ᓂᕿᒃᓴᖃᑦᑎᐊᕐᓂᖅ ᐱᑕᖃᐃᓐᓇᐅᔭᖅᑐᒥ ᐊᑲᐅᙱᓕᐅᕈᑕᐅᕗᖅ ᓄᓇᕗᒻᒥ, ᓇᓚᐅᑦᑖᕆᔭᐅᔪᒥ 57 ᐳᓴᓐᑎᒥ ᐃᓄᖕᓄᑦ ᐊᖏᕐᕋᕆᔭᐅᔪᓂ ᓇᓗᓇᐃᖅᑕᐅᓯᒪᓂᖏᓐᓂ ᓂᕿᒃᓴᖃᑦᑎᐊᙱᓐᓂᐅᔪᓂ 2018–ᒥ.
ᔪᓚᐃᒥ, ᐅᓂᒃᑳᕆᓚᐅᖅᐳᒍᑦ ᓂᐅᕕᕐᕕᖕᒥ–ᓂᐅᕕᖅᑕᐅᔪᓂ ᓂᕿᓂᑦ ᐊᒻᒪ ᖃᓄᖅ 2019–ᒥ ᓇᓚᐅᑦᑖᕆᔭᐅᓂᖓᓂ ᕿᑎᐊᓂ 80 ᐊᒻᒪ 93 ᖁᐃᒃᑎᓐᓇᖅᑐᑦ ᓄᓇᕗᒻᒥᐅᑦ ᓂᕆᕙᒃᑕᖏᓐᓂ ᓇᒃᓯᐅᔾᔭᐅᓲᖑᓂᖏᓐᓂ ᑕᐅᓯᓐ–ᖏᓐᓂ ᑭᓛᒥᑐᓂ ᑐᓂᓯᔨᐅᔪᓂ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.
ᐃᓄᐃᑦ ᑕᐱᕇᑦ ᑲᓇᑕᒥ ᔪᓚᐃ 2021–ᒥ ᐃᓄᐃᑦ ᓄᓇᖓᓐᓂ ᓂᕿᒃᓴᖃᑦᑎᐊᕐᓂᕐᒧᑦ ᐸᕐᓇᒍᑎᖓ ᐅᖃᓚᐅᖅᐳᖅ “ᐱᑕᖃᙱᓐᓂᖓᓂ ᓄᓇᓕᖕᓂ ᓂᕿᒃᓴᖃᖅᑎᑦᑎᓂᕐᒧᑦ ᐊᖑᓇᓱᖕᓂᐅᔪᓂ, ᓂᐅᕕᕐᕕᐅᔪᓂ ᓂᕿᓄᑦ ᐱᓕᕆᕝᕕᒃ ᑭᐅᔪᓐᓇᕋᔭᙱᓚᑦ ᐃᓕᖅᑯᓯᒧᑦ ᐅᕝᕙᓘᓐᓃᑦ ᓂᕿᓂ ᐱᔭᕆᐊᖃᕐᓂᐅᔪᓂ ᐃᓄᖁᑎᑦᑎᓐᓂ.”
ᐊᓕᐊᓇᐃᑦ, ᐅᓂᒃᑳᕆᔪᓐᓇᖅᐳᒍᑦ ᐊᒥᓱᓂ ᓄᓇᓕᖕᓂ–ᑐᙵᕕᓕᖕᓂ ᐱᒋᐊᕈᑕᐅᔪᑦ ᑕᑯᕙᓪᓕᐊᓂᖏᓐᓂ ᓴᖅᑭᓐᓂᐅᔪᓂ (ᐅᕝᕙᓘᓐᓃᑦ ᓂᕿᓂᑦ) ᐊᒃᓱᕈᕐᓂᖏᓐᓂ.
ᖃᔪᖅᑐᕐᕕᒃ ᐊᔪᖅᓴᖅᑐᓄᑦ ᓂᕿᑖᕐᕕᒃ ᐃᖃᓗᖕᓂ ᓴᖑᕙᓪᓕᐊᑎᑦᑎᕗᖅ ᑕᐅᑐᒃᑕᑐᐊᖃᑲᐃᓐᓇᕐᓂᖓᓂ ‘ᖃᔪᖅᑐᕐᕕᖕᒥ’ ᑕᒪᒃᑭᐅᒪᓂᖅᓴᐅᔪᒥ ᑐᕌᒐᕆᔭᐅᔪᒥ ᓂᕿᒃᓴᖃᑦᑎᐊᕐᓂᕐᒧᑦ ᐊᒻᒪ ᓂᕿᓂᒃ–ᐊᑐᐃᓐᓇᖃᕐᓂᕐᒥ ᑕᐃᒪᙵᓂ 2019–ᒥ.
ᔭᓄᐊᕆ 20–ᒥ, ᖃᔪᖅᑐᕐᕕᒃ ᐅᖃᐅᓯᖃᓚᐅᖅᐳᖅ ᓄᑖᖑᓛᖑᔪᒥ ᓂᕿᓪᓚᑦᑖᓄᑦ ᐴᖅᑲᖅᓯᒪᔪᓂ ᐱᓕᕆᐊᖑᔪᒥ. ᐃᓗᐊᓂ ᐃᑲᕐᕋᓂ 24–ᓂ ᐊᓂᒍᖅᑎᓪᓗᒍ, 40–ᓂ ᐴᖅᑲᖅᓯᒪᔪᓂ — ᐊᑭᖃᓪᓗᐊᖅᑐᒥ $125–ᒥ ᑭᓯᐊᓂ ᓂᐅᕕᐊᒃᓴᐅᔪᓂ–ᐊᑭᓕᕈᓐᓇᕐᓂᕐᓂ ᑐᙵᕕᐅᔪᒥ — ᐱ.ᐅᔪᐃᓐᓇᐅᓚᐅᖅᐳᑦ.
ᒫᓐᓇᐅᔪᒥ, ᓂᕿᑦ ᐱᔭᐅᓚᐅᖅᐳᑦ ᐊᖑᓇᓱᒃᑎᓂ ᐃᖃᓗᖕᓂ, ᑕᖏᖅᖢᒑᐱᒃ, ᑕᓗᕐᔪᐊᖅ, ᑲᖏᖅᖠᓂᖅ, ᓇᐅᔮᑦ ᐊᒻᒪ ᒥᑦᑎᒪᑕᓕᖕᒥ. ᐃᓱᒻᒥᖅᑐᐃᔨ ᕋᐃᑦᓱᓪ ᐸᓚᐃ ᐅᖃᓚᐅᖅᐳᖅ ᐸᕐᓇᐅᑎᖃᕐᓂᖓᓂ ᐱᓂᕐᒥ ᐊᓯᖏᓐᓂ ᓄᓇᓕᖕᓂ ᓯᕗᓂᒃᓴᒥ.
ᐅᖃᓚᐅᕆᕗᖅ ᖃᔪᖅᑐᕐᕕᒃ ᐊᑐᐃᓐᓇᖃᖅᑎᑦᑎᕗᖅ ᐊᖑᓇᓱᒃᑎᓂ ᑭᒡᓕᐅᔪᒥ ᓴᖑᓴᕋᐃᓐᓂᐅᔪᒥ ᑕᑯᔭᐅᒐᔪᙱᑦᑐᒥ ᓂᐅᕕᕐᕕᐅᔪᓄᑦ ᐊᑐᖅᑕᐅᕙᒃᑐᓂ ᑎᑭᓴᐃᓂᕐᒧᑦ ᓂᕿᓪᓚᑦᑖᓂ.
“ᐱᓂᐊᖅᐳᒍᑦ ᐱᓯᒪᔭᔅᓯᓐᓂ, ᑭᓱᑐᐃᓐᓇᒥᒃ ᐊᖑᓇᓱᒃᑕᕐᓂᑦ ᓂᐅᕕᕐᓂᐊᖅᐸᕗᑦ ᐊᑲᐅᔪᒥ ᐊᒻᒪ ᐃᒃᐱᒍᓱᖕᓂᖃᑦᑎᐊᖅᑐᒥ ᐊᑭᐅᔪᒥ,” ᐸᓚᐃ ᐅᖃᓚᐅᖅᐳᖅ.
ᐅᓇ ᑐᕌᒐᕆᔭᐅᔪᖅ ᐱᕚᓪᓕᕈᑎᖃᖅᐳᖅ ᓇᒥᕈᓘᔮᓗᒃ ᓄᓇᓕᖕᒥ ᑕᐃᒃᑯᓇᙵᑦ ᐊᖑᓇᓱᒃᑐᓂ ᑕᐃᒃᑯᓄᖓ ᐃᑲᔪᖅᓯᖅᑕᐅᔭᕆᐊᓕᖕᓄᑦ.
6,000–ᐸᓗᖕᓂ ᐃᓄᖕᓂ ᓄᓇᖃᖅᐳᑦ ᐋᑐᕚ ᐃᓂᒋᔭᖓᓂ, ᐊᒥᓱᑦ ᐊᑐᐃᓐᓇᖃᒐᔪᙱᑦᑐᓂ ᐱᖅᑯᓯᑐᖃᖅᑎᒍᑦ ᓂᕿᓄᑦ. ᐅᓇ ᐊᓯᔾᔨᖅᐸᓪᓕᐊᕗᖅ ᐅᕘᓇ Reconseal–ᑎᒍᑦ, ᐃᓕᖅᑯᓯᒧᑦ ᑕᐅᖅᓰᓂᐅᔪᒥ ᓇᓂᔭᐅᔪᒥ ᐴᐱᓂ ᖁᒪᖔᐱᖕᒧᑦ ᐊᒻᒪ ᔪᐊᓂᔅ ᒥᓐᔾᒧᑦ. ᑲᑎᙵᓂᐅᔪᑦ ᑐᓂᓯᓚᐅᖅᐳᑦ 700–ᐸᓗᖕᓂ ᐸᐅᓐᓂ ᓇᑦᑎᐅᑉ ᓂᕿᖏᓐᓂ ᐊᒻᒪᓗᑦᑕᐅᖅ ᐊᖑᓇᓱᒃᑕᐅᔪᓂ ᕿᓯᖏᓐᓂ ᒪᕐᕉᖕᓄᑦ ᑲᑐᔾᔨᖃᑎᒌᖑᔪᓄᑦ ᑲᓇᑕᐅᑉ ᐊᖓᔪᖅᑳᖃᕐᕕᖓᓄᑦ.
“ᓇᖏᖅᓯᕗᒍᑦ ᐱᓕᕆᓂᐅᔪᒥ ᐊᒻᒪᓗ ᐱᓕᕆᓪᓗᑕ ᓴᐃᒻᒪᖃᑎᒌᓪᓚᕆᖕᓂᐅᔪᒥ ᐅᕘᓇ ᐆᒪᔪᒧᑦ,” ᐅᖃᓚᐅᖅᐳᖅ ᖁᒪᖔᐱᒃ. “ᑕᐃᒪᑐᖅ, ᑭᒃᑯᓕᒫᑦ ᐅᕙᓂ ᓄᓇᐅᔪᒥ ᑲᔪᖏᖅᓴᖅᑕᐅᓂᐊᖅᐳᖅ ᐆᒧᖓ.”
ᑕᓗᕐᔪᐊᓂ, ᓂᕿᕼᐊᖁᑦ ᐱᓕᕆᐊᒃᓴᐅᔪᖅ ᐱᓚᐅᖅᐳᑦ $451,000–ᓂ ᐅᕘᓇ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᖃᐅᓯᐊᖑᔪᒥ 2020–ᒥ ᐊᒻᒪᓗ ᐱᔭᕇᖅᐸᓪᓕᐊᕗᑦ ᑐᓂᓯᓂᐅᔪᒥ ᓇᑲᑎᕆᓂᕐᒥ–ᐊᒻᒪ–ᐴᖅᑲᐃᓂᖓᓂ ᐃᒡᓗᕐᔪᐊᖓᓂ, ᑐᓂᓯᓂᐊᖅᐳᖅ ᑐᓂᓯᓂᐅᔪᒥ ᐊᕐᕌᒎᑉ ᐃᓚᖓᓐᓂ ᐆᒪᔪᓂᑦ, ᑐᕌᕋᓱᐊᖅᑐᓂ ᐃᑲᔪᕐᓂᕐᒧᑦ ᓄᓇᓕᐅᔪᒥ ᖃᓂᒋᔭᖓᓄᑦ 1,000–ᓄᑦ ᐃᓄᖕᓄᑦ ᑭᐅᒪᓂᖏᓐᓂ ᓂᕆᐅᓯᖏᓐᓂ ᐱᔭᕆᐊᓕᖏᓐᓂ.
ᔨᒥ ᐅᓖᑲᑕᓕᒃ, ᐊᐅᓚᑦᑎᔨᐅᔪᖅ ᑲᑐᔾᔨᖃᑎᒌᖑᔪᒥ, ᐃᓱᒪᒋᔭᖃᑦᑎᐊᖅᐳᖅ ᐃᓱᒫᓘᑕᐅᔪᓂ ᐊᖑᓇᓱᓗᐊᖅᑕᐅᓂᐅᔪᓂ, ᑭᓯᐊᓂ ᓇᓗᓇᐃᖅᓯᕗᖅ ᑐᕌᒐᒃᓴᖓ ᑐᓂᓯᓂᕐᒧᑦ ᓄᓇᓕᖕᓄᑦ ᐊᒻᒪ ᑲᑎᖅᓱᖅᑕᐅᕙᓪᓕᐊᔪᒪᕗᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᓂᕐᒧᑦ ᑮᓇᐅᔭᓕᐊᖑᔪᓂ ᒪᒃᑯᒃᑐᓄᑦ ᐃᓄᖕᓄᑦ ᓄᓇᓕᖕᓂ ᐊᐅᓪᓛᕈᓐᓇᖁᓪᓗᒋᑦ ᓄᓇᒧᑦ ᐊᒻᒪ ᖃᑎᒃᑲᓐᓂᕐᓂᖏᓐᓂ ᑐᙵᕕᒋᔭᖏᓐᓄᑦ.
ᐱᓕᕆᐊᒃᓴᖅ ᐊᖏᒡᓕᕙᓪᓕᐊᑎᓪᓗᒍ, ᐃᑲᔪᖅᓯᖅᑕᐅᒃᑲᓐᓂᕆᐊᖃᕐᓂᐊᖅᐳᑦ ᒐᕙᒪᒃᑯᓐᓂ, ᐃᓚᒋᐊᖅᓯᓚᐅᖅᐳᖅ.
ᓯᓚᖓ ᐱᐅᕗᖅ ᒐᕙᒪᒃᑯᓐᓄᑦ ᐃᑲᔪᖅᓯᖅᑕᐅᓂᕐᒧᑦ ᑕᐃᒪᐃᑦᑐᓄᑦ ᐱᒋᐊᕈᑕᐅᔪᓄᑦ. ᑕᐅᑐᖕᓂᖓᓂ ᓴᐃᒻᒪᖃᑎᒌᖕᓂᐅᔪᒥ ᐊᒻᒪ ᑎᑭᐅᑎᓂᖓᓂ ᑎᑎᕋᖅᓯᒪᓂᐅᔪᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑎᒃᑯᓐᓂ ᐅᓂᒃᑳᓕᐊᖓᓂ ᐊᒻᒪ ᓯᓚᕐᔪᐊᕐᒥᐅᓕᒫᓄᑦ ᐅᖃᖅᓯᒪᓂᖓᓂ ᐱᔪᓐᓇᕐᓂᕆᔭᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᒐᕙᒪᑐᖃᒃᑯᑦ ᑲᑎᖅᓱᖅᑕᐅᕙᓪᓕᐊᔪᒥ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᕗᑦ ᐊᖏᓂᖅᓴᐅᔪᒥ ᓂᕿᓂᑦ ᐊᑐᐃᓐᓇᖃᕐᓂᕐᒥ. 30–ᓂ ᑲᑐᔾᔨᖃᑎᒌᖑᔪᓂ ᓄᓇᕗᓕᒫᒥ, ᐃᓚᖃᖅᑐᒥ ᕼᐋᒻᓚᐅᔪᑦ, ᐊᔪᖅᓴᖅᑐᓄᑦ ᓂᕿᑖᕐᕕᖕᓂ ᐊᒻᒪ ᐃᓕᓐᓂᐊᕐᕕᖕᓂ, ᐱᓚᐅᖅᐳᑦ ᑲᑎᓪᓗᒍ $1.1 ᒥᓕᐊᓐᓂ ᐋᑐᕚᒥ ᐅᒃᑐᐱᕆᒥ.
ᐊᕕᒃᑐᖅᓯᒪᓂᐅᔪᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᑦ ᐱᒋᐊᖅᑎᑦᑎᓯᒪᕗᑦ ᐃᓚᖏᓐᓂ ᐅᖁᒪᐃᓐᓂᐅᔪᓂ ᐱᑎᑕᐅᔪᓂ ᓄᕙᒡᔪᐊᕐᓇᖅ-19–ᒧᑦ ᐊᐅᒃᑕᔫᓂ ᓂᕿᑖᕈᑎᒃᓴᓂ ᐊᒻᒪ ᐴᖅᑲᖅᓯᒪᔪᓂ ᐱᖁᑎᓂᑦ ᐊᒻᒪ ᓱᓇᒃᑯᑖᓄᑦ, ᐊᒻᒪ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐃᑲᔪᕆᕗᑦ ᑭᐅᓂᕐᒥ ᓂᕿᒃᓴᖃᑦᑎᐊᕐᓂᐅᔪᒥ ᐅᕘᓇ ᓂᕿᓪᓚᑦᑖᓂ ᑐᓐᓂᖅᓴᐃᓂᕐᒥ ᐱᓕᕆᐊᖑᔪᒥ.
ᓱᓕ ᐱᔭᒃᓴᖃᕐᔪᐊᕋᓗᐊᖅᑎᓪᓗᑕ ᑭᓯᐊᓂ ᓄᓇᕗᒻᒥᐅᑕᓕᒫᒥᒃ ᑳᒍᓐᓃᕐᓂᖓᓂ, ᑲᔪᖏᖅᓴᓇᖅᐳᖅ ᑕᑯᓂᕐᒥ ᐅᑯᐊ ᓇᓗᓇᐃᒃᑯᑕᐅᔪᑦ ᐱᕈᖅᐸᓪᓕᐊᓂᕐᒥ ᓂᕿᓂᑦ ᐅᖓᓯᒃᑐᕐᔪᐊᕐᒥᙶᕐᓂᖓᓂ.