ᑕᒫᓂ ᑕᕿᕆᔭᑦᑎᓐᓂ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (ᐊᕙᑎᓕᕆᔩᑦ ᑲᑎᒪᔨᖏᑦ) ᐃᓱᒪᒋᔭᐅᓂᖏᓐᓂᒃ ᑐᓴᕐᕕᖃᕋᓱᐊᒃᑲᓐᓂᕐᓂᐊᓕᕆᕗᑦ ᓈᓚᒋᐊᖅᑐᕐᓗᑎᒃ ᑕᐃᒃᑯᓂᖓ ᐹᕕᓐᓛᓐᑯᑦ ᓄᓘᔭᕐᒥᒃ ᓴᕕᒃᓴᖅᓯᐅᑏᑦ ᑯᐊᐳᕇᓴᖏᓐᓄᑦ “ᓴᓇᔭᐅᑎᒋᐊᒃᑲᓐᓂᕈᒪᔭᖏᓐᓂᒃ ᑐᒡᓕᕆᔭᐅᔪᓂᒃ 2” ᐆᒃᑐᕈᑎᖏᓐᓂᒃ ᒪᕐᕈᐃᖅᑕᖅᓯᒪᓂᐊᖅᑐᓂᒃ ᐊᖏᒡᓕᒋᐊᖅᑎᑦᑎᓂᐊᖅᑐᓂᒃ ᐅᔭᕋᖕᓂᐊᕐᕕᖓᓐᓂᒃ ᑕᐅᕙᓂ ᓄᓘᔭᕐᒥ. ᑕᒪᓐᓇ ᐱᓕᕆᕕᐅᓂᖓ ᓴᕿᑎᑦᑎᓗᑕᐅᔪᓐᓇᖅᑐᖅ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᐃᑲᔫᑕᐅᔪᓐᓇᕐᓂᖅ ᐃᓄᖕᓄᑦ ᑭᖑᕙᕇᖅᑐᓄᑦ ᐃᓚᒌᒃᑐᓄᑦ, ᐊᐅᓚᑦᑕᐅᑦᑎᐊᕈᓐᓇᕈᑎᒃ. ᑭᓯᐊᓂᓕ, ᑲᒻᐸᓂᖓᑕ ᓴᕿᐅᒪᑎᑦᑎᖏᓗᐊᕐᓂᖏᑦ ᐱᒻᒪᕆᐊᓘᔪᓂᒃ ᐃᓱᒫᓘᑕᐅᔪᓂᒃ, ᐊᒻᒪᓗ ᐱᔮᖅᑯᑕᐅᖏᑦᑑᒐᓗᐊᓂᒃ ᐅᔾᔨᕆᔭᐅᓯᒪᔪᔮᖏᓗᐊᕐᓂᖏᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ (ᑭᖑᓪᓕᕐᒥ ᐃᓱᒪᓕᐅᖅᑎᐅᔪᑑᓂᐊᕆᓪᓗᑎᒃ ᐊᖏᕈᑕᐅᓂᐊᖕᒪᖔᑕ ᐅᔭᕋᖕᓂᐊᕐᓂᖏᓐᓂᒃ ᐊᖏᒡᓕᒋᐊᖅᑎᑕᐅᔪᒪᓂᖏᑦ), ᐱᑎᑦᑎᓯᒪᓐᖏᒻᒪᑕ ᐃᓄᐃᑦ ᐱᔪᓐᓇᐅᑎᒋᔭᕋᓗᐊᖏᓐᓂᒃ ᐊᔾᔨᒌᒃᑐᐃᓐᓇᐅᑎᑕᐅᔭᕆᐊᖃᕐᓂᖏᓐᓂᒃ ᐃᓕᑕᕆᔭᐅᓯᒪᓗᑎᒃ ᑲᒪᒋᔭᐅᓂᖏᓐᓂ ᓈᓚᒋᐊᖅᑐᕐᕕᐅᓯᒪᓂᖏᓐᓂ ᐱᐅᓯᕆᔭᐅᔪᓂ. ᑕᒡᕘᓇᑦᓴᐃᓐᓇᖅᑕᐅᖅ, ᑲᒻᐸᓂᖓ ᒥᑭᒡᓕᑎᕆᓯᒪᒋᕗᑦ ᐃᓄᖁᑎᒋᔭᐅᔪᓄᑦ ᐊᒃᑐᖅᑕᐅᓯᒪᕐᔪᐊᕈᓐᓇᕐᓂᖏᓐᓂᒃ ᐅᒥᐊᕐᔪᐊᖃᕐᓂᖅᓴᐅᓕᖅᐸᑦ ᑕᒪᒃᑯᐊ ᑕᕆᐅᕐᒥᐅᑕᐃᑦ ᐆᒪᔪᐃᑦ ᐊᓯᖏᓪᓗ ᐊᕙᑎᖏᑦ ᐃᓱᒪᓘᑕᐅᓂᖏᓐᓂᒃ.
ᐹᕕᓐᓛᓐᑯᑦ ᖃᓄᐃᓕᖓᓪᓚᕆᖕᓂᖏᑦ ᐱᕙᓪᓕᐊᑎᑦᑎᔪᒪᓂᖏᓐᓄᑦ ᐸᕐᓇᐅᑎᒋᓯᒪᔭᖏᑦ ᑐᑭᓯᓇᖏᒻᒪᑕ. ᐊᐃᑉᐹᒍᑦ, ᐹᕕᓐᓚᓐᑯᑦ ᑕᐃᒪᖓᑦ ᐅᖃᐅᔾᔪᐃᓯᒪᖕᒪᑕ ᓇᖕᒥᓂᖃᖅᑎᒥᓂᒃ ᐊᖏᖅᑕᐅᑐᐊᕈᑎᒃ ᐊᖏᒡᓕᒋᐊᖅᑎᑦᑎᔪᒪᓂᕋᐃᖕᒪᑕ ᐅᔭᕋᓐᓂᐊᕈᓐᓇᖅᑕᖏᓐᓂᒃ ᑕᒫᓂ 12 ᒥᓕᔭᓐᓂᒃ ᑕᓐᓂᒃ ᐅᖁᒪᐃᓐᓂᓕᖕᓂ, ᓂᕆᐅᖕᓂᕋᐃᓪᓗᑎᒃ ᐅᔭᕋᓐᓂᐊᕈᓐᓇᖅᓯᓚᖓᓂᖅ 18 ᒥᓕᔭᓐ ᑕᓐᓂᒃ ᐅᖁᒪᐃᓐᓂᓕᖕᓂ ᑕᐅᕗᓈᖃᑕᓕᕈᑎᒃ ᕿᖑᐊᒍᑦ. ᑭᓯᐊᓂᓕᑕᐅᖅ, ᐹᕕᓐᓛᓐᑯᑦ ᐊᓯᖔᖏᓐᓂᒃ ᐅᓂᒃᑳᖃᑦᑕᖅᓯᒪᒋᕗᑦ ᐅᑭᐅᖅᑕᖅᑐᕐᒦᑦᑐᓐᓄᑦ, ᐅᓂᒃᑳᖅᐸᖏᔅᓱᑎᒡᓗ ᐊᖏᓂᖅᓴᑲᓐᓂᒻᒪᕆᖕᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒥᓂᒃ ᐸᕐᓇᐅᑎᓂᒃ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ. ᑕᐃᒃᑯᐊᓗ ᑲᒪᔨᐅᔪᑦ ᒐᕙᒪᒃᑯᑦ ᐃᖃᓇᐃᔭᕐᕕᖁᑎᖏᑦ ᑕᐃᒪᐃᓕᖓᑎᑎᑐᐃᓐᓇᕆᓪᓗᑎᒃ ᐱᒻᒪᕆᐅᔪᓂᒃ ᐊᔾᔨᒌᖏᓐᓂᖃᖅᑐᓂᒃ ᐅᖃᐅᓯᐅᕆᕙᒃᑕᖏᓐᓂ ᑲᔪᓯᑎᑦᑎᑐᐃᓇᖅᑐᔮᖅᓱᑎ, ᐊᐱᖁᑎᒋᓯᒪᖏᔅᓱᓂᒋᑦ.
ᐹᕕᓐᓛᓐᑯᑦ ᐊᑐᐊᓂᒃᓯᒪᓕᕇᒃᑯᑦ ᐅᖓᑕᓃᑐᓂᒃ $700 ᒥᓕᔭᓐᓂᒃ ᑕᐃᒃᑯᓄᖓ ᑐᒡᓕᕆᔭᐅᔪᓂᒃ 2 ᐱᓕᕆᐊᕆᔪᒪᔭᖏᓐᓄᑦ, ᓂᐅᕕᐊᓂᒃᓯᒪᓪᓗᑎᒃ ᐊᖅᑯᑎᑯᑖᓕᐅᕈᑎᒃᓴᖏᓐᓂᒃ ᓄᓇᓯᐅᑎᑯᑖᖕᓄᑦ ᐊᒻᒪᓗ ᑐᓚᒃᑕᕐᕕᓕᐅᕈᑎᒃᓴᖏᓐᓂᒃ, ᐊᒻᒪᓗ ᓴᓇᔭᐅᓂᖏᓐᓄᑦ ᑳᓐᑐᓛᒃᑖᖅᑎᑦᑎᓯᒪᓕᕇᖅᓱᑎᒃ ᐊᖏᕈᑎᓂᒃ ᑕᐃᒪᖓᑦ ᐊᕐᕋᒍᒥᒃ 2017-ᒥᒃ. ᓲᖃᐃᒻᒪ ᑲᒪᓇᖏᑲᓗᐊᖅᐳᖅ ᓈᒻᒪᒋᔭᐅᔪᓐᓃᖃᑕᕐᓂᖏᑦ ᐃᓄᐃᑦ ᐃᓱᒪᒋᔭᖏᓐᓄᑦ ᓈᓚᒋᐊᖅᑐᕐᕕᐅᓯᒪᔪᓂᒃ ᓂᖓᒍᑕᐅᕙᖕᓂᖏᓐᓄᑦ. ᖃᓄᖅ ᐃᓚᐅᖃᑕᐅᔪᓄᑦ ᓱᓕᔪᕆᔭᐅᔪᓐᓇᕐᒪᑕ ᖃᐅᔨᓴᖅᑕᐅᓂᖏᓐᓂ ᓈᓚᒋᐊᖅᑐᕈᑕᐅᓯᒪᓗᑎᒃ ᑕᐃᒃᑯᐊ ᓴᓇᔪᒪᔪᑦ ᑲᒻᐸᓂᐅᔪᑦ ᑲᔪᓯᑎᑕᐅᑐᐃᓐᓇᓚᖓᔪᑎᑐᑦ ᐱᐅᓯᖃᖅᑎᓪᓗᒋᑦ?
ᐹᕕᓐᓛᓐᑯᑦ ᐅᖃᖅᓯᒪᔪᑦ ᑐᒡᓕᕆᔭᐅᔪᓂᒃ 2 ᓴᓇᔭᐅᑎᑦᑐᒪᔭᖏᑦ ᑲᔪᓯᔭᕆᐊᖃᕐᓂᕋᖅᓯᒪᔭᖏᑦ ᑮᓈᐅᔭᓕᐅᕈᑕᐅᔪᓐᓇᕆᐊᖃᕐᓂᖓᓄᑦ ᓄᓘᔭᕐᒥ ᐅᔭᕋᖕᓂᐊᕐᕕᖓᑦ, ᑭᓯᐊᓂᓕᑕᐅᖅ ᓇᖕᒥᓂᕆᔭᖏᓐᓂ ᑮᓇᐅᔭᐃᑦ ᐊᐅᓚᑦᑕᐅᓂᖏᓐᓄᑦ ᐅᓂᒃᑳᓕᐊᖏᑦ ᑕᐃᒃᑯᓄᖓ ᓇᖕᒥᓂᖃᖃᑕᐅᔪᓄᑦ ᓴᕿᐅᒪᑎᑦᑎᔪᑦ ᑕᐃᒪᐃᓕᖓᖏᓐᓂᖏᓐᓂᒃ; ᑕᒫᓂ ᐊᕐᕋᒍᒥ 2018−ᒥ, ᐹᕕᓛᓐᑯᑦ ᐊᐅᓚᑦᑎᓂᖏᓐᓄᑦ ᐊᑭᓕᖅᑐᕆᐊᓕᖏᓐᓂᒃ ᐊᑕᓃᓐᓂᕋᐃᓚᐅᖅᑐᑦ $50-ᓂᒃ ᐊᑕᐅᓯᑕᒫᕐᒧᑦ ᑕᓐᒥᒃ ᐅᖁᒪᐃᓐᓂᓕᖕᒧᑦ. ᐊᑭᓕᖅᑕᐅᓪᓗᑎᒃ ᑕᕆᐅᕐᒥ ᐃᒪᓕᕆᔨᕐᔪᐊᑯᓐᓄᑦ ᐅᑭᐅᖅᑕᖅᑐᒥ−Oceans North−ᑯᓐᓄᑦ, ᐃᖕᒥᒍᖓᔪᓄᑦ ᖃᐅᔨᓴᖅᑎᑦᑎᓚᐅᕐᒪᑕ ᓇᓂᓯᖁᔭᐅᓪᓗᑎᒃ ᐹᕕᓐᓛᓐᑯᑦ ᑮᓇᐅᔭᓕᐊᕆᕙᓪᓕᐊᔭᖏᓐᓂᒃ, ᑕᐃᒃᑯᐊ ᐅᓂᒃᑳᓕᐅᓚᐅᖅᑐᑦ ᓄᔮᕐᒥ ᐅᔭᕋᖕᓂᐊᕐᕕᖓᓐᓂ ᑮᓈᐅᔭᓕᐅᑦᑎᐊᖅᑐᐊᓘᓂᖏᓐᓂᒃ. ᐹᕕᓐᓚᓐᑯᑦ ᐃᓚᖏᓪᓗ ᑕᒪᒃᑯᓂᖓ ᑮᓇᐅᔭᓕᐅᕐᓂᖏᓐᓂᒃ ᐅᓂᒃᑳᓕᐊᓂᒃ ᐊᑭᕋᖅᑐᐃᕙᒃᑐᑦ ᑐᑭᓕᐅᖅᑕᐅᓯᒪᓂᖏᓐᓂᒃ, ᐊᓯᖔᖏᓐᓂᒡᓗ ᓴᕿᑎᑦᑎᓯᒪᒐᑎᒃ ᒪᓕᒐᔭᖅᑐᓂᒃ ᐅᔭᕋᖕᓂᐊᕐᕕᖕᒥ ᓴᓈᖃᖅᑐᓂᒃ ᑮᓇᐅᔭᓕᕆᔾᔪᑕᐅᕙᒃᑐᓂᒃ ᑐᖓᕕᐅᕙᒃᑐᓂᒃ, ᐱᖃᓯᐅᔾᔭᐅᓯᒪᒐᑎᒡᓗ ᑕᐃᒃᑯᐊ $700 ᒥᓕᔭᓐᖏᓃᑦᑐᑦ (ᐊᒥᓱᕈᖅᐸᓪᓕᐊᔪᓪᓗ) ᐹᕕᓐᓚᓐᑯᑦ ᐊᑭᓕᐅᑎᒋᐊᓂᒃᓯᒪᔭᖏᑦ ᓴᓇᔭᐅᑲᓂᖁᔭᖏᓐᓂᒃ ᑐᒡᓕᕆᔭᐅᓇᔭᖅᑐᓂᒃ 2-ᒥᒃ. ᑲᒻᐸᓂᔪᑦ ᓇᖕᒥᓂᕆᔭᐅᔪᑦ ᑮᓇᐅᔭᐃᔭᕈᓐᓇᕐᒪᑦ ᐃᓱᒪᓕᐅᕈᑕᐅᑦᑎᐊᖏᑦᑐᓂᒃ ᐊᑐᖃᑕᕈᑎᒃ.
ᐹᕕᓐᓛᓐᑯᑦᑕᐅᖅ ᓴᕿᑎᑦᑎᓚᐅᓐᖏᒥᔪᑦ ᐅᓯᔭᐅᖃᑕᕐᓂᐊᖅᑐᓂᒃ ᐱᔾᔪᑎᖃᖅᑐᓂᒃ ᐸᕐᓇᐅᑎᒋᔭᖏᓐᓂᒃ. ᐃᓄᓕᒫᓄᑦ ᐃᓱᒪᒋᔭᐅᓂᖏᓐᓂᒃ ᑐᓴᕈᒪᓗᑎᒃ ᓈᓚᒋᐊᖅᑐᕐᕕᐅᓚᐅᕐᓂᖏᓐᓂ, ᐸᕕᓐᓛᓐᑯᑦ ᐅᖃᓚᐅᖅᑐᑦ ᓴᓇᔭᕆᐊᖃᕐᓂᕋᐃᓂᖅ ᓄᓇᓯᐅᑎᑯᑖᖕᓄᑦ ᐊᖅᑯᑎᑯᑖᓕᐅᕆᐊᖃᕐᓂᕐᒥᓂᒃ ᑕᐅᕗᖓ ᕿᖑᐊᓄᑦ ᑎᑭᐅᒪᔪᒥᒃ, ᐊᖏᒡᓕᒋᐊᖅᑕᐅᓗᓂᓗ ᑕᐅᕙᓃᑦᑐᖅ ᑐᓚᒃᑕᕐᕕᖓᑦ, ᓴᓇᔭᐅᒋᐊᓚᐅᖏᓂᖏᓐᓂ ᓱᓕ ᐅᖓᓯᖕᓂᖅᓴᒃᑰᕐᓂᐊᖅᑐᖅ ᑕᐅᕗᖓ ᐃᒃᐱᑭᑦᑐᕐᔪᐊᕐᒥᒃ. ᑭᓯᐊᓂ ᓄᓇᓖ ᑕᒻᒪᖏᑦᑎᐊᖅᐳᖅ ᑕᐃᒪᐃᓕᖓᓇᓱᒋᑦᑎᓐᖏᓐᓂᖏᓐᓂ; ᐹᕕᓐᓛᓐᑯᑦ ᐱᔪᓐᓇᐅᑎᑖᖅᓯᒫᓂᖕᒪᑕ ᐅᓯᔪᓐᓇᖅᑎᑕᐅᓂᖅ 18 ᑕᓐᓂᒃ ᐅᖁᒪᐃᓐᓂᓕᖕᓂ ᐊᕐᕋᒍᑕᒫᖅ, ᑕᐅᕗᓈᖃᑕᕐᓗᑎᒃ ᐃᒃᐱᑭᑦᑐᕐᔪᐊᒃᑯᑦ, ᑕᐃᒃᑯᓄᖓ ᓯᕗᓂᐊᒍᑦ ᐊᕙᑎᓕᕆᔨᒃᑯᓐᓄᑦ ᓈᓚᒋᐊᖅᑐᕈᑕᐅᓯᒪᓗᑎᒃ ᑲᒻᐸᓂᖓᑦ ᐅᖃᐅᓯᖃᓚᐅᓐᖏᑎᓪᓗᒍ ᐱᓕᕆᕕᖕᒥᓂ ᐃᓱᒪᓕᐊᕆᐊᓂᓚᐅᖅᑕᕕᓂᖏᓐᓂᒃ ᐅᓯᔭᐅᑎᑦᑎᖃᑕᓚᖓᓕᕐᓂᖅ ᓴᕕᒃᓴᔭᕐᓂᒃ ᑕᐅᕙᖓᑦ ᕿᖑᐊᓂᒃ. ᓲᖅ ᐃᓄᐃᑦ ᓄᓇᓖᑦ ᐊᖏᕈᑎᖃᕆᐊᖃᕋᔭᖅᐸᑦ ᐱᑕᖃᕆᐊᖃᕐᓂᕋᐃᔪᓂᒃ ᒪᕐᕉᖕᓂᒃ ᐊᖅᑯᑎᑯᑖᒃᓵᖕᓂᒃ ᐊᒻᒪᓗ ᒪᕐᕉᖕᓂᒃ ᑐᓚᒃᑕᕐᕕᒃᓴᖏᓐᓂᒃ ᐅᔭᕋᖕᓂᐊᕐᕕᒃᑯᓐᓄᑦ?
ᐹᕕᓐᓛᓐᑯᑦ ᐊᐃᕙᐅᑎᖃᖅᑐᑦ ᑕᐃᒃᑯᐊ ᐊᐅᓚᑕᖏᓐᓄᑦ ᐱᒻᒪᕆᐅᔪᓂᒃ ᐊᒃᑐᖅᑕᐅᓯᒪᖏᓐᓂᕋᐃᓪᓗᑎᒃ ᐊᒻᒪᓗ ᐱᒻᒪᕆᐅᔪᓂᒃ ᐊᒃᑐᐃᓂᖃᔾᔮᖏᓐᓂᕋᐃᓪᓗᑎᒃ ᐆᒪᔪᕐᓂᒃ. ᐊᖑᓇᓱᒃᑏᑦ, ᐃᓐᓇᑐᑲᐃᓪᓗ, ᖃᓄᐃᓕᖓᓂᖏᓐᓂᒃ ᐊᓯᒋᑦᑎᐊᒻᒪᕆᒃᑕᖏᓐᓂᒃ ᐅᖃᖃᑕᖅᑎᓪᓗᒋᑦ: ᒫᓐᓇᐅᔪᖅ ᐅᒥᐊᕐᔪᐊᖃᓲᖑᓕᕐᓂᖏᑦ ᐱᐅᖏᑦᑐᒥᒃ ᐊᒃᑐᐃᖃᑕᓕᕇᖅᑐᑦ ᑕᒪᐃᓐᓂᒃ ᑕᕆᐅᕐᒥᐅᑕᓂᒃ, ᓄᓇᒥᐅᑕᓂᒡᓗ ᐆᒪᔪᓂᒃ. ᐱᖃᑕᐅᖏᑐᑦᑑᓪᓗᑎᒃ ᐹᕕᓐᓛᓐᑯᑦ ᑐᑭᓕᐅᖅᓯᒪᔭᖏᑦ ᖃᐅᔨᓴᖅᑕᐅᓂᖏᓐᓂᒃ, ᐊᑐᐃᓐᓇᐅᔪᑦ ᖃᐅᔨᓴᖅᑕᐅᓯᒪᔪᑦ ᐃᑲᔪᖅᓱᐃᕗᑦ ᐃᓄᐃᑦ ᐃᓱᒪᓘᑎᒋᔭᖏᓐᓂᒃ. ᖃᐅᔨᓴᖅᑕᐅᓚᐅᖅᑐᑦ ᑕᐃᒃᑯᓄᖓ ᑕᕆᐅᕐᒥ ᑕᕆᐅᒥᑕᓕᕆᓂᕐᒧᓪᓗ ᖃᐅᔨᓴᕐᕕᒡᔪᐊᖓᓄᑦ Scripps-ᑯᑦ ᐃᖃᓇᐃᔭᕐᕕᖓᓂ, ᐃᓚᒋᓗᓂᒋᑦ ᑕᕆᐅᕐᒥ ᐃᒪᓕᕆᔨᕐᔪᐊᑯᑦ ᐅᑭᐅᖅᑕᖅᑐᒥ−Oceans North-ᑯᑦ ᐃᓱᒪᓇᖅᐳᑦ ᖃᐅᔨᒪᔭᐅᖏᓗᐊᕐᒪᑕ ᒫᓐᓇᐅᔪᖅ ᐃᒪᐅᑉ ᐊᐅᓚᖃᑕᐃᓐᓇᕐᓂᖓᓄᑦ ᐊᒃᑐᖅᑕᐅᓯᒪᕙᖕᓂᖏᑦ ᑕᕆᐅᕐᒥᐅᑕᐃᑦ ᐆᒪᔪᐃᑦ, ᐃᑲᔪᖅᓱᐃᔪᓐᓇᐅᑕᐅᖏᓚᑦ ᑐᒡᓕᕆᔭᐅᔪᓂᒃ ᐊᖏᒡᓕᒋᐊᖅᑕᐅᑎᑦᑐᒪᔭᖏᓐᓂᒃ ᐱᓕᕆᐊᖑᔪᒪᔪᓂᒃ, ᐊᒻᒪᓗ ᒪᕐᕈᐃᖅᑕᖅᓯᒪᑎᒋᔪᓂᒃ, ᐱᖓᓱᐃᖅᑕᖅᓯᒪᔪᓐᓇᖅᑐᓂᒡᓗᓐᓃᑦ ᐊᒥᓲᓂᖅᓴᐅᓕᕐᓂᐊᕈᑎᒃ ᐅᒥᐊᕐᔪᐊᖅ ᐃᖏᕐᕋᕙᖕᓂᐊᖅᑐᑦ ᑕᐅᕘᓇ ᑕᓪᓗᕈᑎᐅᑉ ᐃᒫᒍᑦ, ᑲᓇᑕᓕᒫᒥ ᐃᓄᐃᑦ ᓄᓇᓖᑦ ᓴᐳᓐᓂᐊᖅᑕᐅᓯᒪᑎᑖᒍᑦ.
ᑕᐃᒃᑯᐊ ᐱᐅᔫᑎᐊᓘᓂᖏᓐᓄᑦ ᓴᕕᒃᓴᓂᒃᑕᐅᓯᒪᔪᑦ ᑕᐅᕗᖓᑦ ᓄᓘᔭᕐᒥ ᐊᒃᓱᕈᕐᓇᖏᓐᓂᖅᓴᐅᕙᒃᑐᑦ ᓴᕕᒃᓴᕈᖅᑎᑕᐅᑦᑎᐊᕈᓐᓇᕐᓂᖏᓐᓄᑦ, ᓂᐅᕐᕈᑎᒃᓴᐅᔪᓐᓇᖅᓱᑎᒃ ᐊᕙᑎᒥᒃ ᑲᒪᑦᑎᐊᔪᓴᒃᓯᒪᓂᕋᐃᔪᓐᓇᖅᓱᑎᒃ ᓂᐅᕕᐊᖑᖔᕈᓐᓇᕐᓂᖏᓐᓄᑦ ᐊᓯᖏᓐᓂᒃ ᐱᐅᓐᖏᓂᖅᓴᐅᔪᓐᓇᖅᑐᓂᒃ ᓴᕕᒃᓴᓂᒃᑕᐅᓯᒪᔪᓂᒃ ᐅᔭᕋᖕᓂᐊᕐᕕᖕᓂ. ᑭᓯᐊᓂᓕᑕᐅᖅ ᐊᕙᑎᒥᒃ ᑲᒪᑦᑎᐊᔪᓴᖕᓂᕋᐃᔪᓐᓇᕐᓂᖅ ᑐᖓᕕᖃᖅᐳᖅ ᓄᓇᕗᒻᒥ ᐆᒪᔪᐃᑦ ᐊᒻᒪᓗ ᐊᖑᓇᓱᒃᑕᐅᖏᓐᓇᕈᓐᓇᕐᓂᖏᑦ ᓴᐳᓐᓂᐊᖅᑕᐅᓯᒪᓂᐊᕈᑎᒃ. ᐹᕕᓛᓐᑯᑦ ᒫᓐᓇᐅᔪᖅ ᐱᕙᓪᓕᐊᑎᑦᑎᑐᒪᔭᖏᓐᓄᑦ ᐸᕐᓇᐅᑎᖏᑦ ᑕᐃᒪᐃᓕᖓᖏᒻᒪᑕ, ᑲᒪᓇᖏᓚᕐᓗᓐᓃᑦ ᑲᒻᐸᓂᖓᑦ ᓱᓕᔪᕆᔭᐅᖏᓂᖓᑦ ᓄᓇᓕᖕᓄᑦ, ᑭᒡᒐᖅᑐᐃᔨᖏᓄᓪᓗ.
ᑕᒫᓂ ᐊᕐᕋᒍᒥ 2016−ᒥ, ᑲᓇᑕᐅᑉ ᒐᕙᒪᒃᑯᖏᑦ ᐱᓂᐊᕐᓂᕋᐃᓚᐅᖅᑐᑦ ᐊᑐᓕᖅᑎᑦᑎᓂᐊᕐᓂᖅ ᓄᓇᕐᔪᐊᕐᒥ ᑲᑐᔾᔨᖃᑎᒌᒡᔪᐊᑦ ᒪᓕᒐᓕᐊᕆᓚᐅᖅᑕᖏᓐᓂᒃ ᐃᓕᑕᕆᔭᐅᑎᑦᑎᓂᖅ ᓄᓇᓕᑐᖃᐃᑦ ᐱᔪᓐᓇᐅᑎᖃᕐᓂᖏᓐᓂᒃ. ᑕᐃᒃᑯᐊ ᐃᓚᖃᖅᐳᑦ ᐱᓂᐊᕐᓂᖃᖅᑎᑦᑎᓂᖅ ᐃᓱᒪᖅᓱᕈᓐᓇᕐᓂᖏᓐᓂᒃ, ᓯᕗᓂᐊᒍᑦ ᐊᒻᒪᓗ ᑐᑭᓯᐅᒪᑎᑕᐅᑦᑎᐊᕐᓗᑎᒃ ᐊᖏᕈᑎᖃᕈᓐᓇᕐᓂᖏᓐᓂᒃ ᕿᕐᒥᕐᕈᐊᖅᑕᐅᕙᖕᓂᖏᓐᓂ ᐱᒻᒪᕆᐅᔫᑦ ᐊᖏᔪᑏᑦ ᐱᕙᓪᓕᐊᑎᑦᑕᐅᔪᒪᓂᖏᓐᓂ, ᓲᕐᓗ ᑕᐃᒃᑯᑎᑐᓇ ᑐᒡᓕᕆᔭᐅᔪᓂᒃ 2 ᓴᓇᔭᐅᒋᐊᒃᑲᓐᓂᕈᒪᓕᖅᑐᓂᒃ. ᑕᐃᒪᓕ ᐊᖀᖃᑎᒌᑦᑎᐊᕋᓱᐊᕈᓐᓇᕐᓂᐊᕈᑎᒃ, ᑲᓇᑕᐅᑉ ᒐᕙᒪᒃᑯᖏᑦ ᐊᖏᕈᑎᖃᕆᐊᖃᖏᓚᑦ ᑐᒃᓯᕋᐅᑎᒋᔭᐅᓂᖏᓐᓂᒃ (ᐱᐅᕆᔭᐅᔪᓂᒡᓗᓐᓂᑦ ᐊᑐᖅᑕᐅᒃᑲᖅᑐᓂᒃ) ᐊᔭᐅᕈᑕᐅᔪᓂᒃ ᐃᓄᖕᓂᒃ ᓄᓇᓕᖕᓂ, ᐃᓛᑰᔪᓂᒃ ᓴᕿᐅᒪᑎᑦᑎᔪᓂᒃ ᖃᐅᔨᒪᔭᐅᑦᑎᐊᕆᐊᖃᖅᑐᓂᒃ, ᐊᒻᒪᓗ ᐱᔾᔪᑕᐅᓂᐊᖅᑐᓂᒃ ᐊᖏᔪᐊᓗᖕᒥᒃ ᐱᒻᒪᕆᐅᔪᓂᒃ ᐊᕙᑎᒋᔭᐅᔪᓄᑦ ᐊᒻᒪᓗ ᐃᓅᖃᑎᒌᒃᑐᓄᑦ ᖃᓄᐃᓕᖓᓕᕈᑕᐅᓂᐊᖅᑐᓂᒃ. ᒫᓐᓇᐅᓕᖅᑐᖅ ᒐᕙᒪᒃᑯᑦ ᑐᓴᕆᐊᖃᓕᖅᑐᑦ ᓄᓇᓖᖕ ᐃᓱᒪᓘᑎᒋᔭᖏᓐᓂᒃ, ᓄᖃᖅᑎᑦᑎᓗᑎᒡᓗ ᐱᐅᖏᑦᑐᓂᒃ ᐱᑕᖃᓕᕈᑕᐅᓂᐊᖅᑐᓂᒃ ᑕᒪᐃᓐᓄᑦ ᓄᓇᕗᒻᒥᐅᓄᑦ, ᑲᓇᑕᒥᐅᑕᓄᓪᓗ.
– translation provided by Oceans North, see English here
ᑕᕆᐅᕐᒥ ᐃᒪᓕᕆᔨᕐᔪᐊᑯᓐᓂ ᐅᑭᐅᖅᑕᖅᑐᒥ−Oceans North-ᑯᓐᓂ. ᐊᔾᔨᖁᑎ ᖃᐃᑕᐅᓯᒪᔪᖅ ᑖᒃᑯᓇᖓᑦ ᑕᕆᐅᕐᒥ ᐃᒪᓕᕆᔨᕐᔪᐊᑯᓐᓂᒃ ᐅᑭᐅᖅᑕᖅᑐᒥ−Oceans North-ᑯᓐᓂ