ᑲᖏᖅᖠᓂᕐᒥ ᐅᔭᕋᖕᓂᐊᖅᑏᑦ ᓵᓚᖃᓚᐅᖅᑐᑦ Kivalliq Canucks-ᑯᓐᓂᒃ 6-2-ᑯᑦ A-ᑯᑦ ᐱᙳᐊᖅᑎᖏᓐᓂᒃ ᓵᓚᒃᓴᖅᑎᐅᑉᓗᑎᒃ, Team Todd-ᑯᓪᓕ ᓵᓚᖃᓚᐅᖅᑐᑦ ᑎᑭᕋᕐᔪᐊᕐᒥᐅᑕᓂᒃ 5-3-ᑯᑦ B-ᑯᑦ ᐱᙳᐊᖅᑎᖏᓐᓂᒃ ᓵᓚᒃᓴᖅᑎᐅᑉᓗᑎᒃ ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᓚᐅᖅᑎᓪᓗᒋᑦ ᓯᐊᕐᕆᔮᕐᕕᒃ ᐃᓐᓄᒃᑐᒻᒪᕆᐊᓘᑉᓗᓂ ᑲᖏᖅᖠᓂᕐᒥ ᒫᑦᓯ 10-ᒥ.
ᐅᔭᕋᖕᓂᐊᖅᑏᑦ ᓵᓚᖃᓚᐅᖅᑐᑦ ᓇᐅᔮᕐᒥᐅᓂᒃ 6-3 ᑭᖑᓕᖅᐹᖅᓱᖅᐸᓪᓕᐊᓕᖅᑎᓪᓗᒋᑦ, Canucks-ᑯᑦ ᓵᓚᖃᓚᐅᖅᖢᑎᒃ ᑲᖏᖅᖠᓂᕐᒥ Cheifs-ᑯᓐᓂᒃ 5-2-ᑯᑦ ᐱᖃᑖᒍᑦ A-ᑯᑦ ᑭᖑᓪᓕᖅᐹᒃᑯᑦ. B-ᑯᑦ ᑭᖑᓪᓕᖅᐹᖅᓱᖅᐸᓪᓕᐊᑎᓪᓗᒋᑦ Team Todd-ᑯᑦ ᓴᓚᖃᓚᐅᖅᑐᑦ ᐃᒡᓗᓕᒑᕐᔪᖕᒥᐅᑕᑦ ᑎᑭᕋᕐᔪᐊᕐᒥᐅᑕᓂᒡᓗ ᓵᓚᖃᖅᖢᑎᒃ ᐊᕐᕕᐊᕐᒥᐅᑕᓂᒃ, ᑕᒪᕐᒥᒃ 5-4-ᑯᑦ. ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᕐᓂᒃᑯᑦ ᑲᑎᒪᔨᕋᓛᑦ ᐊᒻᒪᓗ ᐅᔭᕋᖕᓂᐊᖅᑎᒃᑯᑦ ᐱᙳᐊᖅᑎᖓ ᐊᑐᐊᑦᔪᐊᖅ ᐊᒃᓴᕐᓂᖅ ᐊᑯᓂ Hᐊᑭᓚᐅᖅᓯᒪᖅᑳᕋᓂ ᐅᑎᓚᐅᖅᑐᖅ ᓯᑕᒪᓂᒃ ᐅᑭᐅᓂᒃ ᓄᖅᑲᖓᖅᑳᖅᖢᓂ ᐃᓚᓐᓇᕆᓛᓂ ᐱᙳᐊᖃᑎᒋᓕᖅᖢᓂᐅᒃ, ᑲᓇᑕᒥ Hᐊᑭᖅᑎᕐᔪᐊᓂᒃ ᐱᖃᑕᐅᖃᑦᑕᖅᓯᒪᔪᖅ ᐱᙳᐊᖃᑎᒋᓕᖅᖢᓂᐅᑉ ᔪᐊᑕᓐ ᑐᑐ. ᓯᕗᓪᓕᖅᐹᒥ ᐱᙳᐊᖃᑎᒌᒋᐅᖅᑑᒃ ᐊᕙᑎᓂᒃ ᐅᑭᐅᓂᒃ. “ᐅᐱᓐᓇᖅᑐᒻᒪᕆᐊᓘᓚᐅᖅᑐᖅ ᓴᓂᓕᕆᑉᓗᒍ ᐃᒃᓯᕙᖃᑎᒋᓚᐅᕋᑉᑯ ᐃᓚᓐᓇᕆᓂᖅᐹᕋ, Hᐊᑭᖅᑎᕐᔪᐊᓂᒃ ᐱᙳᐊᖃᑕᐅᓯᒪᓕᓚᐅᖅᑐᖅ 15-ᓂᒃ ᐅᑭᐅᓂᒃ, Hᐊᑭᖃᑎᒋᓕᖅᖢᒍᓗ,” ᑕᐃᒪᓐᓇ ᐅᖃᖅᖢᓂ ᐊᒃᓴᕐᓂᖅ. ᐅᖃᖅᖢᓂ, ᑕᐃᒪᑐᕉᖅ ᑕᒪᕐᒥᒃ ᐱᙳᐊᕆᐊᖅᑐᓚᐅᖅᑐᑦ ᐅᑎᕈᒫᖅᐳᑦ 2020-ᒥ ᐊᒻᒪᓗ ᐃᖃᓗᖕᒥᐅᑦ ᐅᑎᒃᑲᓐᓂᕈᒪᓂᐊᖅᑐᒃᓴᐅᔪᑦ ᒪᕐᕉᖕᓂᒃ ᐅᑭᐅᓂᒃ ᖃᐃᓚᐅᖅᓯᒪᔪᓐᓃᕐᒪᑕ. ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᕐᓂᖅ ᐅᐱᓐᓇᒃᑲᓐᓂᓚᐅᖅᑐᖅ ᑖᑦᒧᑦ ᓂᐅᕕᕐᒪᑦ ᐊᑕᐅᓯᕐᒥᒃ ᐊᒧᔭᒃᓴᒥᒃ ᐊᒻᒪᓗ ᓵᓚᒃᓴᖅᖢᓂ ᓯᑭᑑᒥᒃ ᓄᑖᑦᑎᐊᕐᒥ. ᑖᑦ ᐅᖃᖅᖢᓂ ᐱᙳᐊᖃᑎᒋᓚᐅᖅᑕᖏᒡᒎᖅ ᕿᑎᖃᑎᒌᒃᑲᓐᓂᕈᒪᓂᐊᖅᑐᑦ ᐱᙳᐊᓕᕐᒥᒃᐸᑕ ᐊᕐᕌᒍ ᓵᓚᒃᓴᒃᑲᓐᓂᕋᔭᕐᓂᓂ ᐃᓱᒪᒋᑉᓗᒍ. ᐅᖃᖅᖢᓂ ᐊᓕᐊᓇᐃᒻᒪᕆᒐᔭᖅᑐᕉᖅ ᐅᑎᒃᑲᓐᓂᕈᓐᓇᕈᑎᒃ ᐱᙳᐊᖃᑎᒌᒃᑲᓐᓂᕐᓗᑎᒃ 2020-ᒥ. “ᐃᖅᑲᐅᒪᓇᕐᓂᐊᖅᑐᒥᒃ ᓴᖅᑭᑎᑦᑎᓚᐅᕋᑉᑕ ᓯᕗᓪᓕᖅᐹᒥ Team Todd-ᑯᑦ ᓵᓚᒃᓴᖅᑎᓪᓗᒋᑦ ᐊᓕᐊᓇᐃᑦᑐᒻᒪᕆᐊᓘᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᑖᑦ. “ᑕᒪᕐᒥᒃ ᐱᙳᐊᖅᑏᑦ ᓵᓚᒃᓴᕈᒪᔪᐃᓐᓇᐅᓚᐅᕐᒪᑕ, ᖁᕕᐊᓱᑦᑎᐊᖅᖢᑎᒃ ᓵᓚᒃᓴᕋᑉᑕ. ᐊᓕᐊᓇᐃᑦᑐᒻᒪᕆᐊᓘᓚᐅᖅᑐᖅ ᐊᒻᒪᓗ ᑕᐃᒪᑐᖅ ᑕᐃᒪᐃᒃᑲᓐᓂᕈᓐᓇᕐᓂᐊᖅᐳᒍᑦ ᐊᕐᕌᒍ.”