ᐅᖃᓕᒫᓚᐅᖅᐳᖓ ᐊᔾᔨᓕᐅᖅᑕᐅᓯᒪᔪᑉ ᐊᑖᓂ ᑎᑎᕋᖅᓯᒪᔪᒥᒃ ‘ᐊᒥᓱᓂᒃ ᒪᐃᔭᓂᒃ ᐊᐅᓪᓛᕐᓂᐊᕈᕕᑦ ᓯᕗᓪᓕᕐᒥ ᐊᑉᓗᕆᐊᖃᖅᐳᑎᑦ’, ᑕᐃᒪᓐᓇᐃᑉᐳᒍᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᒍᑦ ᐅᓪᓗᒥ.
ᐅᒃᐱᕈᓱᒃᐳᖓ ᑲᓇᑕᐅᑉ ᒐᕙᒪᒃᑯᖏᓪᓗ ᐃᒃᓯᕋᕐᔪᐊᑦ ᑐᒃᓯᐊᕐᕕᖏᓪᓗ ᐱᓕᕆᖃᑎᒌᑦᓯᐊᕐᓂᖅᓴᐅᓇᔭᓚᐅᖅᐳᑦ ᑕᐅᑐᖅᑰᓚᐅᖅᐸᑕ ᖃᓄᐃᓕᐅᕆᐊᓚᐅᖏᓐᓂᕐᒥᖕᓂ ᒪᒥᓴᕐᓂᕐᒧᑦ ᐱᓕᕆᖃᑎᒌᑦᓯᐊᕐᓂᕐᒧᓪᓗ ᑕᒪᕐᒥᒃ ᐅᖃᓪᓚᖃᑎᒌᓚᐅᖅᐸᑕ ᒪᒥᐊᓐᓂᕐᒧᑦ ᐊᑕᐅᑦᓯᒃᑯᑦ ᒪᒥᐊᓐᓂᕋᕐᓗᑎᒃ.
ᐅᑭᐅᑦ 12 ᐊᓂᒍᖅᓯᒪᓕᖅᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓯᕗᓕᖅᑎᖓ ᒪᒥᐊᒍᑎᖃᓚᐅᖅᐳᖅ, ᐊᒻᒪᓗ ᐃᒃᓯᕋᕐᔪᐊᕌᐱᒃ ᑕᐃᒪᓐᓇ ᐃᓕᓐᓂᐊᕆᐊᖅᓯᒪᔪᑦ ᐱᑦᓯᐊᖅᑕᐅᖃᑦᑕᖏᓚᐅᕐᓂᖏᓐᓄᑦ ᐅᖃᓕᑕᐃᓐᓇᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ. ᐃᓄᕕᐊᓗᐃᑦ, ᐊᓪᓚᐃᑦ, ᐊᓪᓚᖓᔪᐃᑦ ᐊᒻᒪ ᐃᓄᐃᑦ/ᐃᓐᓄᑯᑦ ᑖᒃᑯᐊᑐᐊᖑᓚᐅᖏᑉᐳᑦ ᑎᒥᐅᔪᑦ ᑕᒪᒃᑯᐊᓗ ᐊᔅᑐᕆᓕᔭᒥᐅᑦ, ᐅᖅᑰᔪᒥᐅᑦ ᓂᒋᕐᒥ ᐊᒥᐊᕆᑲ ᑕᒪᕐᒥᒃ ᐊᓯᖏᓪᓗ ᑎᒥᐅᔪᑦ ᐊᔾᔨᒌᖏᑦᑐᑦ. ᑕᐃᒪᓐᓇ ᓄᖑᑎᕆᓇᓱᐊᓚᐅᕐᓂᖏᑦ ᐃᓕᖅᑯᓯᕆᔭᐅᔪᓂᒃ ᑲᑎᑦᓯᓇᓱᐊᖅᖢᑎᒡᓗ ᐊᑕᐅᓯᕐᒥ ᓄᓇᖃᖁᓪᓗᒋᑦ ᑕᒪᒃᑯᐊ ᐃᖢᐃᓪᓕᐅᕈᑕᐅᓯᒪᕗᑦ ᐊᒥᓱᓄᑦ ᖃᑕᙳᑎᒌᓄᑦ ᓱᓕ ᑕᒡᕙᐅᕗᒍᑦ ᑭᓯᐊᓂ ᐃᑭᖃᖅᖢᑕ ᐊᖏᔪᒥᒃ.
ᑕᒪᓐᓇ ᐃᔨᖅᓯᒪᔭᐅᓛᖑᔪᖅ ᑕᑯᒃᓴᐅᑦᓯᐊᖅᖢᓂᓗ ᐅᓪᓗᒥ ᑕᐃᒪᓐᓇ ᐃᒃᐱᒋᑦᑕᐃᓕᒐᓱᐊᖃᑦᑕᓕᕐᒪᑕ ᐃᒥᐊᓗᖕᓄᑦ ᐊᖓᔮᕐᓇᖅᑐᓄᓪᓗ ᐊᓯᖏᓐᓄᑦ. ᑭᓯᐊᓂ ᕿᓚᒥᑯᓗᒃ ᑕᐃᒪᓐᓇ ᐃᒃᐱᒋᙱᓚᐅᐱᓪᓚᖕᓇᕐᒪᑦ ᑭᓯᐊᓂᓗ ᐋᓐᓂᐊᖅᑖᒃᑲᓐᓂᕐᓇᖅᖢᓂ ᐃᖢᐃᓪᓕᐅᕈᑎᑖᒃᑲᓐᓂᖅᖢᓂᓗ ᐃᓱᒪᒃᑯᑦ ᐃᒃᐱᒋᔭᒃᑯᑦ ᐊᑐᓂ ᐃᓄᐃᑦ ᑕᐃᒪᓐᓇᐃᒻᒪᑕ, ᐊᒻᒪ ᐋᓐᓂᐊᓚᐅᐱᓪᓚᒍᑕᐅᓕᖅᐸᒃᖢᑎᒃ ᐃᖢᕐᕆᔮᙱᓕᕈᑎᖃᖅᑎᑦᑎᔪᓐᓇᖅᖢᑎᒡᓗ. ᑕᐃᒪᓐᓇ ᓱᐴᖅᑐᒐᕐᓗᖃᑦᑕᓕᖅᖢᑎᒃ ᓱᖏᐅᑎᔭᐅᓪᓗᓂᓗ ᑎᒥᐅᑉ ᖃᓄᐃᓐᓂᖓᓄᑦ ᓴᓐᖏᓂᖅᓴᖅᑐᕈᒪᓪᓕᕈᑕᐅᔪᓐᓇᖅᖢᑎᒡᓗ ᑕᐃᒪᓐᓇ ᐊᔪᓕᖅᑎᑕᐅᕙᓪᓕᐊᓪᓗᓂ ᑖᓐᓇ ᑕᐃᒪᓐᓇᐃᑦᑐᓂᒃ ᐊᑐᖃᑦᑕᖅᑐᖅ. ᑲᒪᔨᐅᓪᓗᑕ, ᐊᒃᓱᕈᕈᑎᖃᕆᐊᖃᖅᐳᒍᑦ ᐋᖅᑭᒃᑕᐅᒍᑎᒃᓴᓂᒃ ᑕᒪᒃᑯᓄᖓ ᓱᕈᖅᐸᓪᓕᐊᒃᑲᓐᓂᖅᑕᐃᓕᖁᓪᓗᒋᑦ ᐃᓄᐃᑦ.
ᐅᖃᐅᓯᖃᕌᖓᑦᑕ ᐊᑐᖅᑎ ᐅᕝᕙᓘᓐᓃᑦ ᐃᓕᓐᓂᐊᕆᐊᖅᐸᓚᐅᖅᑐᖅ, ᐊᑕᐅᓯᕐᒥᒃ ᐃᓄᖕᒥᒃ ᐅᖃᐅᓯᖃᖏᑉᐳᒍᑦ, ᐊᐃᑉᐸᖏᓐᓂᒃ ᐅᖃᐅᓯᖃᖅᐳᒍᑦᑕᐅᖅ, ᐅᐃᖏᓐᓂᒃ/ᓄᓕᐊᖏᓐᓂᒃ, ᓄᑕᕋᖏᓐᓂᒃ ᓱᕈᓯᕐᓂᒃ, ᐊᖓᔪᖅᑳᓂᒃ, ᐊᑖᑕᑦᓯᐊᒃᑯᖏᓪᓗ ᐊᒻᒪ ᑕᒪᒃᑯᐊ ᐱᖃᓐᓇᕆᓂᕋᖅᐸᒃᑕᖏᑦ. ᐃᖢᐃᓪᓕᐅᕈᑎᖃᖅᑐᖅ ᐃᓄᑑᖃᑎᒋᒍᒪᒍᓐᓇᖅᐸᕌ? ᑕᐃᒪᓐᓇ ᓇᒡᓕᒍᓱᒍᓐᓇᖅᐱᑖ ᑕᐃᒪᐃᑦᑐᒥᒃ? ᐱᓕᕆᓗᐊᒧᑦ ᑕᑯᓐᓇᖏᒻᒪᑦ ᖃᓄᑎᒋ ᐊᒃᓱᕈᖅᑐᒥᒃ, ᐃᓕᑕᖅᓯᓐᓇᙱᖦᖢᓂᓗ ᑎᒥᖓᑕ ᐊᐅᓚᓂᖓᓂᒃ ᖃᐅᔨᓂᕐᒥᒃ ᐊᒃᓱᕈᖅᑑᑉ?
ᐃᓱᒪᖃᑦᓯᐊᓚᐅᖅᑕ ᒪᑐᐃᖔᑦᓯᐊᕐᓗᑕ, ᑐᓐᖓᓇᕐᓗᑕ ᐃᓚᐅᑎᑦᓯᓗᑕᓗ.