ᖃᔅᓯᐊᕐᔪᖕᓂ ᐊᕐᕌᒍᓂ ᐊᒃᓱᕈᕐᓇᖅᓯᒪᕗᖅ, ᕼᐃᓖ?
ᖄᖓᓂ, ᑭᓱᑐᐃᓐᓇᐃᑦ ᑕᐃᒪᐃᖏᓐᓇᒐᓚᒃᐳᑦ ᓯᕗᓂᐊᓂ ᐊᒥᓱᓄᑦ ᖃᓂᒻᒪᓐᓇᐅᔪᖅ ᑎᑭᓚᐅᖅᑳᕋᓂ, ᐅᓗᕆᐊᓇᖅᑎᑦᑎᔪᒥ ᐊᔪᓕᖅᑎᑦᑎᓂᖓᓂ ᓱᕋᒃᓴᕋᐃᑦᑐᒥ ᐅᑭᐅᖅᑕᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᐅᓂᐅᔪᒥ ᐱᓕᕆᔾᔪᓯᐅᔪᒥ.
ᐅᓄᙱᓗᐊᖅᑐᓂ ᐃᖅᑲᓇᐃᔮᖅᑕᖃᖅᐳᖅ ᐃᓄᓕᒫᓄᑦ, ᐃᒡᓗᒃᓴᖃᙱᓗᐊᖅᑐᖅ – ᐃᖅᑲᓇᐃᔮᖅᑖᕈᓐᓇᓚᐅᕈᕕᑦ ᐊᑕᐅᓯᐅᔪᒥ ᐱᑕᖃᒐᔪᙱᕕᒡᔪᐊᖅᑐᓂ ᓄᓇᕗᒻᒥ ᒐᕙᒪᒃᑯᓐᓂ ᐃᓂᐅᔪᓄᑦ ᐃᖃᓗᐃᑦ ᓯᓚᑖᓂ – ᐊᒻᒪ ᐅᓄᙱᓗᐊᖅᑐᓂ ᐱᓕᒻᒪᒃᓴᖅᓯᒪᔪᓂ ᐃᓄᒃᑕᖃᖅᐳᖅ ᐃᓐᓄᒃᓯᓂᖏᓐᓄᑦ ᑎᑎᕋᖅᓯᒪᓂᐅᔪᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᑲᔪᕐᓂᕐᒧᑦ ᒥᒃᖠᒋᐊᖅᑎᑦᑎᓂᕐᒧᑦ ᓴᖑᓴᕋᐃᓐᓂᐅᒧᒥ ᐊᒻᒪ ᑐᓂᓯᓂᕐᒥ ᐅᑯᓂᖓ ᐱᓪᓚᕆᐅᔪᓄᑦ ᐱᔨᑦᑎᕋᕐᓂᐅᔪᓄᑦ ᐅᖃᐅᓯᕐᒥ ᓄᓇᕗᒻᒥ.
ᕼᐊᓐᓇᓚᖏᓐᓂ ᒥᓕᐊᓐ–ᖏᓐᓂ ᑮᓇᐅᔭᓂᒃ ᑐᓂᔭᐅᓂᐊᕐᓂᕋᖅᑕᐅᔪᓂ ᑕᒪᒃᑭᓂ ᑭᒡᓕᐅᔪᓂ ᒐᕙᒪᐅᔪᓂ ᐃᑲᔪᕐᓂᕐᒧᑦ ᐋᖅᑭᒃᓯᓂᖓᓂ ᐅᑯᓂᖓ ᐊᒥᓲᔪᓄᑦ ᐊᑲᐅᙱᓕᐅᕈᑕᐅᔪᓄᑦ: ᓯᑎᐱᕆ 2020–ᒥ, ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ (NHC) ᐅᖃᐅᓯᖃᓚᐅᖅᐳᑦ ᐱᓂᖏᓐᓂ $265 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐊᕐᕌᒍᓄᑦ 9–ᓄᑦ ᑲᓇᑕᒥ ᐃᒡᓗᒃᓴᖃᖅᑎᑦᑎᓂᕐᒧᑦ ᐸᕐᓇᒍᑎᒥᒃ, ᑐᑭᖃᖅᑐᒥ 700–ᐸᓗᖕᓂ ᓄᑖᓂ ᐃᒡᓗᒃᓴᓄᑦ ᓄᓇᕗᓕᒫᒥ.
ᐸᕐᓇᐅᑎᖃᓚᐅᖅᐳᑦ ᓴᓇᓂᕐᒥ 227–ᓂ ᓄᑖᓂ ᐃᓄᓕᒫᓄᑦ ᐊᖏᕐᕋᒃᓴᐅᔪᓄᑦ 2020–ᒥ 2022–ᒧᑦ. ᐃᒪᐃᓕᖓᓚᐅᖅᐳᖅ, 116–ᓂ ᓄᑖᓂ ᐃᒡᓗᒃᓴᓂ ᓴᓇᓚᐅᖅᐳᑦ ᑕᐃᑲᓂ 2020-21 ᑮᓇᐅᔭᓕᕆᓂᕐᒧᑦ ᐊᕐᕌᒎᔪᒥ. ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᑐᓚᐅᖅᐳᑦ $60.5-ᒥᓕᐊᓐᓂ ᑮᓇᐅᔭᐃᑦ ᐊᑐᖅᑐᒃᓴᓂ ᓇᑉᐸᖅᑎᕆᓂᕐᒧᑦ 114–ᓂ ᐃᒡᓗᒃᓴᓂ ᑲᑎᙵᔪᓂ ᑕᒪᑐᒪᓂ ᖄᖏᖅᑐᒥ ᐊᕐᕌᒍᖓᓂ.
ᐅᓄᕐᓂᖅᓴᐅᔪᒥ $3 ᒥᓕᐊᓐᓂ ᐊᑐᖅᑕᐅᓚᐅᕆᕗᑦ ᐋᖅᑭᐅᒪᑎᑦᑎᓂᕐᒧᑦ ᐊᒻᒪ ᐱᐅᓯᒋᐊᖅᑎᑦᑎᓂᕐᒧᑦ ᐱᑕᖃᖅᐸᒌᖅᑐᓄᑦ ᐃᒡᓗᓂᑦ ᑕᓪᓕᒪᓂ ᓄᓇᓕᐅᔪᓂᑦᑕᐅᖅ.
2010–ᒥ ᑲᓇᑕᒥ ᐊᑭᓕᐅᑕᐅᔪᒥ ᐃᒡᓗᒧᑦ ᓄᓇᒧᓪᓘᓐᓃᑦ ᐊᒻᒪ ᐃᒡᓗᓕᕆᔨᕐᔪᐊᒃᑯᓐᓄᑦ ᑭᓪᓕᓯᓂᐊᕐᓂᐅᔪᒥ ᓇᓂᓯᓚᐅᖅᐳᖅ 49 ᐳᓴᓐᑎᒥ ᐃᓄᖃᖅᑐᓂ ᐃᒡᓗᓂ ᐸᖕᒥᐅᓗᐊᓚᐅᕐᓂᖏᓐᓂ, ᐃᒡᓗᒃᓴᓂ ᐊᒥᒐᓗᐊᖅᖢᑎᒃ 3,800–ᓂ ᐃᒡᓗᓂᑦ ᓄᓇᕗᓕᒫᒥ. ᑕᐃᒫᒃ, ᐱᐅᒐᓗᐊᖅᑎᓪᓗᒍ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᒪᓕᒃᓯᒪᓂᖃᑦᑎᐊᕋᓗᐊᖅᑎᓪᓗᒋᑦ ᐊᒻᒪ ᑐᓂᓯᓪᓗᑎᒃ 230–ᓂ ᐃᒡᓗᒃᓴᓂ, ᐊᑐᐃᓐᓇᐅᓂᖓᓂᐃᒡᓗᒃᓴᓂ ᐊᙳᑎᓚᐅᖅᓯᒪᔾᔮᙱᓚᖅ ᐱᔪᒪᓂᐅᔪᒥ ᑕᐃᒪᓐᓇ ᓱᒃᑲᐃᑎᒋᓂᐅᔪᒥ.
ᐅᓇ ᑐᐊᕕᕐᓇᕐᔪᐊᖅᑐᖅ ᐱᔭᕆᐊᖃᕐᓂᖅ ᑭᐅᔭᐅᔭᕆᐊᖃᖅᐳᖅ ᑐᐊᕕᕐᓇᖅᑐᒥ ᖃᓄᐃᓕᐅᕐᓂᐅᔪᒥ. ᖃᓄᖅ ᐊᑯᓂᐅᑎᒋᒃᑲᓐᓂᖅᑐᒥ ᓄᓇᕗᒻᒥᐅᑦ ᓂᕆᐅᒋᔭᐅᓂᐊᖅᐸᑦ ᑕᐃᑲᓃᖏᓐᓇᕐᓂᕐᒥ ᓇᐃᒡᓕᓚᐅᓯᖅᒪᙱᑦᑐᒥ ᐃᒡᓗᒃᓴᒧᑦ ᐅᑕᖅᑭᔪᓄᑦ ᑎᑎᕋᖅᓯᒪᓂᐅᔪᓂ?
ᓲᖃᐃᒻᒪ, ᐃᖃᓗᖕᓂ ᒪᐃᔭᖓ ᑲᓂ ᐱᐅᓪ ᒫᓐᓇᓕᓴᐅᔪᒥ ᐅᖃᓚᐅᕐᓂᖓᓂ, ᐃᒡᓗᑭᒃᓴᓗᐊᕐᓂᕐᒥ ᒥᑭᑦᑐᑯᓘᕗᖅ ᐊᑲᐅᙱᓕᐅᕈᑕᐅᔪᒥ, ᐱᑕᖃᖅᐸᒌᖅᑐᓂ ᐃᒪᕐᒧᑦ ᐊᒻᒪ ᑯᕕᖅᑕᖅᑕᐅᓂᕐᒧᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᑲᔪᖅᓱᐃᔪᓐᓇᙱᑎᓪᓗᒍ ᐃᓄᒋᐊᖕᓂᐅᔪᓂ ᐱᕈᖅᐸᓪᓕᐊᓂᖓᓂ.
ᑭᓯᐊᓂ ᓄᖑᓱᐃᑦᑐᒥ ᐃᒪᖃᑦᑎᐊᙱᓗᐊᕐᓂᖓᓂ ᐃᖃᓗᖕᓂ ᓵᙵᓯᒪᓂᖓᓂ ᑕᐃᒪᙵᓂ 2005–ᒥ ᐋᖅᑭᒃᑕᐅᒃᐸᑕ, ᓄᓇᓕᐸᐅᔭᖅ ᑭᐅᑦᑎᐊᓪᓚᕆᒍᓐᓇᙱᓚᑦ ᑭᓱᑐᐃᓐᓇᓂ ᓲᕐᓗ ᐃᒡᓗᑖᕆᐊᖃᓪᓚᕆᖕᓂᐅᔪᒥ ᐅᕝᕙᓘᓐᓃᑦ ᓄᓇᓕᐸᐅᔭᐅᑉ ᐱᕈᖅᐸᓪᓕᐊᓂᖓᓂ.
“ᒪᑐᐃᖅᓯᔪᓐᓇᙱᓚᒍᑦ ᓄᓇᓂ ᐃᒡᓗᒃᓴᓄᑦ ᐃᒪᖅᑕᖃᙱᓗᐊᕐᒪᑦ ᐅᓄᕐᓂᖅᓴᓄᑦ ᐃᓄᖕᓄᑦ. ᐱᒻᒪᕆᐅᔪᒥ ᖃᓄᐃᓕᖓᓂᕐᒦᑉᐳᒍᑦ,” ᐅᖃᓚᐅᖅᐳᖅ ᐱᐅᓪ.
ᐃᓕᓐᓂᐊᖅᑐᓕᕆᓂᖅ ᐱᔾᔪᑕᐅᓪᓗᓂ, ᓄᖅᑲᖅᐸᓪᓕᐊᔪᖅ ᐃᓕᓴᐃᔨ ᓯᐊᕋ ᐊᔭᕈᐊᖅ ᑲᖏᖅᖠᓂᕐᒥᐅᑕᖅ ᖃᐃᖁᔨᓂᖃᓚᐅᖅᐳᖅ ᐅᓄᕐᓂᖅᓴᓂ ᐃᓕᓴᐃᔨᓂ ᐃᓗᐊᓂ ᓄᓇᕗᒻᒥ, ᐅᖃᖅᖢᓂ ᓂᕆᐅᖕᓂᖓᓂ ᑕᑯᓂᐊᕐᓂᕐᒥ ᐅᓄᕐᓂᖅᓴᐅᔪᓂ ᓄᓇᓕᖕᒥᐅᑕᐅᔪᓂ ᐃᓕᓴᐃᔨᙳᕐᓂᖏᓐᓂ ᐊᒻᒪ ᐃᓕᓐᓂᐊᕐᕕᖕᒥ ᑲᒪᔨᐅᔪᓄᑦ.
“ᐅᓄᕐᓂᖅᓴᓂ ᓄᓇᓕᖕᓂ ᐃᓕᓴᐃᔨᖃᕆᐊᖃᖅᐳᒍᑦ,” ᐅᖃᓚᐅᖅᐳᖅ. “ᑐᑭᓯᐅᒪᕗᒍᑦ ᐃᓕᓐᓂᐊᖅᑏᑦ ᓇᑭᙶᕐᓂᖏᓐᓂ, ᐊᒻᒪ ᐃᓱᒪᕗᖓ ᑕᐃᓐᓇ ᑲᓱᖃᑎᒌᖕᓂᐅᔪᖅ ᐱᐅᓂᖅᓴᐅᕗᖅ ᐃᓕᓐᓂᐊᖅᑎᓄᑦ ᓇᖕᒥᓂᖅ ᐃᓄᖁᑎᖃᕐᓗᑎᒃ.”
ᓄᓇᕘᑉ ᓂᕈᐊᖅᑕᐅᓵᖅᑐᓂ ᒪᓕᒐᓕᐅᖅᑎᖏᑦ ᐋᖅᑭᒃᓯᓚᐅᖅᐳᑦ ᑕᓪᓕᒪᓂ ᓯᕗᓪᓕᐅᔾᔭᐅᖁᔭᐅᔪᓂ 6–ᖓᓂ ᒪᓕᒐᓕᐅᕐᕕᖕᒧᑦ; ᐊᑐᓕᖅᑎᑦᑎᓂᕐᒥ ᑕᒪᒃᑭᐅᒪᔪᒥ ᐃᓄᑐᖃᕐᓄᑦ ᐸᖅᑭᔭᐅᓂᖓᓐᓂ ᐸᕐᓇᒍᑎᒥᒃ; ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᒃᑲᓐᓂᕐᓂᐅᔪᒥ ᐃᓕᓐᓂᐊᕐᓂᓕᕆᓂᕐᒧᑦ; ᐊᖏᒡᓕᒋᐊᖅᓯᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᐅᐃᕆᓯᒪᓂᐅᔪᓄᑦ ᐱᔨᑦᑎᕋᕐᓂᐅᔪᒥ; ᐊᖏᒡᓕᒋᐊᖅᓯᓂᖅ ᐃᒡᓗᒃᓴᖃᕐᓂᕐᒥ; ᐊᒻᒪ ᐊᔾᔨᒌᙱᑎᑦᑎᒃᑲᓐᓂᕐᓂᖏᓐᓂ ᑮᓇᐅᔭᓕᐅᕈᑕᐅᔪᓂ.
ᓯᕗᓪᓕᖅᐸᐅᔪᖅ ᑲᑎᒪᓂᐅᔪᒥ 6–ᖓᓂ ᒪᓕᒐᓕᐅᕐᕕᖕᒥ ᑲᑎᒪᓂᐅᔪᒥ ᓂᕆᐅᒋᔭᐅᕗᖅ ᐱᒋᐊᕐᓂᐊᕐᓂᖓᓂ ᕕᕈᐊᕆ 21–ᒥ. ᑎᑭᑕᐅᔭᕆᐊᓖᑦ ᖁᑦᑎᒋᐊᖃᖅᐳᑦ ᐅᑯᐊ ᐊᑲᐅᙱᓕᐅᕈᑕᐅᔪᑦ ᑭᐳᒦᓯᒪᖕᒪᑕ ᐊᕐᕌᒍᒐᓴᓄᑦ. ᐃᖏᕐᕋᓂᐅᔪᖅ ᐱᔭᐅᔭᕆᐊᖃᓪᓚᕆᒃᐳᖅ.