓕᖏᓐᓂ, ᓲᕐᓗ ᐸᐃᕆᕝᕕᑦ (ᐊᒻᒪᓗ) ᐃᓕᓐᓂᐊᕐᕕᐅᔪᓄᑦ ᒪᓕᒃᐸᒃᑐᓂ ᐅᖃᐅᓯᓕᕆᓂᕐᒧᑦ ᒪᓕᒐᓕᐊᖑᔪᓄᑦ, ᐃᒪᓐᓇ ᐃᓄᐃᑦ ᐅᖃᐅᓯᓕᕆᓂᕐᒥ ᓯᕗᓪᓕᐅᔾᔭᐅᑎᑕᐅᓂᖓᓂ," ᐅᖃᓚᐅᖅᐳᖅ ᑳᓖᓐ.
ᒪᕐᕉᔫᒃ ᐊᒃᓱᕈᖅᖢᑎᒃ ᐱᓕᕆᓯᒪᑎᓪᓗᒋᑦ ᓴᙱᒃᑎᒋᐊᖅᓯᓂᕐᒥ ᐃᓄᐃᑦ ᐅᖃᐅᓯᖓᓐᓂ, ᒥᒃᖠᕙᓪᓕᐊᖏᓐᓇᕐᓂᖃᖅᐳᖅ ᐅᖃᖅᑎᓂᑦ ᖃᐅᔨᒪᔪᓂ ᐅᖃᐅᓯᕐᒥᓂᑦ
"ᓇᓂᓯᕗᖓ ᖃᔅᓯᒐᓚᖕᓂ ᐊᕐᕌᒍᓄᑦ, ᑕᑯᓯᒪᕗᒍᑦ ᐃᓄᒃᑐᑦ ᐅᖃᐅᓯᖓ ᓄᖑᑉᐸᓪᓕᐊᓂᖓᓂ, ᐊᐃᑦᑖᖑᒐᓗᐊᖅ ᑕᐃᒪᐃᓐᓂᖓᓂ ᐅᓪᓗᒥ ᖄᒃᑲᓐᓂᖃᕐᒪᑦ ᓄᖑᑉᐸᓪᓕᐊᓂᐅᔪᒥ ᐅᔾᔨᕆᓯᒪᔭᓐᓂ, ᐅᕙᓐᓄᑦ ᐱᒻᒪᕆᐅᕗᖅ ᐅᖃᐅᓯᕆᓂᕐᒧᑦ," ᐅᖃᓚᐅᖅᐳᖅ ᐄᕙ.
"ᐃᓄᒃ ᐃᓄᒃᑎᑐᑦ ᐅᖃᓲᖑᔪᒥ ᐱᔭᕇᒐᔪᒃᐳᑦ ᐅᖃᐅᓯᕐᒥᓂ, ᓲᕐᓗ ᐃᓱᐊᓂ ᐃᓄᒃᑎᑐᑦ ᐅᖃᐅᓯᕐᓂ. ᓲᕐᓗ, ᐃᖃᓗᒃ ᐃᖃᓘᕗᖅ, 'ᒃ–ᒥ' ᐃᓱᐊᓂ, ᑐᓴᕐᓂᖅᓴᐅᓲᖑᓕᖅᐳᑦ ᐅᓄᕐᓂᖅᓴᐅᔪᓂ ᐅᖃᖅᑐᒥ, 'ᐃᖃᓗ' ᐆᒥᖓ 'ᓗ–ᒥ' ᐊᒻᒪᓗ ᐊᑐᕐᓇᒍ 'ᒃ'."
ᐄᕙ ᐃᓚᒋᐊᖅᓯᕗᖅ ᒪᒃᑯᒃᑐᑦ ᖃᐅᔨᒪᙱᑕᒥᓂ ᐅᖃᐅᓯᖓᓐᓂ "ᑲᑉᐱᐊᓱᓪᓗᐊᙱᓐᓂᖓᓂ ᐊᐱᖅᑯᑎᓂ ᐊᐱᖅᓱᕐᓂᕐᒧᑦ ᐃᓄᖕᓄᑦ ᐅᒃᐱᕆᔪᓐᓇᖅᑕᖏᓐᓂ" ᐊᖓᔪᖅᑳᕆᒍᓂᒋᑦ, ᐊᑖᑕᑦᑎᐊᖏᑦ ᐊᓈᓇᑦᑎᐊᖏᑦ, ᐱᖃᓐᓇᕆᔭᖏᑦ ᓄᓇᓕᖕᓂ ᐅᕝᕙᓘᓐᓃᑦ ᑭᓇᑐᐃᓐᓇᒧᑦ ᐃᑲᔪᖅᓱᐃᓂᕐᒥ ᕿᓂᕐᕕᒋᔪᓐᓇᖅᑕᖏᓐᓂ.
ᐱᔪᓐᓇᕐᓂᕆᔭᖓᓂ ᒫᓐᓇᐅᔪᒥ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᓂᖓᓂ, ᑳᓖᓐ ᓇᓗᓇᐃᖅᓯᔪᒪᓚᐅᕆᕗᖅ ᐱᔪᓐᓇᕐᓂᕆᔭᐅᔪᓂ ᓄᓇᕗᒻᒥᐅᑦ ᐱᖃᕐᓂᖏᓐᓂ ᐃᓄᒃᑎᑐᑦ-ᐅᖃᐅᓯᓕᕆᓂᕐᒧᑦ ᐱᔨᑦᑎᕋᕐᓂᐅᔪᒥ ᓄᓇᕗᒻᒥ.
"ᑲᔪᖏᖅᓴᐃᔪᒪᕗᖓ ᓄᓇᕗᒻᒥᐅᓂ ᑲᑉᐱᐊᓱᖁᓇᒋᑦ ᐊᔭᐅᕆᓂᖏᓐᓂ ᐅᖃᐅᓯᕐᒧᑦ ᐱᔪᓐᓇᕐᓂᕆᔭᖏᓐᓂ," ᐅᖃᓚᐅᖅᐳᖅ.
"ᓄᓇᕗᒻᒥᐅᑦ ᐃᒃᐱᒍᓱᒃᑯᑎᒃ ᐅᖃᐅᓯᓕᕆᓂᕐᒧᑦ ᐱᔪᓐᓇᕐᓂᕆᔭᐅᔪᑦ ᑭᐅᔭᐅᓯᒪᙱᒃᑯᑎᒃ, ᖃᐅᔨᒋᐊᕈᓐᓇᖅᐳᑦ ᑎᑎᕋᕐᕕᑦᑎᓐᓄᑦ."
ᐊᓯᐊᓂ ᐊᑐᕐᓂᖃᐅᑎᒥᒃ ᑳᓖᓐ ᑎᑎᕋᕐᕕᖓᓂ ᓇᓗᓇᐃᖅᓯᓂᕐᒥ ᓇᖕᒥᓂᖃᖅᑎᐅᔪᓄᑦ ᐱᓕᕆᐊᖑᔪᓂ ᖃᐅᔨᒪᓂᖏᓐᓂ ᐊᑐᕐᓂᖃᐅᑎᖏᓐᓂ ᐊᒻᒪᓗ ᖃᓄᐃᓕᐅᕆᐊᖃᕐᓂᖏᓐᓂ ᓇᖕᒥᓂᖃᖅᑎᐅᔪᓄᑦ ᐱᓕᕆᓂᐅᔪᒥ ᐱᖃᕐᓂᖓᓂ ᓄᓇᕗᒻᒥ, ᐃᓚᖃᖅᑐᒥ ᑐᓂᓯᓂᕐᒥ "ᐱᔨᑦᑎᕋᕐᓂᐅᔪᒥ ᐃᓄᐃᑦ ᐅᖃᐅᓯᖓᓐᓂ (ᐊᒻᒪᓗ) ᓇᓗᓇᐃᒃᑯᑕᐅᔪᑦ ᐃᓄᐃᑦ ᐅᖃᐅᓯᖓᓐᓂ ᑎᑎᕋᖅᓯᒪᓗᑎᒃ."
ᐃᓚᒋᐊᖅᓯᓚᐅᖅᐳᖅ ᐃᑲᔪᖅᓱᐃᔪᓐᓇᕐᓂᖏᓐᓂ ᓇᖕᒥᓂᖃᖅᑎᐅᔪᓂ ᐱᓕᕆᓂᐅᔪᓂ ᓴᖅᑭᑎᑦᑎᓂᐅᔪᒥ ᐅᖃᐅᓯᓕᕆᓂᕐᒧᑦ ᐸᕐᓇᐅᑎᒥᒃ ᐊᒻᒪᓗ ᖃᓄᖅ ᒪᓕᑦᑎᐊᕐᓂᖅᓴᐅᔪᓐᓇᕐᓂᖏᓐᓂ ᐅᖃᐅᓯᓕᕆᓂᕐᒧᑦ ᒪᓕᒐᓕᕆᓂᐅᔪᒥ ᓄᓇᕗᒻᒥ.
"ᐱᓕᕆᔪᒪᕗᒍᑦ ᐱᓕᕆᐊᕆᔭᕆᐊᖃᖅᑕᑦᑎᓐᓂ," ᑳᓖᓐ ᐅᖃᓚᐅᖅᐳᖅ.
ᐅᖃᐅᓯᓕᕆᓂᕐᒧᑦ ᓴᐳᔾᔨᓯᒪᓂᐅᔪᑦ ᐱᑕᖃᖅᑎᓪᓗᒍ ᓄᓇᕗᒻᒥ, ᐱᒻᒪᕆᐅᒋᕗᖅ ᑖᒃᑯᓄᖓ ᐊᖓᔪᖅᑳᖑᔪᑦ ᐊᒻᒪ ᐃᓚᒌᑦ ᐃᓕᓐᓂᐊᖅᑎᑦᑎᓂᖏᓐᓂ ᕿᑐᕐᙵᒥᓂᒃ ᐊᖏᕐᕋᒥᑦᑕᐅᖅ.
"ᐱᒻᒪᕆᕐᔪᐊᖑᕗᖅ ᐱᓕᕆᐊᒃᓴᐅᔪᒥ ᐱᓕᕆᓂᕐᒥ ᐊᒻᒪ ᐊᑐᐃᓐᓇᕐᓗᑕ ᐅᖃᐅᓯᕐᒥᑦ," ᐅᖃᓚᐅᖅᐳᖅ ᐄᕙ.
"ᑭᒃᑯᓕᒫᑦ ᐊᑐᐃᓐᓇᖃᓪᓗᐊᖅᐳᑦ ᐃᓂᐅᔪᒥ ᐃᓕᓐᓂᐊᕐᕕᒋᔪᓐᓇᖅᑕᖏᓐᓂ ᐊᒻᒪᓗ ᐱᕈᖅᑎᑦᑎᓗᑎᒃ ᓯᕗᓪᓕᖅᐹᖓᓂ ᐅᖃᐅᓯᖓᓐᓂ."