ᐱᖓᓱᑦ ᐱᓇᓱᐊᕈᓰᑦ ᐊᓂᒍᖅᑐᓂ, ᑲᑎᖃᑎᖃᖅᓯᒪᕗᒍᑦ ᓄᓇᓕᖕᒥᐅᓂᒃ ᕼᐋᒻᓚᓂ ᕿᑭᖅᑖᓘᑉ ᐅᐊᖕᓇᖓᓂ. ᓈᓚᓚᐅᖅᐸᕗᑦ ᐃᓱᒫᓘᑎᖏᑦ ᐱᔪᒪᔭᐅᔪᒧᑦ ᓄᓘᔭᕐᓂ ᐅᔭᕋᖕᓂᐊᕐᕕᐅᑉ ᐊᖏᒡᓕᒋᐊᕐᓂᖓᓄᑦ ᖁᔭᒋᕙᕗᓪᓗ ᓴᖅᑭᔮᖅᑎᑦᑎᖕᒪᑕ ᐃᓱᒪᒋᔭᕐᒥᓂᒃ ᐃᑲᔪᕐᓂᕐᓄᑦ ᐃᑲᔪᖏᓐᓂᕐᓄᓪᓗ ᐊᖏᒡᓕᒋᐊᕐᓂᕐᒧᑦ.
ᑖᒃᑯᐊ ᐅᖃᖃᑎᒌᖕᓃᑦ ᒪᓕᓚᐅᖅᐳᑦ ᖃᔅᓯᑲᓪᓚᓄᑦ ᐊᕐᕌᒍᓄᑦ ᑐᓴᕋᓱᖕᓂᕐᓂᒃ ᓄᓇᓕᖕᓂᑦ, ᐅᖓᑖᓂ ᕼᐋᓐᓇᓚᐃᑦ ᑲᑎᒪᓃᑦ ᐊᖏᒡᓕᒋᐊᖅᑕᐅᔪᒪᔪᒧᑦ. ᑭᓯᐊᓂ ᑕᐃᒪᐃᒐᔪᒃᑲᒥ, ᑭᓱᑦ ᑕᑯᔭᕐᓂᕐᓂᖅᓴᐅᓕᓲᖑᕗᑦ ᖃᒡᓕᕙᓪᓕᐊᓪᓗᑎᒃ. ᑕᐃᒪᐃᒃᑭᕗᖅ ᑲᔪᓯᓂᐊ ᐊᕙᑎᓕᕆᔨᒃᑯᑦ ᑲᑎᒪᓂᖏᓐᓄᑦ.
ᓈᓚᒃᑐᒍᑦ. ᑭᓱ ᐱᕐᔪᐊᖑᒍᓂ ᐃᓄᖕᓄᑦ ᓄᓇᓕᖕᓄᓪᓗ, ᐱᕐᔪᐊᖑᒋᕗᖅ ᑕᕝᕙ ᐹᕙᓐᓛᓐᑯᓐᓄᑦ. ᐊᓱᐃᓛᒃ ᐱᓕᕆᒃᑲᓐᓂᖅᑐᒍᑦ ᐱᔪᒪᓪᓗᑕᓗ ᓄᑖᓂᒃ ᖃᓄᐃᒋᐊᕐᓂᕐᓂᒃ ᓵᔾᔪᑎᒋᓪᓗᒋᑦ ᐃᓱᒫᓘᑕᐅᔪᓄᑦ. ᑖᒃᑯᐊ ᓄᑖᑦ ᐊᖏᖅᓯᒪᓃᑦ ᐅᖓᑖᒎᖅᐳᑦ ᐱᔪᒪᔭᐅᓯᒪᕙᒌᖅᑐᓄᑦ ᐃᓄᐃᑦ ᐅᒃᐱᕈᓱᖕᓂᖏᓐᓄᑦ ᐊᖏᖃᑎᒌᒍᑎᒧᑦ ᐊᖏᒡᓕᒋᐊᕈᒪᓂᑦᑎᓐᓄᓪᓗ ᐱᔪᒪᓇᓲᑎᒥ.
ᓄᑖᑦ ᐊᖏᖅᓯᒪᔭᕗᑦ ᐱᖃᓯᐅᔾᔨᓕᖅᑐᑦ ᓱᓕᒃᑲᓐᓂᕐᓂᒃ ᖃᓄᖅᑑᕈᑎᓂᒃ ᐳᔪᓄᑦ. ᖄᖓᒍᑦ ᐃᒡᓗᒧᐊᕐᓗᒍ ᓯᖃᓕᒃᑲᓐᓂᕈᑎᕗᑦ ᓄᓇᒃᑰᕈᑎᒃᑯᓪᓗ ᐅᓯᑲᖅᑕᕈᓐᓃᕐᓗᑎᒃ ᐊᖅᑯᑎᒃᑯᑦ, ᐱᖓᓱᐃᓕᓪᓗᐊᕐᓗᒍ ᖃᐅᔨᓴᕐᓂᐊᖅᑕᕗᑦ ᐳᔪᑦ ᐃᓄᐃᓪᓗ ᐃᓚᐅᓂᖅᓴᐅᓗᑎᒃ. ᑮᓇᐅᔭᖃᖅᑎᑦᑎᓂᐊᖅᑐᒍᑦ ᓯᓚᑖᓂᑦ ᑎᒥᒥᒃ ᖃᐅᔨᓴᕐᓂᐊᕐᒪᑕ ᐳᔫᕐᕕᓕᒫᓂᒃ ᓇᓗᓇᐃᕐᓂᐊᕐᒪᑕ ᖃᓄᐃᓕᐅᒃᑲᓐᓂᕆᐊᓖᑦ ᑲᒻᐸᓂᒧᑦ - ᐱᓕᕆᓂᐊᕐᓗᒋᓪᓗ – ᓵᒃᑲᓐᓂᕐᓂᐊᕐᒪᑦ ᑖᓐᓇ ᐱᕐᔪᐊᖅ ᐊᑲᐅᙱᓕᐅᕈᑎ.
ᐱᓕᕆᓂᖅᓴᐅᓂᐊᖅᑐᒍᑦ ᓂᕐᔪᑎᓂᒃ ᖃᐅᔨᓴᕐᓗᑕ. ᐊᖏᒡᓕᒋᐊᕐᓂᐊᖅᑕᕗᑦ ᑐᒃᑐᓂᒃ ᖃᐅᔨᓴᕐᓃᑦ 24ᓂᒃ ᐃᓂᖃᕐᓗᓂ ᐃᓄᖕᓄᑦ. ᐊᖏᒡᓕᒋᐊᕐᓂᐊᕐᒥᔭᕗᑦ ᐃᖃᓗᖕᓂᒃ ᖃᐅᔨᓴᕐᓂᕗᑦ ᓴᓇᓯᒪᓗᓂ ᑲᑐᔾᔭᐅᓗᓂ ᒥᑦᑎᒪᑕᓕᖕᒧᑦ ᕿᙳᐊᓂ ᐃᒡᓗᐊᑕᓗ ᓱᓪᓗᐊᓂ.
ᐅᓄᖅᓯᒋᐊᖅᑕᐅᔪᑦ ᐅᒥᐊᕐᔪᐊᑦ ᐃᓱᒫᓘᑕᐅᔪᖅ ᓵᓐᓂᐊᕐᒥᔭᕗᑦ. ᐊᖏᖅᓯᒪᔪᒍᑦ ᐅᓄᕈᓐᓃᖅᑎᑦᑐᒪᓪᓗᒋᑦ ᐅᓄᓛᑦ ᐅᒥᐊᕐᔪᐊᑦ ᐱᓕᕆᓂᐅᑉ ᒪᕐᕈᐊᓂ 168ᓄᑦ, 176ᖑᖏᑦᑐᓄᑦ ᐱᔪᒪᔭᐅᓚᐅᖅᑐᓄᑦ. ᐱᓕᕆᓂᐅᑉ ᒪᕐᕈᐊ ᐊᖏᖅᑕᐅᓐᓂᕈᓂ, ᐅᒥᐊᕐᔪᐊᑦ ᐅᓄᖅᓯᕙᓪᓕᐊᒋᐊᖅᑕᐅᓂᐊᖅᑐᑦ ᑕᓪᓕᒪᑦ ᐊᕐᕌᒍᓄᑦ ᖃᐅᔨᓴᖅᐸᒡᓗᑎᒃ ᐃᓄᐃᑦ ᐃᓚᐅᓗᑎᒃ ᐅᓄᕐᓂᖅᓴᑦ ᐅᒥᐊᕐᔪᐊᑦ ᐊᒃᑐᐃᓂᖃᓗᐊᖁᓇᒋᑦ. ᓄᖅᑲᖅᑎᓐᓂᐊᖅᑕᕗᑦ ᓱᓕᒃᑲᓐᓂᕐᓄᑦ ᐅᒥᐊᕐᔪᐊᓄᑦ ᐅᓯᑲᖅᑕᕐᓃᑦ ᖃᐅᔨᓴᕐᓃᑦ ᓇᓗᓇᐃᖅᓯᒍᑎᒃ ᐊᕙᑎᓄᑦ ᑭᒡᓕᓕᐊᕆᔭᐅᓯᒪᔪᑦ ᐅᖓᑖᓄᐊᕈᑎᒃ, ᑲᔪᓯᔾᔮᓇᑎᒡᓗ ᐋᖅᑭᒃᑕᐅᒍᓂ ᑭᓯᐊᓂ ᐊᑲᐅᙱᓕᐅᕈᑎ. ᖄᒃᑲᓐᓂᐊᒍᑦ ᐊᑐᖁᔨᔾᔮᖏᑦᑐᒍᑦ ᑭᓂᕐᓂᖅᓴᓂᒃ ᐅᖅᓱᐊᓗᖕᓂᒃ ᐅᒥᐊᕐᔪᐊᓂ 2022ᒥᑦ, 7 ᐊᕐᕌᒍᑦ ᓯᕗᓂᐊᓂ ᑲᓇᑕᐅᑉ ᒐᕙᒪᖏᑕ ᐱᖁᔭᖏᓐᓂᑦ.
ᑮᓇᐅᔭᖃᖅᑎᑦᑎᓂᖅᓴᐅᓂᐊᖅᑐᒍᑦ ᓄᓇᓕᖕᓂᒃ ᐃᓄᖕᓂᒡᓗ. ᓴᓇᓂᐊᖅᑐᒍᑦ 26ᓂᒃ ᓄᑖᓂᒃ ᐃᓂᓂᒃ ᐊᑐᓂ ᓄᓇᓂ ᐃᒃᐱᐊᕐᔪᖕᒥ, ᑲᖏᖅᑐᒑᐱᖕᒥ, ᐃᒡᓗᓕᖕᒥ, ᓴᓂᕋᔭᖕᒥ 28ᓂᒡᓗ ᓄᑖᓂᒃ ᐃᓂᓂᒃ ᒥᑦᑎᒪᑕᓕᖕᒥ. 20 ᑖᒃᑯᓇᓂ ᐃᖅᑲᓇᐃᔮᓂᑦ ᐃᓕᓐᓂᐊᕐᓇᐅᓂᐊᖅᑐᑦ ᐃᓐᓄᒃᐸᒡᓗᑎᒃ 6 ᑕᖅᑭᑕᒫᑦ. ᑖᔅᓱᒧᖓ ᐹᕙᓐᓛᓐᑯᑦ ᐃᖅᑲᓇᐃᔭᖅᑎᑖᖃᑦᑕᕐᓂᐊᖅᑐᑦ 40 ᓄᑖᓂᒃ ᐃᖅᑲᓇᐃᔭᖅᑎᓂᒃ ᐊᕐᕌᒍᑕᒫᑦ, ᐊᑐᓂ ᓄᓇᓕᖕᓂᑦ, ᖄᒃᑲᓐᓂᐊᒍᑦ ᖃᐅᔨᓴᕐᓃᑦ ᐅᖃᐅᓯᕆᔭᐅᖅᑲᐅᔪᓄᑦ. ᓴᓇᓂᐊᕆᓪᓗᑕᓗ ᑎᑎᕋᕐᕕᖕᓂᒃ ᐃᓕᓐᓂᐊᕐᕕᖃᕐᓗᓂ ᐊᑐᓂ ᑕᓪᓕᒪᓂ ᓄᓇᓕᖕᓂ ᐱᒋᐊᕐᓗᒍᓗ "ᓄᓇᓕᖕᓂ ᓄᓇᒃᑰᕈᑎᓕᕆᕝᕕᒃ", ᓯᕗᓪᓕᖅᐹᒥ ᓴᓂᕋᔭᖕᒥ ᐊᓯᖏᓪᓗ ᓄᓇᓕᖕᓂ ᐱᓕᕆᔭᐅᓕᕐᒥᓗᓂ, ᐃᖅᑲᓇᐃᔮᒥ ᐃᓕᓐᓂᐊᖅᑎᑕᐅᓗᑎᒃ ᐱᔨᑦᑎᕋᕐᓂᕐᒥᓂ ᓄᓇᒃᑰᕈᑎᓂᒃ ᓯᑭᑑᓂᒃ ᑎᓴᒪᓕᖕᓂᒡᓗ ᓴᓇᕙᒡᓗᑎᒃ.
ᑖᒃᑯᐊ ᐊᖏᕈᓐᓇᖅᐸᕗᑦ ᑭᓯᐊᓂᑐᐊᖅ ᑲᑐᔾᔭᐅᔪᑦ ᐱᕚᓪᓕᕈᑏᑦ ᐱᔪᒪᔭᐅᔪᒥᑦ ᐱᓕᕆᓂᐅᑉ ᒪᕐᕈᐊᓄᑦ ᐊᖏᒡᓕᒐᕐᓂᐅᑉ ᑕᐃᒪᐃᑎᑦᑐᓐᓇᕐᒪᒋᑦ. ᐊᖏᒡᓕᒋᐊᖏᓪᓗᓂ, ᓯᕗᓂᕗᑦ ᓇᓗᓇᖅᐳᖅ. ᐱᓗᐊᖅᑐᒥᒃ, ᓄᓇᒃᑰᕈᑎᓂᒃ ᓅᑦᑎᔾᔪᑕᐅᓗᑎᒃ ᓴᕕᕋᔭᒃᓴᓂᒃ ᕿᓚᒥᒨᖏᓐᓇᓚᐅᖅᑐᖅ ᐱᔾᔪᑎᖏᓪᓗ ᐊᑕᖏᓕᒫᑲᓴᒃᖢᒋᑦ ᓴᕕᕋᔭᒃᓴᓄᑦ ᐅᔭᕋᖕᓂᐊᕐᕖᑦ ᐊᑐᓲᖑᕗᑦ ᓄᓇᒃᑰᕈᑎᑯᑖᖕᓂᒃ ᓴᓗᒪᓂᖅᓴᐅᖕᒪᑕ, ᓱᕈᐃᖏᓐᓂᖅᓴᐅᓪᓗᑎᒃ ᑮᓇᐅᔭᑐᖏᓐᓂᖅᓴᐅᓗᑎᒡᓗ. ᑲᔪᓯᑎᑦᑕᕆᐊᒃᓴᖅ ᓄᓘᔮᒃ ᓄᓇᒃᑰᕈᑎᓄᑦ ᑲᔪᓰᓐᓇᕈᓐᓇᖏᒻᒪᑦ.
ᐊᖏᒡᓕᒋᐊᕐᓂᐅᔪᒪᔪᖅ ᓱᖅᑯᐃᓇᖅᓯᑎᑦᑎᕗᖅ. ᓴᓇᓂᐊᖅᑐᖅ ᑐᙵᑦᑎᐊᕐᓂᖅᓴᒥᒃ ᑲᔪᓰᓐᓇᕈᓐᓇᕐᓂᖅᓴᒥᒡᓗ ᐊᐅᓚᓂᕐᒥᒃ ᓵᑦᑎᓗᓂ ᐅᓄᖅᑐᓂᒃ ᐊᑲᐅᙱᓕᐅᕈᑎᓂᒃ ᐃᓄᖕᓂᑦ ᐅᖃᐅᓯᕆᔭᐅᓯᒪᔪᓂᒃ ᑐᓂᓯᔪᓐᓇᖅᑎᑦᑎᓗᓂᓗ ᐅᕙᑦᑎᓐᓂᒃ ᐱᕚᓪᓕᕈᑎᓂᒃ ᐃᓚᐅᖃᑕᐅᔪᓐᓇᕐᓂᖅᓴᐅᓕᕐᓗᑕ ᓄᓇᕐᔪᐊᕐᒥ ᓴᕕᕋᔭᒃᓴᓄᑦ ᓂᐅᕕᐊᒃᓴᓕᖕᓄᑦ. ᑕᐅᕗᙵᓕᒫᖅ ᐱᕚᓪᓕᕈᑏᑦ ᓱᖅᑯᐃᓇᖅᐳᑦ ᐃᓕᓐᓂᐊᕐᓂᖅᑎᒍᑦ, ᓄᓇᓕᖕᓄᑦ ᐃᑲᔪᕐᓂᖅᑎᒍᑦ,
ᐅᓄᕐᓂᖅᓴᓄᑦ ᐃᖅᑲᓇᐃᔮᓄᑦ ᐱᐅᓂᖅᓴᓄᓪᓗ ᐱᕚᓪᓕᕈᑎᓄᑦ ᐊᕐᕌᒍᓄᑦ ᐅᓄᖅᑐᓄᑦ ᐊᒡᒋᖅᑐᓄᑦ. ᐱᕐᔪᐊᖑᑎᒋᓪᓗᓂᑦᑕᐅᖅ, ᐊᖏᒡᓕᒋᐊᖅᑕᐅᔪᒪᔪᖅ ᐱᕕᖃᖅᑎᑦᑎᕗᖅ ᐅᖓᑖᓄᑦ ᐳᔫᕈᓐᓃᖅᑎᑦᑎᓂᕐᓄᑦ, ᓴᐳᑎᓗᒋᑦ ᓂᕐᔪᑏᑦ ᐊᕙᑏᓪᓗ, ᓵᓪᓗᒋᓪᓗ ᐊᑐᕆᐊᓕᖏᑦ ᐃᓱᒫᓘᑎᖏᓪᓗ ᕿᑭᖅᑖᓘᑉ ᐅᐊᖕᓇᖓᓂᕐᒥᐅᑦ ᓄᓇᓖᑦ.
ᐊᖏᒡᓕᒋᐊᖅᑕᐅᔪᒪᔪᖅ ᓵᑦᑎᔾᔪᑕᐅᑦᑎᐊᕙᐅᓛᖑᕗᖅ ᐊᑲᐅᙱᓕᐅᕈᑎᓄᑦ ᓵᑦᑎᓐᓃᑦᑐᓄᑦ ᒪᑐᐃᕈᑕᐅᓪᓗᓂᓗ ᑲᔪᓰᓐᓇᕈᓐᓇᖅᑐᒥᒃ ᐊᑯᓂᒧᑦ ᐱᕚᓪᓕᕈᑕᐅᓗᓂ ᑭᒃᑯᓕᒫᓄᑦ ᕿᑭᖅᑖᓗᖕᒥ.
– translation provided by Baffinland, see English here.
