ᑕᐃᒪᐃᒐᔪᒃᐳᖅ ᑕᑯᓂᕐᒥ ᖃᔅᓯᒐᓚᖕᓂ ᐱᒋᐊᕈᑎᓂ ᑐᓴᒐᒃᓴᓂ ᐊᐅᓚᑕᐅᔪᓂ ᑕᑯᓴᕋᐃᓐᓂᐅᔪᓂ ᐃᓄᖕᓂ ᒫᓐᓇᐅᔪᒥ ᐊᕐᕌᒎᔪᒥ.
ᒐᕙᒪᒃᑯᓐᓂ ᑮᓇᐅᔭᓂ ᐊᑐᕐᓂᐅᙱᑦᑐᒥ – ᑭᓯᐊᓂ, ᑕᐃᒃᑯᐊᑦᑕᖅ, ᐅᓪᓗᖃᕐᓂᐊᕆᕗᑦ ᓯᕿᓂᕐᒥ–ᑭᓯᐊᓂ ᐆᓇᔪᖕᓂᐅᔪᒥ ᐊᒻᒪ ᓇᒡᓕᒍᓱᖕᓂᕐᒥ ᑐᓂᔭᐅᔪᒥ ᓄᓇᓕᓕᒫᑦᑎᓐᓂ ᑕᐃᒃᑯᓇᙵᑦ ᖃᓂᑦᑐᓂ ᐊᒻᒪ ᐅᖓᓯᒃᑐᓂ.
ᐅᑭᐅᖅᑕᖅᑐᖅ ᐸᖅᑮᓐᓇᐅᔭᖅᐳᑦ ᓇᖕᒥᓂᖏᓐᓂ, ᕼᐋᒻᓚᒃᑯᑦ ᑎᑎᕋᕐᕕᑦ ᐊᒻᒪ ᑐᕌᖓᓂᖃᖅᑐᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᐸᒃᑐᓄᑦ ᐋᖅᑭᒃᓱᐃᔪᓂ ᖁᕕᐊᓱᒡᕕᖕᒥ ᓂᕿᓂᑦ ᐴᖅᑲᖅᓯᒪᔪᓂ ᑕᒪᒃᑭᓗᒃᑖᓄᑦ ᐊᖏᕐᕋᕆᔭᐅᔪᓄᑦ ᖁᕐᓗᖅᑑᒥ ᐊᒻᒪ ᖃᒪᓂᑦᑐᐊᕐᒥ, ᐊᒻᒪ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᐸᒃᑐᑦ ᐃᖃᓗᒃᑑᑦᑎᐊᕐᒥ ᑲᑎᖃᑎᖃᖅᑐᓂ ᑲᓇᑕᒥ ᐸᓖᓯᒃᑯᓐᓂ ᐋᖅᑭᒃᓱᐃᓂᕐᒧᑦ ᐴᖅᑲᖅᓯᒪᔪᓂ ᓄᓇᖃᖅᑎᐅᔪᓄᑦ.
ᖁᕕᐊᓱᒡᕕᖕᒥ ᑲᑎᒪᔨᕋᓛᖑᔪᑦ ᖁᕐᓗᖅᑑᒥ ᐱᓕᕆᓚᐅᖅᐳᑦ ᐱᕈᖅᓴᐃᓂᕐᒥ $60,000–ᒥ ᑐᓂᓯᓂᕐᒥ ᓂᕿᓂᑦ ᑐᓐᓂᖅᑯᑎᐅᔪᓂ ᖁᕕᐊᓱᒡᕕᖕᒧᑦ ᓂᕆᔭᐅᔪᒃᓴᓂ ᐊᒻᒪ ᐃᖏᕐᕋᔪᓄᑦ ᐅᓪᓛᕈᒻᒥᑕᕐᓂ ᖃᓄᐃᓐᓂᐅᔪᓂ ᖄᖏᖅᓯᒪᔪᓂ ᐱᓇᓱᐊᕈᓯᕐᓂ ᐱᖓᓱᓂ ᑎᓯᐱᕆᒥ.
ᓯᓐᑎ ᑎᓕᓐ, ᐱᒋᐊᖅᑎᑦᑎᔨᐅᓪᓗᓂ ᐅᑯᓄᖓ ᕙᐃᔅᐳᒃᑯᑦ ᑲᑎᙵᓂᐅᔪᒥ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᕋᓛᓂᑦ, ᐃᑲᔪᓚᐅᖅᐳᖅ ᐋᖅᑭᒃᓱᐃᓂᕐᒥ ᑐᓂᔭᐅᓂᐅᔪᒥ ᐅᓄᕐᓂᖅᓴᐅᔪᓂ 5,500–ᓂ ᖁᕕᐊᓲᓯᐊᓂ ᑲᓇᑕᓕᒫᒥ, ᑐᕌᖅᑐᓄᑦ ᐅᑭᐅᖅᑕᖅᑐᒥ ᐃᓕᓐᓂᐊᖅᑎᐅᔪᓄᑦ.
ᑲᓇᑕᒥ ᐸᓖᓯᒃᑯᑦ ᐱᓕᕆᓂᖃᕐᔪᐊᖅᓯᒪᕗᑦ ᐃᓵᒃᓯᒪᓂᕐᒧᑦ ᐊᒻᒪ ᑐᓐᓂᖅᑯᑕᐅᔪᓂ ᓄᓇᓕᖕᓄᑦ. ᑕᒪᑐᒪᓂ ᐊᕐᕌᒎᔪᒥ, ᓱᕈᓯᑦ ᐃᒡᓗᓕᖕᒥ, ᓴᓂᑭᓗᐊᖅ ᐊᒻᒪ ᓴᓪᓕᓂ ᖁᕕᐊᓲᓯᐊᕐᓂᐊᖅᐳᑦ ᐃᓚᒋᔭᐅᓪᓗᓂ 11–ᖓᓂ ᐱᓕᕆᐊᖑᒃᑲᓐᓂᖅᑐᒥ ᐱᙳᐊᓂᑦ ᐅᑭᐅᖅᑕᖅᑐᒧᑦ ᐱᓕᕆᐊᖑᓂᐅᔪᒥ, ᑲᑐᔾᔭᐅᓪᓗᓂ ᐊᒃᓱᕈᕈᑕᐅᔪᖅ ᑲᓇᑕᒥ ᖃᖓᑕᓲᖅᑎᐅᔪᓂ ᐅᓇᑕᖅᑐᒃᓴᓂ. ᒥᑦᑎᒪᑕᓕᒃ ᖁᕕᐊᓲᓯᐊᕐᓂᐊᕆᕗᑦ ᕼᐋᑭᒧᑦ ᐊᑐᖅᑕᐅᓲᓄᑦ. ᐅᓇᑕᖅᑐᒃᓴᑦ ᐊᒻᒪ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᖃᔅᓯᒐᓚᖕᓂ ᐅᓪᓗᓂ ᐴᖅᑲᐃᓚᐅᖅᐳᑦ ᖁᕕᐊᓲᓯᐊᒃᓴᓂ ᑎᓴᒪᓂ–ᓇᑉᐸᓪᓗᐊᖓᓂᓗ ᕿᑐᑦᑐᒐᐅᔭᕐᓂ ᑐᓐᓂᖅᑯᓯᐊᖑᔪᓂ.
ᑭᙵᐃᑦ ᑕᑯᓚᐅᕆᕗᑦ ᐊᒥᓱᒻᒪᕆᐊᓗᖕᓂ ᐱᖁᑎᓂᑦ ᑎᑭᑎᑕᐅᔪᓂ ᖃᖓᑕᓲᒃᑯᑦ ᐋᑐᕚᒥ, ᐃᓚᖃᖅᑐᒥ ᑕᓚᕖᓴᒧᑦ ᐱᙳᐊᕈᑎᐅᔪᓂ ᐊᒻᒪ ᐊᓯᖏᓐᓂ ᐱᙳᐊᓂᑦ; ᐊᓐᓄᕌᓂ ᐊᖑᑎᓄᑦ, ᐊᕐᓇᓄᑦ ᐊᒻᒪ ᓱᕈᓯᕐᓄᑦ, ᐃᓚᖃᖅᑐᒥ ᐊᓕᖅᓯᓂ ᐊᒻᒪ ᑲᒥᓪᓛᕈᑎᓂᑦ; ᐃᕐᒥᒍᑎᓂᒃ ᓲᕐᓗ ᐅᐊᓴᐅᑎᑦ, ᑭᒍᑎᓯᐅᑎᑦ ᐊᒻᒪ ᑭᑎᓯᐅᕈᑎᓂᑦ; ᐸᓂᖅᑐᓂ ᓂᕿᓂᑦ; ᖁᐃᖏᓕᓴᐃᑦ ᐊᒻᒪ ᓄᑕᕋᓛᒧᑦ ᐊᓪᓚᕈᑎᑦ; ᒥᖅᑐᒐᒃᓴᐃᑦ ᖃᓪᓗᓈᖅᑕᑦ; ᕼᐋᑭᒧᑦ ᕿᔪᖏᑦ ᐊᒻᒪ ᐊᓯᖏᓐᓂ ᕼᐋᑭᖅᑐᖅᓯᐅᑎᑦ; ᐊᒻᒪ ᐊᓯᖏᓐᓂ ᓱᓇᒃᑯᑖᓂ ᐱᖁᑎᓂᑦ.
“ᖃᐅᔨᒋᐊᖅᑕᐅᓯᒪᙱᓚᖅ ᓱᓕ ᑕᒪᑐᒪᓂ ᐊᕐᕌᒎᔪᒥ (ᐅᖁᒪᐃᓐᓂᖓᓂ) ᑭᓯᐊᓂ ᐅᖃᐅᔾᔭᐅᓯᒪᓂᓐᓂ, ᑐᓐᓂᖅᑯᑕᐅᔪᑦ ᓱᓕ ᑎᑭᑉᐸᓪᓕᐊᕗᑦ ᓄᖅᑲᕐᕕᒃᓴᖏᑕ ᐅᓪᓗᖓ ᐊᓂᒍᕋᓗᐊᖅᑎᓪᓗᒍ. ᐅᓯᔭᐅᔪᒥ ᓇᒃᓯᐅᔾᔨᓯᒫᓂᒃᐳᑦ ᐊᒻᒪ ᐸᕐᓇᒃᑲᓐᓂᖅᐳᑦ ᐊᓯᔭᐅᒃᑲᓐᓂᕐᓂᐊᖅᑐᒥ ᒫᓐᓇᐅᔪᒥ,” ᐅᖃᐅᓯᐅᓪᓗᓂ ᐅᖃᖅᑎᐅᔪᒥ Const. ᐹᓖᓐ ᒥᓛᓐᓯᓐ.
ᑲᖏᖅᖠᓂᕐᒥ, ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓ ᐊᔪᖅᓴᖅᑐᓄᑦ ᑐᓂᓯᕙᒃᑐᓄᑦ ᒧᒥᕐᓂᐅᔪᖅ ᐱᓕᕆᐊᖑᔪᖅ ᑐᓂᓯᓚᐅᖅᐳᖅ $50,000–ᓂ ᑐᓐᓂᖅᑯᓯᐊᖑᔪᓂ ᓄᓇᓕᖕᓄᑦ ᑲᑐᔾᔨᖃᑎᒌᖑᔪᓄᑦ, ᐃᓚᖃᖅᑐᒥ $10,000–ᓂ ᐊᑐᓂ ᑲᓇᑕᒥ ᐸᓖᓯᒃᑯᓐᓂ ᖁᕕᐊᓱᒡᕕᖕᒥ ᐴᖅᑲᖅᓯᒪᔪᓄᑦ ᐱᓕᕆᐊᖑᔪᒥ ᐊᒻᒪ ᐱᙳᐊᕐᓂ ᐊᕝᕗᕐᓂᖏᓐᓂ ᐋᖅᑭᒃᓱᖅᑕᐅᔪᒥ ᓄᓇᖃᖅᑎᐅᔪᒥ ᓕᐅᓂ ᓴᒻᒧᖅᑐᕐᒧᑦ.
ᐊᔪᕐᓇᙱᑦᑐᑯᓘᓇᔭᖅᐳᖅ ᐃᓱᒪᒋᙱᑐᐃᓐᓇᕐᓂᕐᒧᑦ ᐅᑯᓂᖓ ᐊᒻᒪ ᐊᓯᖏᓐᓂ ᐱᓕᕆᓂᐅᔪᓂ ᑯᙵᓇᕐᓂᐅᔪᒥ ᐊᔪᕐᓇᙱᑦᑐᒥ ᑖᒃᓯᓂ ᐲᖅᑕᐅᓂᖓᓂ ᐊᖏᓂᖅᓴᐅᔪᓄᑦ ᑲᑐᔾᔨᖃᑎᒌᖑᔪᓄᑦ ᑐᓂᓯᔨᐅᔪᓂ, ᑭᓯᐊᓂ, ᑐᕌᒐᕆᔭᖓ ᑐᓐᓂᖅᑯᓯᐊᖑᔪᓂ ᐊᒻᒪ ᐃᓱᒪᑦᑎᐊᕐᓂᐅᔪᒥ ᓂᕈᐊᖅᓯᓂᐅᔪᓂ ᐱᔪᒃᓴᓂ – ᐃᓄᑐᐃᓐᓇᕐᒧᑦ ᐊᒃᓱᕈᕐᓂᐅᔪᓄᑦ ᐅᕝᕙᓘᓐᓃᑦ ᓄᓇᓕᓕᒫᑦ – ᑲᔪᖏᖅᓴᐃᒐᔪᒃᐳᑦ ᐅᒃᐱᕈᓱᖕᓂᐅᔪᒥ ᐃᓅᖃᑎᑦᑎᓐᓂ.
ᓗᐊᕆ ᕉᑎᒃ, ᐊᑕᐅᓯᖅ ᐃᓕᓴᐃᔨᐅᖃᑕᐅᔪᓂ ᖁᕐᓗᖅᑑᒥ ᖁᕕᐊᓱᒡᕕᖕᒥ ᑲᑎᒪᔨᕋᓛᖑᔪᓄᑦ ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ, ᐅᖃᓚᐅᖅᐳᖅ ᐊᓕᐊᓇᐃᒋᓂᖓᓂ ᐃᓚᐅᖃᑕᐅᓂᕐᒥ ᐱᒋᐊᕈᑕᐅᔪᒥ “ᐅᕙᓐᓄᑦ, ᖁᕕᐊᓱᒡᕕᒃ ᓄᓇᓕᖕᓂ ᐱᔾᔪᑎᖃᕐᒪᑕ – ᐸᐸᑦᑎᓂᕐᒥ ᐱᖅᑯᓯᐅᔪᓂ ᐱᒋᐊᖅᑕᐅᓚᐅᖅᑐᓂ ᐊᕐᕌᒍᒐᓴᓂ ᖁᕐᓗᖅᑑᕐᒥᐅᓂ ᑐᓂᓯᕗᖅ ᐱᕕᒃᓴᖃᕐᓂᐅᔪᒥ ᑕᒪᒃᑭᓗᒃᑖᓄᑦ ᐆᒪᓂᕐᒧᑦ ᐊᒻᒪ ᐃᓕᑦᑎᓂᕐᒧᑦ ᐃᓄᐃᑦ ᖃᐅᔨᒪᔭᑐᖃᖏᓐᓂ ᐱᓐᓇᕆᔭᐅᔪᓂ ᓲᕐᓗ ᐱᔨᑦᓯᕐᓂᖅ ᐊᒻᒪ ᐱᓕᕆᖃᑎᒌᖕᓂᕐᒥ.”
ᖃᕋᓴᐅᔭᑎᒍᑦ ᖃᓄᐃᓕᐅᕐᓂᐅᔪᑦ ᐱᓕᕆᐊᖑᓂᐊᖅᐳᑦ ᑕᒪᒃᑭᒐᓚᖕᓂ ᓄᓇᓕᐅᔪᓂ ᐃᑲᔪᕐᓂᕐᒧᑦ ᖁᕕᐊᑦᑕᒃᑎᑦᑎᓇᓱᐊᕐᓂᕐᒧᑦ ᐊᒻᒪᓗ ᖃᔅᓯᐊᕐᔪᐃᑦ ᐅᐸᒃᑕᐅᓯᒪᔪᓐᓇᕐᓂᐊᖅᐳᑦ, ᓲᕐᓗ ᐃᖃᓗᖕᓂ ᓵᓐᑕᑲᓛᓯᒧᑦ ᓄᓇᓯᐅᑎᓂᒃ ᐃᖏᕐᕋᔭᖕᓂᐅᔪᖅ.
ᖃᔅᓯᒐᓚᖕᓂ ᐊᕐᕌᒍᓂ ᐊᒃᓱᕈᕐᓇᖅᑑᓯᒪᕗᖅ, ᐊᒥᓱᓂ ᖃᓄᐃᓕᐅᕐᓂᐅᔪᓂ ᓄᖅᑲᖅᑎᑕᐅᓪᓗᑎᒃ ᐅᕝᕙᓘᓐᓃᑦ ᑭᒡᓕᖃᖅᑎᑕᐅᓪᓗᑎᒃ ᖃᕋᓴᐅᔭᑎᒍᑦ ᐃᓚᐅᖃᑕᐅᓂᐅᔪᒥᑐᐊᖅ, ᑕᐃᒫᒃ ᑐᙵᓇᒃᑲᓐᓂᕐᓂᐊᕐᔪᖕᒥ ᑕᐅᕗᙵᕐᔪᐊᕐᓂᖃᖅᐳᖅ.