ᖃᑉᓯᐅᔭᕆᐊᖃᕐᓂᖏᑦ ᐊᒡᓂᒍ ᐃᒍ Hᐊᑭᕐᕕᖕᒥ ᑕᐃᒪᐅᓚᐅᖅᑐᑦ ᓱᓕ, ᑭᓯᐊᓂ ᐊᖏᕐᕋᕆᔭᕐᒥ ᓄᓇᖅᑲᑎᒌᑦ Hᐊᑭᖅᑐᑦ ᑭᖑᓪᓕᖅᐹᒃᑯᑦ ᐅᐅᒥ ᑲᖏᖅᖠᓂᕐᒥ ᓇᓗᓇᐃᖅᓯᓚᐅᖅᑐᑦ Hᐊᑭᓕᕆᔨᓪᓚᕆᐅᓂᖏᓐᓄᑦ ᓄᓇᖅᑲᑎᒌᓪᓗ Hᐊᖅᑭᖅᑐᓂᒃ ᑕᐅᑐᒍᒪᓪᓕᖅᓯᒪᔪᑦ ᓄᕙᒡᔪᐊᕐᓂᒃᑯᑦ ᑕᐅᑐᒍᓐᓇᐃᓪᓕᖅᑳᖅᖢᑎᒃ.
“ᐊᓕᐊᓇᐃᑦᑐᖅ Hᐊᑭᖅᑐᓂᒃ ᑕᐅᑐᒃᖢᓂ ᑲᖏᖅᖠᓂᕐᒥ, ᓄᓇᒋᔭᖅᐳᑦ ᓄᓇᖅᑲᑎᕗᑦ Hᐊᑭᓕᕆᔨᓪᓚᕆᐅᑉᒪᑕ,” ᑕᐃᒪᓐᓇ ᐅᖃᖅᖢᓂ ᓯᑦᓂ ᓂᑯᓪ, Hᐊᑭᖅᑎᓂᒃ ᐊᓕᔭᒃᑯᓐᓂᒃ Hᐊᑭᖃᑕᐅᓚᐅᖅᑐᖅ ᐱᓇᓱᐊᕈᓯᐅᑉ ᓄᙳᐊᓂ Hᐊᑭᕕᒡᔪᐊᖅᑐᓂᒃ Hᐊᑭᐊᓂᓚᐅᖅᖢᑎᒃ ᐊᐃᕆᓕ 3-ᒥ.
“ᕿᑎᖃᑎᒌᒃᑐᑦ ᖃᓂᒌᒃᑑᑎᖃᑦᑕᓚᐅᖅᑐᑦ ᐃᑎᖅᓯᓂᖏᓐᓄᑦ. ᐊᔾᔨᒌᕈᔪᒃᑐᐊᓘᓚᐅᖅᑐᑦ. ᐊᓕᐊᓇᐃᒍᑕᐅᓚᐅᖅᑐᖅ ᑕᒪᓐᓇ.”
Hᐊᑭᖃᑎᒌᒃᑐᑦ ᑕᐃᔭᐅᔪᑦ ᐊᓕᔭᕐᒥᒃ ᐊᑭᕋᖃᓚᐅᖅᑐᑦ Hᐊᑭᖃᑎᒌᒃᑐᓂᒃ ᑯᓱᒐᒃᑯᓐᓂᒃ ᑭᖑᓪᓕᖅᐹᖅᓱᖅᖢᑎᒃ, ᐊᔾᔨᒌᓕᓚᐅᖅᑐᑦ 2-2 ᐱᖓᔪᐊᓄᑦ ᕿᑎᒋᐊᓕᖅᑎᓪᓗᒋᑦ.
ᑐᕆᔅᑕᓐ ᑎᐊᔅ ᐱᖓᓱᐃᖅᑕᖅᖢᓂ ᐃᑎᖅᑎᑦᑎᖕᒪᑦ ᓴᓂᓕᕇᒃᑐᒃᑯᑦ ᐃᑎᖅᑎᑦᑎᓂᖅᓴᐅᓯᒪᓕᓚᐅᖅᑐᑦ ᐊᓕᔭᒃᑯᑦ 5-3-ᒥ ᐱᐊᓂᒃᐸᓪᓕᐊᓕᖅᑎᓪᓗᒋᑦ, ᑯᓱᒐᒃᑯᑦ ᐃᑎᖅᑎᑦᑎᓯᒪᓕᕆᑉᓗᑎᒃ ᐊᑭᕋᖏᑦ ᑎᒍᔭᐅᓯᒪᔪᖃᖅᑎᓪᓗᒋᑦ. ᐃᑎᖅᑎᑦᑎᓯᒪᒐᓗᐊᖅᑎᓪᓗᒋᑦ, ᐊᓕᔭᒃᑯᑦ ᓵᓚᒃᓴᓕᓚᐅᖅᑐᑦ 5-4-ᑯᑦ.
“ᐱᒻᒪᕆᐅᓂᖅᐹᕆᓚᐅᖅᑕᖅᐳᑦ ᐊᓐᓄᕌᖅᑐᕐᕕᖕᒥ,” ᑕᐃᒪᓐᓇ ᐅᖃᖅᖢᓂ ᐅᖃᐅᓯᖃᖅᖢᓂ ᑎᐊᔅᒥᒃ, ᐅᖃᖅᖢᓂᓗ ᐃᑎᖅᑎᑦᑎᑦᑕᐃᓕᒪᔨᖓ ᐃᑕᓐ ᒪᒃᐸ ᓵᓚᒃᓴᖅᑎᑦᑎᓚᐅᕐᓂᖓᓄᑦᑕᐅᖅ.
B-ᒥ Hᐊᑭᖅᑏᑦ, Hᐊᑭᖃᑎᒌᒃᑏᑦ ᖃᕆᑕᒃᑯᑦ ᓵᓚᖃᓚᐅᖅᑐᑦ Hᐊᑭᖅᑎᓂᒃ ᒥᓯᕌᓛᒃᑯᓐᓂᒃ ᑭᖑᓪᓕᖅᐹᒃᑯᑦ.
“B-ᒥ Hᐊᑭᖅᑏᑦ ᖃᓂᒌᒃᑑᑎᔪᒻᒪᕆᐊᓘᖃᑦᑕᓚᐅᕐᒥᔪᑦ,” ᑕᐃᒪᓐᓇ ᐅᖃᖅᖢᓂ ᓂᑯᓪ. “ᐊᓕᐊᓇᐃᑦᑐᖅ ᐃᓐᓇᐅᓂᖅᓴᑦ ᑕᐅᑐᒃᖢᒋᑦ Hᐊᑭᖅᑐᑦ ᓄᑕᖅᑲᓂᒃ ᕿᑎᖃᑎᖃᖅᖢᑎᒃ.”
B-ᒥ Hᐊᑭᖅᑏᑦ ᑲᑎᖦᖢᒋᑦ ᐅᑭᐅᕆᔭᖏᑦ 172-ᒦᓚᐅᖅᑐᑦ, ᑕᐃᒪᓐᓇ ᐅᖃᒃᑲᓐᓂᖅᖢᓂ.
ᓂᑯᓪ ᐊᓕᐊᓇᐃᒍᓱᓚᐅᖅᑐᖅ Hᐊᑭᕐᓂᐅᔪᖅ ᐃᓱᓕᒻᒪᑦ ᐊᓕᐊᓇᐃᑦᑐᒃᑯᑦ ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᐃᓱᓕᓯᒪᑉᓗᑎᒃ.
“ᑲᖏᖅᖠᓂᕐᒥ ᐊᒥᓲᔪᑦ ᐋᖅᑭᒃᓱᐃᓲᑦ ᑕᒪᒃᑯᓂᙵ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂ Hᐊᑭᕕᒡᔪᐊᖅᑐᑦ ᐊᐅᓚᑕᐅᑦᑎᐊᓚᐅᕐᒪᑕ. “ᑕᐃᒪᐃᓕᐅᖅᑎᑦᑎᔾᔪᑎᒋᔪᓐᓇᖃᑦᑕᖅᑕᖅᐳᑦ.”