ᐊᒥᓱᐊᓗᖕᓂ ᖁᔭᓕᔾᔪᑎᑕᖃᕈᓐᓇᖅᐳᖅ ᑕᒪᑐᒪᒥ ᖁᕕᐊᓱᒡᕕᐅᔪᒥ, ᐃᓚᖃᖅᑐᒥ ᐃᑯᒪᓂᐅᔪᒥ ᓱᓪᓗᑯᑖᑉ ᐃᓱᐊᓂ ᓂᕆᐅᖕᓂᖃᖅᖢᑕ ᐋᓐᓂᐊᓕᕇᒃᑯᑎᑦ ᒪᒃᑯᖕᓂᖅᓴᓄᑦ ᓄᓇᖃᖅᑎᐅᔪᓂ ᑕᐃᒪᐃᑦᑎᑦᑎᓂᐊᕐᓂᖓᓂ.
ᓯᕗᓪᓕᖅᐸᐅᔪᒥ ᐱᓕᕆᓂᐅᔪᒥ ᓄᕙᒡᔪᐊᕐᓇᖅ-19–ᒧᑦ ᐋᓐᓂᐊᓕᕇᒃᑯᑎᓂ ᐅᐸᒃᑕᐅᕕᖕᓂ ᓱᕈᓯᕐᓄᑦ ᐅᑭᐅᓕᖕᓂ 5–ᒥ 11–ᒧᑦ ᐱᔭᕇᓚᐅᖅᐳᖅ ᑎᓯᐱᕆ 9–ᒥ ᑕᒪᒃᑭᓂ ᓄᓇᕗᒻᒥ ᓄᓇᓕᐅᔪᓂ, ᐋᓐᓂᐊᓕᕇᒃᑯᑎᒥᒃ ᐅᐸᒃᑕᐅᕕᒃᓴᓂ ᓱᓕ ᐊᑐᐃᓐᓇᐅᔪᓂ ᐃᖃᓗᖕᓂ.
ᑕᑯᒃᓴᐅᓂᐅᔪᒥ ᐋᓐᓂᐊᓕᕇᒃᑯᑎᒥ ᐸᐃᑉᐹᖃᕐᓂᕐᒥ, ᐱᔭᕇᖅᓯᒪᓂᖃᖅᑐᒥ ᖃᕋᓴᐅᔭᒃᑰᕈᓐᓇᖅᑐᒥ QR ᓇᓗᓇᐃᒃᑯᑕᐅᔪᒥ, ᐊᑐᐃᓐᓇᐅᓯᒪᕗᖅ ᓄᓇᕗᒻᒥᐅᓄᑦ ᓄᓇᓕᖕᓂ ᐋᓐᓂᐊᕕᖕᓂ ᑕᐃᒪᙵᓂ ᐅᒃᑐᐱᕆ 12–ᒥ.
ᐅᓇ ᑕᑯᒃᓴᐅᓂᖅ ᑖᓐᓇᑐᐊᖑᓕᖅᐳᖅ ᑕᒪᒃᑭᓂ-ᐋᓐᓂᐊᓕᕇᒃᑯᓯᖅᓯᒪᔪᓄᑦ ᐊᐅᓪᓛᖅᑏᑦ ᐱᔭᕆᐊᖃᓕᖅᐳᑦ ᐃᓯᒃᑲᓐᓂᕐᓂᕐᒧᑦ ᓄᓇᕗᒻᒧᑦ, ᐃᓇᖏᖅᓯᓪᓗᓂ ᐃᓚᐅᙱᑦᑐᒥ ᑎᑎᖅᑲᒥᒃ ᐃᓄᓕᒫᓄᑦ ᐋᓪᓕᐊᖃᕐᓇᙱᑦᑐᓕᕆᔨᒃᑯᓐᓂ ᐱᔭᕆᐊᖃᓚᐅᖅᑐᒥ ᓯᕗᓂᐊᓂ ᑎᓯᐱᕆ 1–ᒥ.
ᐅᓇ ᐱᐅᓪᓗᓂ ᐱᓕᕆᓂᐅᕗᖅ ᒥᒃᖠᒋᐊᖅᓯᓂᕐᒧᑦ ᐸᐃᑉᐹᓕᕆᓂᕐᓄᑦ ᓄᓇᕗᒻᒥᐅᑦ ᐱᔭᕆᐊᖃᓚᐅᖅᑐᓂ ᐊᐅᓪᓛᕐᓂᕐᒧᑦ, ᐊᒻᒪ ᒥᒃᖠᒋᐊᓪᓚᕆᖕᓂᐊᖅᑐᖅ ᐃᑲᕐᕋᒃᑲᓐᓂᐅᔪᓂ ᐱᔭᕆᐊᓕᖕᒥ ᑐᓂᓯᓂᕐᒧᑦ ᐃᓚᐅᙱᑎᑕᐅᓂᐅᔪᓂ ᐊᒥᓱᓄᑦ ᐃᓄᖕᓄᑦ ᐊᐅᓪᓚᖅᑐᓂ ᓄᓇᕗᒻᒥ ᐱᔭᒃᓴᖃᐅᕐᔪᐊᖅᑐᓄᑦ ᖁᕕᐊᓱᒡᕕᖕᒥ ᐊᐅᓪᓛᕐᓂᐅᔪᒥ ᐊᕐᕌᒎᑉ ᐃᓚᖓᓐᓂ.
ᑭᒡᓕᖃᖅᑎᑕᐅᓂᐅᔪᑦ ᖃᓱᕙᓪᓕᐊᕗᑦ ᓄᓇᓕᖕᓂ ᑕᑯᓚᐅᖅᑐᒥ ᒫᓐᓇᓕᓴᐅᓛᖑᔪᒥ ᐊᐃᑦᑐᐃᓂᐅᔪᒥ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ. ᒥᑦᑎᒪᑕᓕᒃ ᐊᒻᒪ ᓴᓪᓖᑦ ᑕᒪᒃᑭᑦ ᑕᑯᕙᓪᓕᐊᓯᕗᑦ ᑲᑎᙵᓂᐅᔪᓂ ᑭᒡᓕᐅᔪᓂ ᐊᖏᒡᓕᒋᐊᖅᑕᐅᓂᖏᓐᓂ ᖄᖏᕐᓂᐅᔪᒥ ᖃᔅᓯᒐᓚᖕᓂ ᐱᓇᓱᐊᕈᓯᕐᓂ ᑕᐃᒪᙵᓂ ᑭᖑᓪᓕᖅᐹᖑᔪᓂ ᐅᓂᒃᑳᕆᔭᐅᓂᐅᔪᓂ ᐱᑕᖃᕐᓂᐅᔪᓂ, ᐊᒻᒪ ᐊᑕᐅᓯᕐᒥ ᓄᕙᒡᔪᐊᕐᓇᖅ-19–ᒥ ᐱᑕᖃᕐᓂᐅᔪᒥ ᐃᖃᓗᖕᓂ, ᑭᒡᓕᖃᖅᑎᑕᐅᒃᑲᓐᓂᕐᓂ ᓴᖅᑭᑕᐅᔪᖃᖅᓯᒪᙱᓚᖅ.
ᑭᕙᓪᓕᕐᒥ, ᑕᒪᒃᑭᑦ ᑲᖏᖅᖠᓂᕐᒥ ᐊᒻᒪ ᐊᕐᕕᐊᓂ ᒪᓕᒐᕋᓛᓕᐅᖅᓯᒪᕗᑦ – ᓄᕕᐱᕆ 30–ᒥ ᐊᒻᒪ ᑎᓯᐱᕆ 6–ᒥ, ᒪᓕᖃᑦᑕᐅᑎᔪᓂ – ᐱᔭᕆᐊᖃᖅᑎᑦᑎᔪᒥ ᑭᓇᑐᐃᓐᓇᒥ ᐅᑭᐅᓖᑦ 12 ᐅᖓᑖᓄᑦ ᓇᓗᓇᐃᒃᑯᑕᒥ ᑕᑯᒃᓴᐅᑎᑦᑎᔭᕆᐊᖃᕐᓂᖏᓐᓂ ᐋᓐᓂᐊᓕᕇᒃᑯᑎᒥᓂᒃ ᐃᓯᕈᓐᓇᕐᓂᖏᓐᓂ ᕼᐋᒻᓚᐅᔪᓂ ᐃᒡᓗᖁᑎᖏᓐᓄᑦ ᓇᓕᐊᑐᐃᓐᓇᓂ ᓄᓇᓕᐅᔪᓂ.
ᑲᖏᖅᖠᓂᕐᒥ, ᐅᑯᐊ ᐃᒡᓗᕐᔪᐊᑦ ᐃᓚᖃᖅᐳᑦ ᐱᙳᐊᕐᕕᒃ, ᐊᓐᓂᑭᑕᕐᕕᒃ ᐅᕝᕙᓘᓐᓃᑦ ᓇᓕᐊᑐᐃᓐᓇᓂ ᕼᐋᒻᓚᒃᑯᑦ ᐃᒡᓗᖁᑎᖏᓐᓂ ᐱᓕᕆᔪᓂ ᐃᓄᓕᒫᓄᑦ ᑲᑎᙵᓂᐅᔪᒥ ᓲᕐᓗ ᐱᙴᒥ ᐅᓐᓄᖓᓐᓂ, ᑲᑎᑎᑕᐅᔪᓂ ᐅᕝᕙᓘᓐᓃᑦ ᐃᓄᓕᒫᓄᑦ ᑲᑎᒪᓂᐅᔪᓄᑦ “ᐃᓱᒪᒋᓇᒍ ᖃᓄᐃᓕᐅᕐᓂᐅᔪᖅ ᕼᐋᒻᓚᒃᑯᓐᓂ ᑲᒪᒋᔭᐅᒍᓂ ᐅᕝᕙᓘᓐᓃᑦ ᐱᖓᔪᖓᓐᓂ ᐱᓕᕆᔪᒥ ᑲᒪᒋᔭᖃᕈᓂ ᖃᓄᐃᓕᐅᕐᓂᐅᔪᒥ.”
ᑲᖏᖅᖠᓂᕐᒥ ᒪᓕᒐᕋᓛᖅ ᐱᓗᐊᖅᑐᒥ ᑎᓯᓂᖃᕐᔪᐊᖅᓯᒪᕗᑦ ᐃᓚᐅᙱᑎᑕᐅᓂᐅᔪᓄᑦ, ᐅᖃᖅᖢᑎᒃ, “ᐃᓄᐃᑦ ᐃᓚᐅᙱᑎᑕᐅᔪᑦ ᐋᓐᓂᐊᓕᕇᒃᑯᑎᒥᒃ ᐱᔾᔪᑎᖃᖅᑐᒥ ᖃᓄᐃᓐᓂᐅᔪᒥ ᓴᐳᒻᒥᔾᔪᑕᐅᔪᑦ ᑕᒻᒪᖅᖢᑎᒃ ᐱᒋᐊᓲᖑᔪᓂ ᑎᒥᖕᓂ ᐊᑲᐅᙱᓕᐅᕈᑕᐅᔪᓂ, ᑎᒥᐅᑉ ᓈᒻᒪᒋᙱᑕᖓᓂ ᐊᓯᖏᓪᓘᓐᓃᑦ ᖃᓄᐃᓐᓂᐅᔪᓄᑦ, ᑲᑎᙵᓂᕐᓄᐊᓪᓗᐊᙱᓚᑦ ᓯᕗᓪᓕᕐᒥ … ᐊᒻᒪᓗ ᐃᓚᐅᙱᑎᑕᐅᓂᖃᔾᔮᙱᓚᑦ ᐅᕙᙵᑦ ᒪᓕᒐᕋᓛᖑᔪᒥ,” ᑭᓯᐊᓂ ᑐᒃᓯᕋᕈᓐᓇᖅᐳᑦ ᐱᓕᕆᓂᐅᔪᒥ–ᐱᓕᕆᓂᐅᔪᒧᑦ ᑐᙵᕕᓕᖕᒥ.
ᐃᓚᐅᙱᑎᑕᐅᓂᖃᕈᓐᓇᖅᐳᑦ ᐋᓐᓂᐊᓕᕇᒃᑯᓯᖅᓯᒪᙱᑦᑐᓄᑦ ᓄᓇᖃᖅᑎᐅᔪᓄᑦ ᐅᐸᖕᓂᕐᒧᑦ ᐋᓐᓂᐊᓕᕇᒃᑯᑎᓂ ᐅᐸᒃᑕᐅᕕᒃᓴᓄᑦ ᕼᐋᒻᓚᐅᔪᓂ ᐃᒡᓗᖁᑎᖏᓐᓄᑦ, ᐅᕝᕙᓘᓐᓃᑦ ᐊᑭᓖᔭᖅᑐᕐᓗᑎᒃ ᐊᒻᒪ ᑐᒃᓯᕋᕐᓂᕐᒧᑦ ᐱᔪᓐᓇᐅᒻᒥ, ᐱᔨᑦᑎᕋᕐᓂᕐᒧᑦ ᐊᒻᒪ ᐱᓕᕆᐊᖑᔪᓄᑦ, ᒪᑐᐃᖅᓯᒪᔭᕆᐊᖃᕋᔭᖅᐳᑦ ᐃᓗᐊᓃᑎᓪᓗᒋᑦ.
ᑕᐃᒪᐃᑦᑐᓂ ᒪᓕᒐᕋᓛᖑᔪᓂ ᐅᐊᑲᓪᓚᐅᔮᖅᐳᑦ ᐃᓄᑭᑦᑐᓂ ᐃᓗᐊᖅᓴᙱᑦᑐᓄᑦ ᐅᕝᕙᓘᓐᓃᑦ ᐊᑭᕋᖅᑐᑐᐃᓐᓇᕈᕕᑦ ᐋᓐᓂᐊᓕᕇᒃᑯᑎᓂᑦ – ᑭᓱᑐᐃᓐᓇᖅ ᓇᖕᒥᓂᖅ ᐱᔾᔪᑎᑎᑦ – ᑭᓯᐊᓂ ᓄᓇᓕᖕᓂ ᓯᕗᓕᐅᖅᑎᐅᔪᑦ ᐊᔭᐅᕆᔪᓂ ᐅᑯᓂᖓ ᒪᓕᒐᓕᐊᖑᔪᓂ ᓴᖑᓕᒑᙱᓚᑦ ᓴᐳᔾᔨᓯᒪᓇᓱᖕᒪᑕ ᐃᓄᖕᓂ ᐱᐅᓂᖅᐹᖑᔪᒥ ᐱᔪᓐᓇᕐᓂᖏᓐᓂ, ᐊᒻᒪ ᐊᔪᕐᓇᖅᐳᖅ ᐸᓯᒃᖠᓂᕐᒧᑦ ᒪᑐᐃᒃᑲᓐᓂᖅᓯᔪᒪᓂᕐᒧᑦ ᐃᓐᓄᒍᓐᓇᕐᓂᖓᓂ ᐱᙳᐊᕐᕕᓂ ᐊᒻᒪ ᐊᓐᓂᑭᑕᕐᕕᖕᓂ ᐊᑐᕐᓂᖃᓛᖑᓂᕐᒧᑦ ᐃᒡᓘᑉ ᐃᓗᐊᓃᓐᓇᕐᓂᐅᔪᒥ.
ᐊᔪᕐᓇᖅᐳᖅ ᑕᑯᓂᕐᒥ ᐃᓐᓄᒍᓐᓇᕐᓂᖓᓂ 50–ᓂ ᐃᓄᖕᓂ ᐃᓗᐊᓂ $30-ᒥᓕᐊᓐᑐᖅᑐᒥ ᐊᓐᓂᑭᑕᕐᕕᖕᒥ 950–ᓂ ᐃᒃᓯᕙᐅᑕᓕᖕᓂ ᐊᒻᒪ ᐊᐅᓚᑕᐅᑐᐃᓐᓇᖅᐸᒃᑐᒥ ᑕᖅᑭᓄᑦ ᑎᓴᒪᓄᑦ ᐊᐅᓚᑕᐅᓪᓚᕆᖕᓂᖓᓂ ᑕᐃᒪᙵᓂ ᒪᑐᐃᖅᑕᐅᓪᓚᕆᓚᐅᕐᓂᖓᓂ ᓄᕕᐱᕆ 2019–ᒥ.
ᓱᓕ ᑐᓴᕐᓇᙱᓚᖅ ᓄᓇᕗᒻᒥ ᒐᕙᒪᒃᑯᑦ ᐅᔭᐅᕆᓂᐊᕐᓂᖏᓐᓂ ᑖᔅᓱᒥᖓᑦᑕᐃᓐᓇᖅ ᐱᓕᕆᐊᒃᓴᐅᔪᒥ ᓄᓇᕗᓕᒫᒥ. ᐱᓕᕆᕝᕕᒃ ᒫᓐᓇᓕᓴᐅᔪᒥ ᐅᖃᓚᐅᖅᐳᖅ ᓄᑖᖑᔪᒥ–ᑎᒃᑯᐊᖅᑕᐅᓚᐅᖅᑐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᖓ ᔮᓐ ᒪᐃᓐ ᑐᓂᓯᔭᕆᐊᖃᕐᓂᐊᕐᓂᖓᓂ ᐅᖃᐅᓯᒃᓴᒥᓂᑦ ᐊᒻᒪ ᑭᐅᔾᔪᑎᓂ ᓯᕗᓂᐊᓂ ᑕᐃᒪᐃᑦᑐᒥ ᐃᓱᒪᓕᐊᖑᔪᒥ ᓴᓇᔭᐅᔪᓐᓇᕐᓂᖓᓂ.
83 ᐳᓴᓐᑎᐅᔪᒥ ᓄᓇᕗᒻᒥᐅᓂ 12 ᐅᖓᑖᓂ ᐅᑭᐅᓕᖕᓂ ᑕᒪᒃᑭᖅᑐᒥ ᐋᓐᓂᐊᓕᕇᒃᑯᓯᖅᓯᒪᔪᓂ ᐊᒻᒪ ᐊᖏᕐᔪᐊᖅᑐᒥ 92 ᐳᓴᓐᑎᒥ ᐱᓯᒪᓂᖏᓐᓂ ᓯᕗᓪᓕᖅᐹᒥ ᑲᐱᔭᐅᓂᐅᔪᒥ ᓴᐳᔾᔨᓯᒪᓂᕐᒧᑦ, ᓄᓇᕗᒻᒥᐅᑦ ᐱᓕᕆᐊᓂᒃᐳᑦ ᓴᐳᔾᔨᓯᒪᓂᕐᒥ ᓴᓂᓕᖏᓐᓂᑦ.
ᑕᑯᒃᓴᐅᓂᐅᔪᒥ ᐋᓐᓂᐊᓕᕇᒃᑯᑎᒥᒃ ᐱᐅᓪᓗᓂ ᖃᓄᐃᓕᐅᕐᓂᐅᓇᔭᖅᐳᖅ ᓇᓗᓇᐃᖅᓯᓂᕐᒥ ᐃᓄᓕᒫᓂ ᐃᓂᐅᔪᓂ ᐊᑦᑕᓇᔾᔭᐃᖅᓯᒪᐃᓐᓇᕐᓂᖏᓐᓂ ᐊᔪᕐᓇᙱᓐᓂᓕᒫᖓᓂ ᓄᓇᕗᒻᒥᐅᑕᓗᒃᑖᓄᑦ, ᐃᓚᖃᖅᑐᒥ ᓄᑲᖅᖠᖅᐹᖁᑎᑦᑎᓐᓂ ᐊᒻᒪ ᐊᒃᑐᖅᑕᐅᓴᕋᐃᓛᖑᔪᓄᑦ.