ᔪᓚᐃ 12–ᒥ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓴᖅᑭᑎᑦᑎᓚᐅᖅᐳᑦ ᐅᓂᒃᑳᓕᐊᖓᓐᓂ ᑭᐅᓂᕐᒧᑦ ᑳᖕᓂᐅᔪᓄᑦ ᖁᑦᑎᖕᓂᖅᓴᐅᕐᔪᐊᕐᓂᖓᓂ ᐃᓄᐃᑦ ᓄᓇᖓᓐᓂ ᑕᐅᑐᒃᖢᒍ ᑲᓇᑕᐅᑉ ᐊᒥᐊᒃᑯᖓᓂ.

2007–2008–ᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᓪᓕᓯᓂᐊᕐᓂᐅᔪᖅ, ᐃᓚᖃᓚᐅᖅᑐᒥ ᐃᓄᐃᑦ ᐃᒡᓗᖁᑎᖃᖅᑐᓂ ᓄᓇᕗᒻᒥ, ᐃᓄᕕᐊᓗᐃᑦ ᓄᓇᑖᕐᓂᕐᒧᑦ ᐊᕕᒃᑐᖅᓯᒪᓂᐅᔪᒥ ᐊᒻᒪ ᓄᓇᑦᓯᐊᕗᒻᒥ, ᓇᓗᓇᐃᖅᓯᓚᐅᖅᐳᑦ 62.6 ᐳᓴᓐᑎᒥ ᐃᓄᖕᓄᑦ ᐃᒡᓗᖃᖅᑎᐅᔪᓄᑦ ᓂᕿᒃᓴᖃᑦᑎᐊᙱᓐᓂᖏᓐᓂ, ᑕᐅᑐᒃᖢᒍ 7.7 ᐳᓴᓐᑎᒥ ᑕᒪᒃᑭᓂ ᑲᓇᑕᒥ ᐃᒡᓗᖃᖅᑎᐅᔪᓄᑦ.

ᒫᓐᓇᓕᓴᐅᓂᖅᓴᒥ ᐅᓂᒃᑳᓕᐊᖅ, ᑕᐃᒎᓯᓕᖕᒥ ᐃᓄᐃᑦ ᓄᓇᖓᓐᓂ ᓂᕿᒃᓴᖃᑦᑎᐊᕐᓂᕐᒧᑦ ᐸᕐᓇᐅᑎ, ᐅᓂᒃᑳᕆᕗᖅ ᓂᕿᒃᓴᖃᑦᑎᐊᕐᓂᐅᔪᒥ ᐃᓄᓕᒫᓄᑦ, ᖃᖓᓕᒫᑦᑎᐊᖅ, “ᑎᒥᒧᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᐊᑐᐃᓐᓇᖃᕐᓂᖓᓂ ᓈᒻᒪᒃᑐᒧᑦ, ᐊᑦᑕᓇᙱᑦᑐᒧᑦ ᐊᒻᒪ ᓂᕿᑦᑎᐊᕙᖕᓂ ᑭᐅᓂᕐᒧᑦ ᓂᕆᔾᔪᓯᖓᓐᓄᑦ ᐱᔭᕆᐊᖃᖅᑕᖏᓐᓂ ᐊᒻᒪ ᓂᕿᓂᑦ ᐱᐅᒋᓂᖅᓴᐅᔭᖏᓐᓂ ᐱᔪᓐᓇᑦᑎᐊᖅᑐᒧᑦ ᐊᒻᒪ ᖃᓄᐃᙱᑦᑎᐊᖅᑐᒧᑦ ᐃᓅᓯᖃᕐᓂᐅᔪᒥ.

“ᓂᕿᒃᓴᖃᑦᑎᐊᙱᓐᓂᖅ ᐊᕙᓗᓯᓯᒪᕗᖅ ᐊᔾᔨᒌᙱᕈᓘᔭᖅᑐᓂ ᖃᓄᐃᓕᖓᓂᐅᔪᓂ ᓂᐅᕕᕈᓐᓇᙱᓐᓂᕐᒧᑦ ᓈᒻᒪᑦᑎᐊᖅᑐᒥ ᓂᕆᐅᓯᐅᔪᒥ, ᕿᒃᓵᖏᓐᓇᐅᔭᕐᓂᕐᒧᑦ ᓂᕿᓂᒃ ᐊᑐᐃᓐᓇᖃᕐᓂᕐᒧᑦ, ᓂᕆᖃᑦᑕᙱᓐᓂᐅᔪᒥ ᐅᕝᕙᓘᓐᓃᑦ ᓂᕆᖃᑦᑕᙱᓐᓂᕐᒧᑦ ᐅᓪᓗᒐᓴᐅᔪᓄᑦ.”

ᐊᒥᓱᓂ ᐱᔾᔪᑎᑕᖃᖅᐳᖅ ᓂᕿᒃᓴᖃᑦᑎᐊᙱᓐᓂᐅᔪᒧᑦ ᓱᓕ ᐱᑕᖃᐃᓐᓇᓲᖑᕗᖅ ᐅᓪᓗᒥ, ᐃᓚᖃᖅᑐᒥ ᐃᓄᐃᑦ ᓅᑕᐅᓯᒪᔪᓄᑦ ᐊᕐᕌᒍᓕᒫᒥ ᓄᓇᒋᓂᐊᖅᑕᖏᓐᓄᑦ, ᑭᒡᓕᖃᕐᔪᐊᖅᑐᓄᑦ ᐊᖑᓇᓱᖕᓂᕐᒧᑦ ᐱᖁᔭᐅᔪᓂ, ᑐᖁᕋᐃᓂᐅᔪᓂ ᕿᒧᒃᓯᖅᓯᐅᑎᓂ ᕿᒻᒥᓂᑦ ᐃᓚᖏᓐᓂ ᐊᕕᒃᑐᖅᓯᒪᓂᐅᔪᓂ ᐊᒻᒪ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐅᖃᐅᓯᐅᓪᓗᑎᒃ ᐊᖏᔪᐊᓗᖕᒥ ᐊᒃᑐᐃᓂᖃᕐᓂᖓᓂ ᐃᓄᖕᓂ ᒪᑭᒪᓇᓱᐊᕈᓐᓇᕐᓂᖏᓐᓂ ᐊᖑᓇᓱᒃᑕᐅᔪᓄᑦ ᓂᕿᓄᑦ. ᑲᑕᒃᐸᓪᓕᐊᓂᖓᓂ ᑐᒃᑐᓂ ᑲᑎᙵᓂᐅᔪᓂ ᐊᒃᑐᐃᓂᖃᕐᔪᐊᖅᓯᒪᒋᕗᖅ.

ᐊᔪᖅᓴᕐᓂᖅ, ᓈᒪᙱᓗᐊᖅᑐᒥ ᐊᒻᒪ ᐸᖕᒥᐅᖅᑐᓂ ᐃᒡᓗᖃᖅᑎᑕᐅᓂᖅ ᐊᒻᒪᓗᑦᑕᐅᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐃᑲᔪᖅᓱᐃᕗᖅ ᐆᒧᖓ ᓂᕿᒃᓴᖃᑦᑎᐊᙱᓐᓂᐅᔪᒥᑦᑕᐅᖅ, ᐊᖑᓇᓱᖕᓂᖅ ᐊᑭᑐᔪᐊᓘᓪᓗᓂ, ᓇᓗᓇᖅᖢᓂ ᐊᒻᒪ ᐃᓛᓐᓂᒃᑯᑦ ᑎᑭᐅᑎᔭᒃᓴᐅᓇᓂ. ᐃᓄᐃᑦ ᐊᐅᓪᓛᕆᐊᖃᒐᔪᒃᐳᑦ ᐅᖓᓯᒃᑐᐊᓗᖕᒧᑦ ᐊᖑᓇᓱᖕᓂᕐᒥ ᓂᕿᓪᓚᑦᑖᓄᑦ, ᐅᓗᕆᐊᓇᕈᓐᓇᖅᖢᓂ ᐊᒻᒪ ᐊᑭᑐᔪᐊᓘᓪᓗᓂ.

ᓂᐅᕕᕐᕕᖕᒥ–ᓂᐅᕕᖅᑕᐅᔪᑦ ᓂᕿᑦ ᐅᓯᑲᑦᑕᖅᑕᐅᓲᖑᕗᑦ ᐊᕐᕌᒍᓕᒫᒥ ᖃᖓᑕᓲᒃᑯᑦ ᐊᒻᒪ ᐅᒥᐊᕐᔪᐊᒃᑯᑦ ᐊᒻᒪᓗ 2019–ᒥ ᓇᓚᐅᑦᑖᕆᔭᐅᓯᒪᕗᖅ ᕿᑎᐊᓂ 80 ᐊᒻᒪ 93 ᐳᓴᓐᑎᒥ ᖁᐃᒃᓯᓐᓇᖅᑐᑦ ᐃᓄᐃᑦ ᓂᕆᕙᒃᑕᖏᓐᓂ ᐅᓯᑲᑦᑕᖅᑕᐅᓲᖑᕗᑦ ᑕᐅᓴᓐ–ᖏᓐᓂ ᑭᓛᒥᑐᓂ ᑐᓂᓯᔨᐅᔪᓂ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.

ᐅᑯᐊ ᓂᖀᑦ ᓂᕿᑦᑎᐊᕙᐅᓂᖅᓴᐅᒐᔪᙱᓚᑦ ᐊᖑᓇᓱᒃᑕᐅᔪᓂ ᓂᕿᓪᓚᑦᑖᓂ ᐊᒻᒪᓗ ᐅᔾᔨᕆᔭᐅᕗᖅ ᐅᓂᒃᑳᓕᐊᒥ “ᐱᑕᖃᙱᓐᓂᖓᓂ ᓄᓇᓕᖕᓂ ᐊᖑᓇᓱᒃᑕᐅᔪᓂ ᖃᓄᐃᓕᐅᕐᓂᐅᔪᓂ, ᓂᐅᕕᕐᕕᖕᓂ ᓂᕿᑖᕐᕕᐅᔪᑦ ᑭᐅᔪᓐᓇᕋᔭᙱᓚᖅ ᐃᓕᖅᑯᓯᒧᑦ ᐅᕝᕙᓘᓐᓃᑦ ᓂᕿᓂᑦ ᐱᔭᕆᐊᓕᖕᓂ ᐃᓄᖁᑎᑦᑎᓐᓄᑦ.”

ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᕐᒥ ᐱᓕᕆᐊᖑᔪᖅ ᑐᕌᖓᓇᓱᐊᖅᐳᖅ ᐃᑳᖅᓯᓂᕐᒥ ᐃᓚᑰᓂᐅᔪᓂ ᐊᒻᒪᓗ ᓂᐅᕕᕐᕕᖕᒥ–ᓂᐅᕕᖅᑕᐅᔪᓂ ᓂᕿᓂᑦ ᐊᑭᑐᓗᐊᙱᓐᓂᖅᓴᐅᓂᖓᓂ ᐊᒻᒪ ᐊᑐᐃᓐᓇᐅᓂᖓᓂ, ᑭᓯᐊᓂ ᐱᓕᕆᑦᑎᐊᖅᓯᒪᙱᓚᖅ. ᑕᒪᑐᒪᓂ ᐊᕐᕌᒎᔪᒥ, ᒐᕙᒪᑐᖃᒃᑯᑦ ᑐᓂᓯᓇᓱᐊᖅᐳᑦ $163.4 ᒥᓕᐊᓐᓂ ᐊᕐᕌᒍᓄᑦ ᐱᖓᓱᓄᑦ ᐊᖏᒡᓕᒋᐊᖅᓯᓂᕐᒥ ᐱᓕᕆᐊᖑᔪᒥ ᐊᒻᒪᓗ ᒪᕐᕉᖕᓂ ᓄᑖᓂ ᐃᓚᒋᔭᐅᔪᓂ, ᐳᕋᓐᑕ ᔮᓐᑭ ᐊᒻᒪ ᐱᐊᑦ ᑰᑦᑎᖅ,ᑕᒪᒃᑭᑦ ᓄᓇᕗᒻᒥᐅᑕᑦ, ᑎᒃᑯᐊᖅᑕᐅᓚᐅᖅᐳᑦ ᑲᑎᒪᔨᐅᔪᓄᑦ ᐃᖏᕐᕋᓂᐅᔪᒥ ᑲᓇᑕᒥ ᒐᕙᒪᒃᑯᑦ ᓂᕆᐅᖕᓂᖏᓐᓂ “ᓴᙱᒃᑎᒋᐊᖅᓯᓂᐊᕐᓂᖓᓂ ᐊᒻᒪ ᐊᖏᒡᓕᒋᐊᖅᓯᓗᓂ ᓄᓇᓕᖕᓂ ᖃᐅᔨᒪᓂᕐᔪᐊᖑᔪᓂ ᐱᓕᕆᐊᖑᔪᒥ.”

ᐊᒥᓱᓂ ᓄᓇᓕᖕᓂ–ᑐᙵᕕᓕᖕᓂ ᐱᒋᐊᕈᑎᑕᖃᖅᐳᖅ ᐱᑕᖃᖅᑐᓂ ᒥᒃᖠᒋᐊᖅᑎᑦᑎᓂᕐᒧᑦ ᑳᖕᓂᐅᔪᒥ ᐊᒻᒪᓗ ᑐᓂᓯᓗᓂ ᕿᓚᒻᒥᐅᔪᒥ ᖃᓱᓂᐅᔪᒥ ᐃᓄᖕᓄᑦ ᐊᒻᒪ ᐃᓚᒌᖑᔪᓄᑦ ᓄᓇᕗᓕᒫᒥ, ᐃᓚᖃᖅᑐᒥ ᐊᔪᖅᓴᖅᑐᓄᑦ ᓂᕿᑖᕐᕕᓂᑦ, ᑲᔪᖅᑐᕐᕕᒃᓴᓂ, ᓄᓇᓕᖕᓂ ᐊᖑᓇᓱᖕᓂᕐᒧᑦ ᐱᒋᐊᕈᑕᐅᔪᓂ, ᓂᕿᑦᑎᐊᕙᓕᕆᓂᕐᒥ ᐃᓕᓐᓂᐊᕐᓂᐅᔪᓂ ᐱᒋᐊᕈᑕᐅᔪᓂ ᐊᒻᒪᓗ ᐃᓕᓐᓂᐊᕐᕕᓂ ᐅᓪᓛᕈᒻᒥᑕᕐᕕᓂ ᐱᓕᕆᐊᖑᔪᓂ. ᐅᓂᒃᑳᓕᐊᖅ ᐅᖃᖅᓯᒪᕗᖅ “ᐊᓯᖏᑦ ᐃᓕᓐᓂᐊᖅᑎᑦᑎᕗᑦ ᓂᕿᓄᑦ ᐊᔪᙱᓐᓂᐅᔪᓂ, ᓲᕐᓗ ᓂᕿᑦᑎᐊᕙᓕᕆᓂᕐᒥ, ᓂᖅᖠᐅᕐᓂᕐᒥ, ᓂᕿᓪᓚᑦᑖᓂ ᐊᖑᓇᓱᖕᓂᕐᒧᑦ ᐊᒻᒪᓗ ᐱᕈᖅᑐᓕᐅᕆᓂᕐᒥ ᐊᔪᙱᓐᓂᐅᔪᓂ. ᐊᕕᒃᑐᖅᓯᒪᓂᐅᔪᒥ ᐊᖑᓇᓱᒃᑎᒧᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᓂ ᐊᔭᐅᕆᕗᑦ ᐊᖑᓇᓱᖕᓂᕐᒥ ᐃᓅᓯᕆᔭᐅᓂᖓᓂ, ᐊᒻᒪᓗ ᓄᓇᓕᖕᓂ ᖁᐊᖃᐅᑎᑦ ᑐᓂᓯᕙᒃᐳᑦ ᓂᕿᓪᓚᑦᑖᓂ ᐃᓄᖕᓄᑦ ᐊᖏᕐᕋᕆᔭᐅᔪᓄᑦ ᐱᓕᕆᖃᑎᒌᖕᓂᑦᑎᓐᓄᑦ ᑲᓱᖃᑎᒌᖕᓂᐅᔪᓂᑦ.”

ᐊᑕᐅᓯᖅ ᐅᓂᒃᑳᓕᐊᖅ ᐊᑭᕋᖅᑐᖅᑕᐅᕐᔪᐊᕐᓂᖓᓂ, ᑕᐃᒪᐃᓪᓗᐊᕐᓂᖓᓂ, ᐱᑕᖃᙱᓗᐊᕐᓂᖓᓂ ᐊᑯᓂᐅᔪᒥ ᐋᖅᑭᒍᑎᒃᓴᐅᔪᓂ ᐊᑐᐃᓐᓇᐅᑎᑕᐅᓂᖓᓂ, ᐊᒻᒪᓗᑦᑕᐅᖅ ᐱᑕᖃᙱᓗᐊᕐᓂᖓᓂ ᐊᐅᓚᑕᐅᓂᖓᓂ ᐱᒋᐊᕈᑕᐅᔪᓄᑦ ᐊᔾᔨᒌᙱᑦᑑᑕᐅᔪᓄᑦ – ᓲᕐᓗ ᖃᔪᖅᑐᕐᕕᒃ ᐱᓕᕆᕝᕕᒃ ᐊᓂᑎᑦᑎᓇᓱᐊᕐᓂᖓᓂ ᐱᕕᓃᑦ ᑲᑐᔾᔨᖃᑎᒌᖑᔪᓂ ᐊᑭᑭᑦᑐᓂ ᓂᐅᕕᕐᕕᖓᓂ ᐃᓂᒃᓴᓕᐅᕐᓂᕐᒧᑦ ᓇᖕᒥᓂᖅ ᐊᖏᒡᓕᒋᐊᖅᑐᒥ ᐱᓕᕆᐊᕆᔭᐅᓂᖏᓐᓂ – ᐊᒻᒪᓗ ᐱᐅᙱᑦᑐᒥ ᐱᓕᕆᐊᖑᔪᓂ ᓇᐅᑦᑎᖅᓱᖅᑕᐅᓂᖏᓐᓂ, ᐱᔨᑦᑎᕋᑐᐃᓐᓇᖅᑐᒥ ᒥᒃᖠᒋᐊᖅᑎᑦᑎᓂᕐᒥ ᐊᑑᑎᖃᑦᑎᐊᕐᓂᖓᓂ ᐊᒃᓱᕈᕈᑕᐅᔪᓕᒫᓂᑦ, ᐊᒃᑐᐃᓂᖃᙱᓐᓂᖅᓴᐅᑎᑦᑎᓕᖅᖢᑎᒃ ᐊᒻᒪ ᐊᑑᑎᖃᕐᓂᖓᓂ ᑕᒪᐃᑎᒍᑦ.

ᑭᐅᓂᕐᒥ ᐊᔪᖅᓴᕐᓂᕐᒥ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ, ᑕᒪᒃᑭᑦ ᒐᕙᒪᑐᖃᒃᑯᑦ ᑲᒪᒋᔭᕆᐊᓕᖏᓐᓂ, ᓇᓗᓇᐃᖅᓯᓗᑎᒃ ᐃᓄᐃᑦ ᑐᕌᖅᑎᑦᑎᓂᖏᓐᓂ ᐃᓱᒪᓕᐅᕆᓂᐅᔪᒥ ᐱᓕᕆᓂᐅᔪᓂ, ᓇᓗᓇᐃᖅᓯᓂᐊᖅᐳᖅ ᓄᓇᓕᐅᔪᑦ ᓂᕆᑎᑦᑏᓐᓇᕈᓐᓇᕐᓂᖏᓐᓂ ᐃᓄᖁᑎᖏᓐᓂ. ᑭᓇᑐᐃᓐᓇᑦᑎᐊᖅ ᓯᓂᒋᐊᖅᑐᓪᓗᐊᙱᓚᖅ ᑳᒡᓗᓂ ᓄᓇᐅᔪᒥ ᐊᒃᖢᙱᑦᑐᐊᓗᖕᒥ ᑲᓇᑕᒥ. ᐅᑯᐊ ᑕᑯᔭᐅᙱᓐᓂᐅᔪᑦ ᓇᓕᒧᙱᓐᓂᐅᔪᑦ ᓇᖏᕐᓂᖃᙱᓚᑦ.

Leave a comment

Your email address will not be published. Required fields are marked *