ᑕᒪᑐᒪᓂ ᐱᓇᓱᐊᕈᓯᐅᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐃᔨᖏᓐᓂ ᓴᖑᑎᑦᑎᕗᑦ ᑲᓇᑕᒥ ᓱᕈᓯᕐᓄᑦ ᐅᓪᓗᖓᓂ, ᐊᒻᒪ ᐱᔨᑦᑎᕋᕐᓂᐅᔪᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᓄᓇᓕᑦᑎᓐᓂ.
ᐊᒥᓱᑦ ᕿᑎᖅᐸᓯᐊᓃᑎᓪᓗᒋᑦ ᓴᐳᔾᔨᓯᒪᓂᕐᒧᑦ, ᑕᐃᒪᐃᓪᓗᐊᖅᑐᒥ, ᓴᐳᔾᔨᓯᒪᓂᖅ ᓱᕈᓰᑦ ᖃᓄᐃᙱᑦᑎᐊᕐᓂᖏᓐᓂ ᓴᐳᔾᔨᓯᒪᓂᖃᕐᒪᑦ ᓯᕗᓂᒃᓴᐅᔪᒥ ᑕᐃᒪᓐᓇᑎᑐᑦ ᓴᐳᔾᔨᓯᒪᓂᕐᒥ ᐊᕙᑎᑦᑎᓐᓂ ᑐᓂᓯᓲᖑᕗᖅ.
ᐱᔪᒪᓂᖅ ᐱᓕᕆᕙᓪᓕᐊᓂᕐᒥ ᖃᓄᐃᙱᑦᑎᐊᖅᑐᓄᑦ, ᐃᓄᖕᓄᑦ–ᐊᐅᓚᑕᐅᔪᓄᑦ ᐋᖅᑭᒍᑎᒃᓴᐅᔪᓂ ᓱᕈᓯᕐᓄᑦ ᐸᖅᑭᓂᐅᔪᒥ ᐊᒻᒪ ᐃᓅᖃᑎᒌᖑᔪᓄᑦ ᐱᕙᓪᓕᐊᑎᑕᐅᓂᖏᓐᓂ ᐊᖏᓂᖅᓴᒻᒪᕆᐅᓕᕐᒪᑦ. ᐅᓇ ᓴᓇᔭᐅᓯᒪᕗᖅ ᐱᓗᐊᖅᑐᒥ ᑕᑯᒃᓴᐅᑦᑎᐊᕐᓂᐅᔪᒥ ᐱᓕᕆᓂᐅᔪᒥ ᐱᓕᕆᔭᐅᕙᓪᓕᐊᔪᒥ ᖃᔅᓯᒐᓚᖕᓄᑦ ᑲᑐᔾᔨᖃᑎᒌᖑᔪᓄᑦ ᑕᒪᒃᑭᑦ ᐃᓗᐊᓂ ᐊᒻᒪ ᓯᓚᑖᓂ ᓄᓇᕗᒻᒥ.
ᐱᖅᑯᓯᑦ ᑲᑐᔾᔨᖃᑎᒌᖑᔪᓂ ᓄᓇᕘᑉ ᓯᓚᑖᓂ ᓱᒃᑲᐃᑦᑐᒥ ᓴᖑᕙᓪᓕᐊᓯᒪᕗᖅ ᐅᖃᓪᓚᖕᓂᐅᔪᖅ ᓴᐃᒻᒪᖃᑎᒌᖕᓂᖅ ᐃᖏᕐᕋᕙᓪᓕᐊᑎᓪᓗᒍ. 2017–ᒥ, ᒥᐊᕆ ᐹᓕᓐᑕᐃᓐ, ᑕᐃᔅᓱᒪᓂ-ᐊᐅᓚᑦᑎᔨᒻᒪᕆᐅᓚᐅᖅᑐᖅ ᐋᓐᑎᐊᕆᐅ ᑲᑐᔾᔨᖃᑎᒌᖑᔪᓄᑦ ᓱᕈᓯᕐᓄᑦ ᐃᑲᔪᖅᑕᐅᓂᖏᓐᓂ ᑲᑐᔾᔨᖃᑎᒌᖑᔪᓄᑦ (OACAS), ᒪᒥᐊᓚᐅᖅᐳᑦ ᓱᔪᐃᓂᐅᔪᒥ ᐊᑐᕐᓂᖃᐅᑎᖓᓐᓂ ᓱᕈᓯᕐᓄᑦ ᐊᑐᖅᑕᐅᓂᖓᓂ ᖃᓄᐃᙱᑦᑎᐊᕐᓂᖏᓐᓄᑦ ᐱᓕᕆᓯᒪᓂᖏᓐᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ, ᐅᖃᖅᖢᑎᒃ ᑲᑐᔾᔨᖃᑎᒌᖑᔪᑦ “ᖃᐅᔨᒪᓚᐅᖅᐳᑦ ᐅᕝᕙᓘᓐᓃᑦ ᐅᔾᔨᕈᓱᓪᓗᐊᓚᐅᖅᐳᑦ ᓱᔪᐃᓂᐅᔪᒥ ᐊᒻᒪ ᐱᓂᕐᓗᒡᔪᐊᕐᓂᐅᔪᒥ ᓴᖅᑭᑎᑕᐅᔪᒥ ᓯᕗᓪᓕᕐᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ, ᐊᓱᐃᓛᒃ ᓯᕗᒻᒧᐊᕆᔭᐅᓪᓗᑎᒃ ᐃᓚᐅᖃᑕᐅᓂᑦᑎᓐᓂ 60-ᓂ ᐊᖅᓵᖅᑕᐅᓂᑰᔪᓂ. ᑕᑯᓚᐅᖅᐳᒍᑦ ᓱᕋᒃᓯᒪᔪᓂ ᐊᒻᒪ ᕿᒃᓵᖕᓂᕐᔪᐊᖑᔪᒥ ᓄᓇᓕᐅᔪᓂ ᐊᒻᒪ ᐃᒻᒥᓂᒃ ᐅᐱᒋᓪᓗᑎᒃ ᐅᒃᐱᕈᓱᖕᓂᐅᔪᒥ ᐱᑎᑦᑎᓂᐅᔪᖅ ᐃᓕᔅᓯᑐᐊᖑᓂᕋᐃᓪᓗᑎᒃ. ᖃᓄᐃᓕᐅᕐᓂᐅᔪᑦ ᐃᓚᐅᖃᑕᐅᓚᐅᕐᓂᑦᑎᓐᓂ ᑐᑭᓯᓇᑦᑎᐊᖅᑐᒥ ᑐᕌᖅᑎᑦᑎᓚᐅᖅᐳᖅ ᐃᓕᖕᓂ ᐅᕗᖓ ᑎᑭᓐᓂᐅᔪᒧᑦ.”
ᑲᑐᔾᔨᖃᑎᒌᖑᔪᑦ 2020-21–ᓂ ᐊᕐᕌᒍᑕᒫᒥ ᐅᓂᒃᑳᓕᐊᖑᔪᒥ ᖃᐅᔨᓴᐃᓂᐅᔪᒥ ᓇᓗᓇᐃᖅᓯᓚᐅᖅᐳᖅ ᐱᓕᕆᓯᒪᓂᖏᓐᓂ “ᐃᖏᕐᕋᓂᑦᑎᐊᕙᐅᔪᒥ” ᐱᔾᔪᑎᖃᓪᓗᐊᑕᖅᑐᒥ ᒪᕐᕈᐃᓐᓇᓂ 9–ᖑᔪᓂ ᐃᓂᐅᔪᓂ ᐊᖏᖅᓯᒪᓂᕆᔭᖏᓐᓂ 2017–ᒥ: ᐱᓕᒻᒪᒃᓴᐃᓂᕐᒥ ᐊᒻᒪ ᑲᑎᒪᔨᓄᑦ ᑭᒡᒐᖅᑐᐃᓂᐅᔪᒥ. ᐅᓂᒃᑳᓕᐊᖅ ᓇᓗᓇᐃᖅᓯᓚᐅᖅᐳᖅ ᐃᓂᒃᓴᖃᕐᓂᖓᓂ ᐱᐅᓯᒋᐊᕐᓂᐅᔪᒥ.
ᐊᑕᐅᓯᐅᔪᒥ ᐱᓐᓇᕆᔭᐅᓂᖅᓴᐅᔪᓂ ᐊᖏᖅᓯᒪᓂᐅᔪᓂ ᐱᓕᕆᐊᖑᔪᒥ ᐋᓐᑎᐊᕆᐅ ᑲᑐᔾᔨᖃᑎᒌᖑᔪᓄᑦ ᓱᕈᓯᕐᓄᑦ ᐃᑲᔪᖅᑕᐅᓂᖏᓐᓂ ᑲᑐᔾᔨᖃᑎᒌᖑᔪᓄᑦ “ᓴᖑᑎᑦᑎᓂᕐᒥ ᐃᑲᔪᕈᑎᒃᓴᓂ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᖑᔪᓄᑦ ᑐᓂᓯᑦᑎᐊᒃᑲᓐᓂᕈᓐᓇᕐᓂᐊᕐᒪᑕ ᐱᔨᑦᑎᕋᕐᓂᕐᒥ ᐅᑯᓄᖓ ᐊᒻᒪᓗ ᐃᑲᔪᖅᓱᐃᓂᕐᒥ ᑭᒡᒐᖅᑐᐃᓗᑎᒃ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓂ, ᐃᓚᒌᓂ, ᐊᒻᒪ ᓄᓇᓕᐅᔪᓂᑦ.”
ᐋᑐᕚ ᐅᓄᓛᖑᔪᒥ ᐃᓄᒋᐊᕐᓂᖃᖅᐳᑦ ᐃᓄᖕᓂ ᐃᓄᐃᑦ ᓄᓇᖓᑕ ᓯᓚᑖᓂ, ᑕᐃᒫᒃ ᐅᑯᐊ ᐊᖏᖅᓯᒪᓂᐅᔪᑦ ᐋᒻᑎᐊᕆᐅᒥ ᐊᑯᓂᐅᔪᒥ ᐊᒃᑐᐃᓂᖃᕐᓂᐊᖅᐳᑦ ᓄᓇᕗᒻᒥᐅᓂ ᐃᓚᒌᖑᔪᓄᑦ.
ᑕᑯᓂᐅᔪᒥ ᓴᐃᒻᒪᖃᑎᒌᖕᓂᐅᔪᒥ, ᓱᕈᓯᕐᓄᑦ ᐃᑲᔪᕐᓂᕐᒥ ᑲᑐᔾᔨᖃᑎᒌᖑᔪᑦ ᐋᑐᕚᒥ (CASO) ᑎᑎᕋᓚᐅᖅᐳᑦ 2018–ᒥ ᐅᓂᒃᑳᓕᐊᖑᔪᒥ ᐱᔪᒥᓇᖅᑐᓂ ᓱᕈᓯᕐᓄᑦ ᐸᖅᑭᔭᐅᑦᑎᐊᕐᓂᖏᓐᓄᑦ ᐊᑐᖅᑕᐅᕙᒃᑐᓂ, ᐱᓗᐊᖅᑐᒥ ᑕᐃᒃᑯᓄᖓ ᓴᓇᓯᒪᔪᓄᑦ ᐃᓄᖕᓄᑦ ᐃᓚᒌᖑᔪᓄᑦ.
ᓱᕈᓯᕐᓄᑦ ᐃᑲᔪᕐᓂᕐᒥ ᑲᑐᔾᔨᖃᑎᒌᖑᔪᑦ ᐋᑐᕚᒥ ᐃᖅᑲᓇᐃᔮᖃᖅᑎᑦᑎᓯᒪᕗᑦ ᐅᓄᕐᓂᖅᓴᐅᔪᓂ ᐃᓄᖕᓂ ᐃᖅᑲᓇᐃᔭᖅᑎᐅᔪᓂ, ᐊᒻᒪ ᐱᓕᕆᓯᒪᕗᑦ ᐃᓕᖅᑯᓯᒧᑦ ᐱᔪᓐᓇᑦᑎᐊᕐᓂᖓᓂ ᐱᓕᒻᒪᒃᓴᐃᓂᕐᒥ. ᓇᓗᓇᐃᖅᓯᓯᒪᒋᕗᑦ ᐊᔭᐅᕆᔪᓐᓇᕐᓂᐅᔪᒥ ᓇᓕᒧᙱᓐᓂᐅᔪᓂ ᑲᑐᔾᔨᖃᑎᒌᖑᔪᑦ ᓲᕐᓗ ᐃᒻᒥᖕᓂᒃ ᑎᒍᒥᐊᕐᓂᖏᓐᓂ ᐱᓕᕆᔾᔪᔾᔭᐅᕙᒃᑐᓄᑦ, ᐊᒻᒪ ᒥᒃᖠᒋᐊᖅᓯᓯᒪᕗᑦ ᐅᓄᕐᓂᐅᔪᓂ ᑲᒪᔨᐅᔪᓂ ᐊᒻᒪ ᐃᖅᑲᓇᐃᔭᖅᑎᓂ ᑲᑎᒪᖃᑎᒋᔭᐅᕙᒃᑐᓂ ᐃᓄᖕᓂ ᐱᓕᕆᖃᑎᒋᔭᒥᓂᑦ ᑲᑐᔾᔨᖃᑎᒌᖑᔪᓂᑦ ᐊᒻᒪ ᐃᓄᖕᓂ ᐃᓚᒌᖑᔪᓂᑦ ᐊᒃᓱᕈᕐᓂᐅᔪᒥ ᐃᓕᕋᓇᙱᓐᓂᖅᓴᐅᓇᓱᐊᕐᓂᕐᒧᑦ.
ᐊᖏᕐᕋᒧᑦ ᖃᓂᓐᓂᖅᓴᐅᔪᒥ, ᐅᑭᐅᖅᑕᖅᑐᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᑐᙵᕕᐅᔪᖅ (ACYF) ᐊᒻᒪ ᐅᒥᖕᒪᒃ ᐱᓕᕆᕝᕕᒃ ᐃᖃᓗᖕᓂ ᐱᓕᕆᕗᑦ ᑐᓂᓯᓂᕐᒥ ᐱᔭᕆᐊᖃᓪᓚᕆᒃᑐᒥ ᐃᑲᔪᖅᓱᐃᓂᐅᔪᒥ ᒪᒃᑯᒃᑐᓄᑦ ᐊᒻᒪ ᐃᓚᖏᓐᓄᑦ.
ᐅᒥᖕᒪᒃ ᐱᓕᕆᕝᕕᒃ ᐱᓂᕐᓗᕐᔪᐊᖅᑕᐅᓯᒪᔪᓄᑦ ᐃᓅᓕᓴᖅᓴᐃᔨᖃᖅᐳᑦ ᐊᒻᒪ ᐃᓅᓯᓕᕆᔨᐅᔪᓂ ᐃᖅᑲᓇᐃᔭᖅᑎᓂᑦ, ᐊᒻᒪᓗᑦᑕᐅᖅ ᐃᓄᑐᖃᕐᓂ ᐃᓅᓯᓕᕆᔨᐅᔪᓂ ᐊᑐᐃᓐᓇᖃᖅᑎᑦᑎᓂᕐᒥ ᐊᔪᕆᖅᓱᐃᓂᐅᔪᒥ ᐊᖓᔪᖅᑳᖑᔪᓄᑦ.
ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᖅ, ᐱᒋᐊᓚᐅᖅᑐᒥ ᐅᒃᑐᐱᕆ 2020–ᒥ, ᐊᑐᐃᓐᓇᖃᖅᑎᑦᑎᕗᖅ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᑎᓂᐅᔪᒥ ᑭᐅᓂᕐᒧᑦ ᓇᓕᓱᙱᓐᓂᐅᔪᓂ ᐊᒻᒪ ᖁᑦᑎᒃᑐᒥ ᐊᑭᐅᔪᓂ ᐆᒪᓇᓱᐊᕐᓂᕐᒧᑦ ᐅᑭᐅᖅᑕᖅᑐᒥ. ᐊᕐᕌᓂᐅᓚᐅᖅᑐᒥ, ᐊᐅᓚᑕᐅᓂᖓᓄᑦ ᐊᐅᓚᑦᑎᔨᐅᔪᖅ ᑕᔭ ᑑᑑ ᐃᑲᔪᖅᓯᒪᕗᖅ ᐃᓚᒌᓂᑦ ᑕᑕᑎᕆᓂᕐᒥ ᐅᓂᒃᑳᕆᓯᒪᑦᑎᐊᖅᑐᒥ–ᑐᕌᖓᔪᓄᑦ ᑐᒃᓯᕋᐅᑎᓂᑦ ᐃᑲᔪᖅᓱᐃᓂᕐᒧᑦ 86–ᓂ ᓱᕈᓯᕐᓂᑦ.
ᐅᑭᐅᖅᑕᖅᑐᒥ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᑐᙵᕕᐅᔪᖅ ᐱᓕᕆᖃᑎᖓ, ᐃᐊᒪ ᐋᑯᓗᒃᔪᒃ-ᕼᐋᑭᑦ, ᐅᖃᓚᐅᖅᐳᖅ, “ᓇᓗᓇᐃᖅᓯᔪᒪᑐᐃᓐᓇᖅᐳᖓ ᓴᙱᓂᐅᔪᓂ ᒪᒃᑯᒃᑐᓂ ᐃᓚᒌᖑᔪᓂᑦ ᓄᓇᓕᑦᑎᓐᓂ ᐊᓯᔾᔨᖅᓯᓇᓱᐊᖅᑐᓂ ᐊᖅᑯᑎᒋᔭᐅᔪᖅ ᒪᓕᒃᑕᐅᔪᒥ ᕿᑐᕐᙵᖏᓐᓂ. “ᐊᒥᓱᐊᓗᖕᓂ ᒪᒃᑯᒃᑐᓂ ᐃᓚᒌᖑᔪᓂ ᐃᓴᒃᑐᓂ ᐊᔾᔨᒌᙱᑦᑐᓄᑦ ᐃᑲᔪᕈᑎᒃᓴᓄᑦ ᕿᑐᕐᙵᒥᓄᑦ ᐊᒻᒪᓗ ᐃᒻᒥᖕᓄᑦ.”
ᒫᓐᓇᐅᔪᒥ, ᐃᓕᓐᓂᐊᕐᕕᖕᓄᑦ ᐱᓕᕆᐊᖑᔪᑦ ᑐᓂᓯᕙᒃᐳᑦ ᐊᑕᐅᓯᓪᓗᐊᒥ ᓂᕆᔭᒃᓴᓂ ᓇᓕᐊᑐᐃᓐᓇᓄᑦ ᓱᕈᓯᕐᒧᑦ ᐱᔭᕆᐊᖃᖅᑐᒥ, ᐊᒻᒪ ᐱᙳᐊᕐᓂᕐᒧᑦ ᐱᓕᕆᐊᖑᔪᓂ ᑐᓂᓯᓲᖑᕗᖅ ᒪᒃᑯᒃᑐᓂ ᐊᓂᐊᑎᑦᑎᓂᐅᔪᒥ ᐆᒻᒪᕆᖕᓂᖏᓐᓄᑦ, ᐱᙳᐊᕐᓂᒃᑯᑦ ᐅᕝᕙᓘᓐᓃᑦ ᓴᓇᐅᒐᓕᕆᓂᕐᒧᑦ ᐊᒻᒪ ᐃᓕᖅᑯᓯᒧᑦ ᖃᓄᐃᓕᐅᕐᓂᐅᔪᓄᑦ.
ᐅᑯᐊᖑᒐᓗᐊᖅᑎᓪᓗᒍ ᐊᔾᔨᒌᙱᕐᔪᐊᕐᓂᐅᔪᓂ. ᓄᓇᕗᒻᒥᐅᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖏᔪᓂ ᐃᖏᕐᕋᓂᖃᕐᔪᐊᖅᐳᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᐸᖅᑭᔭᐅᓂᖏᓐᓄᑦ. ᑲᔪᖏᖅᓴᐃᓐᓇᖅᐳᖅ ᑕᑯᓂᕐᒥ ᐱᓕᕆᓂᐅᔪᓂ ᐊᒥᓱᓂ ᑭᒡᓕᐅᔪᓂᑦ ᑎᑭᐅᑎᓂᖏᓐᓂ ᖃᓄᐃᙱᑦᑎᐊᖅᑐᓄᑦ ᐋᖅᑭᒍᑕᐅᔪᓄᑦ ᐃᓄᖕᓂ ᓱᕈᓯᕐᓂ ᑲᑎᙵᓂᖃᕐᓂᖏᓐᓂ ᐃᓕᖅᑯᓯᖓᓐᓄᑦ ᐊᒻᒪ ᓄᓇᓕᖏᓐᓄᑦ ᖃᓂᓪᓗᑎᒃ.