ᖃᓄᑐᐃᓐᓇᖅ ᑭᔾᔭᖅᑐᕋᓗᐊᕈᕕᐅᒃ, ᓄᓇᕗᑦ ᕿᑎᐊᓃᑉᐳᖅ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᐊᒻᒪᓗ ᑕᐃᒪᐃᓯᒪᐃᓐᓇᖅᐳᖅ ᓄᓇᕗᑖᓚᐅᖅᑳᕋᑎᒃ.

ᐊᔾᔨᐅᙱᓐᓂᕐᔪᐊᖑᔪᖅ ᒫᓐᓇᐅᔪᒥ ᐊᒻᒪᓗ ᐊᕐᕌᒍᓄᑦ 20–ᓄᑦ ᐊᓂᒍᖅᓯᒪᔪᒥ ᑕᑯᒃᓴᐅᑎᑕᐅᓂᖓᓂ.

ᒪᐃ 13–ᒥ, ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᓇᖏᖅᓯᓚᐅᖅᐳᖅ ᑲᓇᑕᐅᑉ ᑲᑎᒪᓕᐅᕐᕕᖏᑕ ᑲᑎᒪᕝᕕᒡᔪᐊᖓᓂ ᐅᖃᐅᓯᖃᕐᓂᕐᒧᑦ ᐃᖏᕐᕋᐃᓐᓇᖅᑐᒥ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ.

“ᑭᐅᓂᖅ ᐱᕐᔪᐊᖑᔪᒥ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᓄᓇᕗᒻᒥ ᐱᓕᕆᓂᐅᕗᖅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᓄᓇᖃᖅᑳᖅᓯᒪᔪᓄᑦ ᐱᔪᓐᓇᕐᓂᕆᔭᐅᔪᓂ ᐊᒻᒪᓗ ᐃᓄᖕᓄᑦ ᐱᒃᓴᐅᓱᒋᓂᕐᒥ,” ᖃᖅᑲᖅ ᐅᖃᓚᐅᖅᐳᖅ.

ᓇᓚᐅᑉᐳᖅ. ᐊᓂᒍᐃᔪᓐᓇᙱᓚᖅ ᓱᓕᓂᐅᔪᒥ ᓄᓇᕗᒻ ᖁᑦᑎᓛᖑᔪᒥ ᐅᓄᕐᓂᐅᔪᓂ ᐸᖕᒥᐅᓗᐊᖅᑐᓂ ᐃᒡᓗᖃᖅᑎᑕᐅᓂᐅᔪᒥ ᑲᓇᑕᒥ ᐊᒻᒪ 6–ᖏᖅᓱᓪᓗᐊᖅᑐᒥ ᑲᓇᑕᒥ ᐅᓄᕐᓂᐅᔪᒥ ᐃᒡᓗᓂᑦ ᐊᖏᔫᑎᓂᑦ ᐋᖅᑭᒃᓱᖅᑕᐅᔭᕆᐊᖃᖅᑐᓂ.

ᓄᓇᕗᒻᒥ ᑲᓐᓲᕕᑎᒃᑯᓐᓂ ᑲᑐᔾᔨᖃᑎᒌᖑᔪᓄᑦ ᐊᖓᔪᖅᑳᖓ ᐹᓪ ᒨᕕ ᐅᐱᒍᓱᓗᐊᕌᓗᓚᐅᙱᓚᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᒧᑦ ᐃᓘᖃᖅᑎᑦᑎᓂᕐᒧᑦ ᐳᓚᕋᕐᓂᕆᔭᖓᓂ ᐊᐅᔭᐅᓚᐅᖅᑐᒥ, ᐅᖃᖅᖢᓂ ᑮᓇᐅᔭᑦ ᐊᑐᖅᑕᐅᔪᑦ ᓇᓗᓇᐃᖅᓯᓂᕐᒧᑦ ᐸᖕᒥᐅᓗᐊᖅᑐᓂ ᐊᖏᕐᕋᕆᔭᐅᔪᓂ ᐊᖅᑭᒃᓱᖅᑕᐅᑦᑎᐊᖅᓯᒪᙱᑦᑐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᑦᑎᐊᕙᐅᙱᓚᖅ ᓱᓕᙱᓐᓂᕋᖅᑕᐅᔪᓐᓇᙱᖦᖢᓂ ᐊᑲᐅᙱᓕᐅᕈᑕᐅᕌᓂᖕᒪᑦ.

“ᖃᐅᔨᒫᓂᒃᐸᕗᑦ. ᑭᒃᑯᓕᒫᑦ ᑕᒫᓂᕐᒥᐅᓴᐅᔪᑦ ᖃᐅᔨᒪᕗᑦ ᐊᑲᐅᙱᓕᐅᕈᑕᐅᔪᒥ. ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᐅᓪᓚᔭᓪᓗᐊᙱᓚᖅ ᑮᓇᐅᔭᓂ ᐊᑐᕐᓂᕐᒧᑦ ᑎᑎᕋᕐᓂᕐᒧᑦ ᐅᓂᒃᑳᓕᐊᒥ ᐅᖃᖅᓯᒪᔪᒥ ᖃᐅᔨᒫᓂᒃᑕᑦᑎᓐᓂ,” ᒨᕕ ᐅᖃᓚᐅᖅᐳᖅ.

ᑭᓯᐊᓂ, ᑕᑯᒃᓴᐅᙱᓐᓂᖅᓴᐅᕗᖅ ᐊᑲᐅᙱᓕᐅᕈᑕᐅᓪᓗᓂ ᐃᓄᖕᓄᑦ ᓄᓇᕘᑉ ᓯᓚᑖᓂᕐᒥᐅᑕᐅᔪᓄᑦ, ᐊᐃᑦᑖᖑᒐᓗᐊᖅ, ᐊᖏᔪᒥ ᐃᓚᖓᓐᓂ ᐊᐅᓚᑕᐅᓂᐅᔪᒥ ᐊᒻᒪᓗ ᑮᓇᐅᔭᓄᑦ ᐃᓱᒪᓕᐅᕆᓂᐅᔪᓂ ᐱᓕᕆᐊᖑᕙᓪᓕᐊᓂᖏᓐᓂ. ᐅᖃᓪᓚᐅᓯᖃᕐᓂᖅ, ᐊᒻᒪ ᐅᖃᓪᓚᐃᓐᓇᕐᓂᕐᒧᑦ, ᐱᒻᒪᕆᐅᕗᖅ ᑕᑯᔪᒪᒍᑦᑕ “ᐊᓯᔾᔨᕐᓂᓪᓚᕆᐅᔪᓐᓇᖅᑐᒥ” ᑲᑎᒪᔨᕐᔪᐊᖑᔪᓂ ᓯᕗᓕᐅᖅᑎᕗᑦ ᐱᓕᕆᓂᕋᐃᖏᓐᓇᕐᓂᕋᖅᑐᓄᑦ.

ᑐᓴᖅᓯᒪᕗᒍᑦ ᐊᒥᓱᓂ ᐅᓂᒃᑳᖅᑕᐅᓂᐅᔪᓂ ᐊᒥᓱᓂ ᓄᓇᓕᐅᔪᓂ ᐅᖃᐅᓯᖃᖅᑐᒥ ᑕᐃᔅᓱᒥᖓᑦᑕᐃᓐᓇᖅ ᐆᒻᒪᑎᒥ ᓱᕋᐃᓂᐅᔪᒥ ᑐᓴᒐᒃᓴᐅᔪᓂ, ᓲᕐᓗ ᔭᐃᑯᑉ ᐅᔭᕐᕋᐃ ᐅᖅᓱᖅᑑᒥ. ᐅᑕᖅᑭᓯᒪᕗᖅ ᐊᕐᕌᒍᓄᑦ 14–ᓄᑦ ᐃᒡᓗᒥᒃ ᐊᖏᕐᕋᕆᓂᐊᖅᑕᖓᓂ ᑕᓪᓕᒪᓪᓗ ᕿᑐᕐᙵᖏᓐᓂ ᐊᒻᒪᓗ ᐊᕐᕌᒍᓂ 8–ᓂ ᐃᒡᓗᖃᖃᑎᖃᖅᐳᖅ 13–ᓂ ᐊᓯᖏᓐᓂ ᐃᓄᖕᓂ.

ᐊᑕᐅᓯᐅᓪᓗᓂ 142–ᖑᔪᓂ ᑐᒃᓯᕋᖅᓯᒪᔪᓂ ᐅᑕᖅᑭᔪᓂ ᑎᑎᕋᖅᑕᐅᓯᒪᓂᐅᔪᓂ 1,325–ᓂ ᐃᓄᓕᖕᓂ.

ᒪᐃᔭ ᒪᐃᒐᓐ ᐳᐊᑕᐅᑉ ᐅᖃᐅᓯᒃᓴᓕᐊᖓ ᐊᔭᐅᕆᔪᒥ ᓄᓇᖃᖅᑎᐅᔪᓂ “ᐃᓕᓐᓂᐊᑦᑎᐊᖁᔨᓪᓗᓂ ᓇᓂᓯᔪᓐᓇᕐᓂᐊᕐᒪᑕ ᐃᖅᑲᓇᐃᔮᖃᑦᑎᐊᕐᓂᐅᔪᒥ ᐊᒻᒪᓗ ᑕᐃᒪᑐᖅ ᖃᖓᑭᐊᖅ ᐊᖏᕐᕋᒥ ᓇᖕᒥᓂᖃᖅᑎᐅᔪᓐᓇᓛᕐᓂᖏᓐᓂ” ᑐᑭᖃᑦᑎᐊᓂᐅᒐᓗᐊᖅᐳᖅ, ᐱᕐᔪᐊᖑᔪᒥ ᐊᑲᐅᙱᓕᐅᕈᑕᐅᔪᒥ ᑭᓲᙱᑎᑦᑎᓗᐊᖅᐳᖅ ᑕᑯᒃᓴᐅᓂᐅᔪᓂ ᐊᔪᕐᓇᕐᓂᐅᔪᓂ ᓇᓂᓯᓂᕐᒥ ᐃᖅᑲᓇᐃᔮᖑᔪᓂ ᐱᑕᖃᑦᑎᐊᙱᑦᑐᓂ.

$25 ᒥᓕᐊᓐ ᓇᓗᓇᐃᖅᑕᐅᓯᒪᔪᒥ 2021 ᒐᕙᒪᑐᖃᒃᑯᓐᓂ ᑮᓇᐅᔭᓂᑦ ᐊᑐᖅᑐᒃᓴᐅᔪᒥ ᑕᐃᔭᐅᓚᐅᖅᐳᖅ ᓯᕗᓪᓕᕐᒥ ᐊᑭᓖᑕᐅᓂᐅᔪᒥ ᐃᓕᔭᐅᔭᕆᐊᓕᖕᒧᑦ, ᐃᑲᔪᕋᓱᐊᕐᓂᕐᒧᑦ ᓄᓇᕗᒻᒥ ᒐᕙᒪᒃᑯᓐᓂ “ᑮᓇᐅᔭᖅᑖᕋᓱᐊᕐᓂᕐᒥ ᑲᓇᑕᒥ ᐃᒡᓗᓕᕆᓂᕐᒧᑦ ᐊᑐᐊᒐᐅᔪᒥ, ᐅᕝᕙᓘᓐᓃᑦ ᑲᑐᔾᔨᓗᑎᒃ ᐊᑕᐅᓯᐅᔪᒥ ᐃᓄᖕᓄᑦ–ᐱᔪᓐᓇᕐᓂᕆᔭᐅᔪᓂ ᑎᒍᒥᐊᖅᑎᐅᔪᓂ ᐃᒻᒪᖄ ᐊᑐᐃᓐᓇᖃᖅᑎᑦᑎᓂᖏᓐᓂ ᐃᓚᖏᓐᓂ ᓄᓇᖃᖅᑳᖅᓯᒪᔪᓄᑦ–ᑐᙵᕕᓕᖕᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᑮᓇᐅᔭᖃᖅᑎᑕᐅᓂᐅᔪᒥ ᐃᓚᖃᖅᑐᒥ ᐃᒡᓗᖃᖅᑎᑦᑎᓂᐅᔪᒥ,” ᐅᖃᓚᐅᖅᐳᖅ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓐ ᕚᓐᑎᐅᓪ.

ᐊᓯᒃᑲᓐᓂᐊᓂ ᑐᕌᖓᓂᖃᑦᑎᐊᕋᓱᐊᖅᑐᒥ ᐃᖏᕐᕋᓂᐅᔪᒥ, ᑭᓯᐊᓂ ᐊᐃᑦᑖᖑᒐᓗᐊᖅ ᓈᒻᒪᙱᓗᐊᖅᑐᖅ.

ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓂ ᒫᔾᔨ 16–ᒥ, ᐃᖃᓗᐃᑦ-ᓂᐊᖁᖒᒥ ᒪᓕᒐᓕᐅᖅᑎᖓ ᐹᑦ ᐊᕐᓇᒃᑲᖅ ᐅᖃᕆᐊᓪᓚᓚᐅᖅᐳᖅ ᓄᓇᕗᑦ ᐱᔭᕆᐊᖃᖅᐳᑦ 3,000–ᓂ ᓄᑖᓂ ᐃᒡᓗᒃᓴᐅᔪᓂ ᐊᙳᑎᓂᕐᒧᑦ ᐱᑕᖃᖅᐸᒌᖅᑐᒥ ᐱᔪᒪᓂᐅᔪᒥ, ᐊᒻᒪᓗ ᓄᓇᕗᒻᒥ ᒐᕙᒪᒃᑯᑦ ᐊᖑᒻᒪᑎᓂᖃᙱᓚᑦ ᑕᐃᒪᐃᑦᑐᓐᓇᕐᓂᕐᒧᑦ.

“ᐊᔾᔨᒌᙱᕈᓘᔭᖅᑐᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᐊᒻᒪᓗ ᓄᓇᕗᒻᒥ ᒐᕙᒪᒃᑯᑦ ᐱᓕᕆᔭᕆᐊᖃᖅᐳᑦ ᓇᖕᒥᓂᖅ–ᐃᓄᓕᒫᓄᑦ–ᒐᕙᒪᑐᖃᒃᑯᓐᓂ ᐱᓕᕆᖃᑎᒌᖕᓂᐅᔪᒥ ᖃᓱᑎᑦᑎᓂᕐᒥ ᐊᒃᓱᕈᕐᓂᑦᑎᓐᓂ,” ᐅᖃᓚᐅᖅᐳᖅ ᐊᕐᓇᒃᑲᖅ. “ᓂᕆᐅᖕᓂᖃᖅᐳᖓ ᓯᕗᓕᐅᖅᑎᐅᔪᓂ ᐃᓄᖕᓄᑦ ᑎᒥᐅᕗᓗᑦ ᓈᓚᖕᒪᖔᑕ, ᓈᒻᒪᒃᓯᕗᖅ ᓂᓪᓕᕐᓂᕐᒧᑦ. ᐃᓄᖕᓂ ᑭᒡᒐᖅᑐᐃᒋᕗᓯ, ᐊᒻᒪᓗ ᐃᒡᓗᖃᖅᑎᑦᑎᓂᕐᒧᑦ ᐊᒥᒐᓗᐊᕐᓂᖓᓂ ᐱᔭᕆᐊᖃᖅᐳᖅ ᐱᓕᕆᓗᓂ ᐱᓕᕆᓂᐅᔪᒥ ᐋᖅᑭᒃᑕᐅᓂᕐᒧᑦ ᑖᒃᑯᓇᓂ ᐱᖓᓱᓄᑦ ᐱᓕᕆᖃᑎᖃᕐᓂᐅᔪᓄᑦ.”

ᐊᒃᓱᕈᕐᓂᖅ ᓈᒻᒪᒃᓯᑎᑦᑎᒍᓂ, ᐄᒻᒪᕆᒃ ᐱᔭᕆᐊᖃᕐᓂᐊᖅᐳᒍᑦ ᑲᑎᙵᓂᐅᔪᒥ ᐊᒻᒪᓗ ᓄᖅᑲᕐᓂᖃᙱᑦᑐᒥ ᐱᓕᕇᓐᓇᕐᓂᐅᔪᒥ ᑕᒪᒃᑭᓂ ᑭᒡᓕᐅᔪᓂ ᒐᕙᒪᐅᔪᓂ ᐃᒡᓗᖃᖅᑎᑦᑎᓂᕐᒧᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᒥ ᐆᒪᙵᑦ ᓄᓇᕘᔪᒥ ᐱᔭᕆᐊᖃᕐᔪᐊᖅᑕᖓᓐᓂ.

Leave a comment

Your email address will not be published. Required fields are marked *