ᒐᕙᒪᑐᖃᒃᑯᑦ ᐅᖃᐅᓯᒃᓴᓕᐊᕆᓚᐅᖅᑕᖓᓂ ᔭᓄᐊᕆ 21–ᒥ ᓄᓇᕗᑦ, ᑕᐃᒪᓐᓇᑎᑐᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ, ᑎᑭᐅᑎᓯᒪᕗᑦ ᐊᖏᕈᑕᐅᔪᒥ $10–ᒥ ᐊᑐᓂ ᐅᓪᓗᕐᒧᑦ ᓱᕈᓯᕐᓂ ᐸᖅᑭᓂᕐᒧᑦ ᒫᔾᔨ 2024–ᒥ, ᑎᑭᓐᓂᖃᖅᐳᖅ ᖁᑦᑎᒃᑐᒥ ᓂᕆᐅᖕᓂᐅᔪᒥ ᐊᖓᔪᖅᑳᑦ ᑭᓱᑐᐃᓐᓇᐃᑦ ᐊᔪᕐᓇᙱᓐᓂᖅᓴᐅᓕᕐᓂᐊᕐᓂᖓᓂ.
ᐅᓇ ᐅᖃᐅᓯᒃᓴᓕᐊᖅ ᐊᖏᔪᐊᓘᕗᖅ ᐊᖓᔪᖅᑳᖑᒍᕕᑦ ᐱᔪᓐᓇᖅᓯᒪᔪᓂ ᐊᑕᐅᓯᐅᔪᒥ 1,200–ᐸᓗᖕᓂ – ᒫᔾᔨ 2020–ᒥ – ᐱᑕᖃᖅᐸᒌᖅᑐᑦ ᓚᐃᓴᓐᓯᓖᑦ ᓱᕈᓯᕐᓂ ᐸᖅᑭᓂᕐᒧᑦ ᐃᓂᐅᔪᓂ ᓄᓇᕗᒻᒥ, ᐅᖃᐅᓯᐅᓪᓗᓂ ᐅᓂᒃᑳᓕᐊᖑᔪᒥ Atkinson Centre ᐃᓅᖃᑎᒌᖑᔪᓄᑦ ᐊᒻᒪ ᓱᕈᓯᕐᓄᑦ ᐱᕙᓪᓕᐊᑎᑕᐅᓂᖏᓐᓂ ᐋᓐᑎᐊᕆᐅ ᐃᓕᓐᓂᐊᕐᕕᖓᓂ ᖃᐅᔨᓴᕐᓂᕐᒧᑦ ᐃᓕᓐᓂᐊᕐᓂᕐᒥ/ᓯᓚᑦᑐᖅᓴᕐᕕᒡᔪᐊᖅ ᑐᕌᓐᑐᒥ.
ᓄᑕᖅᑲᓄᑦ ᐃᓕᓐᓂᐊᓕᒻᒪᒃᓴᔪᓕᕆᔩᑦ ᐃᓕᓐᓂᐊᕐᓂᕐᒧᑦ ᐅᓂᒃᑳᓕᐊᖅ ᖃᐅᔨᓴᓚᐅᖅᐳᖅ ᐃᓕᑦᑎᓂᕐᒥ ᐊᒻᒪ ᓱᕈᓯᕐᓂ ᐸᖅᑭᓂᕐᒧᑦ ᐱᒋᐊᕈᑕᐅᔪᓂ ᑕᐃᑯᖓ ᒫᔾᔨ 31, 2020–ᒧᑦ. ᐅᖃᐅᓯᐅᓪᓗᓂ ᐅᓂᒃᑳᓕᐊᒧᑦ, ᑕᐃᒪᐃᒐᔪᒃᑐᒥ ᖃᐅᑕᒫᒥ ᐊᑭᓕᐅᑎᑦ ᓱᕈᓯᕐᓂ ᐸᖅᑭᓂᕐᒧᑦ $48.99–ᖑᕗᑦ ᐅᓪᓗᓕᒫᖅᓯᐅᖅᑐᓄᑦ ᓄᑕᕋᓛᓄᑦ; $26.94 ᐅᓪᓘᑉ–ᐃᓚᐃᓐᓇᖓᓂ ᓄᑕᕋᓛᓄᑦ; ᐅᓪᓗᓕᒫᖅᓯᐅᖅᑐᑦ ᐃᓕᓐᓂᐊᓕᒻᒪᒃᓴᖅᑐᓄᑦ ᑐᑭᖃᖅᐳᖅ ᐊᑭᓖᓂᐅᔪᑦ $47.86–ᒥ; ᐊᒻᒪ ᐅᓪᓘᑉ–ᐃᓚᐃᓐᓇᖓᓂ ᐃᓕᓐᓂᐊᓕᒻᒪᒃᓴᖅᑐᓄᑦ ᐊᑭᖓ $22.53. ᑕᐃᒪᐃᒐᔪᒃᑐᒥ ᐃᓕᓐᓂᐊᕌᓂᒃᑳᖓᑕ ᐱᓕᕆᐊᖑᔪᒥ ᐊᑭᓕᐅᑎᖏᑦ $22.50–ᖑᕗᖅ ᐊᑐᓂ ᐅᓪᓗᕐᒧᑦ. ᐅᓇ ᑲᑎᕐᔪᐊᓲᖑᕗᖅ ᓇᓕᐊᑐᐃᓐᓇᓂ ᐃᓚᒌᖑᔪᓄᑦ ᑮᓇᐅᔭᓂ ᐊᑐᖅᑐᒃᓴᓂ.
ᐊᑭᓕᐅᑎᑦ ᓚᐃᓴᓐᓯᓕᖕᓄᑦ ᓱᕈᓯᕐᓂ ᐸᖅᑭᓂᕐᒧᑦ ᓄᓇᕗᒻᒥ ᓇᑲᓐᓂᐊᖅᐳᖅ ᓇᑉᐸᓪᓗᐊᖓᓂ, ᑕᐃᒪᐃᒐᔪᖕᓂᖓᓂ, ᐊᕐᕌᒎᔪᒥ ᐃᓱᖓᓂ, ᐊᒻᒪ ᓇᓚᐅᑦᑖᕆᔭᐅᕗᖅ ᐊᖓᒧᖅᑳᑦ ᕿᑐᕐᙵᓕᖕᓂ ᑎᑭᐅᒪᔪᓄᑦ ᐅᑭᐅᓕᖕᓄᑦ 6-ᓄᑦ ᓚᐃᓴᓐᓯᓕᖕᓂ ᓱᕈᓯᕐᓂ ᐸᖅᑭᕝᕕᖕᓂ ᐃᖃᓗᖕᓂ ᐊᑐᙱᓐᓂᖅᓴᐅᓂᐊᖅᐳᑦ $14,000–ᓂ ᐊᕐᕌᒍᑕᒫᒥ ᐅᑯᓄᖓ ᐊᑭᓕᐅᑎᐅᔪᓄᑦ.
ᐃᑲᔪᖅᓱᐃᓂᐅᔪᖅ ᐃᓚᒌᖑᔪᓄᑦ ᐃᓚᒋᔭᐅᔪᓂ ᖃᓱᑎᑦᑎᔪᓐᓇᖅᐳᖅ ᐃᓚᖏᓐᓂ ᐊᔪᕐᓇᕐᓂᐅᔪᓂ ᓵᙵᔭᐅᔪᓂ ᒪᒃᑯᒃᑐᓂ ᐊᖓᒧᖅᑳᖑᔪᓂ, ᐱᓗᐊᖅᑐᒥ ᐃᓕᓐᓂᐊᕐᓂᕐᒧᑦ ᐅᑎᖅᑎᓪᓗᒋᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᓂᕐᒧᑦ ᐸᐃᕆᕝᕕᒃ ᑕᑯᒃᓴᐅᑎᑦᑎᓯᒪᒍᓂ ᐊᑭᑐᓗᐊᕐᓂᐊᕐᓂᖓᓂ ᐅᕝᕙᓘᓐᓃᑦ ᐊᔪᕐᓇᕐᓗᓂ ᓇᓂᓯᔭᕆᐊᒃᓴᖅ. ᐃᑲᔫᓯᖅᑕᐅᕙᒃᑐᑦ ᐊᑐᐃᓐᓇᐅᒋᕗᑦ ᐅᕘᓇ ᐊᕕᒃᑐᖅᓯᒪᓂᐅᔪᓂ ᑎᑎᕋᕐᕕᖕᓂ ᐃᓄᓕᕆᔨᒃᑯᓐᓂ ᑕᐃᒃᑯᓄᖓ ᐱᔭᕆᐊᖃᖅᑐᓂ ᐃᑲᔪᖅᓯᖅᑕᐅᓂᕐᓂ ᐊᒻᒪ ᐱᔪᓐᓇᕐᓗᑎᒃ.
ᐊᖏᓂᐅᔪᑦ ᑐᙵᕕᖃᖅᐳᑦ ᐱᔭᕆᐊᖃᕐᓂᐅᔪᒥ ᖃᐅᔨᓴᖅᑕᐅᓂᖓᓂ, ᐃᓱᒪᒋᔭᖃᕐᓗᓂ ᐃᓚᒌᑦ ᐊᖏᓂᖓᓂ, ᐃᒡᓗᖓᓄᑦ ᐊᑭᓕᕆᐊᓕᖏᓐᓂ ᐊᒻᒪ ᐊᑭᖓᓂ ᐱᓕᕆᐊᖑᔪᒥ. ᐅᓂᒃᑳᓕᐊᖅ ᐅᖃᓚᐅᖅᐳᖅ 34–ᓂ ᐃᓚᒌᓂᑦ ᐱᓚᐅᖅᐳᑦ ᐃᑲᔫᓯᖅᑕᐅᕙᒃᑐᒥ 2019-2020–ᒥ ᐊᒻᒪ ᖄᒃᑲᓐᓂᐊᓂ 50–ᓂ ᑐᒃᓯᕋᖅᑐᓂ ᐱᓚᐅᖅᐳᑦ ᑮᓇᐅᔭᖃᖅᑎᑕᐅᓂᕐᒥ ᐅᕘᓇ ᒪᒃᑯᒃᑐᓄᑦ ᐊᖓᔪᖅᑳᖑᔪᓄᑦ ᐃᓕᑦᑏᓐᓇᕆᑦ ᐱᓕᕆᐊᖑᔪᒥ, ᐃᑲᔫᓯᖅᓯᕙᒃᑐᒥ ᐸᐃᕆᕝᕕᖕᒥ ᐊᑭᖏᓐᓂ ᐊᖓᔪᖅᑳᖑᔪᓄᑦ 18 ᑐᖔᓃᑦᑐᓄᑦ ᐱᓕᕆᕙᓪᓕᐊᔪᓄᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᓕᑦᑎᓇᓱᐊᕐᓂᖓᓄᑦ.
ᒫᓐᓇᓕᓴᐅᔪᒥ ᐊᖏᕈᑎ ᐋᑐᕚᒥ ᐃᓚᖃᓚᐅᕆᕗᖅ ᓴᖅᑭᑎᑕᐅᓂᖓᓂ 238–ᓂ ᓄᑖᓂ ᓱᕈᓯᕐᓂ ᐸᖅᑭᓂᕐᒧᑦ ᐃᓂᒃᓴᐅᔪᓂ ᓄᓇᕗᒻᒥ ᐅᑯᓇᓂ ᓚᐃᓴᓐᓯᓕᖕᓂ, ᑮᓇᐅᔾᔭᒐᓱᐊᙱᑦᑐᓄᑦ ᐊᒻᒪ ᐃᓚᒌᓄᑦ–ᑐᙵᕕᓕᖕᓂ ᓱᕈᓯᕐᓂ ᐸᖅᑭᓂᕐᒧᑦ ᑐᓂᓯᔨᐅᔪᓄᑦ ᒫᔾᔨ 2026–ᒥ. ᓇᓗᓇᐃᖅᓯᓯᒪᙱᓚᖅ ᖃᓄᖅ ᐅᑯᐊ ᐃᓂᐅᔪᑦ ᑐᓐᓂᖅᓴᖅᑕᐅᓂᐊᕐᓂᖏᓐᓂ ᓄᓇᓕᐅᔪᓂ, ᑭᓯᐊᓂ ᐊᑯᓂᐸᓗᖕᒥ ᖃᐅᔨᓇᓱᖕᓂᖃᕐᓂᐊᖅᐳᑦ ᖃᓄᖅ ᐊᒻᒪ ᓇᒥ ᐊᑐᕐᓂᐊᕐᓂᖏᓐᓂ $66 ᒥᓕᐊᓐᓂ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᐅᔪᓂ ᐊᕐᕌᒍᓄᑦ ᑕᓪᓕᒪᓄᑦ ᐱᓂᐊᕐᓂᕋᖅᑕᐅᔪᒥ ᐱᔾᔪᑕᐅᔪᒧᑦ.
ᓄᓇᓖᑦ ᐃᒡᓗᕐᔪᐊᖃᙱᑦᑐᓂ ᑲᒪᒋᔭᖃᕐᓂᕐᒥ ᐸᐃᕆᕝᕕᓂᑦ ᐅᖃᖃᑎᖃᓪᓗᐊᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ, ᐅᖃᖅᐳᖅ ᒐᕙᒪᑐᖃᒃᑯᑦ, ᑮᓇᐅᔭᖃᖅᑎᑕᐅᓂᐅᔪᖅ ᑲᓇᑕᒥ ᒐᕙᒪᒃᑯᓐᓂ ᐃᓚᖃᕐᒪᑦ ᐃᑲᔪᖅᓱᐃᓂᐅᔪᒥ ᐱᑕᖃᖅᐸᒌᖅᑐᓄᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐃᓚᖃᖅᑐᒥ ᐃᓕᓐᓂᐊᕐᕕᓂᑦ ᐊᒻᒪᓗ ᐱᙳᐊᕐᕕᖕᓂᑦ.
ᐊᖏᕈᑎ ᓇᒃᓴᕐᓂᐊᕆᕗᖅ ᖁᑦᑎᖕᓂᖅᓴᐅᔪᓂ ᑮᓇᐅᔾᔭᒃᓴᓂᐅᔪᓂ ᐃᓕᓐᓂᐊᓕᒻᒪᒃᓴᖅᑐᓄᑦ ᓱᕈᓯᕐᓂ ᐸᖅᑭᓂᕐᒧᑦ ᓴᓇᔨᐅᔪᓄᑦ. ᑕᒪᓐᓇ ᑎᑭᐅᑎᔭᐅᓂᐊᖅᐳᖅ ᓴᖅᑭᑎᑕᐅᓂᖓᒍᑦ ᑮᓇᐅᔾᔭᒃᓴᓂᕐᒧᑦ ᖁᕝᕙᕆᐊᕐᓂᐅᔪᒥ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᑐᒃᓯᕋᖅᐳᑦ ᑲᑎᖅᓱᖅᑕᐅᕙᓪᓕᐊᓂᕐᒥ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᕐᒧᑦ ᑎᑭᐅᑎᔪᒧᑦ 25 ᐳᓴᓐᑎᒥ $66 ᒥᓕᐊᓐᓂ ᖁᕝᕙᕆᐊᖅᑎᑦᑎᓂᕐᒧᑦ ᐊᑭᓖᓂᖓᓄᑦ ᓱᕈᓯᕐᓂ ᐸᖅᑭᓂᕐᒧᑦ ᐃᖅᑲᓇᐃᔭᖅᑎᐅᔪᓄᑦ.
ᐅᓇ ᐃᓱᒪᑐᓪᓗᓂ ᓂᕈᐊᕐᓂᐅᕗᖅ, ᐃᓕᓐᓂᐊᓕᒻᒪᒃᓴᖅᑐᓄᑦ ᐃᓕᓐᓂᐊᕐᓂᕐᒧᑦ ᐅᓂᒃᑳᓕᐊᖅ ᐅᔾᔨᕆᓚᐅᕐᒪᑦ ᐸᐃᕆᕝᕕᖕᒥ ᓴᓇᔨᐅᔪᑦ ᒫᓐᓇᐅᔪᒥ ᑮᓴᐅᔾᔭᒃᓴᓂᖏᓐᓂ ᑲᒪᓇᖅᑐᒥ 44 ᐳᓴᓐᑎᖓᓂ ᑮᓴᐅᔾᔭᒃᓴᓂᐅᕙᒃᑐᓂ ᐃᓕᓴᐃᔨᐅᔪᓂ ᓄᓇᕗᒻᒥ, ᑕᐃᒪᐃᒐᔪᖕᓂᐅᔪᒥ $50,000–ᒥ ᐊᕐᕌᒍᑕᒫᒥ ᐃᓕᓴᐃᔨᓄᑦ $113,000–ᒥ.
ᑕᑯᓯᒪᕗᒍᑦ ᖃᓄᐃᑉᐸᖕᓂᖓᓂ ᐱᓪᓚᕆᐅᔪᓂ ᓴᓇᔨᐅᔪᑦ ᑐᓂᔭᐅᒑᖓᒥᒃ ᒥᑭᑦᑐᑯᓗᖕᒥ ᑮᓴᐅᔭᓂᒃ ᐊᒻᒪ ᐊᐱᕆᔭᐅᓪᓗᑎᒃ ᐱᓕᕇᓐᓇᕐᓂᕐᒧᑦ ᑐᓂᓯᓂᕐᒥ ᐱᔨᑦᑎᕋᕐᓂᐅᔪᒥ ᓇᖕᒥᓂᖅ ᐊᑭᓖᔪᓐᓇᕐᓇᑎᒃ ᐊᑭᓕᒐᒃᓴᒥᓂᑦ.
ᕿᒪᒃᓯᓲᖑᕗᑦ, ᐅᕝᕙᓘᓐᓃᑦ ᐃᖅᑲᓇᐃᔭᕐᓂᖓᓂ ᓄᖅᑲᖅᖢᑎᒃ.
ᓱᕈᓯᕐᓂ ᐸᖅᑭᓂᕐᒧᑦ ᐊᒃᓱᕈᕐᓇᕐᓂᓪᓗᐊᖑᙱᓚᖅ. ᐸᕐᓇᐅᑎᑦ ᓴᖅᑭᑎᑦᑎᓂᕐᒧᑦ ᐅᑯᓂᖓ ᐃᓂᐅᔪᓄᑦ, ᐱᓕᒻᒪᒃᓴᕐᓂᕐᒧᑦ, ᐊᒻᒪ ᐊᖏᒡᓕᒋᐊᖅᑐᓄᑦ ᑮᓇᐅᔾᔭᒃᓴᓂᐅᔪᓂ ᑐᓴᕈᒥᓇᑦᑎᐊᖅᐳᑦ, ᐊᒻᒪ ᑕᐃᒪᑐᖅ ᑕᐃᒪᐃᓕᖓᐃᓐᓇᕐᓂᐊᖅᐳᑦ.