ᒥᓂᔅᑕᐃᑦ ᑲᑎᒪᔨᖏᓐᓄᑦ ᒥᓂᔅᑕᒋᔭᐅᔪᖅ ᐋᑕᒻ ᓚᐃᑦᔅᑑᓐ ᐃᒻᒥᓂᒃ ᓇᓂᓯᓚᐅᖅᐳᖅ ᐊᑲᐅᙱᓕᐅᕈᑕᐅᒐᓛᒃᑐᒥ ᑕᖅᑭᐅᓚᐅᖅᑐᒥ ᖄᖏᖅᓯᒪᔪᒥ ᑲᑎᒪᔨᐅᖃᑎᖏᑦ ᐱᒋᐊᖅᑎᑦᑎᓚᐅᖅᑎᓪᓗᒋᑦ ᖃᐅᔨᓴᕐᓂᐅᔪᒥ ᓄᓇᕘᑉ ᐅᒃᐱᕆᔭᐅᔪᓐᓇᕆᐊᖃᕐᓂᕐᒧᑦ ᑲᒥᓴᓇᖓᓄᑦ ᐱᑕᖃᑐᐃᓐᓇᕆᐊᓕᖕᒥ ᐱᓕᕆᐊᒥᒃ ᐊᑐᕐᓂᕐᓘᑎᖃᕐᓂᖅ ᐱᕙᓪᓕᐊᔾᔪᑎᒋᓇᓱᐊᕐᓗᒍ ᓴᖅᑭᑕᐅᔪᒥ ᕿᓚᒻᒥᐅᔪᒥ ᑎᒃᑯᐊᖅᑕᐅᓂᐅᔪᒥ ᐱᓕᕆᕝᕕᖓᑕ ᐃᓗᐊᓂ.

ᓚᐃᑦᔅᑑᓐ ᐊᖏᖅᓯᓚᐅᖅᐳᖅ ᑎᒃᑯᐊᖅᓯᓂᐅᔪᒥ ᓄᓕᐊᖓᓂ ᒥᓂᔅᑕᒧᑦ ᑐᒡᓕᕆᔭᐅᓚᐅᑲᖕᓂᐊᖅᑐᒥ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐅᓪᓗᓄᑦ ᑕᓪᓕᒪᓄᑦ, ᐱᔭᕇᖅᓯᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐋᖅᑭᒃᓱᖅᓯᒪᔪᒥ ᕿᑲᕐᓂᖓᓄᑦ ᐅᒃᐱᕆᔭᐅᔪᓐᓇᕆᐊᖃᕐᓂᕐᒧᑦ ᑲᒥᓴᓇᐅᑉ ᑲᑕᕆ ᐲᑐᓴᓐ ᐅᓂᒃᑳᕆᓚᐅᖅᑕᖓᓂ “ᐃᖅᑲᓇᐃᔭᖅᑎᖃᙱᓗᐊᒃᑲᐅᓂᖓᓂ” ᐱᓕᕆᕝᕕᖓᓂ.

ᒥᓂᔅᑕᐅᑉ ᑐᒡᓕᐊ ᐃᓱᓕᑦᑎᓚᐅᖅᐳᖅ ᓚᐃᑦᔅᑑᓐ ᓄᓕᐊᖓ ᓈᒻᒪᓛᖑᓚᐅᖅᐳᖅ ᐃᓇᖏᖅᓯᓚᐅᑲᖕᓂᖓᓂ ᐱᔾᔪᑎᖃᖅᑐᒥ “ᓴᙱᔪᒥ ᐊᔪᙱᓐᓂᕆᔭᖏᓐᓂ, ᖃᐅᔨᒪᓂᖓᓂ ᐊᒻᒪ ᐊᑐᕐᓂᑯᖏᓐᓂ,” ᐊᒻᒪ ᐱᓕᕆᓂᖃᓚᐅᖅᐳᑦ ᐱᑦᑕᐃᔨᒪᑎᑦᑎᓂᕐᒧᑦ ᓚᐃᑦᔅᑑᓐ ᓄᓕᐊᖓᓂ ᑐᕌᖓᓂᓕᖕᒥ ᐅᐸᖃᑎᖃᕐᓂᖓᓂ ᒥᓂᔅᑕᒧᑦ ᐱᔾᔪᑎᖃᖅᑐᒥ ᐱᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓄᑦ.

ᓚᐃᑦᔅᑑᓐ ᑕᐃᒪᙵᓂ ᐃᒻᒥᓂᒃ ᓴᓂᕐᕙᐃᓯᒪᕗᖅ, ᓴᒃᑯᐃᑦᑎᓪᓗᓂ ᒥᓂᔅᑕᐅᑉ ᑲᒪᒋᔭᕆᐊᖃᖅᑕᖏᓐᓂ “ᑭᓯᐊᓂ ᖃᖓᐅᓂᖓᓂ ᒪᓕᒐᓕᐅᕐᕕᒃ ᐱᕕᒃᓴᖄᓂᒃᑯᓂ ᐋᖅᑭᒃᓯᓪᓚᑦᑖᕐᓂᖏᓐᓂ ᐆᒥᖓ ᐱᓕᕆᐊᖑᔪᒥ ᒪᓕᒃᑐᒥ ᑐᓂᓯᓂᐅᔪᒥ ᐅᒃᐱᕆᔭᐅᔪᓐᓇᕆᐊᖃᕐᓂᕐᒧᑦ ᒪᓕᒐᐅᔪᒥ,” ᓯᕗᓕᖅᑎ ᐅᖃᓚᐅᖅᐳᖅ.

ᐲᑐᓴᓐ, ᑲᒪᒋᔭᖃᖅᑐᒥ ᐃᓕᖅᑯᓯᖃᑦᑎᐊᕋᓱᖕᓇᕐᓂᕐᒧᑦ ᑭᒡᒐᖅᑐᐃᓪᓗᓂ ᒪᓕᒐᓕᐅᕐᕕᖕᒥ, ᐃᒪᐃᖁᔨᓇᔭᖅᐳᖅ ᒪᔨᒐᓕᐅᖅᑏᑦ ᐃᓂᖅᑎᕆᓗᑎᒃ ᓚᐃᑦᔅᑑᓐᒥ ᐊᒻᒪᓗ ᒪᓕᒐᓕᐅᖅᑎ ᐃᓄᓕᒫᓄᑦ ᓇᓗᓇᐃᖅᓯᓗᓂ ᐱᓕᕆᓂᖓᓂ.

ᑭᓯᐊᓂ, ᓴᒃᑯᐃᑦᑎᔭᕆᐊᖃᕐᓂᖓᓂ ᒥᓂᔅᑕᐅᑉ ᑲᒪᒋᔭᕆᐊᖃᖅᑕᖏᓐᓂ ᐱᓪᓚᑲᐅᔭᕐᓂᐅᔮᖅᐳᖅ, ᑕᒪᒃᑭᑦ ᖃᓄᐃᓐᓂᐅᔪᓂ ᐃᓱᒪᒋᔭᐅᓪᓗᑎᒃ.

ᐲᑐᓴᓐ ᐅᖃᓚᐅᖅᐳᖅ ᓚᐃᑦᔅᑑᓐ ᓯᕗᓪᓕᕐᒥ ᐃᓱᒫᓘᑎᖃᓚᐅᖅᐳᖅ ᐱᔾᔪᑎᖃᖅᑐᒥ ᑎᒃᑯᐊᖅᑕᐅᓂᐅᔪᒥ ᑭᓯᐊᓂ ᓈᒻᒪᒍᓱᓚᐅᖅᐳᖅ ᒥᓂᔅᑕᐅᑉ ᑐᒡᓕᖓᑕ ᐅᖃᐅᔾᔨᓂᖓᓂ ᐊᒻᒪ ᑐᓂᓯᓚᐅᖅᐳᖅ ᐊᑎᓕᐅᕐᓂᖓᓂ ᐊᖏᕐᓂᖓᓂ.

ᓱᓕᒐᓗᐊᖅᑎᓪᓗᒍ ᐃᓚᖏᓐᓂ ᐅᔾᔨᕆᙱᓐᓂᖃᓚᐅᕐᓂᖓᓂ, ᐱᓗᐊᖅᑐᒥ ᓚᐃᑦᔅᑑᓐᒥ ᓴᐳᔾᔭᐅᓂᖓᓂ “ᑭᒃᑯᓕᒫᑦ (ᐊᖓᔪᖅᑳᑦ ᐃᖅᑲᓇᐃᔭᖅᑏᑦ) ᖃᐅᔨᒪᓚᐅᖅᐳᑦ” ᐊᐃᑉᐸᖃᕐᓂᖓᓂ ᐊᑐᖁᔭᐅᓇᔭᖅᑕᒥ ᑎᒃᑯᐊᖅᑕᐅᓇᓱᐊᖅᑐᒥ, ᐱᑕᖃᙱᓗᐊᕐᓂᖓᓂ ᐱᔪᒪᓂᐅᔪᓂ ᐊᓯᖏᓐᓂ ᐊᑐᐃᓐᓴᐅᑐᐃᓐᓇᕆᐊᖃᖅᑐᓂ ᐊᖓᔪᖅᑳᖑᔪᓂ ᐃᖅᑲᓇᐃᔭᖅᑎᐅᔪᓂ ᐊᔪᕐᓇᖅᑐᒦᑎᑦᑎᓯᒪᕗᖅ.

ᐲᑐᓴᓐ ᑭᐅᓂᖓ ᐃᒪᐃᓚᐅᖅᐳᖅ “ᐱᓕᕆᕝᕕᒃᓴᖃᒃᑲᓐᓂᓚᐅᙱᓚᖅ ᐊᓯᖏᓐᓂ ᐱᓕᕆᕝᕕᐅᔪᓂ ᐃᓱᒪᓕᐅᕆᓂᕐᒧᑦ ᐊᖓᔪᖅᑳᖑᔪᓂ ᐃᖅᑲᓇᐃᔭᖅᑎᓂ ᐃᓗᓪᓕᖅᓯᔪᓐᓇᕐᓂᖏᓐᓂ ᐆᒥᖓ ᐃᓂᐅᔪᒥᒃ.”

ᐊᖏᓛᖑᔪᖅ ᐊᑲᐅᙱᓕᐅᕈᑕᐅᔪᒥ ᐅᓇᐅᙱᓚᖅ ᐱᓕᕆᐊᒥᒃ ᐊᑐᕐᓂᕐᓘᑎᖃᕐᓂᖅ ᐱᕙᓪᓕᐊᔾᔪᑎᒋᓇᓱᐊᕐᓗᒍ, ᑭᓯᐊᓂ ᐃᓱᒪᒋᓇᒍ ᐱᓕᕆᓂᐅᔪᒥ ᓚᐃᑦᔅᑑᓐ ᐃᓱᒪᒋᔭᖃᓚᐅᕐᓂᖓᓂ ᕿᒥᕐᕈᔭᐅᑦᑎᐊᕐᓂᐅᔪᒥ ᐊᒻᒪ ᐊᖏᖅᓯᓂᕐᒥ ᐸᕐᓇᐅᑎᒥᒃ ᓈᒻᒪᒋᔭᐅᓚᐅᖅᑐᒥ ᑕᒪᒃᑭᓄᑦ ᐃᕐᙲᓐᓇᑲᐅᑎᒋᒥ ᐱᓕᕆᖃᑎᒋᔭᐅᔪᓂ, ᐋᔩᖃᑎᒋᔭᐅᓚᐅᙱᓚᖅ ᓈᒻᒪᒃᑐᒥ, ᐃᓗᐊᒍᑦ ᓯᓚᑖᓂᓪᓘᓐᓃᑦ.

ᐊᕐᕕᐊᑦ-ᓂᒋᕐᒥ ᒪᓕᒐᓕᐅᖅᑎ ᔫ ᓴᕕᑲᑖᖅ ᐃᓚᒋᔭᐅᖃᑕᐅᓚᐅᖅᐳᖅ ᓴᖅᑭᑎᑦᑎᓂᕐᒧᑦ “ᓇᐃᓂᕐᒧᑦ ᖃᐅᔨᓴᕐᓂᐅᔪᒥ” ᐅᕝᕙᓘᓐᓃᑦ ᐃᓱᒪᓂᐅᔪᒥ ᖃᓄᐃᑉᐸᓪᓕᐊᓂᐅᔪᓄᑦ.

ᐅᒃᐱᕆᔭᐅᔪᓐᓇᕆᐊᖃᕐᓂᕐᒧᑦ ᑲᒥᓴᓇᖓ ᐃᓱᐊᓂ ᓇᓂᓯᓚᐅᖅᐳᖅ “ᑕᐃᒫᒃ … ᒥᓂᔅᑕ ᓚᐃᑦᔅᑑᓐ ᑕᒻᒪᓚᐅᕐᓂᖓᓂ ᐃᓱᒪᓕᐅᕆᓂᐅᔪᒥ ᐱᓕᕆᑦᑎᐊᕋᓱᐊᖅᑎᓪᓗᒍ ᐊᒻᒪᓗ ᑐᙵᕕᐅᔪᒥ ᐅᖃᐅᔾᔨᓂᐅᔪᒥ ᑐᓂᔭᐅᔪᒥ ᑕᐃᔅᓱᒪᓂ … ᑎᒃᑯᐊᕆᔪᒪᕗᖓ ᑕᑯᒃᓴᐅᓂᖃᙱᓐᓂᖓᓂ ᐱᕋᔭᖕᓂᐅᔪᒥ, ᓱᓕᙱᑦᑐᒥ, ᓈᒻᒪᙱᑦᑐᒥ ᐱᕚᓪᓕᕈᑕᐅᔪᒥ ᐅᕝᕙᓘᓐᓃᑦ ᐱᕋᔭᖕᓂᐅᔪᒥ ᖃᓄᐃᓕᐅᕐᓂᐅᔪᓂ ᐅᕝᕙᓘᓐᓃᑦ ᑎᓕᐅᕈᑕᐅᔪᓂ ᐃᓚᒋᔭᐅᔪᓂ ᐅᑯᓇᓂ ᖃᓄᐃᓐᓂᐅᔪᓄᑦ. ᑕᑯᒃᓴᐅᓂᖃᓚᐅᙱᓚᖅ ᐅᖓᕙᕆᐊᕐᓂᐅᔪᒥ ᐃᒻᒥᒎᖅᑐᒥ ᐱᔪᒪᓂᐅᔪᒥ ᒥᓂᔅᑕᒧᑦ, ᓄᓕᐊᖓᓄᑦ ᐊᓯᖓᓐᓂᓪᓘᓐᓃᑦ ᐃᓄᖕᒧᑦ.”

ᐱᓕᕆᐊᒥᒃ ᐊᑐᕐᓂᕐᓘᑎᖃᕐᓂᖅ ᐱᕙᓪᓕᐊᔾᔪᑎᒋᓇᓱᐊᕐᓗᒍ ᑕᐃᒪᐃᙱᑎᑕᐅᒃᓴᐅᙱᑲᓴᒃᐳᖅ ᑕᐃᒪᐃᑦᑐᒥ ᑳᓐᑐᕌᒃᑕᐅᓯᒪᔪᓂ ᐃᖅᑲᓇᐃᔭᖅᑎᒃᓴᐅᔪᓂ – ᑭᒃᑯᓕᒫᑦ ᖃᐅᔨᒪᕗᑦ ᑭᒃᑯᓕᒫᓂ; ᐃᓚᒌᖑᔪᑦ ᐅᓄᖅᑑᕗᑦ; ᐊᖏᔪᒥ ᓇᒦᕈᓘᔭᖅᐳᑦ ᐊᒻᒪ ᐃᓛᓐᓂᒃᑯᑦ ᓇᓗᓇᕐᓂᖅᓴᐅᓪᓗᑎᒃ ᖃᓪᓗᓈᓂ–ᐱᓕᕆᓂᐅᔪᓄᑦ ᐊᐅᓚᑕᐅᓂᖓᓂ ᐱᔪᓐᓴᖅᑎᑕᐅᓂᖏᓐᓂ.

ᑕᑯᒃᓴᐅᑦᑎᐊᕐᓂᐅᔪᒥ ᐊᒻᒪ ᓴᖅᑭᑎᑦᑎᓂᐅᔪᒥ ᓄᖅᑲᖅᑎᑦᑎᔪᓐᓇᓚᐅᖅᐳᖅ ᐆᒥᖓ ᐊᑲᐅᙱᓕᐅᕈᑕᐅᔪᒥ ᐱᒋᐊᓚᐅᖅᑳᕋᓂ ᑎᓯᐱᕆᒥ – ᑎᑎᕋᖅᓯᒪᓂᐅᔪᒥ ᑕᑯᒃᓴᐅᓂᐅᔪᒥ ᐅᑯᓂᖓ ᐅᖃᓪᓚᖕᓂᐅᔪᓂ ᐅᕙᑦᑎᓐᓂ ᓴᐳᔾᔨᓲᖑᕗᑦ ᐃᓗᐊᙱᑦᑐᓂ ᖃᓄᐃᓕᖓᓂᐅᔪᓂ ᐃᖅᑲᓇᐃᔭᕐᕕᖕᒥ.

ᐃᓱᒪᓂᐅᔪᒥ ᕿᓚᒻᒥᐅᔪᒥ ᐋᖅᑭᒃᓱᖅᑕᐅᔭᕆᐊᖃᙱᑉᐳᖅ ᐱᔪᒪᔪᓂ ᐃᓚᐅᖃᑕᐅᔪᓂ ᐅᖃᐅᔾᔭᐅᓯᒪᑎᓪᓗᒋᑦ.

Leave a comment

Your email address will not be published. Required fields are marked *