ᐊᕐᕌᒍᑦ ᒪᕐᕈᑲᓴᐃᑦ ᐊᓂᒍᖅᓯᒪᕗᖅ ᑕᐃᒪᙵᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑐᐊᕕᕐᓇᕐᓂᖓᓂ ᐅᖃᐅᓯᐅᓚᐅᖅᑎᓪᓗᒍ ᓄᓇᕗᒻᒥ ᑭᐅᓂᕐᒧᑦ ᓴᖅᑭᑉᐸᓪᓕᐊᔪᒥ ᓄᕙᒡᔪᐊᕐᓇᖅ-19–ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ.
ᑕᒪᑐᒪᓂ ᐱᓕᕆᓂᐅᔪᒥ, ᑕᐅᑐᒃᑕᑐᐊᖃᑲᐃᓐᓇᕐᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ – ᐊᒻᒪ ᓄᓇᕘᑉ ᐱᔪᓐᓇᕐᓂᖓᓂ ᑐᓂᓯᔪᓐᓇᕐᓂᕐᒧᑦ ᓈᒻᒪᒃᑐᓂ ᐱᔨᑦᑎᕋᕐᓂᐅᔪᓂ ᑭᒡᓕᐅᔪᓂ – ᓱᑲᑕᐅᒃᑲᓐᓂᑐᐃᓐᓇᖅᐳᖅ. ᓲᕐᓗᖃᐃ ᕿᒥᔾᔪᑕᐅᖅᑰᔨᕗᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ.
ᕿᑎᐊᓂ ᑲᓇᑕᒥ ᐃᓗᐊᖅᓴᐃᔨᑭᒃᓴᓗᐊᕐᓂᐅᔪᒥ, ᑕᑯᓚᐅᖅᐳᒍᑦ ᓄᓇᓕᖕᓂ ᐋᓐᓂᐊᕕᖕᓂ ᐃᖅᑲᓇᐃᔭᖅᑎᑭᓗᐊᖅᑐᒻᒪᕆᐊᓘᓂᖏᓐᓂ, ᐃᓛᓐᓂᒃᑯᑦ ᓄᖅᑲᖅᑎᑦᑎᓪᓗᑎᒃ ᐅᐸᒃᑕᐅᕝᕕᑐᐃᓐᓇᐅᔪᓂ ᐊᒻᒪ ᓅᑎᕆᓂᕐᒥ ᐱᔨᑦᑎᕋᕐᓂᐅᔪᓂ ᑐᐊᕕᕐᓇᖅᑐᓄᑐᐊᖅ. ᓄᓇᕘᑉ ᖃᐅᔨᓴᕈᓐᓇᕐᓂᖓᓂ ᐊᒻᒪ ᖃᐅᔨᓴᖅᑕᐅᖏᓐᓇᕐᓂᖓᓂ ᓄᕙᒡᔪᐊᕐᓇᕐᒥ ᐊᐃᑦᑐᐃᓂᐅᔪᓂ ᑕᓯᕐᔪᐊᖅᓯᒪᓂᖓᓂ ᐊᒻᒪ ᓱᒃᑲᐃᒃᑎᑦᑎᓯᒪᕗᖅ ᐊᓯᐅᔨᓂᐅᔪᒥ ᖃᐅᔨᓴᕐᕕᖕᒥ ᐱᓕᕆᔨᕐᔪᐊᖑᔪᓂ ᐃᖃᓗᖕᓂ, ᖁᔭᒋᔭᐅᔫᔮᓚᐅᙱᑦᑐᓄᑦ ᐱᓕᕆᑎᓪᓗᒋᑦ ᖁᑦᑎᓛᖑᔪᒥ ᑭᒡᓕᐅᔪᒥ ᐊᐃᑦᑐᐃᓐᓇᖅᑐᓂ ᐆᒃᑑᑎᐅᔪᓂ ᒫᓐᓇᒧᑦ ᑎᑭᖦᖢᒍ ᐊᕐᕌᒍᓂ ᒪᕐᕉᖕᓂ ᖃᐅᔨᓴᖅᓯᓂᐅᔪᓂ.
ᐃᕐᓂᓱᒃᓰᔩᑦ ᐃᒪᒃᓯᔪᓂ ᑲᖏᖅᖠᓂᕐᒥ ᐊᐅᔭᑦ 2020–ᒥ ᓄᖅᑲᖅᑎᑦᑎᓂᖃᓚᐅᖅᐳᖅ ᐃᕐᓂᓱᒡᕕᓂᑦ ᓄᓇᓕᖕᓂ, ᐊᒻᒪ ᑕᐃᒃᑯᐊ ᐊᕐᓇᐃᑦ ᐅᖃᐅᓯᒃᓴᓕᐅᖅᓯᒪᕗᑦ ᓯᐊᒻᒪᖅᑎᑦᑎᔨᐅᔪᓄᑦ ᐃᒃᐱᒍᓱᖕᓂᖏᓐᓂ ᖁᔭᒋᔭᐅᙱᓐᓂᐅᔪᒥ ᐊᒻᒪ ᐱᓕᕆᐊᒃᓴᖃᖅᑎᑕᐅᓗᐊᕐᓂᖏᓐᓂ.
ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᓴᓇᔨᐅᔪᑦ ᑕᐃᒪᓐᓇᑎᒋ ᐱᔪᓐᓇᙱᓐᓂᐅᒋᕗᑦ, ᐱᓗᐊᖅᑐᒥ ᑕᐃᑲᓃᓐᓂᐊᖅᑐᓂ ᐊᑯᓂᒐᓚᐅᔪᒥ, ᕿᒪᐃᔪᒥ ᓄᓇᕗᒻᒥᐅᓂ ᖃᔅᓯᐊᕐᔪᓂᑐᐃᓐᓇᖅ ᓂᕈᐊᒐᒃᓴᐅᔪᓂ ᐆᒥᖓ ᑭᓯᐊᓂ ᐱᒋᐊᒃᑲᓐᓂᕐᓂᖏᓐᓂ ᐃᓅᓯᓕᕆᓂᐅᔪᒥ ᐱᓕᕆᓂᐅᔪᒥ ᒪᓕᒃᑐᒧᑦ ᐃᓄᖕᒧᑦ ᑎᑭᓐᓂᐊᖅᑐᒥ, ᑕᐃᒫᒃ ᒪᑐᐃᖅᓯᒃᑲᓐᓂᕐᓗᑎᒃ ᐃᑭᕐᓂᑦ.
ᓄᓇᕗᑦ ᖃᓄᐃᓕᐅᕈᓐᓇᖅᐸ ᑐᓂᓯᓂᕐᒥ ᐱᔨᑦᑎᕋᕐᓂᐅᔪᒥ ᐅᐸᒍᒥᓇᕐᓂᖅᓴᐅᓂᕐᒥ?
ᒪᒃᑯᒃᑐᓂ ᐱᓕᕆᔪᓄᑦ–ᑲᑎᙵᓂᐅᔪᒥ ᐃᖃᓗᖕᓂ ᑕᑯᒃᓴᐅᑎᑦᑎᓂᖃᓚᐅᖅᐳᑦ ᕕᕗᐊᕆ 1–ᒥ ᐊᑐᖁᓇᔭᖅᑕᖏᓐᓂ ᐱᐅᓯᒋᐊᖅᑎᑦᑎᓂᕐᒧᑦ ᓄᓇᕘᑉ ᐊᔾᔨᒌᙱᑦᑐᓂ ᐱᓕᕆᔨᐅᔪᓂ ᑐᓴᐅᒪᑎᑦᑎᓂᐅᔪᒥ ᒪᓕᒋᐊᓕᖏᓐᓂ (IISP), ᐱᔪᓐᓇᖅᑎᑦᑎᔪᒥ ᐱᓕᕆᕝᕕᐅᔪᓂ ᐊᔪᕐᓇᙱᓐᓂᖅᓴᒥ ᐅᖃᐅᓯᖃᕐᓂᖏᓐᓂ ᑐᓴᒐᒃᓴᐅᔪᓂ ᑭᓇᑐᐃᓐᓇᖅ ᐃᒻᒥᓃᕈᒪᑐᐃᓐᓇᕆᐊᖃᖅᑎᓪᓗᒍ.
ᒪᒃᑯᒃᑐᑦ ᐊᑐᖁᔨᓇᔭᕆᕗᑦ ᐱᑕᖃᖅᑎᑦᑎᓂᖓᓂ ᐃᓄᒃᑎᑐᑦ ᐅᖃᖅᑎᐅᔪᓂ, ᑕᐅᑐᒃᖢᒍ ᓯᕗᓪᓕᖅᐋᖑᓪᓗᓂ ᐅᖃᐅᓯᐅᒐᔪᖕᒪᑦ ᐊᒥᓱᓂ ᓄᓇᕗᒻᒥᐅᓂ ᐃᓄᑭᓐᓂᖅᓴᐅᔪᓂ ᓄᓇᓕᐅᔪᓂ ᐃᖃᓗᐃᑦ ᓯᓚᑖᓂ.
“ᐊᒥᓱᑦ ᓱᕈᓰᑦ ᐊᒻᒪ ᒪᒃᑯᒃᑐᑦ ᓴᖅᑭᑎᑦᑎᓲᖑᕗᑦ ᐃᒃᐱᒋᔭᒥᓂ ᐃᓄᒃᑎᑐᑦ ᐱᐅᓂᖅᓴᒻᒪᕆᐅᔪᒥ ᖃᓪᓗᓈᑎᑑᕐᓂᐅᔪᒥ,” ᐅᖃᓚᐅᖅᐳᖅ ᔮᔅᒥᓐ ᐃᕕᒃ, ᐊᑕᐅᓯᐅᔪᖅ ᐃᓕᓐᓂᐊᖅᑎᓂ ᐃᓚᐅᖃᑕᐅᔪᓂ. “ᐃᑲᔪᕋᔭᖅᑰᖅᑐᖅ ᒪᒃᑯᒃᑐᓂ ᐅᓂᒃᑳᕐᓂᖏᓐᓂ ᖃᓄᐃᓕᐅᕐᓂᐅᔪᓂ ᐃᓅᓯᖏᓐᓂ.”
ᐱᔭᕆᐊᖃᖅᐳᒍᑦ ᐊᖏᕐᕋᒥ–ᐱᕈᖅᓯᐊᖑᔪᒥ ᖃᐅᔨᒪᔨᕐᔪᐊᖑᔪᓂ, ᐊᓯᐊᒎᕐᕕᒃᓴᖃᒃᑲᓐᓂᙱᓚᖅ. ᐱᐅᙱᓐᓂᐅᔪᖅ ᐱᔪᒪᓂᖃᓗᐊᕌᓗᙱᓚᖅ ᑕᐃᒃᑯᓄᖓ ᐱᓕᒻᒪᒃᓴᖅᓯᒪᔪᓂ ᓄᓇᕗᒻᒥᐅᓄᑦ ᐅᕙᓃᖏᓐᓇᕆᐊᒃᓴᖅ, ᐃᒡᓗᒃᓴᖃᑦᑎᐊᙱᓗᐊᕐᓂᐅᔪᒥ ᐊᒻᒪ ᐊᒥᓱᓂ ᐊᒃᓱᕈᕐᓂᐅᔪᓂ ᐸᒡᕕᓵᕆᔪᓂ ᑐᙵᕕᒋᔭᖏᓐᓂ.
ᐃᖃᓗᖕᓂ ᑲᑎᙵᓂᐅᔪᑦ ᐃᒪᐃᖁᔨᓇᔭᖅᐳᑦ ᓇᓗᓇᐃᖅᓯᓂᖏᓐᓂ ᐃᒻᒥᓃᖅᑕᐃᓕᒪᑎᑦᑎᓂᐅᔪᓂ ᐃᖅᑲᓇᐃᔭᖅᑎᓂ ᐱᓪᓚᕆᐅᓂᖏᓐᓂ ᓴᓇᔨᐅᓂᖏᓐᓂ ᐃᓕᓯᒪᐃᓐᓇᕐᓂᐊᖅᑐᓂ ᐱᔾᔪᑎᖃᖅᑐᒥ ᐃᒻᒥᓃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᓄᓇᕗᒻᒥ – ᐊᒻᒪ ᑐᓂᔭᐅᓂᖏᓐᓂ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐅᔪᓂ ᐊᒻᒪ ᐊᑎᓕᐅᕆᓂᕐᒧᑦ ᑮᓇᐅᔭᓂᒃ ᐃᓚᒋᐊᕈᑕᐅᔪᒥ ᑐᓂᔭᐅᓗᑎᒃ ᐊᔾᔨᐸᓗᐊᓂ ᑕᐃᒃᑯᓂᖓ ᑐᓂᔭᐅᕙᒃᑐᓄᑦ ᐃᓗᐊᖅᓴᐃᔨᐅᔪᓄᑦ. ᑕᑯᔪᒪᓇᔭᕆᕗᑦ ᓄᓇᓕᖕᓂ ᖃᓄᐃᙱᑦᑎᐊᕐᓂᕐᒧᑦ ᐃᖅᑲᓇᐃᔭᖅᑎᓂ ᐃᓚᐅᖃᑕᐅᓂᖏᓐᓂ ᒪᓕᒋᐊᓕᖕᒥ ᐊᒻᒪ ᐱᓕᒻᒪᖅᓴᕐᓂᐅᔪᒥ, ᐃᓚᒋᐊᖅᓯᔪᓐᓇᖅᑐᒥ ᖄᒃᑲᓐᓂᐊᒍᑦ ᖄᖑᔪᒥ ᐃᑲᔪᖅᓱᐃᓂᐅᔪᒥ ᑕᒪᒃᑭᓄᑦ ᐃᖅᑲᓇᐃᔭᖅᑎᐅᔪᓄᑦ ᐊᒻᒪ ᒪᒃᑯᒃᑐᓄᑦ ᐃᑲᔪᖅᑕᐅᔭᕆᐊᓕᖕᓂ ᑲᒪᒋᔭᖃᕐᓂᕐᒥ ᑕᐃᒃᑯᓂᖓ ᐊᒃᑐᖅᑕᐅᓴᕋᐃᑦᑐᓂ ᖃᓄᐃᓐᓂᐅᔪᓂ.
ᐸᖅᑭᓂᖅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᐱᓗᐊᖅᑐᒥ ᐊᒃᑐᖅᑕᐅᓴᕋᐃᑦᑐᓄᑦ ᒪᒃᑯᒃᑐᖁᑎᑦᑎᓐᓂ ᐊᑕᐅᓯᐅᒧᒥ ᐊᑯᓂᐅᓛᒥᒃ ᐊᒃᑐᐃᓂᖃᕐᓂᐊᖅᐳᖅ ᑕᒪᒃᑭᓕᒫᓂ ᖃᓄᐃᓕᖓᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ.
ᑭᓱᑐᐃᓐᓇᒥᒃ ᐊᖏᓂᖅᓴᐅᔪᒥ, ᑕᒪᒃᑭᐅᒪᔪᒥ ᑐᕌᒐᕆᔭᖃᖅᑐᒥ ᐱᔭᕆᐊᖃᖅᐳᑦ – ᐊᑲᐅᙱᓕᐅᕈᑎ ᐅᓇᑕᖅᑕᐅᔭᕆᐊᖃᖅᐳᖅ ᐊᒥᓱᓂ ᑎᕆᖅᑰᔪᓂ ᐊᑕᐅᑦᑎᒃᑯᑦ ᑕᑯᓂᕐᒥ ᐱᓪᓚᕆᐅᔪᒥ ᐃᖏᕐᕋᓂᖃᕐᓂᐅᔪᒥ. ᐱᓕᕆᔭᕆᐊᖃᕐᓂᖅ ᐊᓂᒍᖅᓯᓯᒪᔪᑐᖃᐅᕗᖅ ᐃᒃᓯᕚᑐᐃᓐᓇᕐᓂᕐᒥ ᐃᑭᒪᔪᒧᑦ ᐃᒃᓯᕙᐅᑕᒥ ᐊᒻᒪ ᖁᙱᐊᕐᓗᑕ ᑕᑯᓇᓱᐊᕐᓂᕐᒥ ᓇᓕᐊᑦ ᐆᒃᑐᕋᖅᑕᐅᔪᑦ ᐊᒻᒪ ᕿᓚᒻᒥᐅᔪᒥ ᐋᖅᑭᒃᓯᓂᐅᔪᓂ ᐊᖏᓛᖑᔪᒥ ᐊᒃᑐᐃᓂᖃᕐᓂᐊᕐᓂᖓᓂ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᖅᐳᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᔨᑦᑎᕋᕐᓂᐅᔪᖅ ᐊᖏᒡᓕᒋᐊᖅᓯᒪᓂᖓᓂ ᖄᖏᖅᓯᒪᓕᖅᑐᓄᑦ ᐊᕐᕌᒍᓂ ᒪᕐᕉᖕᓂ, ᐆᒧᖓᖑᑐᐊᖑᙱᑦᑐᒥ ᓄᕙᒡᔪᐊᕐᓇᖅ-19–ᒧᑦ, ᑭᓯᐊᓂ ᑕᔪᓰᓐᓇᖅᑐᒥ ᐊᒃᓱᕈᕐᓂᐅᔪᓂ ᐊᒥᓱᒃᑲᓐᓂᕐᓂ ᓂᕈᐊᒐᒃᓴᖃᕐᓂᕐᒧᑦ ᐃᑲᔪᖅᓱᐃᓂᕐᒧᑦ ᓄᓇᕗᒻᒥᐅᓂ.
ᒥᑭᑦᑑᑎᓂ ᐱᓕᕆᓂᐅᔪᓂ ᐱᓕᕆᐊᖑᔪᓐᓇᖅᐳᑦ ᓄᓇᓕᖕᓂ ᑭᒡᓕᐅᔪᓄᑦ, ᐊᒻᒪ ᐊᒥᓱᑦ ᐱᕙᓪᓕᐊᕌᓂᓕᖅᐳᑦ. ᐅᖃᓪᓚᖃᑎᖃᕐᓂᕐᒥ ᐃᒻᒥᖕᓄᑦ, ᓇᓂᑎᓂᕐᒥ ᐃᑲᔪᖅᓱᐃᓂᐅᔪᓂ ᐊᑐᐃᓐᓇᐅᔪᓂ ᓇᒦᓐᓂᕐᓂ. ᐅᖓᓯᒃᑐᒥ ᐃᓅᓯᓕᕆᓂᐅᔪᒥ ᐅᕝᕙᓘᓐᓃᑦ ᐅᖃᓗᖕᓂᕐᒧᑦ ᐃᑲᔪᖅᑕᐅᕕᖕᓂ ᐅᖃᓗᒡᕕᒃᓴᓄᑦ ᓯᕗᓪᓕᐅᓗᓂ ᐱᓕᕆᓂᐅᔪᓐᓇᖅᐳᖅ ᓇᓂᓯᓂᕐᒥ ᓇᐸᑦᑎᐊᒃᑲᓐᓂᕈᓐᓇᖅᓯᓂᐅᔪᒥ.