ᓯᕗᓕᖅᑎᑦᓯᐊᕙᒃ ᐱᔨᑦᓯᕋᖅᑎᐅᕗᖅ ᐃᓕᔭᐅᓯᒪᓪᓗᓂ ᓯᕗᓕᖅᑎᐅᓂᕐᒧᑦ ᐃᓅᖃᑎᒥᓄᑦ. ᑕᐃᒪᓐᓇ ᖃᐅᔨᓚᐅᖅᓯᒪᕗᖓ ᑕᑯᓯᒪᓪᓗᖓᓗ ᐊᖓᔪᖅᑳᕆᓚᐅᖅᑕᓐᓂ ᕿᖓᐅᓕᕆᔨᐅᑎᓪᓗᒍ ᑕᐃᑦᓱᒪᓂ. ᐃᓕᓐᓂᐊᕆᐊᖃᑕᐅᕙᓚᐅᖅᓯᒪᓪᓗᑎᒡᓗ ᑕᐃᑦᓯᒪᓂᑐᖃᖅ ᐅᐱᒋᔭᖃᕆᐊᖃᓚᐅᖅᖢᑎᒡᓗ ᐊᓯᒥᖕᓂᒃ ᑲᒪᑦᓯᐊᕆᐊᖃᓚᐅᖅᖢᑎᒡᓗ. ᑕᐃᒪᓐᓇ ᐃᓕᓐᓂᐊᖅᑎᑕᐅᓯᒪᕗᒍᑦ ᐊᒃᓱᕈᕐᓇᕋᓗᐊᖅᑎᓪᓗᒍ, ᐊᒃᓱᕈᖅᐸᓚᐅᖅᓯᒪᕗᒍᑦ, ᑕᐃᒪᓐᓇ ᐃᓕᓐᓂᐊᖅᓯᒪᔭᑦᑎᓐᓂᒃ ᐊᑐᕐᓗᑕ ᐃᓅᓯᖃᕋᓱᐊᖅᖢᑕ ᐃᑲᔪᖅᖢᑕᓗ ᐃᓅᖃᑎᑦᑎᓐᓂᒃ.
ᓄᓕᐊᕋᓗ ᓄᑕᕋᖃᖅᐳᒍᑦ 6–ᓂᒃ ᐊᒻᒪᓗ ᑎᒍᐊᙳᐊᖃᖅᓯᒪᓪᓗᑕᓗ ᑕᒪᒃᑯᓂᖓ ᐱᑦᓯᐊᖅᑕᐅᖃᑦᑕᖏᑦᑐᓂᒃ. ᐃᖅᑲᐅᒪᕗᖓ ᐃᓅᓱᒃᑐᑯᓗᖕᒥᒃ ᐊᐱᕆᓚᐅᖅᓯᒪᖕᒪᑦ ᐅᕙᓐᓂᒃ ᐊᑖᑖᓚᖃᑦᑕᕈᓐᓇᖅᐸᒋᑦ ᓄᑕᕋᓪᓚᕆᒃᐳᑦ ᐋᒃᑳᓚᐅᖅᓯᒪᖕᒪᑦ, ᐊᑖᑕᒋᙱᑕᐃᓛᖅᖢᓂ. ᐃᓚᐅᑎᑕᐅᒍᒪᓪᓗᓂ ᐊᐱᕆᓚᐅᖅᐳᖅ ᑕᐃᒪᓐᓇ ᐊᖏᖃᑕᐅᓕᖅᖢᓂᓗ ᐊᑖᑖᓚᖃᑦᑕᖁᔨᓚᐅᖏᑦᑐᖅ.
ᖃᓄᑐᐃᓐᓇᖅ ᐅᑭᐅᖃᕋᓗᐊᕈᕕᑦ ᐅᕝᕙᓘᓐᓃᑦ ᖃᓄᐃᓕᖓᒐᓗᐊᕈᕕᑦ, ᓴᓐᖏᔪᒥᒃ ᐃᓚᐅᑎᑕᐅᓂᕐᒧᑦ ᐊᑐᕈᒪᖃᑕᐅᔪᓗᒃᑖᖑᕗᒍᑦ. ᓴᓐᖏᓂᖃᖅᐳᒍᑦ ᐊᔪᖏᓐᓂᖅᓴᐅᔮᖅᐳᒍᓪᓗ ᐃᓚᐅᓪᓗᑕ. ᖃᓄᐃᓕᐅᖃᑕᐅᒍᒪᓐᓇᖅᐳᖅ ᑕᐃᒪᓐᓇ ᐃᓚᐅᖃᑕᐅᓗᓂ ᓴᓐᖏᓕᖅᐸᓪᓕᐊᓐᓇᖅᐳᖅ. ᐱᔪᓐᓇᕐᓂᖅᓴᐅᓐᓇᖅᐳᖅ ᐊᔪᖏᓐᓂᖅᓴᐅᔪᔮᖅᖢᓂᓗ ᐊᒃᓱᕈᕐᓇᕋᓗᐊᖅᑎᓪᓗᒍ ᓯᕗᓂᑦᑎᓐᓂ.
ᖃᐅᔨᒪᓪᓗᑕᓗ ᑎᒥᐅᔪᓂᒃ ᐊᔾᔨᒌᖏᑦᑐᓂᒃ ᐱᑕᖃᕐᒪᑦ ᑕᖅᑳᓂ ᐃᑲᔪᕈᓐᓇᕐᓂᕋᖅᖢᑎᒡᓗ; ᐅᐸᒡᓗᒋᑦ, ᐃᓱᒪᒧᑦ ᐋᓐᓂᐊᖅᓯᐅᖅᑎᑦ, ᐃᓚᔮᕇᓄᑦ ᐃᓅᓯᓕᕆᔨᑦ, ᐋᓐᓂᐊᖅᑕᐃᓕᒪᓂᕐᒧᑦ ᐱᓕᕆᔨᑦ, ᐃᓐᓇᑐᖃᐃᓪᓗ. ᐱᖃᓐᓇᖃᖅᑐᒃᓴᐅᕗᑎᑦ ᐱᕈᖅᓴᖃᑎᒋᓯᒪᔭᕐᓂᒃ ᐅᐱᒋᓪᓗᒍᓗ ᖃᐅᔨᒪᑦᓯᐊᖅᖢᒍᓗ ᐅᖃᕐᓂᐊᖏᒻᒪᑦ ᐅᖃᐅᓯᕆᔭᕐᓂᒃ ᑐᓴᖅᑕᐅᖁᖏᑕᕐᓂᒃ ᐅᖃᓪᓚᖃᑎᒋᔪᓐᓇᖅᖢᒍᓗ ᖃᓄᑐᐃᓐᓇᖅ. ᐅᖃᐅᓯᕆᖏᒃᑯᖕᓂ ᐊᓂᑎᖏᒃᑯᕕᐅᒃ ᐅᖃᐅᓯᕆᒍᒪᔭᐃᑦ, ᐊᖏᒡᓕᕙᓪᓕᐊᓂᐊᖅᐳᖅ ᐃᓗᖕᓂ ᑭᓯᐊᓂ ᐊᓂᒋᐊᖃᕐᒪᑦ ᐅᔾᔨᖅᑐᑦᓯᐊᖏᒃᑯᕕᓪᓗ ᖄᑐᐃᓐᓇᕆᐊᖃᖅᐳᖅ.
ᑕᐃᒪ ᓯᕗᓕᖅᑎᑦᓯᐊᕙᐅᔪᖅ ᓯᕗᓕᖅᑎᑦᓯᑦᓯᐊᕙᐅᓂᖅᓴᐅᓕᕋᔭᖅᐳᖅ ᐅᖃᓪᓚᖃᑎᒋᔭᐅᖃᑦᑕᑦᓯᐊᕐᓗᓂ ᐅᐱᒋᔭᒥᓂᒃ ᐱᓕᕆᖃᑎᖃᑦᓯᐊᕐᓗᓂ.