ᓂᕈᐊᕈᓐᓇᔾᔮᙱᑦᑐᓄᑦ ᐅᓪᓗᖓᓂ ᓯᕗᓂᐊᓂ ᓂᕈᐊᕐᓂᖅ ᓯᑎᐱᕆ 10–ᒥ ᐊᒻᒪᓗ ᐊᑕᐅᓯᑐᐊᒥ ᐱᓇᓱᐊᕈᓯᐅᔪᒥ ᓂᕈᐊᕐᓂᕐᒧᑦ–ᐅᓪᓗᖓᓂ, ᐱᒻᒪᕆᐅᕗᖅ ᕿᒥᕐᕈᐊᕐᓗᑕ ᓯᕗᓪᓕᐅᔾᔭᐅᖁᔭᑦᑎᓐᓂ ᐃᓄᑐᐃᓐᓇᐅᓗᑕ ᐊᒻᒪᓗ ᓄᓇᕘᓪᓗᑕ ᑕᑯᒃᓴᐅᓂᐅᔪᒥ ᓱᒃᑲᔪᒥ–ᑎᑭᑉᐸᓪᓕᐊᔪᒥ ᒐᕙᒪᑐᖃᒃᑯᓐᓄᑦ ᓂᕈᐊᕐᓂᐅᔪᒧᑦ.

ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓇᒃᓯᐅᔾᔨᓚᐅᖅᐳᑦ ᖁᕕᐊᓱᒡᕕᖕᒥ ᐱᔪᒪᓂᕆᔭᖏᓐᓂ ᓂᕈᐊᒐᒃᓴᐅᔪᓄᑦ ᐋᒍᔅᑎ 24–ᒥ. ᖄᖅᑯᑦᑎᔪᒥ ᐱᔭᕇᖅᑕᐅᓂᖓᓂ ᐃᓄᐃᑦ ᓄᓇᖓᓐᓂ ᐊᑐᐊᒐᓄᑦ ᐊᒻᒪᓗ ᐊᑐᓕᖅᑎᑕᐅᓂᖓᓂ ᐃᓗᐊᓂ ᓯᕗᓪᓕᐅᔪᓂ ᑕᖅᑭᓂ ᐱᖓᓱᓂ ᓄᑖᖑᔪᒥ ᒐᕙᒪᐅᔪᒥ ᑲᑎᒪᔨᕐᔪᐊᙳᖅᑐᓄᑦ.

ᑲᑐᔾᔨᖃᑎᒌᖑᔪᑦ ᑎᑎᕋᖅᓯᓯᒪᕗᑦ ᐊᒥᓱᓂ ᐊᑐᖁᔭᐅᓇᔭᖅᑐᓂ, ᐃᓚᖃᖅᑐᒥ ᐱᕈᖅᓴᐃᓂᕐᒥ ᐱᑕᖃᖅᐸᒌᖅᑐᓄᑦ ᓄᕙᒡᔪᐊᕐᓇᖅ-19–ᒧᑦ ᖃᓱᒋᐊᕐᓂᐅᔪᓄᑦ ᐱᓕᕆᓂᐅᔪᓂ ᐊᒻᒪᓗ ᓴᖅᑭᑎᑦᑎᓂᕐᒥ ᐊᔪᖅᓴᕐᓂᕐᒥ ᒥᒃᖠᒋᐊᖅᑕᐅᓂᐅᔪᓄᑦ ᐱᓕᕆᓂᐅᔪᓂ, ᑭᐅᓂᕐᒥ ᐋᓐᓂᖅᓯᕆᓂᐅᔪᒥ ᕿᑎᐊᓂ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᓕᕆᔾᔪᓯᖓᓐᓂ, ᐊᒻᒪᓗᑦᑕᐅᖅ ᒐᕙᒪᒃᑯᓐᓂ “ᓱᓕᓂᕋᐃᓗᑎᒃ ᐊᖏᔪᓂ ᓄᑖᖑᔪᓂ ᐊᒻᒪᓗ ᐸᐸᑕᐅᖏᓐᓇᖅᑐᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᒃ ᐃᓄᐃᑦ ᓄᓇᖓᓐᓂ ᑎᒍᒥᐊᖅᑎᑦᑎᓂᕐᒧᑦ ᑲᓇᑕᐅᑉ ᐃᓄᖕᓄᑦ ᐱᔪᓐᓇᕐᓂᕆᔭᖏᓐᓂ ᐱᓕᕆᐊᒃᓴᖏᓐᓂ ᐊᒻᒪ ᐃᑲᔪᖅᓱᐃᓗᑎᒃ ᑮᓇᐅᔾᔭᒃᓴᓂᕐᒧᑦ ᐱᕙᓪᓕᐊᑎᑕᐅᓂᖏᓐᓂ.”

ᑐᐊᕕᕐᓇᓛᖑᔪᖅ ᐃᓚᖓ ᐅᑯᓂᖓᓗᒃᑖᖅ ᐊᑲᐅᙱᓕᐅᕈᑕᐅᔪᓄᑦ ᑕᒪᒃᑭᑦ ᐋᖅᑭᒍᑎᒃᓴᐅᔪᓐᓇᕋᔭᖅᑐᓂ ᐃᓄᖕᓄᑦ–ᐊᐅᓚᑕᐅᔭᕆᐊᖃᖅᐳᑦ ᐊᒻᒪ ᐃᒃᐱᒍᓱᑦᑎᐊᕐᓂᖃᕐᓗᑎᒃ ᐃᓄᖕᓂ ᐃᒻᒥᒃᑯᑦ–ᐃᓱᒪᒃᓴᖅᓯᐅᕆᓂᕐᒥ ᐊᒻᒪ ᐊᐅᓚᑦᑎᓂᕐᒥ.

ᑲᑎᙵᖃᑎᒌᒃᑐᓂ ᐊᒃᑐᐃᓂᐅᔪᓂ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᐊᒃᑐᐃᓂᖃᖅᐳᖅ ᓂᕿᒃᓴᖃᑦᑎᐊᕐᓂᕐᒥ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᐃᒻᒥᓃᕐᓂᕐᒧᑦ ᐅᓗᕆᐊᓇᕐᓂᖓᓂ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᔾᔪᑎᖃᖅᑐᒥ ᐳᕙᒡᓗᖕᓂᕐᒥ ᐊᒻᒪᓗ ᓄᕙᒡᔪᐊᕐᓇᖅ-19–ᒥ ᐊᒻᒪ ᐊᒥᓱᒃᑲᓐᓂᕐᓂ, ᑕᐃᒫᒃ ᑲᒪᓇᙱᓚᖅ ᑕᑯᓂᕐᒥ ᐊᖏᔪᒥ ᐃᑯᕐᕋᕆᔭᐅᓂᖓᓂ ᐊᑐᓂ ᑲᑎᒪᔨᕐᔪᐊᙳᕋᓱᒃᑐᓂ ᐱᓕᕆᐊᕆᔭᖏᓐᓂ ᐅᖃᐅᓯᒃᓴᖏᓐᓂ.

Liberal–ᑯᑦ ᓂᕈᐊᒐᒃᓴᖓ ᐹᑦ ᐊᕐᓇᒃᑲᖅ ᐅᖃᓚᐅᖅᐳᖅ ᑲᓇᑕᒥ ᐊᖓᔪᖅᑳᕐᔪᐊᖓᑕ ᐳᓚᕋᕐᓂᖓᓂ ᐋᒍᔅᑎ 30–ᒥ ᐊᖓᔪᖅᑳᖃᕐᕕᖓᓄᑦ “ᖃᐅᔨᒪᔪᐃᓐᓇᐅᕗᒍᑦ ᐊᒃᓱᐊᓗᒃ ᐃᒡᓗᖃᖅᑎᑦᑎᓂᕐᒥ ᐱᔭᕆᐊᖃᕐᓂᑦᑎᓐᓂ,” ᐊᒻᒪ ᐅᒃᐱᕈᓱᒃᐳᖅ ᐱᓕᕆᖃᑎᒌᖕᓂᐅᔪᒥ ᐊᓯᖏᓐᓂ ᓄᓇᕗᒻᒥ–ᑐᙵᕕᓕᖕᓂ ᑲᑎᙵᓂᐅᔪᓂ ᓯᕗᒻᒧᐊᕆᓂᐅᓂᐊᖅᐳᖅ ᐱᓕᕆᓂᕐᒧᑦ ᐃᓚᑰᓂᐅᔪᓂ ᐅᓄᕐᓂᖅᓴᐅᔪᓂ 3,000–ᓂ ᐃᒡᓗᒃᓴᐅᔪᓄᑦ.

NDP ᓂᕈᐊᒐᒃᓴᖓ ᓗᐊᕆ ᐃᓪᓚᐅᑦ ᓇᒃᓴᕈᒪᕗᖅ ᐱᐅᓂᖅᓴᐅᔪᓂ ᐃᑲᔪᕈᑎᒃᓴᓂ ᐊᒻᒪ ᐱᔨᑦᑎᕋᕐᓂᐅᔪᓂ ᓯᕗᓪᓕᐅᔾᔭᐅᖁᔭᐅᔪᓂ ᐃᓂᐅᔪᓂᑦ, “ᓲᕐᓗ ᐃᒡᓗᒃᓴᒃᑲᓐᓂᕐᓂ, ᓄᑖᙳᕆᐊᖅᑎᑦᑎᓂᕐᒥ ᐊᒻᒪ ᐋᖅᑭᒃᓱᖅᑕᐅᓂᖏᓐᓂ ᐱᑕᖃᖅᐸᒌᖅᑐᓂ ᐃᒡᓗᓂᑦ. ᐃᒡᓗᒃᓴᓂ ᐊᑐᐃᓐᓇᐅᓂᖅᓴᐅᑎᑦᑎᓂᕐᒥ ᐃᓄᑐᖃᕐᓄᑦ ᐊᒻᒪ ᑭᐅᓂᕐᒧᑦ ᐅᖁᖕᒥ ᑐᐊᕕᕐᓇᕐᓂᐅᔪᒥ.”

ᑲᖏᖅᖠᓂᐅᕐᒥᐅᑕᖅ ᓗᐊᕋ ᒪᑲᓐᓯ, ᓂᕈᐊᒐᒃᓴᐅᔪᖅ Conservative ᑲᑎᒪᔨᕐᔪᐊᖑᔪᓄᑦ ᑭᒡᒐᖅᑐᐃᔨᒃᓴᖓᓄᑦ, ᐅᖃᓚᐅᖅᐳᖅ ᐱᓕᕆᐊᖃᕐᓂᕐᒥ ᐃᒡᓗᒃᓴᖃᖅᑎᑦᑎᓂᕐᒥ ᑐᐊᕕᕐᓇᕐᓂᐅᔪᒥ ᐱᖃᕆᐊᖃᕐᓂᐊᖅᐳᖅ ᖃᔅᓯᒐᓚᖕᓂ–ᑮᓇᓕᖕᓂ ᑐᕌᒐᕆᔭᐅᔪᒥ.

ᐅᖃᓚᐅᖅᐳᖅ ᑕᑯᒃᑲᓐᓂᕈᒪᓇᔭᕐᓂᖓᓂ ᑭᒃᑯᓕᒫᓄᑦ ᐃᓐᓇᒃᑯᕕᖕᓂ ᓴᓇᔭᐅᓂᖏᓐᓂ ᓄᓇᕗᒻᒥ ᐃᑲᔪᖅᓱᐃᒃᑲᓐᓂᕐᓂᕐᒧᑦ ᐃᓄᑐᖃᕐᓂ ᐸᖅᑭᓂᖏᑦ ᐱᓪᓚᕆᙳᓚᐅᙱᓐᓂᖏᓐᓂ ᐊᒻᒪᓗ ᖃᓱᑎᑦᑎᕚᓪᓕᕐᓗᓂ ᐃᓚᖏᓐᓂ ᐃᓄᓕᒫᓄᑦ ᐃᒡᓗᒃᓴᖃᕐᓂᕐᒧᑦ ᐱᔭᕆᐊᓕᖏᓐᓂ.

ᐃᓱᒪᒃᓴᖅᓯᐅᕆᔭᐅᓪᓗᐊᖅᐳᖅ ᖃᓄᖅ ᐃᓄᐃᑦ ᓂᕈᐊᕆᐊᖅᑐᕐᓂᖏᓐᓂ, ᐱᓗᐊᖅᑐᒥ ᓂᕈᐊᕈᑎᒃᓴᑦ ᑎᑎᕋᖅᓯᒪᙱᒻᒪᑕ ᓱᓕ ᓄᓇᕘᑉ ᐅᖃᐅᓯᖓᓂ ᐅᓄᕐᓂᖅᓴᐅᔪᓄᑦ, NDP ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᒧᒥᓛᖅ ᖃᖅᑲᐅᑉ ᒫᓐᓇᓕᓴᐅᔪᒥ ᓴᖅᑭᑎᑕᐅᓯᒪᔪᒥ ᐱᖁᔭᒃᓴᒥ ᑕᐃᒪᐃᓕᖓᔪᒥ. ᑲᓇᑕᒥ ᒪᓕᒐᓕᐅᖅᑎᖏᑦ ᒪᑐᔭᐅᓚᐅᖅᐳᖅ ᒪᓕᒐᓕᐊᖑᓇᓱᒃᑐᖅ ᖄᖏᖅᑕᐅᓚᐅᕐᓇᓂ.

ᖃᖅᑲᖅ ᐅᖃᓚᐅᖅᐳᖅ ᔫᓂᒥ, “ᒥᒃᖠᒋᐊᖅᑎᑦᑎᓂᕐᒥ ᐊᒡᕕᐊᕈᑕᐅᔪᓂ ᐃᓚᖃᕆᐊᖃᖅᐳᖅ ᐃᒃᐱᒍᓱᑦᑎᐊᕐᓂᕐᒥ ᐅᖃᐅᓯᑦᑎᓐᓂ.” “ᖃᐅᔨᒪᕗᖓ ᒐᕙᒪᑐᖃᒃᑯᑦ ᐅᖃᕋᔭᕐᓂᖏᓐᓂ ᐅᖓᕙᕆᐊᖅᓯᒪᓂᖏᓐᓂ ᐱᔾᔪᑎᖃᖅᑐᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ ᒪᓕᒐᖓᓐᓂ ᐊᒻᒪᓗ ᐃᓕᓴᖅᓯᕗᖓ ᖃᓄᖅ ᐅᖃᓪᓚᒃᐸᖕᓂᖏᓐᓂ ᐃᓗᐊᓂ ᓄᓇᕗᒻᒥ ᒐᕙᒪᑐᖃᒃᑯᑦ ᑐᓂᓯᔭᕆᐊᖃᖅᐳᑦ ᐱᔨᑦᑎᕋᕐᓂᐅᔪᒥ ᐃᓐᓄᒍᓐᓇᕐᓂᖃᖅᑎᓪᓗᒍ,” ᐅᖃᓚᐅᖅᐳᖅ ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᒻᒥ ᑐᙵᕕᒃᑯᓐᓄᑦ. ᐃᓚᒋᐊᖅᓯᓚᐅᖅᐳᖅ, ᐊᑐᓪᓗᐊᙱᒃᑲᓗᐊᖅᑎᓪᓗᒍ ᐃᓐᓄᒍᓐᓇᕐᓂᖓᓂ, ᐊᑐᕐᓂᖃᓪᓗᐊᖅᐳᖅ ᐱᔭᕆᐊᖃᕐᓂᐅᔪᒥ.

“ᐱᔭᕆᐊᖃᕐᓂᖃᑦᑎᐊᖅᐳᖅ ᓄᓇᕘᑉ ᐃᓗᐊᓂ ᐃᓄᓕᒫᑦ ᑕᒪᕐᒥᒐᓚᖕᓂ ᐅᖃᐅᓯᖓ ᐃᓄᒃᑑᑎᓪᓗᒍ.”

ᓂᕈᐊᖅᑐᓕᕆᓂᕐᒧᑦ ᑲᓇᑕᒥ ᐃᖅᑲᓇᐃᔭᖅᑎᑦᑎᓇᓱᐊᓲᖑᕗᑦ ᓴᓇᔨᐅᔪᓂ ᐃᓗᐊᓂ ᓇᖕᒥᓂᖅ ᓄᓇᓕᖏᓐᓂ ᐅᖃᓪᓚᓲᓂᒃ ᐃᓄᒃᑎᑐᒻᒥ ᐃᓄᐃᓐᓇᖅᑐᒥᓪᓘᓐᓃᑦ, ᐊᒻᒪᓗ ᑐᓵᔨᐅᓂᕐᒧᑦ ᐱᔨᑦᑎᕋᕐᓂᐅᔪᒥ ᐋᖅᑭᒃᓱᖅᑕᐅᔪᓐᓇᕆᕗᑦ ᑎᑭᐅᒪᔪᒧᑦ ᓯᑎᐱᕆ 14–ᒧᑦ. ᓂᕈᐊᖅᑏᑦ ᓇᒃᓴᕈᓐᓇᖅᐳᑦ ᓇᖕᒥᓂᖅ ᑐᓵᔨᒃᓴᖓᓂ ᓂᕈᐊᕆᐊᖅᑐᕐᓗᑎᒃ ᐱᔪᒪᒍᑎᒃ, ᑭᓯᐊᓂ ᑰᑦᑎᖅ ᓇᓚᐅᑉᐳᖅ ᐅᖃᕐᓂᕐᒥ ᓂᕈᐊᖅᑎᓄᑦ ᑲᒪᒋᔭᐅᓪᓗᐊᙱᓚᖅ ᓇᓂᓯᓂᕐᒧᑦ ᑐᓵᔨᒃᓴᓂ ᐃᑲᔪᕐᓂᐊᖅᑐᓂ.

ᑭᒃᑯᑐᐃᓐᓇᐃ ᐃᓱᒪᒋᔭᖏᓐᓂ ᑐᑭᓕᐊᖃᑎᖃᕐᓂᕐᓂ, ᓇᓗᓇᐃᖅᓯᓂᑐᐊᖑᕗᖅ ᑐᓴᖅᑕᐅᓂᐊᕐᓂᖓᓂ ᐊᑐᕐᓂᕐᒧᑦ ᐱᔪᓐᓇᐅᑎᖏᓐᓂ ᓂᕈᐊᕐᓂᕐᒧᑦ, ᐃᓗᐊᑦᑎᐊᕈᕕᑦ ᑭᓯᐊᓂ. ᐊᒻᒪ ᑕᐃᒪᐃᓕᐅᒃᑲᓐᓂᕐᒥᓗᑎᒃ ᑕᖅᑭᐅᑉ ᐅᖓᑎᑦᑎᐊᖓᓂ ᐅᑎᕈᑦᑕ ᓂᕈᐊᕐᓂᕐᒧᑦ ᓄᓇᕗᒻᒥ ᓂᕈᐊᕐᓂᐅᔪᒧᑦ ᐅᒃᑐᐱᕆ 25–ᒥ.

Leave a comment

Your email address will not be published. Required fields are marked *