ᓄᓇᕗᑦ ᑐᕌᕐᓂᐊᖅᐳᑦ ᓂᕈᐊᕆᐊᖅᑐᕐᕕᖕᓄᑦ ᐅᒃᑐᐱᕆ 25–ᒥ ᓂᕈᐊᖅᓯᓂᕐᒥ 17–ᓂ ᒪᓕᒐᓕᐅᖅᑎᒃᓴᐅᔪᓂᑦ ᐃᓚᐅᖃᑕᐅᓂᕐᒥ ᑕᓪᓕᒪᐅᔪᓂ ᓂᕈᐊᒐᒃᓴᐅᖃᑎᖃᙱᑦᑐᓄᑦ ᐃᒃᓯᕙᐅᑕᖅᑖᖅᑐᓄᑦ ᒪᓕᒐᓕᐅᕐᕕᒃ ᑲᑎᒪᕕᒡᔪᐊᖓᓐᓂ.
ᐃᓚᖏᑦ ᓄᑖᖑᓪᓗᑎᒃ ᑮᓇᐅᕗᑦ, ᐊᒻᒪ ᐃᓚᖏᑦ ᑕᐃᒃᑯᐊᑦᑕᐃᓐᓇᐅᓪᓗᑎᒃ ᑎᒍᒥᐊᓚᐅᖅᑐᓂ ᐃᒃᓯᕙᐅᑕᖏᓐᓂ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ ᑎᓴᒪᓄᑦ, ᑭᓯᐊᓂ ᐱᒻᒪᕆᐅᓂᐅᔪᖅ ᑕᒪᒃᑭᑦ ᓂᕈᐊᖅᑕᐅᔪᑦ ᑲᑎᒪᔨᕐᔪᐊᖑᓂᐊᖅᑐᓂ ᐅᖃᐅᓯᖃᖅᑐᐃᓐᓇᐅᕗᑦ ᑕᐃᔅᓱᒥᖓᑦᑕᐃᓐᓇᖅ ᑐᕌᒐᒃᓴᐅᔪᒥ ᐱᔨᑦᑎᕋᕐᓂᕐᒧᑦ ᓄᓇᕗᒻᒥ ᐊᒻᒪᓗ ᓴᖑᑎᑦᑏᓐᓇᕐᓂᕐᒧᑦ ᓯᕗᓂᒃᓴᒧᑦ ᑕᐅᑐᙳᐊᖅᑕᐅᔪᒥ ᓄᓇᕗᒻᒥ ᐊᖏᕈᑎᖓ ᐊᑎᓕᐅᖅᑕᐅᓚᐅᖅᑎᓪᓗᒍ.
ᓄᑖᖑᔪᖅ ᒐᕙᒪᐅᔪᑦ ᑐᙵᕕᖃᕐᓂᐊᖅᐳᑦ ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 22–ᓄᑦ ᐱᓕᕆᕝᕕᖃᕐᓗᑎᒃ, ᑭᖑᓪᓕᖅᐹᖑᔪᒥ ᒪᓕᒐᓕᐅᕐᕕᐅᑉ ᑲᑎᒪᕝᕕᒡᔪᐊᖓᓂ ᑐᕌᖅᑕᕗᑦ ᐱᓕᕆᐊᒃᓴᖏᓐᓂ ᐱᒋᐊᕐᕕᑦᑎᐊᕙᐅᓗᓂ ᐃᖏᕐᕋᐃᓐᓇᕐᓂᐅᔪᒧᑦ.
ᑭᓯᐊᓂ, ᐊᒃᓴᓗᐊᖏᑦ ᐊᐅᓚᑦᑎᓂᐅᔪᒥ ᓱᒃᑲᐃᑦᑐᒻᒪᕆᐊᓗᖕᒥ ᐃᖏᕐᕋᓲᖑᕗᖅ ᓱᓕᓂᕋᕈᑎᓂ ᐱᐅᓂᖅᓴᐅᔪᓂ ᑭᓱᑐᐃᓐᓇᓂ ᑎᑭᐅᑎᔭᐅᓯᒪᙱᖦᖢᑎᒃ ᓱᓕᓂᕋᕈᑎᙳᖅᖢᑎᒃ.
ᒐᕙᒪᑐᖃᒃᑯᑦ ᖁᙱᐊᖅᑕᐅᓂᖓ ᐅᑭᐅᖅᑕᖅᑐᒦᑉᐳᖅ, ᐱᓗᐊᕐᓂᖅᓴᐅᔪᒥ ᑕᐃᒪᙵᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᐅᓚᐅᖅᑐᒥ ᐱᒋᐊᕐᓂᖓᓂ, ᑭᓯᐊᓂ ᒫᓐᓇ ᐊᑖᓃᑉᐳᖅ ᓱᓕᔫᔮᖅᑐᒥ ᑕᕐᓂᐅᔪᒥ ᓴᐃᒻᒪᖃᑎᒌᖕᓂᐅᔪᒥ. ᒫᓐᓇ ᑕᐅᑐᒃᑕᑐᐊᖃᑲᐃᓐᓇᕐᓇᖅᓯᕗᖅ ᐊᒻᒪ ᐃᑲᔪᖅᓱᐃᕐᔪᐊᕐᓂᕐᒥ ᐱᓕᕆᐊᒃᓴᐅᔪᓄᑦ ᐊᑭᐅᔪᒥ ᐆᒪᓇᓱᐊᕐᓂᐅᔪᒥ ᒥᒃᖠᒋᐊᖅᑎᑦᑎᓂᐊᖅᑐᒥ ᐊᒻᒪ ᐃᑲᔪᕐᓗᓂ ᑭᕕᒃᓯᓂᕐᒥ ᓄᓇᕗᒻᒥᐅᓂ ᐊᔪᖅᓴᕐᓂᐅᔪᒥ.
ᐃᒡᓗᒃᓴᖃᖅᑎᑦᑎᓂᖅ ᓱᓕ ᐊᖏᓪᓗᓂ ᐊᑲᐅᙱᓕᐅᕈᑕᐅᕗᖅ. ᖁᑦᑎᓛᖑᓗᓂ ᓯᕗᓪᓕᐅᔾᔭᐅᑎᑕᐅᖁᔭᐅᓂᐊᖅᐳᖅ ᑭᓯᐊᓂ ᑭᒃᑯᓕᒫᑦ ᐊᖏᕐᕋᖃᓕᖅᐸᑕ. ᐅᓇ ᒪᓕᒃᑕᐅᕗᖅ ᐋᖅᑭᒃᓯᔭᕆᐊᖃᕐᓂᐅᔪᒥ ᐊᒻᒪ ᐃᓇᖏᖅᓯᓂᕐᒥ ᓄᑕᐅᙱᑦᑐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᓈᒻᒪᙱᑦᑐᓂ ᐱᕈᖅᐸᓪᓕᐊᔪᓄᑦ ᐃᓄᒋᐊᖕᓂᐅᔪᓂ ᐊᒻᒪᓗ ᐅᓗᕆᐊᓇᖅᑐᒦᑦᑐᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.
ᑲᓇᑕᒥ-ᓄᓇᕗᒻᒥ ᐃᒡᓗᖃᖅᑎᑦᑎᓂᕐᒧᑦ ᐱᕚᓪᓕᕈᑎ, ᐅᖃᐅᓯᐅᓚᐅᖅᑐᒥ ᐋᒍᔅᑎᒥ, ᑐᓂᓯᓂᐊᖅᐳᖅ $3,100–ᐸᓗᖕᓂ ᑕᖅᑭᑕᒫᒥ ᐃᑲᔪᖅᓱᐃᓂᕐᒧᑦ ᐃᒡᓗᖃᕐᓂᕐᒧᑦ ᐊᑭᖏᓐᓂ ᕿᑎᐊᓂ 40–ᓂ ᐊᒻᒪ 70–ᓄᑦ ᓄᓇᕗᒻᒥ ᐊᖏᕐᕋᕆᔭᐅᔪᓂ ᐊᕐᕌᒍᓄᑦ 7–ᓄᑦ, ᑐᙵᕕᖃᑦᑎᐊᖅᑐᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᔪᖅᓴᕐᓂᕐᒧᑦ ᒥᒃᖠᒋᐊᖅᑎᑦᑎᓂᐅᔪᒥ, ᑕᐃᒃᑯᓄᖓ ᐊᖏᕐᕋᖃᖅᑐᓄᑦ.
ᓇᓗᓇᐃᖅᓯᓂᕐᒥ ᐃᒡᓗᕐᔪᐊᓂ ᐃᓚᒋᐊᖅᑕᐅᔪᓂ ᓄᑖᙳᕆᐊᖅᑎᑕᐅᔪᓐᓇᖅᑐᓂ ᐃᒡᓗᒃᓴᖃᖅᑎᑦᑎᒃᑲᓐᓂᕐᓂᕐᒧᑦ ᐊᒻᒪᓗ ᐃᒡᓗᒃᓴᖃᒃᑲᓐᓂᕐᓂ ᓴᓇᔭᐅᔪᖃᕐᓗᓂ ᐱᒻᒪᕆᐅᓗᓂ ᑕᐅᑐᒃᑕᑐᐊᖃᑲᐃᓐᓇᕆᐊᖃᕐᓗᓂ ᐆᒧᖓ ᒐᕙᒪᐅᔪᒧᑦ. ᓇᐃᒡᓕᒋᐊᖅᓯᓂᕐᒥ ᐅᑕᖅᑭᔪᓄᑦ ᑎᑎᕋᖅᓯᒪᔪᓂ ᓄᓇᕗᒻᒥᐅᓄᑦ ᐃᒡᓗᖃᖅᑐᓂ ᐸᖕᒥᐅᓗᐊᖅᑐᓂ ᐊᖏᕐᕋᓂ ᐊᒃᓱᕈᕐᓇᖅᖢᓂ
ᐃᓄᑐᖃᕐᓂ ᐸᖅᑭᔭᐅᓂᖏᓐᓂ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᑲᔪᖅᓱᐃᓂᐅᔪᓂ ᐊᑲᐅᙱᓕᐅᕈᑕᐅᒋᕗᑦ.
ᐊᑎᓕᐅᒐᒃᓴᒥ ᑐᒃᓯᕋᐅᑎᒥᒃ ᐃᓄᑐᖃᕐᓂ ᐊᖏᕐᕋᖅᑎᑕᐅᓂᖏᓐᓂ ᓄᓇᕗᒻᒧᑦ ᖃᓪᓗᓈᑦ ᓄᓇᖓᓐᓂ ᐊᑯᓂᐅᔪᒥ ᐸᖅᑭᔭᐅᓂᕐᒧᑦ ᐃᒡᓗᕐᔪᐊᓂ ᒫᓐᓇᓕᓴᐅᔪᒥ ᐱᒋᐊᖅᑕᐅᓚᐅᖅᐳᖅ
ᒪᓕᒐᓕᐅᖅᑎᐅᓚᐅᖅᓯᒪᔪᒥ ᒪᓃᑦᑐᖅ ᑖᒻᑉᓴᓐᒧᑦ.
“ᐸᕐᓇᐅᑎᑕᖃᓪᓗᐊᖅᐳᖅ, ᐅᓪᓗᒥ ᐊᑐᓂ ᓄᓇᓕᐅᔪᒧᑦ–ᐊᕕᒃᑐᖅᓯᒪᔪᓄᑦ ᐱᓕᕆᕝᕕᑐᐃᓐᓇᐅᙱᑦᑐᒧᑦ–ᐃᓂᒃᓴᖃᕐᓂᕐᒥ ᐸᖅᑭᓂᕐᒧᑦ ᐃᓄᑐᖃᕐᓄᑦ,” ᐅᖃᓚᐅᖅᐳᖅ.
ᑖᒻᑉᓴᓐ ᓂᕆᐅᒃᐳᖅ ᓄᑖᖑᔪᑦ ᒪᓕᒐᓕᐅᖅᑎᐅᓂᐊᖅᑐᑦ ᑭᐅᓂᐊᖅᐳᑦ ᐊᑲᐅᙱᓕᐅᕈᑕᐅᔪᒥ “ᓯᓚᑖᓂ ᕿᑐᑦᑐᒐᐅᔭᕐᒥ ᑕᐃᒪᐃᒐᔪᒃᑐᒥ ᐊᖏᔪᒥ ᒐᕙᒪᐅᔪᓄᑦ ᐃᓱᒪᓕᐅᕆᓂᐅᔪᓂ.” ᓇᓚᐅᑉᐳᖅ ᐃᓱᒫᓗᖕᓂᕐᒧᑦ ᑕᑯᓯᒪᙱᓗᐊᕐᓂᑦᑎᓐᓂ ᐃᖏᕐᕋᓂᖃᕐᓂᐅᔪᒥ ᐊᕐᕌᒍᑦ ᖁᓖᑦ ᐅᖓᑖᓄᑦ, ᐅᓇ ᐊᑯᓂᐅᓗᐊᖅᐳᖅ ᑕᐃᒃᑯᓄᖓ ᑭᖑᓪᓕᖅᐹᖏᓐᓂ ᐊᕐᕌᒍᖏᓐᓂ ᐊᕕᓯᒪᓪᓗᑎᒃ ᐃᓚᖏᓐᓂ ᐊᒻᒪ ᐊᖏᕐᕋᖓᓂ ᓄᓇᖓᓐᓂᑦ.
ᓄᓇᕗᒻᒥ ᒐᕙᒪᒃᑯᑦ ᐊᒃᓱᕈᕐᓗᑎᒃ ᐱᓕᕆᔭᕆᐊᖃᖅᐳᑦ ᑎᑭᐅᑎᓂᕐᒧᑦ ᐊᖏᖃᑎᒌᖕᓂᐅᔪᒥ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖑᔪᓄᑦ. ᐱᑕᖄᓂᒃᑐᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᓄᑦ ᐊᖏᕈᑕᐅᔪᒥ, ᐃᓱᓕᓚᐅᖅᑐᒥ ᐊᕐᕌᒍᑦ ᐱᖓᓲᓕᖅᑐᓄᑦ, ᓈᒻᒪᙱᖦᖢᓂ ᖃᓄᐃᓐᓂᐅᕗᖅ, ᐱᖁᔨᕗᖔᕈᑎᖃᖅᑎᓪᓗᒍ ᔫᓂᐊᓐᑯᓐᓂ–ᐱᒋᐊᖅᑕᐅᔪᒥ ᐃᖅᑲᖅᑐᐃᕕᒃᑰᖅᑎᑦᑎᓂᐅᔪᒥ ᓱᓕ ᐱᓕᕆᒋᐊᖅᑕᐅᓚᐅᙱᑦᑐᒥ. ᐱᕕᒃᓴᖃᖅᓯᒪᕗᑦ ᐅᑎᕐᓂᕐᒧᑦ ᐋᔩᖃᑎᒌᖕᓂᐅᔪᒥ ᑭᐳᖓᓐᓄᑦ ᐊᒻᒪ ᑎᑭᐅᑎᓂᕐᒧᑦ ᐊᖏᕈᑕᐅᔪᒥ, ᐅᒃᐱᕈᓱᑦᑎᐊᕐᓂᐅᔪᒥ, ᐊᒻᒪ ᓯᕗᓪᓕᐅᔾᔭᐅᖃᑕᐅᓪᓗᐊᖅᐳᖅ ᓄᑖᖑᔪᓄᑦ ᒪᓕᒐᓕᐅᖅᑎᓄᑦ. ᐅᑭᐅᖅᑕᖅᑐᒥ ᑮᓴᐅᔭᖅᑖᕆᔭᐅᒃᑲᓐᓂᖃᑦᑕᖅᑐᑦ ᐊᖏᒡᓕᒋᐊᖅᑕᐅᓯᒪᙱᓚᖅ ᓄᓇᕗᒻᒥ ᒐᕙᒪᒃᑯᓐᓄᑦ ᓴᓇᔨᐅᔪᓄᑦ ᐊᕐᕌᒍᓄᑦ 12–ᓄᑦ, ᐊᑭᖓ ᐆᒪᓇᓱᐊᕐᓂᕐᒧᑦ ᐱᕈᖅᐸᓪᓕᐊᖏᓐᓇᖅᑎᓪᓗᒍ, ᐊᒻᒪ ᓱᒃᑲᒃᑎᒋᐊᖅᑐᒥ ᐃᖏᕐᕋᓂᐅᔪᒥ ᒫᓐᓇᓕᓴᐅᔪᒥ.
ᒪᓕᒃᑐᑦ ᑲᑎᙵᓂᐅᔪᓂ ᒪᓕᒐᓕᐅᖅᑎᐅᓂᐊᖅᑐᓂ ᐊᒃᓱᕈᕐᓂᐊᖅᐳᑦ ᖃᓂᑦᑐᒥ ᐱᓕᕆᖃᑎᖃᕐᓂᕐᒥ ᓇᓗᓇᐃᖅᑕᐅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖑᔪᓂᑦ ᐊᒻᒪ ᒐᕙᒪᑐᖃᒃᑯᓐᓂ ᐋᖅᑭᒃᓯᓂᕐᒧᑦ ᐊᒥᓱᓂ ᓯᕗᓂᐊᓂ ᐅᖃᐅᓯᐅᔪᓂ ᐊᑲᐅᙱᓕᐅᕈᑕᐅᔪᓂ.
ᐃᓗᐊᒍᑦ, ᐊᖏᖃᑎᒌᖕᓂᐅᔪᒥ ᒐᕙᒪᐅᔪᒥ ᐱᓕᕆᑦᑎᐊᓛᖑᕗᖅ ᑕᒪᒃᑭᑦ ᐱᓕᕆᕝᕕᐅᔪᑦ ᐋᔩᖃᑎᒌᑦᑎᐊᖅᑎᓪᓗᒋᑦᐃᒻᒥᖕᓄᑦ ᐊᒻᒪ ᐊᕕᒃᑐᖅᓯᒪᐅᙱᖦᖢᑎᒃ, ᐅᓚᕕᓴᖅᑕᐅᓪᓗᑎᒃ ᐃᒻᒥᓂᑐᐊᖅ ᐱᓕᕆᐊᒃᓴᖏᓐᓂ.
ᐊᑲᐅᙱᓕᐅᕈᑕᐅᔪᑦ ᐊᒃᑐᐃᔪᓂ ᖃᐅᑕᒫᒥ ᐃᓅᓯᐅᔪᓂ ᑲᑎᙵᓂᖃᕆᕗᑦ ᐆᒻᒪᕆᒃᑐᒥ ᐊᖏᖃᑎᖃᕐᓂᖃᕆᐊᖃᖅᐳᖅ ᐋᖅᑭᒃᓯᓂᕐᒧᑦ.