ᐅᐱᕐᙶᒃᓴᙳᓕᖅᐳᖅ. ᐊᑯᓂ ᓯᕿᓐᓂᖃᑦᑕᓕᖅᖢᓂ ᐆᓇᖅᓯᕙᓪᓕᐊᓪᓗᓂᓗ ᓂᕆᐅᓇᖅᐳᖅ ᓄᑖᓂᒃ ᐊᑐᕐᓂᐊᕐᓂᕐᒧᑦ.
ᓄᓕᐊᕋᓗ ᐊᖓᖓᓂᒃ ᐱᖃᑎᖃᖅᖢᑕ ᐊᖁᓚᐅᖅᐳᒍᑦ ᔭᓗᓇᐃᒥᑦ ᐃᑦᒪᓐᑕᒧᑦ ᐊᑯᓂᐅᒐᓗᐊᖅᑎᓪᓗᒍ ᐃᖏᕐᕋᓂᕗᑦ, ᖃᐅᔨᕚᓪᓕᕈᑎᖃᓚᐅᖅᐳᒍᑦ ᑐᑭᓯᕙᓪᓕᕈᑎᖃᖅᓗᑕᓗ. ᑲᔾᔮᕐᓇᓚᐅᖅᐳᖅ ᐊᔾᔨᒌᖏᑦᑐᓂᒡᓗ ᐆᒪᔪᓂᒃ ᑕᑯᖃᑦᑕᖅᖢᑕ ᑕᒪᒃᑯᐊ ᑐᒃᑑᔭᐃᑦ ᐃᒻᒧᒃᓯᐅᒐᐃᓪᓗ ᐊᒻᒪ ᕿᒻᒥᔾᔪᐊᑦ. ᓄᑕᐅᖏᑦᑐᑐᖃᓂᒃ ᐃᒡᓗᕐᔪᐊᕕᓂᕐᓂᒃ ᑕᑯᖃᑦᑕᓚᐅᖅᐳᖓ ᐊᒻᒪ ᐅᖅᓱᐊᓗᖕᓂᒃ ᒥᓗᑲᐅᑎᓂᒃ ᒥᓗᑲᖅᑐᑦ ᐅᖅᓱᐊᓗᖕᒥᒃ. ᐊᒻᒪ ᓲᖃᐃᒻᒪ ᓄᓇᓯᐅᑎᑕᖃᖃᑦᑕᓚᐅᖅᐳᖅ ᐊᒥᓱᓂᒃ, ᑕᒪᒃᑯᐊ ᐊᖏᔪᑦ ᓄᓇᓯᐅᑎᑦ ᐅᓯᑲᑦᑕᖅᑎᑦ ᐊᒻᒪ ᐊᖏᓂᖅᓴᐃᑦ ᐊᒻᒪ ᒥᑭᓂᖅᓴᐃᑦ ᓄᓇᓯᐅᑎᑐᐃᓐᓇᐃᓪᓗ.
ᓄᖅᑲᖃᑦᑕᓚᐅᖅᖢᑕᓗ ᐅᖅᓴᒋᐊᖅᑐᖅᖢᑕ ᓂᕆᔭᒃᓴᑦᑎᓐᓂᒡᓗ ᐱᖃᑦᑕᖅᖢᑕ. ᐊᔾᔨᐅᖏᑦᑑᓚᐅᖅᐳᖅ ᐃᓅᓯᕆᖃᑦᑕᖅᑕᑦᑕ ᓴᓂᐊᒍᑦ ᑎᒥᒃᑯᑦ ᐃᓱᒪᒃᑯᓪᓗ ᐊᔾᔨᐅᓚᐅᙱᖦᖢᓂ. ᑕᖃᓚᐅᖅᖢᑕᓗ ᑭᓯᐊᓂ ᐃᓱᒪᒃᑯᑦ ᑕᖃᐃᖅᓯᓚᐅᖅᖢᑕ.
ᑕᐃᒪᓐᓇ ᐊᖁᖦᖢᓂ ᑕᒪᐃᓐᓄᑦ ᐃᓄᖕᓄᑦ ᐊᑐᒐᒃᓴᐅᖏᑉᐳᖅ ᑭᓯᐊᓂ ᑕᐃᒪᓐᓇᐃᒍᓐᓇᕋᓗᐊᖅᖢᑕ ᓄᓇᑦᑎᓐᓂ. ᐊᒥᓱᓂᒃ ᐃᒡᓗᐊᓛᓂᒃ ᓄᓇᒥ ᐱᑕᖃᖅᐳᖅ ᑐᐱᕐᕕᒃᓴᓂᒡᓗ ᓯᓚᑦᓯᐊᖑᕙᓪᓕᐊᓕᕐᒪᓪᓗ ᐊᓃᕋᔭᖕᓂᖅᓴᐅᒋᐊᖃᓕᖅᐳᒍᑦ.
ᓄᓇᒥ ᐊᐅᓪᓛᖅᓯᒪᓪᓗᓂ ᐃᖢᕐᕆᔮᕐᓇᖅᐳᖅ, ᑕᖃᐃᖅᓯᖅᖢᓂᓗ ᓴᓐᖏᓕᖅᑎᓴᓪᓗᓂᓗ. ᐊᒃᓱᕈᖅᑎᑕᐅᖏᓐᓇᐅᔭᖃᑦᑕᕋᑦᑕ ᐃᓅᓯᑦᑎᓐᓂ ᑕᐃᒪᓐᓇ ᑕᖃᖃᑦᑕᖅᐳᒍᑦ ᐊᒃᓱᕈᕋᓱᐊᓗᐊᒧᑦ. ᐊᐅᓪᓛᖅᓯᒪᓕᖅᖢᓂ, ᐃᒡᓗᐊᓛᒧᐊᖅᓯᒪᓪᓗᓂᓗ ᓄᑖᖑᖅᑰᔨᓐᓇᖅᖢᓂ. ᑏᑐᖅᖢᓂᓗ ᐸᓚᐅᒑᖅᑐᖅᖢᓂᓗ ᐃᓱᒪᓇᖅᑕᖃᕐᓇᓂ ᐱᓕᕆᐊᕆᔭᐅᒋᐊᖃᖅᑐᒥᒃ ᑐᐊᕕᕐᓇᖅᑐᒥᒃ ᓇᒧᙵᐅᔭᕆᐊᖃᕐᓇᙱᖦᖢᓂᓗ ᓱᒋᐊᖃᕐᓇᓂᓗ ᐃᒻᒥᓂᒃ ᐱᒍᒪᔭᕐᓂᒃ ᐱᓕᕆᐊᖃᕐᓇᖅᐳᖅ.
ᐃᓅᓯᕗᑦ ᕿᓚᒥᐅᖃᑦᑕᕐᒪᑦ ᑕᒪᒃᑯᓂᖓ ᖁᕕᐊᓇᖏᑦᑐᓂᒃ ᐱᓕᕆᐊᖃᕆᐊᒃᓴᖅ ᓱᕙᓕᑭᐊᖑᓪᓗᓂ ᐊᑲᐅᓂᖅᓴᒥᒃ ᐱᓇᓱᐊᖅᓴᐅᒋᐊᖃᖅᐳᒍᑦ ᑕᖃᐃᖅᓯᕐᓇᕐᓂᖅᓴᐅᖕᒪᑦ ᐱᓇᓱᐊᕈᓯᐅᓂᐊᖅᑐᒧᑦ ᐱᓇᓱᐊᕐᓂᐊᕐᓗᓂ.
ᖃᓄᑐᐃᓐᓇᖅ ᐱᔪᓐᓇᑐᐊᕈᕕᑦ, ᓄᓇᑦᓯᓐᓂ ᐊᐅᓪᓚᓚᐅᐱᓪᓚᒍᓐᓇᕈᕕᑦ ᐱᓇᓱᐊᕈᓯᐅᑉ ᓄᙳᐊᓂ ᓲᕐᓗ ᑕᐃᒪᓐᓇ ᑲᔾᔮᕐᓇᖅᑐᒥ ᓄᓇᒦᓚᐅᐱᓪᓚᒍᓐᓇᖅᐳᑎᑦ.