ᑎᓕᓐ ᒍᐃᓐᑐᕐ ᐃᓯᖅᑎᑦᑎᒐᒥ ᒪᕐᕈᖓᓂ ᐃᓯᖅᑎᑦᑎᓂᐅᔪᒥ ᐱᙳᐊᕐᓂᐅᔪᒥ 6:22−ᒥ ᐅᖓᑖᓅᕈᔾᔨᔪᒥ ᑐᓂᓯᓂᕐᒥ ᑲᓇᑕᒥ 3-2 ᓵᓚᖃᕐᓂᐅᔪᒥ ᓴᒃᑮᐊᒥ ᐱᓂᕐᒧᑦ ᓄᓇᕐᔪᐊᓕᒫᒥ ᓯᑯᒥ ᕼᐋᑭᒥ ᑐᙵᕕᐅᔪᒥ (IIHF) ᓄᓇᕐᔪᐊᒥ ᒪᒃᑯᖕᓂᖅᓴᓄᑦ ᕼᐋᑭᒥ ᓵᓚᖃᕋᓱᐊᕐᓂᐅᔪᒥ, ᐃᒡᓘᑉ ᖄᖓ ᐲᑲᓴᓚᐅᖅᐳᖅ Scotiabank Centre−ᒥ ᕼᐋᓕᕚᒃᔅ, N.S.−ᒥ, ᐅᓐᓄᖓᓂ ᔭᓄᐊᕆ 5−ᒥ — ᐊᒻᒪ ᔫᓯᐱ ᓄᑲᖅᖠᖅ ᖃᓗᔾᔭᖅ ᐃᓚᖏᓪᓗ ᑲᖏᖅᖠᓂᕐᒥ ᕿᑎᐊᓃᑦᑎᐊᓚᐅᖅᐳᑦ.
ᖃᓗᔾᔭᖅ, 47, ᐅᖃᓚᐅᖅᐳᖅ ᐊᓕᐊᓇᐃᒋᔭᖃᑦᑎᐊᖅᐳᖅ ᓄᖃᖅᖠᓂ ᕼᐋᑭᒥ ᑕᐃᒪᙵᓂ ᐅᑭᐅᖃᓕᕋᒥ 10−ᓂ ᐊᒻᒪᓗ ᐱᔪᒪᓂᖃᐃᓐᓴᐅᔭᖅᖢᓂ ᐃᓚᐅᖃᑕᐅᓂᕐᒥ ᓄᓇᕐᔪᐊᒥ ᒪᒃᑯᖕᓂᖅᓴᓄᑦ ᐅᐸᒃᓯᒪᓗᓂ.
ᐅᖃᓚᐅᖅᐳᖅ ᓄᓕᐊᖓ, ᕋᐃᑦᓱᓪ, ᐊᒻᒪ ᒪᕐᕉᒃ ᕿᑐᕐᙵᖏᑦ, ᓘᓕ ᐊᒻᒪ ᓕᐅ, ᑎᑎᕋᕋᒥᐅᒃ ᐊᑎᖏᑦ ᓄᓇᕐᔪᐊᓕᒫᒥ ᓯᑯᒥ ᕼᐋᑭᒥ ᑐᙵᕕᐅᔪᒥ ᓯᕗᓪᓕᐅᔾᔭᐅᑎᑕᐅᓂᕐᒧᑦ ᐊᒧᔭᐅᓂᐅᔪᒥ — ᓵᓚᖃᕋᓱᐊᕐᓂᐅᔪᒥ ᐊᒧᔭᐅᓂᕐᒧᑦ — ᐱᕕᒃᓴᖃᕐᓂᖏᓐᓂ ᓂᐅᕕᕐᓂᕐᒧᑦ ᓵᓚᖃᕋᓱᐊᕐᓂᐅᔪᓂ ᑎᑭᑦᓂ ᑕᖅᑭᒐᓇᖕᓂ ᓯᕗᓂᐊᓂ ᖃᓄᐃᓐᓂᐅᔪᒥ ᐱᒋᐊᕐᓂᐊᕐᓂᖓᓂ — ᐊᒻᒪ ᓘᓕᐅᑉ ᐊᑎᖓ ᐊᒧᔭᐅᒐᒥ−ᖃᐅᔨᓚᐅᖅᐳᑦ ᑕᐃᑯᙵᕆᐊᖃᕐᓂᖏᓐᓂ.
“ᐱᓇᓱᐊᖅᓯᒪᕗᒍᑦ ᐊᑯᓂᐸᓗᖕᒥ ᐊᒻᒪ ᐊᓱᐃᓛᒃ ᐊᒧᔭᐅᖦᓚᑕᐃᓐᓇᖅᐳᒍᑦ ᓵᓚᖃᕋᓱᐊᕐᓂᐅᔪᒥ ᑎᑭᑦᓂ,” ᐅᖃᓚᐅᖅᐳᖅ ᖃᓗᔾᔭᖅ.
“ᐊᑕᐅᓯᐊᑦᑎᐊᖅᑐᒥ−ᐃᓅᓯᐅᔪᒥ ᐱᕕᒃᓴᐅᓚᐅᖅᐳᖅ ᐅᕙᑦᑎᓐᓄᑦ. ᐅᐸᓚᐅᖅᐳᒍᑦ ᑕᒪᒃᑭᒐᓚᖕᓄᑦ ᐱᙳᐊᕐᓂᐅᔪᓄᑦ ᐊᒻᒪ ᐊᓕᐊᓇᐃᒍᓱᑦᑎᐊᓚᐅᖅᐳᒍᑦ.
“ᑎᓴᒪᓂ ᒎᓗᒧᑦ ᐅᔭᒥᖕᒧᑦ ᑎᑭᑦᑖᓚᐅᖅᐳᒍᑦ ᐊᒻᒪ ᑕᒪᑦᑕ ᐱᙳᐊᕐᔪᐊᕐᓂᐊᓗᓕᐊᕈᓐᓇᓚᐅᖅᐳᒍᑦ.”
ᖃᓗᔾᔭᖅ ᐅᖃᓚᐅᖅᐳᖅ ᕼᐋᓕᕚᒃᔅᒥ ᑐᙵᓇᖅᖢᓂ ᓄᓇᓕᐸᐅᔭᐅᓂᖓᓂ ᐃᓄᖏᑦ ᑐᙵᓇᖅᖢᑎᒃ.
ᐅᖃᓚᐅᖅᐳᖅ ᐃᓗᐊᓂ Scotiabank Centre “ᐅᐊᑲᓪᓚᖔ ᓂᐱᖅᑯᖅᑐᓚᐅᖅᐳᖅ” ᐱᙳᐊᕐᓂᐅᔪᒥ ᑲᓇᑕᒥ ᐱᙳᐊᖅᑎᐅᔪᑦ ᐱᙳᐊᖅᑎᓪᓗᒋᑦ.
ᐃᓚᐅᖃᑕᐅᕐᔪᐊᓚᐅᖅᐳᖓ ᖁᕕᐊᓐᓂᐅᔪᒥ, ᐊᒃᓱᐊᓗᒃ ᐸᑦᑕᒃᑐᖅᖢᖓ ᐃᕆᐊᓛᖅᖢᖓ.
“ᐱᐅᓂᖅᓴᑦᑎᐊᒻᒪᕆᐅᕗᖅ ᑕᑯᓂᕐᒥ ᐱᙳᐊᖅᑐᓂ ᐅᐸᒃᓯᒪᓪᓚᕆᒃᖢᓂ ᑕᓚᕖᓴᒥᐅᙱᑦᑐᖅ. ᐃᒃᐱᖕᓇᖅᐳᖅ ᐃᓄᓕᒫᓂᒃ ᑭᒃᑯᓕᒫᑦ ᐸᑦᑕᒃᑐᖅᑎᓪᓗᒋᑦ ᐃᕆᐊᓛᖅᑎᓪᓗᒋᑦ.”
ᖃᓗᔾᔭᖅ ᑐᕌᓐᑐ ᒪᐃᐳᓪ ᓖᕝ−ᑯᓐᓄᑦ ᐃᑲᔪᖅᓱᐃᔨᐅᕗᖅ NHL ᕼᐋᑭᐅᑎᓪᓗᒍ, ᐊᒻᒪ ᐊᐃᑦᑖᕈᓱᒐᓚᓚᐅᖅᐳᖅ ᓖᕝᔅ ᐱᕕᒃᓴᖃᓚᐅᙱᑦᑎᐊᕐᓂᖏᓐᓂ ᑕᒪᑐᒪᓂ ᐊᕐᕌᒎᔪᒥ ᓵᓚᖃᕋᓱᐊᕐᓂᐅᔪᒥ.
ᑭᓯᐊᓂ, ᐃᓚᓕᒫᖏᑦ ᐸᑦᑕᒃᑐᓚᐅᖅᐳᑦ ᑲᓇᑕᐅᑉ ᑳᓄᕐ ᐱᑖᑦᒧᑦ ᐊᒻᒪ ᖃᓗᔾᔭᖅ ᐅᖃᓚᐅᖅᐳᖅ ᑲᒪᓇᕐᔪᐊᓚᐅᕐᓂᖓᓂ ᖁᙱᐊᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ.
“ᐅᐊᑲᓪᓛᓘᔪᖅ.
“ᑕᒪᓐᓇ ᐊᑐᕐᓂᑯᕐᔪᐊᖑᓚᐅᖅᐳᖅ ᐳᐃᒍᓚᐅᖅᓯᒪᔾᔮᙱᑕᓐᓂ. ᖁᙱᐊᖅᓯᒪᕙᕋ (ᐱᑖᑦ) ᐃᓯᖅᑎᑦᑎᓂᖓᓂ ᐅᖓᑖᓅᔾᔭᐅᔪᒥ ᐃᓯᖅᑎᑦᑎᓂᐅᔪᒥ ᐅᐸᒃᓯᒪᓪᓗᖓ (ᔅᓗᕚᑭᐊᒧᑦ ᕿᑎᖅᐸᓯᐊᓂ ᑭᖑᓪᓕᖅᐹᖅᓯᐅᑎᓂ).
“ᐃᖅᑲᐅᒪᙱᓚᖓᓘᓐᓃᑦ ᐊᓗᒍᓕᐊᕋᒪ ᑲᓇᑕ ᐃᓯᖅᑎᑦᑎᑎᓪᓗᒍ (ᐅᖓᑖᓅᔾᔭᐅᔪᒥ ᓵᓚᖃᖅᑎᐅᔪᒥ ᓵᓚᖃᕋᓱᐊᕐᓂᐅᔪᒥ ᐱᙳᐊᕐᓂᐅᔪᒥ), ᑭᓯᐊᓂ ᖃᐅᔨᒪᕗᖓ ᓯᕗᓪᓕᖅᐸᐅᓪᓗᖓ ᑕᐃᑯᙵᓚᐅᖅᐳᖓ ᑲᓇᑕ ᐃᓯᖅᑎᑦᑎᒐᒥ. ᐊᒻᒪ ᐊᑐᓚᐅᖅᐳᖓ ᒎᓕᒧᑦ ᑮᓇᑉᐸᖓᓂ.
“ᐅᒃᐱᕐᓇᓚᐅᙱᓚᖅ ᐊᒻᒪ ᐊᓕᐊᓇᐃᕐᔪᐊᖅᖢᓂ. ᐅᓇ ᐱᔪᒪᓯᒪᐃᓐᓇᖅᑕᕗᑦ ᐃᓅᓯᓕᒫᑦᑎᓐᓂ ᕼᐋᑭᒥ ᐊᓕᐊᓇᐃᒋᔭᖃᑦᑎᐊᖅᖢᑕ.