Skip to content

ᐃᓱᒪᕗᑦ: ᑎᑭᑎᑦᑎᓂᖅ ᐋᖅᑭᒍᑎᒃᓴᓂ ᑎᑭᑎᑕᐅᓯᒪᔪᓄᑦ ᐊᑲᐅᙱᓕᐅᕈᑕᐅᔪᓄᑦ

Nunavut News_editorial
Editorial & opinions - Nunavut News

ᐊᑲᐅᙱᓕᐅᕈᑎ: ᐃᓅᖃᑎᒌᖑᔪᓄᑦ ᖃᓄᐃᑦᑑᓂᖏᓐᓂ ᐱᔾᔪᑎᒋᓪᓗᒋᑦ ᐊᑭᕋᖅᑐᐃᓂᖅ
ᐅᖃᖅᐳᒍᑦ: ᓂᐱᔅᓯᓐᓂ ᐱᔭᕆᐊᖃᖅᐳᒍᑦ

ᐱᓇᓱᐊᕈᓯᐅᓚᐅᖅᑐᒥ, ᑎᑎᕋᐃᓚᐅᖅᐳᒍᑦ ᐅᓂᒃᑳᓕᐊᒥ ᐊᕐᓇᒥᒃ ᐅᖃᐅᓯᒃᓴᓕᐊᖏᓐᓂ, ᐃᓄᓕᒫᓅᖓᔪᓂ, ᓇᒃᓴᓚᐅᖅᑐᒥ ᑕᕐᓂᐅᔪᒥ ᐃᒃᐱᒍᓱᑦᑎᐊᙱᓐᓂᐅᔪᒥ ᐊᒻᒪᓗ, ᐊᒥᓱᓄᑦ ᐃᔨᓄᑦ, ᖃᐅᔨᒪᓂᖃᙱᓗᐊᕐᓂᐅᔪᒥ.

ᔭᓂ ᐴᓗ-ᐃᒋᓚᐃ ᐅᖃᓕᒫᒐᕐᒧᑦ ᐊᐱᖅᓱᖅᑕᐅᓂᖓ ᐅᖃᖅᑕᐃᓕᒪᓂᖃᓚᐅᙱᓚᖅ, ᐃᒻᒪᖄ, ᐅᖃᐅᓯᖏᑎᒍᑦ ᑕᑯᒃᓴᐅᓂᖃᑦᑎᐊᙱᓚᖅ ᑐᙵᓇᕐᓂᖃᙱᓐᓂᖓᓂ ᐃᓄᖕᓄᑦ ᓄᓇᖅᑲᑎᒋᓚᐅᖅᑕᖏᓐᓂ ᐊᕐᕕᐊᓂᑦ.

ᐃᓕᖅᑯᓯᒧᑦ-ᖁᒃᓴᒡᓚᖕᓂᖓ ᑐᑭᓯᓇᓚᐅᖅᐳᖅ, ᒪᒃᑯᒃᑑᓪᓗᓂ ᐊᕐᓇᐅᓪᓗᓂ ᕿᒪᐃᔪᒥ ᓄᓇᖓᓐᓂ ᐃᓅᕝᕕᕕᓂᐊᓂ.

ᑎᑎᕋᐃᓂᖅᐳᑦ ᐃᓱᒪᒋᔭᒥᓂᑦ ᓱᒋᐊᖅᑕᐅᓂᐅᙱᓚᖅ ᒪᑐᐃᖓᓂᖓᓂ ᐅᖃᓪᓚᖕᓂᖓᓄᑦ, ᑭᓯᐊᓂ ᐃᓂᑦᑎᕈᑕᐅᓪᓗᓂ ᐊᒥᓱᑦ ᐃᓄᐃᑦ ᓱᓕ ᑎᒍᒥᐊᖅᐳᑦ ᐊᒻᒪ ᐅᖃᐅᓯᖃᓲᖑᕗᖅ ᑕᐃᒪᐃᑦᑐᒐᓚᖕᓂ ᐃᓱᒪᒋᔭᖃᕐᓂᐅᔪᓂ ᕿᒪᐃᓕᕋᒥ ᓄᓇᕗᒻᒥ – ᐊᒻᒪᓗ ᑕᐃᒪᐃᑦᑐᑦ ᐃᓱᒪᒋᔭᐅᓂᐅᔪᑦ ᕿᒥᕆᓲᖑᕗᑦ ᐃᓅᖃᑎᒌᖑᔪᓄᑦ ᖃᓄᐃᑦᑑᓂᖏᓐᓂ ᐱᔾᔪᑎᒋᓪᓗᒋᑦ ᐊᑭᕋᖅᑐᐃᓂᕐᒥ ᑲᓇᑕᒥ ᐸᓖᓯᓕᕆᓂᐅᔪᒥ.

ᐅᖃᐅᓯᕆᔭᖏᑦ ᐱᕙᓪᓕᐊᑎᑦᑎᓂᖃᙱᓗᐊᕐᓂᖓᓂ ᐊᒻᒪᓗ ᐱᔪᒪᙱᓐᓂᐅᔪᒥ ᓯᕗᒻᒧᐊᖅᐸᓪᓕᐊᓂᐅᔪᒥ, ᖃᐅᔨᒪᕗᒍᑦ ᓴᓇᔭᐅᓯᒪᓂᕆᔭᐅᓂᖏᓐᓂ ᐱᐅᓯᖃᑎᒌᖑᔪᓂ ᐱᓂᕐᓗᒡᔪᐊᕐᓂᐅᔪᓄᑦ, ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᐅᔪᒥ ᐊᒻᒪᓗ ᑎᓕᐅᕈᑕᐅᓪᓗᑎᒃ ᐊᓯᔾᔨᕐᓂᐅᔪᓂ ᐱᖅᑯᓯᐅᔪᒥ ᐊᒻᒪ ᐃᓕᖅᑯᓯᐅᔪᒥ ᐊᒃᓱᕈᕈᑕᐅᔪᓂ ᓇᖏᕈᓐᓇᖅᓯᒪᓂᐅᔪᓂ ᐊᕐᕌᒍᒐᓵᓗᖕᓄᑦ.

ᐊᒥᓱᐃᑦ ᐊᑲᐅᙱᓕᐅᕈᑕᐅᔪᑦ ᑎᑭᑎᑕᐅᓚᐅᖅᐳᑦ ᓯᓚᖅᑲᑎᑦᑎᓐᓂ ᐃᓱᒪᓚᐅᖅᑐᓂ ᖃᐅᔨᒪᓂᖅᓴᐅᓂᖏᓐᓂ, ᑭᓯᐊᓂ ᐆᒪᔪᓐᓇᕋᔭᓚᐅᙱᓚᑦ ᖃᐅᔨᒪᓂᖃᕐᓂᐅᔪᒥ ᐃᓄᑐᖃᕐᓂ ᐊᒻᒪ ᐃᓄᖕᓂ ᐹᓚᐅᖅᑕᖏᓐᓂ ᐅᕙᓂ ᓄᓇᐅᔪᒥ
ᖃᐅᔨᒪᑎᓪᓗᑕ ᑎᑎᕋᐃᓂᐅᔪᒥ ᐅᖃᐅᓯᒃᓴᓕᐊᖑᔪᓂ ᐋᓐᓂᕐᓇᕈᓐᓇᕐᓂᖓᓂ ᐊᒥᓲᔪᓄᑦ ᐱᓕᕆᓂᐅᔪᓂ, ᐃᒃᐱᒍᓱᓚᐅᖅᐳᒍᑦ ᐃᒃᓯᓐᓇᖅᑕᐅᑐᐃᓐᓇᕆᐊᖃᙱᓐᓂᖓᓂ, ᐅᓪᓘᓕᖅᑐᒥ ᐃᒃᐱᒍᓱᑦᑎᐊᕐᓂᖅ ᐊᒻᒪ ᓈᒻᒪᒋᔭᖃᕐᓂᐅᔪᒥ ᐊᔾᔨᒌᙱᑦᑐᓂ ᐃᓱᒪᒋᔭᐅᓂᐅᔪᓂ ᐊᒻᒪ ᐃᓕᖅᑯᓯᐅᔪᓂ ᐱᔭᕆᐊᖃᕐᓂᐅᕗᖅ ᐃᓅᖃᑎᒌᖑᔪᓄᑦ ᑲᒪᑦᑎᐊᖅᑐᒥ ᐃᓄᖕᒧᑦ. ᐃᓱᒪᑭᑦᑐᒥ ᐅᖃᐅᓯᒃᓴᓂ ᐃᓄᓕᒫᓄᑦ ᓴᖅᑭᔮᖅᑎᑕᐅᑎᓪᓗᒋᑦ, ᐃᒃᓯᓐᓇᑐᐃᓐᓇᓪᓗᐊᙱᑉᐸᕗᑦ ᑭᐅᙱᓪᓗᑕ.

ᐃᓄᐃᑦ ᐃᓱᒪᒋᔭᖃᕐᓂᕆᔭᖏᓐᓂᑦ ᐅᖃᖅᓴᕋᐃᑉᐳᑦ, ᑭᓯᐊᓂ ᖃᓄᐃᓕᐅᕐᓂᕐᓂ ᐃᓱᒪᒋᔭᖃᕐᓂᕆᔭᕐᓂ ᐃᓕᖕᓂ ᑐᑭᓕᐅᕆᓲᖑᕗᖅ ᐃᓅᓪᓗᑎᑦ.

ᐊᕐᕕᐊᕐᒥᐅᑦ ᐱᐅᓂᖅᓴᒥ ᐱᓪᓗᐊᖅᐳᑦ. ᓄᓇᕗᒻᒥᐅᑦ ᐱᐅᓂᖅᓴᒥ ᐱᓪᓗᐊᖅᐳᑦ. ᐃᓄᐃᑦ ᐃᓄᐃᑦ ᓄᓇᖓᓐᓂ ᐱᐅᓂᖅᓴᒥ ᐱᓪᓗᐊᖅᐳᑦ.

ᐃᒃᓯᓐᓇᑐᐃᓐᓇᕐᓂᐅᔪᒥ ᐱᑎᑦᑎᓇᔭᖅᐳᖅ ᐆᒥᖓ ᓱᔪᐃᓂᐅᔪᓐᓇᖅᑐᒥ ᐃᓱᒪᒋᔭᖃᕐᓂᐅᔪᒥ ᐊᐃᑦᑐᖅᑕᐅᓂᖓᓂ ᑮᓇᒧᑦ ᓵᙵᔭᐅᓂᖓᓄᑦ, ᐊᒻᒪᓗ ᑕᒪᓐᓇ ᓈᒻᒪᙱᓚᖅ.

ᐃᖏᕐᕋᓂᖃᖅᓯᒪᕗᑦ ᐋᖅᑭᒃᓯᓂᕐᒥ ᐸᓖᓯᓂᒃ ᐱᓕᕆᖃᑎᖃᕐᓂᐅᔪᒥ ᐃᓄᖕᓄᑦ ᐸᓖᓯᐅᔪᑦ ᐱᔨᑦᑎᕋᓪᓗᐊᖅᑕᖏᓐᓂ ᐊᒻᒪ ᓴᐳᔾᔨᓯᒪᓪᓗᐊᖅᑕᒥᓂᑦ. ᐃᓕᖅᑯᓯᒥ ᐃᓕᓐᓂᐊᖅᑎᑕᐅᓂᐅᔪᒥ ᐃᓚᒋᔭᐅᖃᑕᐅᕗᖅ ᐱᓕᒻᒪᒃᓴᕐᓂᐅᔪᒥ ᐸᓖᓰᑦ ᐱᕙᖕᓂᖏᓐᓂ ᓄᓇᕗᒻᒧᐊᓚᐅᖅᑳᕋᑎᒃ, ᑭᓯᐊᓂ ᐊᑯᓂᐅᓂᖅᓴᐅᔪᒥ ᐊᒻᒪ ᑮᓇᐅᔭᓂ ᑑᕌᖓᓕᕈᓂ ᑕᒪᑐᒧᖓ, ᐸᓖᓰᑦ ᓄᓇᕗᒻᒧᐊᕈᓐᓇᖅᐳᑦ ᓇᖕᒥᓂᖅ ᐃᓚᐃᓐᓈᕈᑎᖏᓐᓂ ᖄᖅᑯᑦᑎᔪᓂ ᖃᔅᓯᐊᕐᔪᖕᓂ ᐅᓪᓗᓂ ᐃᓕᑦᑎᓂᐅᔪᓂ.

ᓴᓇᖃᑎᖃᕐᓂᐅᖃᑕᐅᔪᓂ ᐊᒻᒪ ᓴᐃᒻᒪᖃᑎᒌᖕᓂᖅ ᐱᐅᔪᐊᓘᓪᓗᑎᒃ ᐅᖃᐅᓯᐅᕗᑦ, ᑭᓯᐊᓂ ᑲᑕᒃᓯᒪᕗᑦ ᑐᑭᖃᖅᑎᑕᐅᓇᑎᒃ ᐃᓗᓕᖃᖅᑎᑕᐅᓇᑎᒃ ᐊᕐᕌᒍᒐᓴᓄᑦ ᐊᒻᒪᓗ ᒐᕙᒪᑐᖃᒃᑯᑦ ᑎᑭᑎᓯᒪᔭᖏᓐᓂ ᐋᖅᑭᒍᑎᒃᓴᑦ ᐊᑲᐅᙱᓕᐅᕈᑕᐅᔪᓄᑦ ᓇᖕᒥᓂᖅ ᓴᓇᓯᒪᔭᖏᓐᓂ ᐱᓕᕆᑦᑎᐊᕐᓂᖃᙱᓚᑦ.

ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ ᖃᐃᖁᔨᓂᖃᓚᐅᖅᐳᑦ ᐃᑲᔪᖅᓱᐃᓂᕐᒧᑦ ᐊᓯᔾᔩᓂᐅᔪᒥ ᐊᒻᒪ ᐃᓄᐃᑦ ᐱᐅᓯᑐᖃᖏᓐᓄᑦ ᐊᐅᓚᓂᖅᓴᐅᑎᑦᑎᓂᕐᒧᑦ ᐸᓖᓯᓕᕆᓂᕐᒧᑦ ᔭᓄᐊᕆ 2020–ᒥ ᐅᓂᒃᑳᓕᐊᒥ ᐋᖅᑭᒃᓱᖅᑕᐅᔪᒥ ᓘᑖᒧᑦ ᐃᓕᓴᐱ ᑯᐊᒫᒃᒧᑦ ᓯᓚᑦᑐᖅᓴᕐᕕᒡᔪᐊᒥ ᒫᓂᑑᐸᒥ ᐱᓕᕆᕝᕕᖓᓂ ᐃᓅᓯᓕᕆᓂᐅᔪᒥ ᐊᒻᒪ ᐱᕋᔭᓕᕆᓂᕐᒧᑦ.

ᔭᓄᐊᕆ 27–ᒥ ᑲᓇᑕᒥ ᐸᓖᓯᒃᑯᑦ ᑲᒥᓴᓇᖓ ᐳᕋᓐᑕ ᓚᑭ ᐊᒻᒪ ᑲᓪᓗ ᐊᑎᓕᐅᕆᓚᐅᖅᐳᑦ ᐱᓇᓱᐊᖃᑎᒌᖕᓂᖅ ᐊᖏᕈᑕᐅᔪᒥ, ᐊᖏᖅᓯᒪᑎᑦᑎᔪᒥ ᑕᒪᒃᑭᓂ ᑲᑐᔾᔨᖃᑎᒌᖑᔪᓂ ᐊᑐᓕᖅᑎᑦᑎᓂᕐᒥ ᐊᑐᓕᖁᔭᐅᔪᓂ ᑕᐃᔅᓱᒥᖓ ᐅᓂᒃᑳᓕᐊᖑᔪᒥ "ᐃᓗᓕᖃᐅᖅᖢᓂ ᐃᓕᖅᑯᓯᒥᒃ ᐅᔾᔨᕈᓱᖕᓂᐅᔪᒥ ᐊᒻᒪ ᐱᓂᕐᓗᒡᔪᐊᖅᑕᐅᓯᒪᔪᓄᑦ–ᐅᖃᐅᔾᔨᓯᒪᓂᐅᔪᒥ ᐸᓖᓯᓄᑦ ᐱᔨᑦᑎᕋᖅᑕᐅᓂᕐᒥ ᐊᖑᑕᐅᒐᓗᐊᖅᐸᑦ ᐊᕐᓇᐅᒐᓗᐊᖅᐸᑦ–ᑐᙵᕕᓕᖕᒥ ᐱᓕᒻᒪᒃᓴᕐᓂᐅᔪᒥ ᐊᒻᒪᓗ ᐊᑐᐊᒐᓂᑦ, ᐊᒻᒪᓗᑦᑕᐅᖅ ᓴᙱᓂᖅᓴᐅᔪᓂ ᐅᖃᓗᒡᕕᐅᓂᐅᔪᓄᑦ ᑭᐅᓂᐅᔪᓂ, ᐊᑯᓂᐅᓂᖅᓴᒥ ᓄᓇᓕᖕᓃᑎᑕᐅᓂᐅᔪᓂ ᑲᓇᑕᒥ ᐸᓖᓯᐅᔪᓂ ᓄᓇᓕᖕᓂ, ᐊᒻᒪ ᐊᔾᔨᒌᙱᓐᓂᐅᔪᓂ ᐃᓗᐊᓂ ᐃᖅᑲᓇᐃᔭᖅᑎᖁᑎᖏᓐᓂ."

ᓯᕗᓪᓕᐅᔾᔭᐅᔭᕆᐊᖃᕐᓂᐅᔪᒥ ᐃᖅᑲᓇᐃᔭᖅᑎᑖᕐᓂᕐᒧᑦ ᓄᓇᓖᑦ ᐃᓗᐊᓂ ᐊᒻᒪᓗ ᐱᓕᒻᒪᒃᓴᕐᓂᐅᔪᒥ ᐃᓄᖕᓄᑦ ᐸᓖᓯᐅᔪᓄᑦ, ᐊᕐᓇᓄᑦ ᐊᒻᒪ ᐊᖑᑎᓄᑦ, ᐱᔭᕆᐊᖃᖅᑑᕗᖅ.
ᑲᓪᓗ ᐅᖃᓚᐅᖅᐳᖅ "ᐃᓅᖃᑎᒌᖑᔪᓄᑦ ᖃᓄᐃᑦᑑᓂᖏᓐᓂ ᐱᔾᔪᑎᒋᓪᓗᒋᑦ ᐊᑭᕋᖅᑐᐃᓂᖅ ᐱᓪᓚᕆᐅᕗᖅ ᐃᓄᐃᑦ ᐊᕐᓇᓄᑦ ᐹᖅᓯᓂᐅᔪᓂ ᐸᓖᓯᒃᑯᓐᓂ."

ᑕᒪᓐᓇ ᓱᓕᕗᖅ, ᐊᒻᒪ ᐱᓪᓚᕆᐅᕗᖅ ᐊᒥᓱᓂ ᖃᓄᐃᓐᓂᐅᔪᓂ ᐃᓅᓯᐅᔪᓂ ᐅᑭᐅᖅᑕᖅᑐᒥ.
ᐋᓐᓂᖅᑕᐅᓂᕕᓃᑦ ᐲᖅᑕᐅᔪᓐᓇᙱᓚᑦ ᐊᒻᒪᓗ ᕿᓗᕉᔪᑦ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᖅ ᐃᓗᑐᕗᖅ ᓄᓇᕗᒻᒥ. ᑲᒪᓇᖅᑐᖅ ᑕᕐᓂᖅ ᐊᒻᒪ ᓴᙱᓂᐅᔪᒥ ᓄᓇᕗᒻᒥᐅᓂ ᐱᔪᓐᓇᖅᑎᑦᑎᓂᐊᖅᐳᖅ ᒪᒥᓴᕐᓂᕐᒧᑦ, ᑭᓯᐊᓂ ᒪᒥᓴᕐᓂᖅ ᐱᔪᓐᓇᖅᑎᑕᐅᔭᕆᐊᖃᖅᐳᖅ ᐃᓗᒃᑯᑦ ᐱᒋᐊᕐᓗᓂ, ᐃᓄᐃᑦ ᖃᐅᔨᒪᔭᑐᖃᖏᓐᓂ ᑐᑭᒧᐊᕈᑕᐅᓗᑎᒃ.

ᐆᒻᒪᑎᒧᑦ ᐃᒃᐱᖕᓇᖅᐳᖅ ᑕᑯᓂᕐᒥ ᓇᓗᓇᐃᒃᑯᑕᐅᔪᒥ ᐊᖏᖅᓯᒪᓂᐅᔪᒥ ᓴᓇᔭᐅᓂᐅᔪᒥ. ᐱᔭᕆᐊᖃᕐᓂᐊᖅᐳᖅ ᐃᖏᕐᕋᐃᓐᓇᖅᑐᒥ ᐊᒃᓱᕈᐃᓐᓇᕐᓂᐅᔪᒥ, ᑭᓯᐊᓂ ᐱᓱᒋᐊᕐᓂᓪᓚᕆᐅᕗᖅ ᑐᑭᖃᑦᑎᐊᖅᑐᒥ ᓴᐃᒻᒪᖃᑎᒌᖕᓂᐅᔪᒥ.