ᓄᓇᕗᒻᒥ ᐱᒻᒪᕆᐅᓛᖑᔪᒥ ᓴᓇᙳᐊᖅᑎᓄᑦ ᑲᑐᔾᔨᖃᑎᒌᖑᔪᑦ ᓇᓗᓇᖅᑐᒦᑉᐳᑦ, ᐱᐅᓂᖅᐹᖓᓂ, ᒪᑐᓯᓚᐅᖅᐳᑦ ᐹᖏᓐᓂ ᐃᖃᓗᖕᓂ ᐅᓄᕐᓂᖅᓴᐅᔪᓂ ᐊᕐᕌᒍᓂ 20–ᓂ ᐃᑲᔪᖅᓱᐃᓪᓗᑎᒃ ᓴᓇᐅᒐᓕᕆᔨᓂ ᓄᓇᕗᓕᒫᒥ.
ᐱᓕᕆᑦᑎᐊᕐᓂᖅᐹᖓᓂ, ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᑦ (NACA) ᑲᒪᒋᔭᖃᓚᐅᖅᐳᑦ ᐊᕐᕌᒍᑕᒫᒥᑐᐃᓐᓇᐅᙱᑦᑐᖅ ᖁᕕᐊᓱᒍᑎᖃᕐᓂᕐᒥ ᑕᑯᒃᓴᐅᑎᑦᑎᓪᓗᑎᒃ ᓴᓇᐅᒐᓂ ᐊᔪᙱᕐᔪᐊᖅᑐᓂ ᓄᓇᕗᒻᒥᐅᓂ, ᑭᓯᐊᓂ ᒥᑭᓐᓂᖅᓴᐅᔪᓂ ᐃᓕᓐᓂᐊᕐᓂᖃᖃᑦᑕᓚᐅᖅᐳᑦ ᐊᒻᒪ ᑲᑎᒪᓂᐅᔪᓂ ᖁᕝᕙᕆᐊᖅᑎᑦᑎᓂᕐᒧᑦ ᓴᓇᐅᒐᓕᕆᓂᕐᒧᑦ ᑮᓇᐅᔾᔭᒃᓴᓂᐅᔪᒥ.
ᒫᓐᓇ ᓇᓗᓇᐃᖅᐳᖅ ᐊᑮᑦᑐᖃᕐᔪᐊᖅᑐᒥ ᑲᑐᔾᔨᖃᑎᒌᖑᔪᑦ ᐃᖏᕐᕋᓯᒃᑲᓐᓂᕈᓐᓇᕋᔭᕐᒪᖔᑕ ᐊᐅᓚᑕᐅᓂᖓᓂ, ᑲᑎᒪᔨᓄᑦ ᑲᑎᒪᓂᖃᖅᓯᒪᙱᒻᒪᑕ ᐊᕐᕌᒎᒥ ᓇᑉᐸᓪᓗᐊᖓᓂᓗ ᐅᖓᑖᓂ ᐊᒻᒪ ᑲᑎᒪᔨᐅᖃᑕᐅᔪᖅ ᐅᖃᖅᐳᖅ ᑐᓴᒐᒃᓴᐅᔪᓂ ᑐᓂᓯᓯᒪᓂᖃᙱᓚᑦ ᑕᐃᒪᙵᓂᑦᑕᐅᖅ.
ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᑦ ᐋᖅᑭᒃᑕᐅᓚᐅᖅᐳᑦ 1998–ᒥ ᐃᑲᔪᕐᓂᕐᒧᑦ ᑕᑯᒃᓴᐅᓂᐅᔪᓂ ᓴᓇᐅᒐᓕᕆᔨᐅᔪᓂ ᖁᕝᕙᖅᓴᐃᓂᖏᓐᓂ ᐊᒻᒪ ᓂᐅᕕᐊᒃᓴᖃᕐᓂᖏᓐᓂ ᓴᓇᔭᖏᓐᓂ. ᐱᔨᑦᑎᕋᓚᐅᕆᕗᖅ ᑲᓱᖃᑎᒌᖕᓂᐅᔪᒥ ᐱᓕᕆᔾᔪᑕᐅᓪᓗᓂ ᓴᓇᐅᒐᓕᕆᔨᓄᑦ.
ᐊᓯᖏᓐᓂ ᓴᓇᐅᒐᓕᕆᔨᐅᔪᓄᑦ ᑲᑐᔾᔨᖃᑎᒌᖑᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ ᐃᓗᓪᓕᖅᓯᑎᓪᓗᒋᑦ ᐃᓚᑰᓂᐅᔪᓂ ᓲᕐᓗ ᖁᙱᐊᖅᑕᐅᕙᒃᑐᓂ ᓴᓇᐅᒐᓕᕆᓂᕐᒧᑦ ᐊᒻᒪ ᓂᔾᔮᑎᑦᑎᓂᕐᒧᑦ ᐃᓱᒪᒋᓪᓗᒍ, ᑕᑯᒃᓴᐅᓂᐅᔪᑦ ᐊᒻᒪ ᐱᖅᑯᓯᑐᖃᖅᑎᒍᑦ ᓴᓇᐅᒐᓕᕆᔨᐅᔪᑦ ᐃᒻᒥᓂᒃ ᓇᓂᓯᔪᓐᓇᖅᐳᑦ ᐃᒃᓯᓐᓇᖅᑕᐅᓂᖏᓐᓂ ᐃᒻᒥᓂᒃ–ᖁᕝᕙᖅᓴᐃᓂᕐᒧᑦ ᕿᑎᖅᐸᓯᐊᓂ ᐱᓕᕆᕝᕕᖃᕋᑎᒃ ᓄᓇᕗᒻᒥ.
“35 ᐳᓴᓐᑎᒥ ᐅᖓᑎᓪᓗᐊᖓᓂ ᐃᓐᓇᕐᓂ ᓄᓇᕗᒻᒥ ᐃᓄᖕᓂ ᐃᒻᒥᓂᒃ–ᑭᓇᐅᓂᖏᓐᓂ ᓴᓇᐅᒐᓕᕆᔨᐅᓪᓗᑎᒃ ᐊᒻᒪ ᐊᒥᓱᓂ ᐅᑯᓇᙵᑦ ᓴᓇᐅᒐᓕᕆᔨᐅᔪᓂ ᖃᔅᓯᒐᓚᖕᓂ–ᐱᐅᓯᖃᑎᒌᖑᔪᓂ ᐃᓚᒌᖑᔪᓂ ᓴᓇᐅᒐᓕᕆᔨᓂᙶᖅᐳᑦ,” ᐅᖃᖅᐳᖅ ᔮᓂᑦ ᐱᑦᓯᐅᓛᖅ ᐳᕉᔅᑐᕐ, ᑲᒪᒋᔭᖃᓚᐅᖅᑐᒥ ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᓐᓂ ᐊᕐᕌᒍᑦ ᒪᕐᕉᑲᓴᖕᓂ ᐃᓱᒻᒥᖅᑐᐃᔨᐅᓪᓗᓂ ᑕᐃᑯᖓ ᓯᑎᐱᕆ 2020–ᒧᑦ.
ᑕᒪᓐᓇ ᑐᑭᖃᖅᐳᖅ ᐊᖏᐸᓗᒃᑐᒥ ᐃᓄᒋᐊᖕᓂᐅᔪᓂ ᑐᙵᕕᖃᖅᑐᓂ ᓄᓇᕘᑉ ᐃᓗᐊᓂ ᐱᕚᓪᓕᕈᑎᖃᕈᓐᓇᖅᑐᓂ ᐊᐅᓚᑦᑎᐊᖅᑐᒥ ᓴᓇᙳᐊᖅᑎᓄᑦ ᑲᑐᔾᔨᖃᑎᒌᖑᔪᒥ.
ᓄᓇᕗᒻᒥ ᒐᕙᒪᒃᑯᑦ, 2010–ᒥ ᑮᓇᐅᔾᔭᒃᓴᓂᕐᒧᑦ ᐊᒃᑐᖅᑕᐅᓂᖓᓂ ᖃᐅᔨᓴᕐᓂᐅᔪᒥ ᓴᓇᐅᒐᓕᕆᓂᕐᒧᑦ ᓄᓇᕗᒻᒥ, ᐅᖃᓚᐅᖅᐳᑦ “ᖃᔅᓯᒐᓚᖕᓂ ᐱᓕᕆᓂᐅᔪᓂ ᓱᓇᒃᑯᑖᓂ ᑐᓂᓯᓂᐅᔪᒥ, ᓴᓇᓂᕐᒧᑦ ᓴᖅᑭᑎᑦᑎᓂᐅᔪᒥ ᐊᒻᒪ ᐅᓄᖅᑐᓂ ᓂᐅᕕᐊᒃᓴᖃᕐᓂᐅᔪᓄᑦ ᐊᒻᒪ ᓂᐅᕕᕐᕕᖕᓄᑦ ᑐᓐᓂᖅᓴᐃᓂᐅᔪᓂ, ᐱᓕᕆᓂᐅᔪᖅ ᓴᖅᑭᑎᑦᑎᕗᖅ ᑲᑎᓪᓗᒍ ᑮᓇᐅᔾᔭᒃᓴᓂᐅᔪᒥ ᐊᒃᑐᐃᓂᐅᔪᒥ $33.4 ᒥᓕᐊᓐᓂ ᐊᕐᕌᒍᑕᒫᒥ,” ᐅᕝᕙᓘᓐᓃᑦ ᐅᓄᕐᓂᖅᓴᐅᔪᓂ 1,000–ᓂ ᐅᓪᓗᓕᒫᖅᓯᐅᑎᓂ ᓇᓕᒧᑦᑐᓄᑦ ᐃᖅᑲᓇᐃᔮᖑᔪᓄᑦ.
ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓚᐅᖅᐳᑦ ᖃᔅᓯᒐᓚᖕᓂ ᐅᓗᕆᐊᓇᕈᑕᐅᔪᓂ ᐊᐅᓚᔪᓐᓇᕐᓂᖓᓂ ᑲᑐᔾᔨᖃᑎᒌᖑᓪᓗᑎᒃ 2009–ᒥ ᐊᑐᖅᑕᐅᔭᕆᐊᓕᖕᓂ ᐸᕐᓇᐅᑎᒥᒃ, ᐃᓚᖃᖅᑐᒥ ᓱᔪᐃᓂᐅᔪᒥ ᑕᑯᒃᓴᐅᓂᖓᓂ ᐃᓱᒪᒋᔭᐅᓂᖓᓂ; ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᑲᐅᙱᓕᐅᕈᑕᐅᔪᓂ; ᐃᖏᕐᕋᐃᓐᓇᖅᑐᒥ, ᐊᕐᕌᒍᒐᓵᓗᖕᓂ ᐊᔪᕐᓇᕐᓂᖓᓂ ᓇᓂᓯᓂᕐᒥ ᐊᒻᒪ ᐅᔭᕋᖕᓂᐊᕐᓂᕐᒥ ᐅᔭᖅᑲᓂ ᑲᑎᖅᓱᖅᑕᐅᓂᖏᓐᓂ ᓴᓇᙳᐊᖅᑎᐅᔪᓄᑦ, ᓴᖅᑭᔮᖏᓐᓇᖅᑐᒥ ᖃᓪᓗᓈᓂ ᔫᓂᐊᓐ–ᖓᓂ ᕿᓯᖕᓂ ᓴᓇᓯᒪᔪᓄᑦ ᓄᖅᑲᖅᑎᑕᐅᓯᒪᓂᖏᓐᓂ – ᒫᓐᓇ ᐅᖓᕙᕆᐊᖅᑎᓯᒪᔪᓂ ᐅᓄᕐᓂᖅᓴᐅᔪᓄᑦ 30–ᓄᑦ ᓄᓇᐅᔪᓄᑦ – ᐊᒻᒪ ᐊᑐᐃᓐᓇᐅᓂᖏᓐᓂ ᐱᓕᕆᔾᔪᑕᐅᔪᓄᑦ ᐊᒻᒪᓗ ᓂᐅᕕᕈᓐᓇᕐᓂᖏᓐᓄᑦ.
ᐳᕉᔅᑐᕐ ᓴᖅᑭᑎᑦᑎᓚᐅᕆᕗᖅ “ᐊᐅᓚᑕᐅᓂᖏᓐᓄᑦ ᐊᑲᐅᙱᓕᐅᕈᑕᐅᔪᓂ,” ᐊᑐᖅᑕᐅᔭᕆᐊᓕᖕᓂ ᐸᕐᓇᐅᑎᒥᒃ ᑕᑯᑎᑦᑎᓇᓱᐊᖅᑐᓂ ᐋᖅᑭᒃᓯᒪᓂᐅᔪᒥ ᐱᑕᖃᙱᓗᐊᕐᓂᖓᓂ ᓄᓇᓕᐅᔪᓂ, ᐱᑕᖃᙱᓗᐊᕐᓂᖓᓂ ᑐᕌᖅᑎᑕᐅᓂᐅᔪᒥ, ᐊᒻᒪᓗᑦᑕᐅᖅ ᓄᑖᙳᕆᐊᖅᑎᑕᐅᔭᕆᐊᖃᕐᓂᖓᓂ ᐊᒻᒪ ᓴᙱᒃᑎᒋᐊᖅᓯᓗᓂ ᒪᓕᒐᕋᓛᖑᔪᓂ ᐊᒻᒪ ᐊᑐᐊᒐᓂᑦ.
ᑲᑐᔾᔨᖃᑎᒌᖑᔪᑦ ᐱᐅᔪᓂ ᐃᓱᒪᓕᐅᕆᓂᖃᖅᑑᔮᓚᐅᖅᐳᑦ ᐸᕐᓇᐅᑎᖓᓐᓂ, ᑭᓯᐊᓂ ᐱᑕᖃᙱᓗᐊᓚᐅᖅᐸ ᐱᔪᒪᓂᐅᔪᒥ ᑲᔪᓯᑎᑕᐅᓂᖓᓂ?
ᓴᓇᐅᒐᓕᕆᓂᕐᒧᑦ ᐃᓕᓐᓂᐊᕈᑎᓕᐅᖅᑕᐅᓯᒪᔪᒥ ᐱᒋᐊᓕᓵᖅᑐᓂ ᑕᐃᑯᖓᓗᒃᑖᖅ ᓯᓚᑦᑐᖅᓴᕐᕕᖕᒧᑦ, ᐱᕙᓪᓕᐊᑎᑕᐅᓪᓗᐊᖅᖢᓂ ᑐᓂᔭᐅᓛᕐᓂᖓᓂ ᐃᓄᒃᑎᑐᑦ, ᑲᒪᓇᕐᔪᐊᕋᔭᓚᐅᖅᐳᖅ, ᐃᓕᖅᑯᓯᒧᑦ ᐊᑑᑎᓕᖕᒥ ᐱᒋᐊᕈᑕᐅᓗᓂ ᐅᑯᓇᓂ ᐱᓕᕆᕝᕕᐅᔪᓂ ᐱᕙᓪᓕᐊᔪᓕᕆᔨᒃᑯᓐᓂ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᓐᓂ. ᐃᓚᐅᑎᑦᑎᓇᔭᓚᐅᖅᐳᖅ ᒪᒃᑯᒃᑐᓂ, ᑐᕌᒐᕆᔭᐅᔪᒥ ᐋᖅᑭᒃᓱᖅᓯᒪᓂᐅᔪᓂ ᐃᓄᒋᐊᖑᔪᓂ ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᓐᓄᑦ, ᐅᖃᖅᓯᒪᔪᒥ 2009–ᒥ ᐅᓄᕈᓐᓃᖅᐸᓪᓕᐊᖏᓐᓇᖅᑐᒥ ᒪᒃᑯᒃᑐᓂ ᓂᕈᐊᖅᐸᓕᕐᓂᖏᓐᓂ ᐃᖅᑲᓇᐃᔮᖃᕐᓂᕐᒥ ᓴᓇᐅᒐᓕᕆᓂᐅᔪᒥ.
ᑐᕌᒐᒃᓴᐅᔪᑦ 2013-14–ᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐃᓚᖃᓚᐅᖅᐳᖅ ᑐᓂᓯᓂᕐᒥ ᒫᓐᓇᐅᔪᒥ ᐊᒻᒪ ᓇᓚᐅᓯᒪᑦᑎᐊᖅᑐᒥ ᑐᓴᒐᒃᓴᓂ ᓴᓇᐅᒐᓕᕆᓂᕐᒥ ᐱᓕᕆᓂᐅᔪᒥ, ᑭᓯᐊᓂ ᑕᐃᒪᐃᑦᑐᒃᓴᐅᓚᐅᖅᐳᖅ ᑮᓇᐅᔭᑦ ᓄᖅᑲᖅᑎᓪᓗᒋᑦ, ᑭᓱᑐᐃᓐᓇᐃᑦ ᖃᕋᓴᐅᔭᑎᒍᑦ ᐱᔾᔪᑎᓕᖕᓂ ᓄᓇᕗᒻᒥ ᓴᓇᐅᒐᓕᕆᓂᐅᔪᓄᑦ ᐃᓚᑰᓂᖃᕐᔪᐊᖅᑐᒥ ᓄᓇᕗᒻᒥ ᒐᕙᒪᒃᑯᑦ ᓴᓇᐅᒐᐃᑦ ᓴᓇᐅᒐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓂ ᐱᔭᕇᓚᐅᖅᑎᓪᓗᒍ 2013–ᒥ.
ᓴᓇᐅᒐᐃᑦ ᐅᖃᖅᓯᒪᕗᑦ ᐅᓄᕐᓂᖅᓴᐅᔪᓂ 10 ᐳᓴᓐᑎᖓᓂ ᑲᓇᑕᒥ ᓴᓇᐅᒐᓂᑦ ᓂᐅᕕᐊᒃᓴᐅᕙᒃᑐᑦ ᑕᕆᐅᑉ ᐊᑭᐊᓄᑦ ᐃᓄᖕᓄᑦ ᓴᓇᐅᒐᐅᕗᑦ, ᐊᒻᒪ ᑕᒪᓐᓇ ᐊᕐᕌᒍᑲᓴᖕᓄᑦ 15–ᓄᑦ ᖄᖏᖅᓯᒪᓕᖅᑐᓂ.
ᐊᖏᔪᒻᒪᕆᐊᓗᖕᓂ ᐃᑲᔫᓯᐊᓂᒃ ᐃᓅᖃᑎᒌᖑᔪᓄᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᖃᓪᓗᓈᖅᑕᖓᓂ ᓄᓇᕗᒻᒥ ᐊᒻᒪ ᓄᓇᖓᓐᓂ, ᐊᐃᑦᑖᖑᒐᓗᐊᖅ ᓴᓇᐅᒐᓕᕆᔩᑦ ᕿᒻᒪᑰᓂᖏᓐᓂ ᐃᒻᒥᓂᒃ ᐸᖅᑭᓂᕐᒧᑦ. ᑕᑯᒃᓴᐅᑎᑕᐅᕐᔪᐊᖅᑎᓪᓗᒋᑦ ᐅᐃᓂᐱᐊᒡᒥ ᓴᓇᐅᒐᓕᕆᓂᕐᒧᑦ ᑕᑯᔭᒐᖃᕐᕕᖓᓂ ᖃᐅᒪᔪᖅ ᑕᑯᒃᓴᐅᑎᑕᐅᓂᖓᓂ, ᓄᓇᕗᒻᒥ ᓴᓇᐅᒐᓕᕆᔩᑦ ᐱᒃᑲᓐᓂᓪᓗᐊᖅᐳᑦ ᐱᕕᒃᓴᖃᕐᓂᐅᔪᓂ ᐃᒻᒥᖕᓂᒃ ᓂᐊᕕᐊᒃᓴᖃᕆᐊᖅᑐᖅᑎᓪᓗᒋᑦ ᑲᓇᑕᒥ ᐊᒻᒪ ᑕᕆᐅᑉ ᐊᑭᐊᓄᑦ, ᐊᒻᒪ ᐃᑲᔪᖅᓱᐃᓂᖃᕐᔪᐊᒃᑲᓐᓂᕐᓂᕐᒥ ᐱᓕᕆᓂᕐᒥ ᐱᓕᕆᐊᒥᓂᑦ.