ᓄᓇᕗᒻᒥ ᒐᕙᒪᒃᑯᑦ (GN) ᓴᖅᑭᑎᑦᑎᓯᒪᕗᑦ ᑳᓐᑐᕌᒃᑖᕋᓱᐊᖅᑐᒥ ᖃᐃᖁᔨᓪᓗᑎᒃ ᑳᓐᑐᕌᒃᑎᐅᔪᓂ ᐋᖅᑭᒃᓯᓂᖏᓐᓂ ᐸᕐᓇᐅᑎᒥᒃ ᓄᓇᕗᓕᒫᒥ ᑎᓯᔪᓄᑦ ᐊᒃᑕᑯᓂ ᐊᐅᓚᑦᑎᓂᐅᔪᒥ ᑐᕌᒐᕆᔭᐅᔪᒥ, ᐱᓗᐊᖅᑐᒥ ᕿᓂᖅᑐᓂ ᐃᓱᒪᑐᓂᐅᔪᓂ ᑲᓛᖦᖠᐅᑉ ᓄᓈᓐᓂ ᐊᒻᒪ ᐊᓛᔅᑲᒥ ᐊᒻᒪ ᖃᓄᖅ ᐊᑐᓕᖅᑎᑦᑎᓂᕐᒧᑦ, “ᐊᖏᒡᓕᒋᐊᖅᑎᑦᑎᓂᕐᒧᑦ ᐱᕕᒃᓴᖃᕐᓂᐅᔪᒥ ᐊᒃᑕᑯᓂ ᓴᖑᑎᑦᑎᓂᐅᔪᒥ ᐊᒻᒪ ᐊᒃᑕᑯᓂ–ᐆᒻᒪᖅᑯᑎᓄᑦ ᓴᖅᑭᑎᑦᑎᓂᐅᔪᒥ, ᐊᒻᒪ ᐊᑐᓕᖅᑎᑦᑎᓂᕐᒥ ᑕᐃᒪᐃᒐᔪᒃᑐᒥ ᐅᓯᔭᐅᓂᐅᔪᓂ ᐊᑦᑕᓇᖅᑐᓂ ᐊᒃᑕᑯᓂ ᓴᐳᔾᔨᓯᒪᓂᕐᒧᑦ ᐃᓄᓕᒫᓂᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐊᕙᑎᒧᑦ.”
ᐊᑯᓂᐅᔪᒥ ᑐᕌᒐᒃᓴᖓ, ᓇᐃᓈᕆᔪᒥ, ᐊᖏᓛᖓᓂ ᓴᖅᑭᑎᑦᑎᓂᐅᔪᒥ ᐱᑕᖃᙱᓗᐊᕐᓂᖓᓄᑦ, ᓄᓇᓕᖕᓂ ᐅᖃᐅᔾᔭᐅᓯᒪᔪᓄᑦ ᐊᕕᒃᑐᐃᖁᔭᐅᓪᓗᑎᒃ ᐊᒻᒪ ᐊᒃᑕᑯᓂ ᑲᒪᒋᔭᖃᕐᓂᖏᓐᓂ ᑭᓯᐊᓂ ᑐᓂᔭᐅᓯᒪᓇᑎᒃ ᓈᒻᒪᒃᑐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐱᔭᕇᖅᓯᓂᕐᒥ ᐃᓅᓯᖏᑕ–ᐃᓱᐊᓂ ᐅᑯᓄᖓ ᖃᓕᕇᖑᔪᓄᑦ ᐊᔾᔨᒌᙱᓐᓂᐅᔪᓂ ᐊᖏᓂᓕᖕᓂ ᐊᑦᑕᓇᖅᑐᓂ ᐊᒃᑕᑯᓂ.
ᓄᓇᕗᒻᒥ ᒐᕙᒪᒃᑯᑦ ᐅᖃᓚᐅᖅᐳᑦ 2014–ᒥ “ᐊᒥᓱᑦ ᐊᒃᑕᕐᕖᑦ ᑕᑖᓗᐊᕐᓂᖏᓐᓂ, ᓈᒻᒪᒃᑐᒥ ᐊᕕᒃᑐᐃᓂᐅᔪᒥ ᐅᕝᕙᓘᓐᓃᑦ ᑐᖅᑯᐃᓂᖃᙱᓚᑦ ᐊᑦᑕᓇᖅᑐᒥ ᐊᒃᑕᑯᓂ, ᐃᔅᓴᒃᓯᒪᓂᐅᔪᓂ ᐅᕝᕙᓘᓐᓃᑦ ᓱᕈᔪᖕᓇᖅᑐᓂ ᑰᒍᔾᔭᐅᓂᖓᓄᑦ ᐊᐅᓚᑦᑎᓂᕐᒥ, ᐊᒻᒪᓗ ᐊᐅᓚᑦᑎᓂᖃᙱᓚᑦ ᐃᓄᓕᒫᓄᑦ ᐊᑐᐃᓐᓇᖃᕐᓂᖏᓐᓂ ᐊᒃᑕᕐᕕᖕᓄᑦ. ᐱᑕᖃᙱᓗᐊᕐᓂᖓᓂ ᑕᐃᔅᓱᒪᓂᒃᑲᓐᓂᖅ ᓈᒻᒪᒃᑐᓂ ᐊᐅᓚᑦᑎᓂᐅᔪᒥ ᐊᒻᒪ ᓈᒻᒪᒃᑐᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐅᑯᓇᓂ ᐃᓂᐅᔪᓂ ᓴᖅᑭᔮᖅᑎᑦᑎᕗᖅ ᐅᓗᕆᐊᓇᕈᑕᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐊᑦᑕᓇᕐᓂᖓᓄᑦ ᓄᓇᕗᒻᒥᐅᓄᑦ ᐊᒻᒪ ᐊᕙᑎᒧᑦ.”
ᐅᓇ ᑐᐊᕕᕐᓇᖅᖢᓂ ᐱᓕᕆᓂᐅᕗᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓄᓇᓕᑦᑎᓐᓂ ᐊᒻᒪ ᐊᑲᐅᙱᓕᐅᕈᑕᐅᕗᖅ ᐱᕈᖅᐸᓪᓕᐊᖏᓐᓇᖅᑐᒥ ᖃᐅᔨᓴᕋᓱᐊᖅᑎᓪᓗᑕ ᐱᐅᓂᖅᐹᖑᔪᓂ ᐊᑐᖅᑕᐅᓂᐅᔪᓂ.
ᓱᕈᐃᓂᖅ ᐊᒻᒪ ᐳᔪᖅ ᒪᑐᐃᖓᔪᓂ ᐃᑭᑎᑕᐅᓂᐅᔪᓂ ᓴᓂᕐᓂ ᐱᑕᖃᒐᔪᒃᖢᑎᒃ ᐃᓱᒫᓘᑕᐅᕗᑦ, ᐊᒻᒪᓗᑦᑕᐅᖅ ᐱᑕᖃᑐᐃᓐᓇᕆᐊᖃᖅᑐᒥ ᓱᕈᖅᑎᕆᓂᐅᔪᒥ ᐃᒥᖅᑕᕐᕕᖕᓂ ᐊᓄᕆᒧᑦ–ᐃᖏᕐᕋᔪᓄᑦ ᓴᓂᕐᓂ ᐊᒻᒪ ᐊᒃᑐᐃᓂᐅᔪᒥ ᓱᕈᖅᑎᕆᓂᖃᕈᓐᓇᕐᓂᖓᓂ ᐃᒪᕐᒧᑦ ᐆᒪᔪᐃᑦ ᓄᖅᑭᐅᕐᕕᖓᓂ ᐊᒻᒪ ᐊᖑᓇᓱᒡᕕᐅᕙᒃᑐᓂ ᐃᓂᐅᔪᓄᑦ.
ᒫᔾᔨ 23–ᒥ ᐅᑭᐅᖅᑕᖅᑐᒥ ᐃᒫᓗᖕᒥ ᐅᓂᒃᑳᓕᐊᒥ ᐃᓂᖅᑎᕆᓚᐅᖅᐳᖅ ᓄᓇᓕᖕᓂ ᑎᓯᔪᓂ ᐊᒃᑕᑯᓂ ᐊᒃᑕᕐᕕᐅᔪᓂ ᐊᒻᒪ ᑯᕕᖅᑕᖅᑕᐅᓂᑯᓂ ᑕᓯᕐᓂ ᐊᖅᑭᒃᓯᒪᓂᖃᑦᑎᐊᙱᓚᑦ ᐱᓕᕆᓂᕐᒧᑦ ᐊᖏᓂᖓᓂ ᐊᒻᒪ ᐋᓐᓂᐊᕐᓇᕐᓂᖓᓂ ᐊᒃᑕᑯᓂ ᑐᖅᑯᐃᕙᒃᑕᖏᓐᓂ. ᐊᖏᒡᓕᕙᓪᓕᐊᓪᓗᐊᙱᓚᑦ, ᐊᒻᒪᓗ, ᖄᒃᑲᓐᓂᐊᒍᑦ ᓄᓇᖓ ᐃᓂᒃᓴᖓᓂ ᐱᔭᐅᔭᕆᐊᖃᕋᔭᕐᓂᖓᓂ ᐃᒡᓗᒃᓴᓄᑦ ᐊᒻᒪ ᐊᓯᖏᓐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓄᑦ.
ᐅᑭᐅᖅᑕᖅᑐᒥ ᐃᒫᓗᖕᒥ ᐃᒪᐃᓕᔫᔮᖅᐳᑦ ᒐᕙᒪᒃᑯᑦ ᐋᖅᑭᒃᓯᓂᖏᓐᓂ ᑐᕌᒐᒃᓴᐅᔪᒥ ᒥᒃᖠᒋᐊᖅᑎᑦᑎᓗᑎᒃ ᐊᒃᑕᑯᓂ ᓇᑉᐸᓪᓗᐊᖓᓂ ᐅᑭᐅᖅᑕᖅᑐᓕᒫᒥ 2040–ᖑᕋᓱᖕᓂᖓᓂ.
ᐱᓕᕆᓂᑐᐊᖑᔪᖅ ᐊᖏᔪᒻᒪᕆᐊᓗᖕᒥ ᐱᓇᓱᐊᒐᒃᓴᕐᒥ ᑎᑭᐅᑎᔭᐅᔪᓐᓇᕐᓂᖓᓂ ᐅᕘᓇ ᑕᒪᒃᑭᖅᑐᒥ ᐸᕐᓇᒍᑎᒥᒃ ᐃᓚᖃᖅᑐᒥ ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐊᒻᒪ ᐊᑐᒃᑲᓐᓂᕐᓂᕐᒧᑦ ᓱᓇᒃᑯᑖᓂ ᐱᔪᓐᓇᕐᓂᓕᒫᖏᓐᓂ. ᒥᒃᖠᒋᐊᖅᑎᑦᑎᓂᕐᒥ ᐊᒃᑕᑯᓂ ᐊᔪᕐᓇᙱᑦᑑᔮᖅᐳᖅ, ᐸᐃᑉᐹᑎᒍᑦ, ᐃᓱᒪᒋᔭᖃᖅᖢᓂ ᐊᒥᓱᒻᒪᕆᐊᓗᖕᓂ ᐴᖅᑲᖅᓯᒪᕙᒌᖅᑐᓂ ᑭᓱᑐᐃᓐᓇᓂ ᓂᐅᕕᕐᕕᖕᓄᐊᖅᐸᓪᓕᐊᔪᓂ ᖁᓕᕈᐊᖏᓐᓄᑦ ᐊᒻᒪ ᑭᓱᓕᒫᑲᓴᑦ ᐅᓕᒃᓯᒪᓪᓗᑎᒃ ᐊᐅᒃᑕᔫᒥᑦ ᐅᕝᕙᓘᓐᓃᑦ ᕿᑐᑦᑐᒐᐅᔭᕐᒥ ᐃᓕᓯᔪᒥ ᐸᓯᔭᐅᓂᖓᓂ ᓂᐅᕕᖅᐸᒃᑐᓄᑦ ᑭᒡᓕᐅᔪᒥ, ᐸᓯᓂᐅᔪᖅ ᑕᐃᑲᓃᓪᓗᐊᙱᓐᓂᖓᓂ, ᐱᓗᐊᖅᑐᒥ ᐅᖓᓯᒃᑐᒧᑦ ᓄᓇᕗᒻᒧᑦ.
ᐅᑭᐅᖅᑕᖅᑐᒥ ᐃᒫᓗᖕᒥ ᐅᓂᒃᑳᓕᐊᖅ ᐅᖃᖅᓯᒪᕗᖅ ᓇᖕᒥᓂᖃᖅᑎᐅᔪᓄᑦ ᐱᓕᕆᕝᕕᖓ ᐊᑐᓕᖅᑎᑦᑎᓪᓗᐊᖅᐳᖅ ᐅᖓᕙᕆᐊᖅᑐᒥ ᓴᖅᑭᑎᑦᑎᓂᐅᔪᒥ ᑲᒪᒋᔭᖃᕐᓂᖓᓂ ᐱᓕᕆᐊᖑᔪᓂ ᐱᖁᑎᓄᑦ, ᑲᒻᐸᓂᐅᔪᑦ ᑲᒪᒋᔭᖃᓕᕐᓗᑎᒃ ᐊᕙᑎᒧᑦ ᐊᑭᖏᓐᓂ ᐃᓚᒋᔭᐅᔪᒥ ᐃᒋᑕᐅᑦᑎᐊᕐᓂᐅᔪᓄᑦ ᐱᖁᑎᖏᓐᓂ.
ᑕᒪᓐᓇ ᖃᓄᐃᓗᐊᕋᔭᙱᓚᖅ, ᑕᐃᓐᓇ ᑲᒪᒋᔭᖃᕐᓂᖅ ᐅᑎᕐᔭᔾᔮᙱᓐᓂᖓᓂ ᑕᐃᑯᖓ ᓂᐅᕕᖅᐸᒃᑐᒧᑦ ᐋᖅᑭᒃᓯᒪᓂᐅᔪᒥᓂ ᖁᑦᑎᖕᓂᖅᓴᒻᒪᕆᐅᔪᓂ ᐊᑭᐅᔪᓂ ᐱᖁᑎᓄᑦ ᐊᑭᑐᓂᖅᓴᐅᕙᒌᖅᑐᓂ ᓇᒥᓕᒫᑦᑎᐊᖅ ᑲᓇᑕᒥ.
ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐱᓕᕆᓂᐅᕗᖅ ᐊᐅᓚᑕᐅᔪᓐᓇᖅᑐᓂ ᓄᓇᓕᖕᒥᐅᑕᓄᑦ.
“ᐃᓚᖏᑦ ᐅᖃᕋᔭᖅᐳᑦ ᑕᒪᒃᑭᐅᒪᔪᒥ ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐅᑭᐅᖅᑕᖅᑐᒥ ᐅᐃᑦᑕᑑᖅᖢᓂ, ᖃᐅᔨᒪᔭᐅᙱᓗᐊᕐᓂᖓᓂ, ᐊᔪᕐᓇᖅᖢᓂ ᐱᔪᒪᓂᐅᕗᖅ ᑭᓯᐊᓂ ᑭᐅᓗᒃᑲᔭᖅᐳᖓ ᐱᔭᕆᐊᖃᕐᓂᑦᑎᓐᓂ ᐊᖏᖃᑎᒌᖕᓂᖅᓴᐅᔪᒥ, ᑕᑯᒃᓴᐅᒃᑲᓐᓂᕐᓂᖅᓴᐅᔪᒥ ᐊᒻᒪ ᐱᔪᒪᓂᖃᕐᔪᐊᕐᓂᐅᔪᒥ,” ᐅᖃᓚᐅᖅᐳᖅ ᐃᓕᓴᐃᔨ ᔭᓇᕗ ᑖᒻᑉᓯᓐ, ᐱᒋᐊᖅᑎᑦᑎᓚᐅᖅᑐᒥ ᖃᕐᒪᖅᑕᓕᒃ ᐃᓕᓐᓂᐊᕐᕕᖓᓂ ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐱᓕᕆᐊᖑᔪᒥ ᖃᐅᓱᐃᑦᑐᕐᒥ ᐊᒻᒪ ᐃᓕᓐᓂᐊᕐᕕᐊᕈᓯᖓ ᐃᓗᓪᓕᖅᓱᐃᓚᐅᖅᑐᓂ ᐅᒥᐊᕐᔪᐊᒃᑰᕈᑎᒥ ᐴᕐᒥ 27,000–ᓂ ᓴᕕᕋᔭᖕᓂ ᐴᖏᓐᓂ ᐊᐅᔭᐅᓚᐅᖅᑐᒥ ᐊᑐᓕᖅᑎᑦᑎᒃᑲᓐᓂᖅᑕᐅᓂᐊᖅᑐᓂ ᖃᓪᓗᓈᑦ ᓄᓇᖓᓐᓂ. ᐅᖃᓪᓚᓚᐅᖅᐳᖅ ᐊᕙᑎᒧᑦ ᐱᒪᑐᑦᑎᐊᕆᐊᕐᓂᕐᒥ ᐃᓄᐃᑦ ᖃᐅᔨᒪᔭᑐᖃᖏᓐᓂ ᑐᙵᕕᐅᓂᖓᓂ ᐃᓕᓐᓂᐊᖅᑎᑦᑎᕙᒃᑕᑦᑎᓐᓂ ᒪᒃᑯᒃᑐᖁᑎᑦᑎᓐᓄᑦ ᐊᒻᒪ ᑕᑯᒃᓴᐅᓂᖃᖅᖢᓂ ᓄᓇᓕᖕᓂ ᐃᓚᐅᑎᑦᑎᓂᐅᔪᒥ ᐊᒻᒪ ᖁᕕᐊᓐᓂᖏᓐᓂ ᐊᐅᓚᑦᑎᔪᓐᓇᕐᓂᑦᑎᓐᓂ ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐱᓕᕆᐊᖑᒧᒥ ᓯᕗᒻᒧᑦ.
ᐃᖃᓗᐃᑦ ᐱᓚᐅᖅᐳᑦ $35 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐃᓇᖏᖅᓯᓂᕐᒧᑦ ᐊᒻᒪ ᓄᑖᙳᕆᐊᖅᑎᑦᑎᓂᕐᒧᑦ ᑎᓯᔪᓂ ᐊᒃᑕᑯᖏᓐᓂ ᐱᓕᕆᕝᕕᖓᓂ, ᐃᓚᖃᖅᑐᒥ ᐊᑐᓕᖅᑎᑦᑎᒃᑲᓐᓂᕐᓂᕐᒧᑦ ᐊᒻᒪ ᐅᖁᒃᓯᒪᔪᓂ ᓄᓇᒥᙶᖅᑐᓂ ᐱᕈᖅᓯᐊᓄᑦ ᐊᑐᖅᑕᐅᔪᒃᓴᓕᐅᕐᓗᑎᒃ ᐱᔪᓐᓇᕐᓂᐅᔪᒥ, ᐱᓕᕆᐊᒃᓴᐅᔪᒥ ᑐᕌᖓᓂᖃᖅᑐᒥ ᐱᔭᕇᖅᑕᐅᔪᒃᓴᐅᔪᒥ 2020–ᒥ, ᑭᓯᐊᓂ ᑭᖑᕙᕆᐊᖅᑕᐅᔪᖅ 2023–ᒧᑦ.
ᐃᓱᓕᕝᕕᒃᓴᖓᓂ ᐊᕐᕌᒎᑉ–ᐃᓱᐊᓄᑦ ᓇᓗᓇᐃᖅᑕᐅᑐᐃᓐᓇᕆᐊᓕᖕᒥ ᓄᓇᕗᓕᒫᒥ ᑎᓯᔪᓄᑦ ᐊᒃᑕᑯᓄᑦ ᐊᐅᓚᑦᑎᓂᐅᔪᒥ ᐸᕐᓇᐅᑎᒥᒃ ᑐᓂᔭᐅᔭᕆᐊᖃᕐᓂᖓᓂ, ᐃᓱᒪᔭᕆᐊᖃᖅᐳᒍᑦ ᖃᓄᑎᒋ ᐱᓕᕆᓂᐊᕐᓂᖓᓂ ᓄᓇᓕᖕᓂ ᑕᑯᓂᖏᓐᓂ ᐃᓱᒫᓘᑎᖏᓐᓂ ᑭᐅᔭᐅᓂᖏᓐᓂ.