ᔫᓐ ᐅᑲᓕᖅ ᑭᓕᖏᖕᐴᒡ ᐆᒻᒪᑎᓂᑦ ᐆᓇᖅᑎᑦᑏᓐᓇᓚᐅᖅᐳᑦ ᐱᓯᑦᑎᐊᕙᖏᓐᓄᑦ ᐊᒻᒪ ᑎᒥᓂᑦ ᐅᖅᑰᑎᑦᑎᓪᓗᓂ ᐱᐅᕐᔪᐊᖅᑐᓂ ᐊᒡᒐᒧᑦ ᓴᓇᓯᒪᔪᓂ ᖁᓕᑦᑕᐅᔭᓄᑦ.
ᐅᑯᐊ ᐃᓚᒋᔭᐅᖃᑕᐅᓚᐅᖅᐳᑦ ᐃᖅᑲᐅᒪᓂᐅᔪᓂ ᐅᖃᐅᓯᐅᓚᐅᖅᑐᓂ ᑭᓕᖏᖕᐴᒡ ᐃᓅᓯᖓᓐᓂ, ᐊᑯᓂᐅᓂᖃᓚᐅᖅᑐᒥ ᐊᕐᕌᒍᑦ 100 ᐅᖓᑖᓄᑦ, ᐅᐱᒋᔭᐅᓚᐅᖅᐳᖅ ᒪᓕᒃᑐᒥ ᐃᓅᔪᓐᓃᕐᓂᖓᓂ ᔭᓄᐊᕆ 8–ᒥ.
"ᑲᒪᓇᕐᔪᐊᖅᑐᖅ, ᑲᒪᓇᕐᔪᐊᓚᐅᖅᐳᖅ," ᐅᖃᓚᐅᖅᐳᖅ ᓚᔅᓕ ᑭᓕᖏᖕᐴᒡ, ᔫᓐ ᐃᕐᙳᑕᖓ. "ᒥᖅᓱᖅᐸᓚᐅᖅᐳᖅ. ᖁᓕᑦᑕᐅᔭᓂ ᒥᖅᓱᖅᐸᓚᐅᖅᐳᖅ. ᑭᓱᓕᒫᑦᑎᐊᓂ ᓴᓇᕙᓚᐅᖅᐳᖅ ᕿᑐᕐᙵᒥᓄᑦ. ᖃᐅᔨᒪᔭᐅᕐᔪᐊᓚᐅᖅᐳᖅ ᓯᒃᓯᐅᑉ ᐊᒥᖏᓐᓂ ᖁᓕᑦᑕᐅᔭᓕᐊᖏᓐᓄᑦ."
ᐃᐊᑦᓇ ᐃᓚᐃᔭᔅ, ᐱᕈᖅᓴᓚᐅᖅᑐᒥ ᖁᕐᓗᖅᑑᒥ, ᐃᖅᑲᐅᒪᒋᕗᖅ ᔫᓐ ᐱᔪᓐᓇᑦᑎᐊᕐᓂᖓᓂ ᓴᓇᓂᕐᒧᑦ ᓯᓚᓯᐅᑎᓄᑦ ᐊᓐᓄᕌᓂᒃ.
"ᐊᑕᐅᓯᐅᓪᓗᓂ ᓯᕗᓕᐅᖅᑎᐅᖃᑕᐅᓚᐅᖅᐳᖅ ᑕᖅᓯᖅᓱᖅᓯᒪᑦᑎᐊᖅᑐᓂ ᓴᓇᔨᐅᓂᖓᓂ," ᐃᓚᐃᔭᔅ ᐅᖃᓚᐅᖅᐳᖅ. "ᐱᓕᕆᓂᖃᕐᔪᐊᖅᐳᖅ ᑲᑎᖅᓱᐃᓂᕐᒧᑦ ᐊᒻᒪ ᐋᒃᑐᐃᓂᕐᒧᑦ ᑕᐃᒪᓐᓇᑎᒋ ᐅᓄᖅᑎᒋᔪᓄᑦ ᓯᒃᓯᓂᑦ (ᐅᑭᐅᖅᑕᖅᑐᒥ ᓄᓇᒥᐅᑕᓂ ᓯᒃᓯᓂᑦ, ᖃᐅᔨᒪᔭᐅᖕᒥᔪᑦ ᕼᐃᒃᕼᐃᒃᓂ ᕿᑎᕐᒥᐅᒥᑦ) ᖁᓕᑦᑕᐅᔭᓕᐅᕐᓂᕐᒧᑦ."
ᐃᓚᐃᔭᔅ ᐃᖅᑲᐅᒪᓚᐅᕆᕗᖅ ᑭᓕᖏᖕᐴᒡᒥ ᐃᓚᒋᔭᐅᖃᑕᐅᒐᔪᖕᓂᖓᓂ "ᐊᕐᓇᑦᑎᐊᕙᖕᒧᑦ" ᓵᓚᖃᕋᓱᐊᕐᓂᐅᔪᓂ ᐅᑭᐅᖅᑕᖅᑐᒥ ᐱᙳᐊᕐᓂᐅᔪᓄᑦ ᐱᓕᕆᐊᖑᕙᒃᑐᓂ ᐅᐊᓕᓂᕐᒥ. ᔫᓐ ᑕᑯᒃᓴᐅᑎᑦᑎᕙᓚᐅᖅᐳᖅ ᐱᓕᕆᒃᑲᐅᓂᖓᓂ ᖃᓄᐃᓐᓂᐅᔪᓄᑦ ᓲᕐᓗ ᑏᓚᐅᕐᓂᕐᒧᑦ, ᒥᑎᕐᓂ ᒥᖅᑯᐃᔭᐃᓂᖓᓂ, ᐱᔅᓯᓕᐅᕐᓂᕐᒧᑦ ᐊᒻᒪ ᐱᓚᒃᑐᐃᓂᕐᒧᑦ ᓇᑦᑎᕐᓂ ᐊᒻᒪ ᑐᒃᑑᑉ ᓂᐅᖏᓐᓂ"
"ᑭᐱᙳᐃᔭᐃᕙᓚᐅᖅᐳᖅ ᐃᓄᒋᐊᓂᑦ ᐊᒥᓱᓄᑦ ᐊᕐᕌᒍᒐᓴᓄᑦ ᑕᑯᒃᓴᐅᑎᑦᑎᓪᓗᓂ ᐊᔪᙱᓐᓂᖓᓐᓂ," ᐅᖃᓚᐅᖅᐳᖅ ᐃᓚᐃᔭᔅ.
ᐊᖅᑯᓵᓕᕌᖓᒥ ᐅᖅᓱᖅᑑᒥ, ᐃᓚᐃᔭᔅ ᐳᓛᕆᐊᖅᐸᓚᐅᖅᐳᖅ ᑭᓕᖏᖕᐴᒡᒥ ᐸᖅᑭᔭᐅᖏᓐᓇᖅᑐᒥ ᐱᓕᕆᕝᕕᖓᓂ, ᐊᖏᕐᕋᕆᓚᐅᖅᑕᖓᓂ ᖃᔅᓯᐊᕐᔪᖕᓄᑦ ᑭᖑᓪᓕᖅᐹᖑᔪᓄᑦ ᐊᕐᕌᒍᖏᓐᓂ.
"ᐃᙱᒐᔪᓚᐅᖅᐳᖅ ᕿᓚᐅᔾᔭᐅᒻᒧᑦ ᐱᓯᖏᓐᓂ. ᐅᓪᓗᕐᒥ ᐊᑕᐅᓯᕐᒥ ᐅᖃᐅᑎᓚᐅᖅᐹᖓ, ᐃᓱᒪᓐᓂ ᒧᒥᕈᓐᓇᑦᑎᐊᖅᐳᖓ,'" ᐃᓚᐃᔭᔅ ᐃᖅᑲᐃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑭᓕᖏᖕᐴᒡ ᐅᖃᕈᓐᓇᑦᑎᐊᓚᐅᖅᐳᖅ ᐃᓄᐃᓐᓇᖅᑐᓐ, ᐅᖃᐅᓯᐅᔪᒥ ᓇᓚᐅᑦᑖᕆᔭᐅᓯᒪᔪᒥ ᖃᔅᓯᐊᕐᔪᖕᓂ ᕼᐊᓐᓇᓚᓂ ᐅᖃᖅᑎᐅᔪᓂ ᐊᒥᐊᒃᑯᔪᓂᑦ. "ᐊᓯᐅᔨᓵᖅᐳᒍᑦ ᐱᕐᔪᐊᖑᔪᒥ ᐅᖃᐅᓯᕐᒧᑦ ᐸᖅᑭᔨᐅᔪᒧᑦ, ᖃᐅᔨᒪᓂᕐᒧᑦ ᑎᒍᒥᐊᖅᑎᐅᔪᒥ."
ᓚᔅᓕ ᐃᒡᓗᖓ ᑕᑖᓚᐅᖅᐳᖅ ᐳᓚᕋᖅᑐᓂ ᐃᓚᖏᓐᓂ ᐱᓇᓱᐊᕈᓯᐅᓚᐅᖅᑐᒥ ᐊᒻᒪᓗᑦᑕᐅᖅ ᐅᖃᓘᒻᒥ ᓯᕙᓃᓐᓇᐅᔭᖅᑐᒥ ᔫᓐ ᔭᓄᐊᕆ 16–ᒥ ᐃᓗᕕᖅᑕᐅᓂᐊᕐᓂᖓ ᑎᑭᑉᐸᓪᓕᐊᑎᓪᓗᒍ.
"ᐃᓄᐃᑦ ᓇᒃᓯᐅᔾᔨᕗᑦ ᒪᒥᐊᓐᓂᖏᓐᓂ ᓇᒥᑐᐃᓐᓇᖅ ᓄᓇᕗᒻᒥ ᐊᒻᒪ ᓄᓇᑦᓯᐊᕐᒥ. ᐊᒥᓱᐊᓗᖕᓂ ᐱᖃᓐᓇᕆᔭᖃᓚᐅᖅᐳᖅ ᓇᒥᑐᐃᓐᓇᑦᑎᐊᖅ, ᐊᒻᒪ ᐃᓚᖃᖅᖢᓂ," ᓚᔅᓕ ᐅᖃᓚᐅᖅᐳᖅ. "ᐅᐱᕐᔪᐊᖅᐳᖓ ᐃᕐᙳᑕᕆᔭᐅᓂᓐᓂ."
ᐆᒪᔪᑐᐊᖑᓕᖅᑐᒥ ᐊᓂᖓ, ᔨᒥ, 90–ᖏᓐᓃᒐᓚᒃᑐᒥ, ᐊᐅᓪᓛᕐᓂᖃᓚᐅᖅᐳᖅ ᐃᖃᓗᒃᑑᑦᑎᐊᕐᒥ ᐃᓚᒋᔭᐅᖃᑕᐅᔭᖅᑐᖅᖢᓂ ᐃᖅᑲᐅᒪᓂᐅᔪᒧᑦ.
ᔫᓐ ᐃᓅᓚᐅᖅᓯᒪᕗᖅ ᕿᑭᖅᑕᓇᔪᖕᒥ, ᓯᒡᔭᖅᐸᓯᖓᓂ ᐃᖃᓗᒃᑑᑦᑎᐊᑉ ᕿᑭᖅᑖᓗᐊᓂ, ᔫᓂ 1, 1914–ᒥ. ᐃᖅᑲᐅᒪᓚᐅᖅᐳᖅ ᐃᓅᓂᖓᓂ ᐃᓚᖓᓐᓂ ᓯᕈᓯᐅᓂᕆᓚᐅᖅᑕᖓᓂ ᑐᐱᕋᓛᒥᑦ ᑭᓯᐊᓂ ᐃᒻᒥᓂᒃ ᐊᒻᒪ ᐃᓚᖏᑦ ᓅᑎᓪᓗᒋᑦ ᐃᒡᓗᕋᓛᒧᑦ, ᓚᔅᓕ ᐅᖃᓚᐅᖅᐳᖅ. ᑕᒪᕐᒥᒐᓚᒃ ᐃᓅᓯᖓᓐᓂ ᖁᕐᓗᖅᑑᕐᒥᐅᑕᐅᓚᐅᖅᐳᖅ. ᑲᑎᑎᑕᐅᓚᐳᖅᐳᖅ ᐋᓐᑎ ᑭᓕᖏᖕᐴᒡᒧᑦ, ᑕᐃᓂᔅ–ᖑᔪᒥ ᒥᑭᒋᐊᕐᓂᐊᖅᑎᐅᓚᐅᖅᑐᒥ, ᕿᓚᓗᒐᕋᓱᒃᑎ ᐊᒻᒪ ᑕᐅᖅᓰᔨᐅᓚᐅᖅᑐᒥ ᑯᕆᔅᑎᐊᓐ ᑭᓕᖏᖕᐴᒡᒥ.
ᔫᓐ ᐱᕈᖅᓴᐃᓚᐅᖅᐳᖅ ᑕᓪᓕᒪᓂ ᑎᒍᐊᕆᔭᒥᓂᑦ ᓱᕈᓯᖏᓐᓂ ᐊᒻᒪ ᓇᒡᓕᒋᑦᑎᐊᓚᐅᖅᐸᖏᑦ ᐃᕐᙳᑕᖏᑦ.
"ᓇᒡᓕᒋᓚᐅᖅᐸᖏᑦ ᑕᐅᓯᓐ–ᖏᖅᓱᖅᑐᒥ ᑕᖅᑭᒧᑦ ᐊᒻᒪ ᐅᑎᒧᑦ," ᐃᓚᐃᔭᔅ ᐅᖃᓚᐅᖅᐳᖅ. "ᓇᓗᓇᐃᖅᓰᓐᓇᓚᐅᖅᐳᖅ ᐃᕐᙳᑕᖏᑦ ᑲᒪᒋᔭᐅᑦᑎᐊᖏᓐᓇᐅᔭᕐᓂᖏᓐᓂ."
ᓚᔅᓕ ᐱᐅᒋᔭᖃᑦᑎᐊᕋᓗᐊᖅᑎᓪᓗᒍ ᐱᓕᕆᐊᒃᓴᐅᔪᒥ ᐃᖅᑲᓇᐃᔭᖅᑏᑦ ᐱᓕᕆᓂᕆᓚᐅᖅᑕᖓᓂ ᐸᖅᑭᔭᐅᖏᓐᓇᖅᑐᒥ ᐱᓕᕆᕝᕕᖓᓂ ᐅᖅᓱᖅᑑᒥ, ᓇᓗᓇᐃᖅᓯᓚᐅᖅᐳᖅ ᐅᖓᓯᖕᓂᖓ ᐊᒻᒪ ᐊᑭᑐᔪᐊᓘᓂᖓᓂ ᐊᐅᓪᓛᕐᓂᕐᒧᑦ ᕿᒪᐃᓚᐅᖅᐳᖅ ᔫᓐᒥ ᐅᖓᓯᒃᑑᔮᕐᓂᖓᓂ ᐃᓚᖏᓐᓂᑦ. ᐱᔾᔪᑕᐅᕗᖅ ᓚᔅᓕ ᐱᓇᓱᐊᕐᓂᖓᓂ ᐊᑯᓂᐅᔪᒥ ᐸᖅᑭᔭᐅᕝᕕᒃᓴᒧᑦ ᖁᕐᓗᖅᑑᒥ, ᕼᐋᒻᓚᒃᑯᑦ ᖃᔅᓯᒐᓚᖕᓄᑦ ᐊᕐᕌᒍᓄᑦ ᐱᓇᓱᐊᖅᓯᒪᔭᖓᓐᓂ
"ᐊᓈᓇᑦᑎᐊᕋ ᓅᑕᐅᑎᓐᓇᓱᐊᓚᐅᖅᐸᖓ ᐃᖃᓗᒃᑑᑦᑎᐊᒧᑦ ᐃᓄᑐᖃᒃᑯᕕᒃ ᐊᖏᕐᕋᕆᔭᐅᔪᖅ ᒪᑐᐃᖅᑎᓪᓗᒍ ᑕᐃᑲᓂ ᑭᓯᐊᓂ ᐊᔪᕐᓇᒐᓚᓚᐅᖅᐳᖅ," ᓚᔅᓕ ᐃᖅᑲᐅᒪᕗᖅ ᐱᓕᕆᑦᑎᐊᕈᓐᓇᓚᐅᙱᑦᑐᒥ ᑐᒃᓯᕋᕐᓂᐅᔪᒥ.
ᐃᓚᒋᔭᖏᑦ ᐱᓕᕆᔪᓐᓇᕐᓂᓕᒫᖏᓐᓂ ᐱᓕᕆᓚᐅᖅᐳᑦ ᐳᓚᕋᖅᐸᒃᖢᑎᒃ ᐱᔪᓐᓇᕌᖓᑕ ᐊᒻᒪ ᐅᖃᓪᓚᒃᐸᒃᖢᑎᒃ ᔫᓐᒧᑦ ᑕᓚᕖᓴᒃᑯᑦ–ᐋᓐᓂᐊᖃᕐᓇᙱᑦᑐᓕᕆᔨᒃᑯᑎᒍᑦ ᖃᔅᓯᐊᖅᓱᒐᓚᒃᖢᑎᒃ ᐱᓇᓱᐊᕈᓯᕐᒥ.
"ᓱᓕ ᐅᕙᑦᑎᓐᓄᑦ ᐃᙱᖅᐸᓚᐅᖅᐳᖅ ᐊᒻᒪ ᖃᓄᓕᒫᖅ ... ᑕᐃᒪᓐᓇ ᑲᒪᓇᕐᔪᐊᓚᐅᖅᐳᖅ" ᓚᔅᓕ ᐅᖃᓚᐅᖅᐳᖅ.