ᓄᕕᐱᕆ 16–ᒥ 18–ᒧᑦ, ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ (QIA) ᑐᙵᓱᒃᑎᑦᑎᓚᐅᖅᐳᑦ ᕿᒧᒃᓯᖅᑎᐅᔪᓂ ᐃᖃᓗᖕᓄᑦ ᓯᕗᓪᓕᖅᐹᑦᑎᐊᒥ ᕿᒧᒃᓯᖅᑏᑦ ᐊᕕᒃᑐᖅᓯᒪᓂᐅᔪᓂ ᑲᑎᙵᓂᐅᔪᒧᑦ.
ᑲᑎᙵᓂᐅᔪᖅ ᐱᓕᕆᓂᒃᑲᓐᓂᐅᓚᐅᖅᐳᖅ ᐅᔾᔨᕆᓂᕐᒥ ᑐᕌᒐᒃᓴᐅᔪᓂ ᓇᓗᓇᐃᖅᑕᐅᓯᒪᔪᓂ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (QTC) 2013 ᑭᖑᓪᓕᖅᐹᖓᓂ ᐅᓂᒃᑳᓕᐊᖓᓂ, ᑎᑭᐅᑎᓂᖅ ᓴᐃᒻᒪᖃᑎᒌᖕᓂᕐᒥ, ᑐᑭᓕᐊᖑᔪᒥ “ᑕᐃᔅᓱᒪᓂᑐᖃᖅ ᐊᑭᕋᕇᒃᑐᓂ ᑲᑎᖃᑎᒌᖕᒪᑕ, ᕿᑎᐊᓂ ᐹᕐᓗᑎᒃ, ᐊᒻᒪ ᓴᐃᒪᖃᑎᒌᖕᓂᖃᕐᓗᑎᒃ.”
ᔭᓄᐊᕆ 2008–ᒥ ᒪᐃ 2009–ᒧᑦ, ᐅᓂᒃᑳᓕᐊᖅ ᑲᑎᖅᓱᐃᓚᐅᖅᐳᑦ ᐅᓂᒃᑲᐅᓯᓂᑦ ᐃᓄᖕᓂ ᑕᒪᒃᑭᓂ 13–ᓂ ᕿᑭᖅᑖᓗᖕᒥ ᓄᓇᓕᖕᓂ ᐆᒪᓂᖃᓚᐅᖅᑐᓂ ᓅᓐᓂᐅᔪᒥ ᐃᓅᓯᖓᓐᓂ ᐃᓕᓯᒪᐃᓐᓇᓕᖅᑐᓂ ᓄᓇᓕᐅᔪᓂ ᕿᑎᐊᓂ 1950–ᒥ ᐊᒻᒪ 1975–ᒧᑦ, “ᐊᒻᒪᓗᑦᑕᐅᖅ ᕿᑐᕐᙵᖏᓐᓂ, ᐃᖅᑲᐅᒪᐃᓐᓇᖅᑐᓂ ᐋᓐᓂᐊᕐᔪᐊᕐᓂᐅᔪᒥ ᐊᖓᔪᖅᑳᖏᓐᓂ ᐊᒻᒪ ᐊᓯᖏᓐᓂ ᐃᓚᖏᓐᓂ.”
“ᓄᓇᓕᖕᒥ ᓄᓇᓕᖕᒧᑦ ᐳᓚᕋᓚᐅᖅᑕᑦᑎᓐᓂ, ᐃᓄᐃᑦ ᐅᕙᓐᓂ ᐅᖃᐅᔾᔨᓚᐅᖅᐳᑦ, ᖁᕝᕕᐅᒐᔪᒃᖢᑎᒃ, ‘ᐃᖅᑲᐅᒪᕗᖓ ᐅᓪᓗᖓᓂ ᕿᒻᒥᒃᑲ ᖁᑭᖅᑕᐅᑎᓪᓗᒋᑦ,’ ᐅᕝᕙᓘᓐᓃᑦ ‘ᐃᖅᑲᐅᒪᕗᖓ ᐊᑖᑕᒪ ᕿᒻᒥᖏᑦ ᑐᖁᕋᖅᑕᐅᑎᓪᓗᒋᑦ,’” ᐅᓂᒃᑳᓕᐊᖅ ᐅᖃᖅᐳᖅ.
ᕿᒧᒃᓯᖅᑏᑦ ᑲᑎᙵᓂᐅᔪᒥ, ᓯᕗᓪᓕᖅᐹᖅ ᐱᓕᕆᐊᒃᓴᐅᔪᖅ ᐅᖃᓪᓚᐅᓯᖃᕐᓂᕐᒥ ᑕᐃᔅᓱᒥᖓ ᐊᒃᓱᕈᕐᓇᕐᔪᐊᖅᑐᒥ ᑕᐃᔅᓱᒪᓂᐅᓚᐅᖅᑐᒥ ᐊᒥᐊᒃᑯᖓᓂ ᐱᕆᓂᐅᔪᒥ ᑐᕌᖓᓂᖃᕐᓂᐊᕐᒪᑦ ᓯᕗᓂᒃᓴᐅᔪᒧᑦ ᕿᒧᒃᓯᓂ ᐊᑐᕐᓂᕐᒧᑦ.
“ᐆᒪᔪᓄᑦ ᐊᑐᖅᑕᐅᓂᑰᕗᖅ, ᐆᒪᔪᓄᑦ ᐃᖅᑲᐅᒪᓂᐅᕗᖅ — ᖃᖓᐅᔭᑐᖄᓘᓚᐅᙱᓚᖅ ᕿᒻᒦᑦ ᑐᖁᕋᖅᑕᐅᑎᓪᓗᒋᑦ,” ᐅᖃᓚᐅᖅᐳᖅ ᐃᓄᒃᓱᒃ ᐊᖅᓴᕐᓂᖅ, ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐊᑐᓕᖅᑎᑦᑎᓂᕐᒧᑦ ᐊᒻᒪ ᐱᓕᕆᐊᖑᔪᓄᑦ ᐊᐅᓚᑦᑎᔨ.
ᐊᓯᐅᔨᓂᐅᔪᒥ ᕿᒻᒥᓂᑦ ᐃᒃᐱᒋᔭᐅᓯᒪᕗᖅ ᐱᐅᓯᖃᑎᒌᖑᔪᓂᑦ ᐊᒻᒪ ᐊᒃᑐᐃᓂᕐᔪᐊᖑᓚᐅᖅᐳᖅ ᐃᓄᐃᑦ ᐃᒻᒥᒃᑰᕈᓐᓇᕐᓂᖏᓐᓂ, ᐃᒻᒥᓂᒃ–ᒪᑭᒪᒍᑕᐅᓂᐅᔪᓂ ᐊᒻᒪ ᑭᓇᐅᓂᖏᓐᓂ ᐊᖑᓇᓱᒃᑎᐅᓪᓗᑎᒃ ᐊᒻᒪ ᓂᕿᒃᓴᖃᖅᑎᔨᐅᓪᓗᑎᒃ. ᓯᑭᑑᑖᕐᓂᕐᒧᑦ ᐊᑐᐃᓐᓇᖃᕐᓂᕐᒥ ᓄᓇᒧᑦ ᐊᑐᐃᓐᓇᐅᓂᖅᓴᐅᕗᖅ ᐃᓚᒌᖑᔪᓄᑦ ᐊᖑᓇᓱᒃᑎᐅᔪᓄᑦ ᐃᑲᔪᖅᓱᐃᓂᕐᒧᑦ ᐱᓕᕆᐊᖑᒧᒥ, ᑭᓯᐊᓂ ᑕᐃᒪᐃᓚᐅᙱᓚᖅ ᑕᒪᒃᑭᒐᓚᖕᓄᑦ ᐊᖑᓇᓱᒃᑎᐅᔪᓄᑦ ᕿᒻᒥᖏᑦ ᑐᖁᕋᖅᑕᐅᑎᓪᓗᒋᑦ.
ᐅᑎᖅᑎᕆᓂᐅᔪᒥ ᐊᒃᓱᕈᕐᓂᐅᔪᒥ ᑲᔪᓰᓐᓇᖅᐳᑦ, ᐊᒻᒪ ᕿᒻᒦᑦ ᐅᑎᖅᑎᕆᓂᐅᔪᒧᑦ ᐱᓕᕆᐊᖑᔪᒥ ᐅᕘᓇ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᓐᓂ ᐱᒋᐊᖅᑕᐅᓚᐅᖅᑐᒥ 2020–ᒥ ᐃᓚᒋᔭᐅᒃᑲᓐᓂᖅᖢᓂ ᐊᒃᓱᕈᕐᓂᐅᔪᒥ ᐅᑎᖅᑎᕆᓂᕐᒧᑦ ᕿᒧᒃᓯᓂᑦ ᓄᓇᕗᒻᒧᑦ.
ᑮᓇᐅᔭᖃᖅᑎᑕᐅᓂᐅᔪᒥ ᑐᕌᖓᓪᓗᐊᑕᓚᐅᕋᓗᐊᖅᑎᓪᓗᒍ ᑮᓇᐅᔭᑎᒍᑦ ᐃᑲᔪᖅᓱᐃᓂᕐᒥ ᓄᓇᕗᒻᒥ ᕿᒧᒃᓯᕐᓂᐅᔪᒥ, ᓄᖅᑲᖅᑎᑕᐅᓂᖓᓂ ᖄᖏᖅᓯᒪᓕᖅᑐᒥ ᒪᕐᕉᖕᓂ ᓱᒃᑲᓴᐅᑎᓂᐅᔪᓂ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19–ᒧᑦ ᑕᑯᓚᐅᖅᐳᖅ ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖑᔪᓂ ᑐᕌᖅᑎᑦᑎᓂᖏᓐᓂ ᑕᐃᒃᑯᓂᖓ ᑮᓇᐅᔭᓂ ᕿᒧᒃᓯᓪᓚᕆᖕᓄᑦ
ᑕᒪᓐᓇ ᖁᔭᒋᔭᐅᕐᔪᐊᓚᐅᖅᐳᖅ ᑕᐃᒃᑯᓇᙵᑦ ᐃᓚᐅᖃᑕᐅᔪᓂ ᕿᒧᒃᓯᖅᑏᒻᒥ, ᑭᓯᐊᓂ ᐊᒥᓱᑦ ᐅᖃᓚᐅᖅᐳᖅ ᐆᒪᓇᓱᐊᕐᓂᕐᒧᑦ ᐊᑭᖓ, ᓲᕐᓗ $200–ᑐᖅᑐᓂ ᐴᕐᓂ ᕿᒻᒥᑦ ᓂᕿᒃᓴᖏᓐᓂ ᕿᓚᒥᐊᓗᒃ ᓄᖑᓲᖑᕗᖅ ᐅᓄᖅᑐᓂ ᕿᒻᒥᖁᑎᓕᖕᓄᑦ, ᑐᑭᖃᖅᐳᖅ ᐱᔭᕆᐊᖃᕐᓂᐅᔪᒥ ᑐᕌᖓᓂᖃᓪᓚᕆᒃᑐᒥ ᐃᑲᔪᖅᓱᐃᓂᐅᔪᒥ.
ᐊᖅᓴᕐᓂᖅ ᐅᖃᓚᐅᖅᐳᖅ ᐊᖏᒡᓕᒋᐊᖅᓯᓂᖅ ᑐᓂᕐᕈᓯᐊᖑᔪᒥ, ᒫᓐᓇᐅᔪᒥ $3,000–ᖑᔪᖅ ᐊᕐᕌᒍᒧᑦ, ᓂᕈᐊᒐᒃᓴᐅᔪᓐᓇᕆᕗᖅ.
ᐊᓯᐊᓂ ᐱᓱᖕᓂᐅᔪᒥ ᓯᕗᒻᒧᑦ ᑎᑭᐅᑎᓂᕐᒧᑦ ᓴᐃᒻᒪᖃᑎᒌᖕᓂᐅᔪᒥ ᑎᑭᓚᐅᖅᐳᖅ ᑎᓯᐱᕆ 2–ᒥ, ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᒻᒪ ᑲᓇᑕᒥ ᐸᓖᓯᒃᑯᑦ ᓴᖅᑭᑎᑦᑎᑎᓪᓗᒋᑦ ᐃᖅᑲᐅᒪᔾᔪᑎᒥᒃ ᓴᓇᙳᐊᒐᒥᒃ ᐃᑲᔪᖅᓱᐃᓂᐅᓚᐅᖅᑐᓂ ᐃᓄᖕᓂ ᐊᓯᐊᒎᖅᑐᓂ ᐸᓖᓯᓂᑦ ᐊᒻᒪ ᕿᒻᒥᖏᓐᓂ.
ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ ᐅᐱᒋᓚᐅᖅᐸᖓ ᓴᓇᙳᐊᒐᕐᒥ ᐱᓱᒃᑲᓐᓂᕐᓂᐅᓂᖓᓂ ᓴᐃᒻᒪᖃᑎᒌᖕᓂᕐᒧᑦ, ᓇᓗᓇᐃᖅᑕᐅᓯᒪᓂᖓᓂ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᖓᓂ.
“ᑕᐃᒪᙵᓂ 2010–ᒥ, ᐊᑐᓕᖅᑎᑦᑎᓯᒪᕗᒍᑦ ᐊᑐᖁᔭᐅᓇᔭᖅᑐᓂ ᐅᕙᙶᖅᑐᓂ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᖓᓐᓂ,” ᐅᖃᓚᐅᖅᐳᖅ ᐊᑭᓱᒃ. “ᕿᑭᖅᑖᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐅᐱᒋᔭᖃᖅᐳᖅ ᐱᓕᕆᓂᐅᔪᒥ ᐃᓄᖕᓂ ᓴᓇᙳᐊᖅᑎᐅᔪᓂ ᑐᓂᓯᓂᕐᒧᑦ ᐆᒧᖓ ᐱᐅᓯᖃᑎᒌᖑᔪᓄᑦ ᐆᒻᒪᖅᑎᕆᓂᕐᒥ.”
ᐃᓅᓪᓗᓂ ᐊᓯᐊᒎᖅᑐᒥ ᐸᓖᓯᐅᓚᐅᖅᓯᒪᔪᖅ ᓘ ᕕᓕᑉ, ᐅᖃᓪᓚᒃᖢᓂ ᐃᓄᒃᑎᑐᑦ, ᐅᖃᓚᐅᖅᐳᖅ “ᓂᕆᐅᖕᓂᖃᖅᐳᖅ ᐊᒻᒪ ᓯᕗᒻᒧᑦ ᐃᖏᕐᕋᔪᒪᕗᖅ ᐋᓐᓂᕐᓇᖅᑐᓂ ᐊᑐᖅᑕᐅᓂᑯᓂ ᐅᖓᑖᓄᑦ ᑕᐃᒪᐃᓚᐳᖅᑐᓂ ‘40–ᖏᓐᓂ, ‘50–ᖏᓐᓂ, ᐊᒻᒪ ‘60–ᖏᓐᓂ ᑐᖁᕋᐃᓂᐅᔪᓂ ᕿᒻᒥᓂᑦ.”
ᐅᑯᓂᖓ ᐱᐅᔪᓂ ᐱᓱᖕᓂᐅᔪᓂ ᓯᕗᒻᒧᑦ ᓴᐃᒻᒪᖃᑎᒌᖕᓂᐅᔪᒧᑦ ᐊᒻᒪ ᐊᒃᓱᕈᕐᓂᐅᔪᓂ ᑐᕌᖓᓂᖃᑦᑎᐊᖅᑐᓂ ᐃᓄᖕᓂ, ᓂᕆᐅᖕᓂᖃᓪᓚᕆᒃᐳᖅ ᑕᐃᒃᑯᓄᖓ ᐱᒻᒪᕆᐅᔪᓄᑦ ᑲᓱᖃᑎᒌᖕᓂᐅᔪᓄᑦ ᐅᖃᐅᓯᕐᒧᑦ ᐊᒻᒪ ᐃᓕᖅᑯᓯᒧᑦ ᐸᐸᑕᐅᖏᓐᓇᕐᓂᖓᓂ ᐊᒻᒪ ᓴᙱᒃᑎᒋᐊᖅᑕᐅᓂᖓᓂ.