Skip to content

ᑐᒡᓕᐊᒍᑦ ᐳᑭᖅᑕᓕᙳᖁᔨᓂᕐᒧᑦ ᐃᑲᔫᑎ ᑲᖏᖅᖠᓂᕐᒦᓐᓂᐊᖅᑐᖅ

ᑐᒡᓕᐊᒍᑦ ᐳᑭᖅᑕᓕᙳᕈᒪᔪᓂᒃ ᐃᑲᔫᑎ ᐃᓚᓯᒋᐊᕈᑕᐅᓂᐊᖅᑐᖅ ᐃᓄᖕᓂᒃ ᐳᑭᖅᑕᓕᒋᔭᐅᔪᓂᒃ ᓄᓇᕗᒥ ᐃᑲᔫᑎ ᑲᖏᖅᖠᓂᕐᒦᑐᐃᓐᓇᕆᐊᓕᒃ ᐅᐱᕐᖔᒃᑯᑦ 2021-ᒥ, ᑕᐃᒪᓐᓇ ᐅᖃᖅᖢᓂ ᐊᖓᔪᖅᑳᕆᔭᐅᔪᖅ ᐳᑭᖅᑕᓕᖕᓂᒃ.

ᐳᑭᖅᑕᓕᒃᑯᓐᓂᒃ ᐊᖓᔪᖅᑳᖅ ᐊᒫᓐᑕ ᔫᓐᔅ ᐅᖃᓪᓚᒃᑐᖅ ᐃᓚᐅᖃᑕᐅᔪᓄᑦ ᐅᖃᐅᓯᖃᖅᖢᓂ ᓄᑖᒥᒃ ᐳᑭᖅᑕᓕᒃᑖᕈᒪᓂᕐᒧᑦ ᐃᑲᔫᑎᒥᒃ ᐃᖃᓗᖕᓂ ᕕᕗᐊᕆᐅᓚᐅᖅᑐᒥ. ᐊᔾᔨ ᐳᑭᖅᑕᓕᒃᑯᓐᓂᙶᖅᑐᖅ.
ᐊᔾᔨ ᐳᑭᖅᑕᓕᒃᑯᓐᓂᙶᖅᑐᖅ

ᑎᓂᔅ ᓛᒻ, ᒥᐊᓂᖅᓯᓯᒪᔪᖅ ᐳᑭᖅᑕᓕᙳᖅᑎᑦᑎᔪᒪᔪᓂᒃ ᐱᖓᓲᓕᖅᑐᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ, ᐅᖃᖅᖢᓂ ᐃᑲᔫᑎ, ᐱᒋᐊᓚᐅᖅᑐᖅ ᐃᖃᓗᖕᓂ ᐅᑭᐅᖅ ᐱᒋᐊᓕᓵᖅᑎᓪᓗᒍ, ᐆᒃᑑᑕᐅᓯᒪᙱᑦᑐᖅ ᑲᓇᑕᒥ ᐊᒻᒪᓗ ᐆᒃᑑᑕᐅᓕᖅᑐᖅ ᐱᐅᔪᒃᑯᑦ ᐳᑭᖅᑕᓕᙳᖅᓴᖁᔨᓂᕐᒧᑦ ᖃᓄᖅᑑᕈᑕᐅᔪᒃᑯᑦ ᐃᓄᖕᓄᑐᐃᓐᓇᐅᙱᑦᑐᖅ ᓄᓇᕗᒥ, ᑭᓯᐊᓂᓕ ᓄᓇᖃᖅᑳᖅᓯᒪᔪᓄᑦᑕᐅᖅ ᐊᓪᓚᖓᔪᓄᑦ.

ᐅᖃᖅᖢᓂ ᓄᓇᕗᒦᓕᖅᖢᓂᒎᖅ 25-ᓂᒃ ᐅᑭᐅᓂᒃ − 18-ᓂᒃ ᐅᑭᐅᓂᒃ ᐳᑭᖅᑕᓕᐅᑉᓗᓂ − ᐅᔾᔨᕈᓱᓕᓚᐅᖅᑐᖅ ᐳᑭᖅᑕᓕᓕᕆᔨᒃᑯᑦ ᓴᓇᔨᑖᕋᓱᙱᒻᒪᑕ ᐃᓄᖕᓂᒃ.

“ᐊᖓᔪᖅᑳᕆᔭᐅᔪᑦ ᑕᒪᕐᒥᒃ ᐳᑭᖅᑕᓖᓪᓗ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐅᖃᐃᓐᓇᓲᑦ ᓴᓇᔨᑖᒃᑲᓐᓂᕆᐊᖃᕐᓂᖏᓐᓄᑦ, ᓴᓇᔨᑖᒃᑲᓐᓂᕆᐊᖃᖅᑐᒎᓚᐃᓐᓇᖅᑐᑦ, ᑭᓯᐊᓂ ᓴᓇᔨᑖᒃᑲᓐᓂᕋᓱᓚᐅᕋᑉᑕ ᐊᑐᖅᖢᑕ ᓄᑕᐅᙱᑦᑐᓂᒃ ᖃᓄᖅᑑᕈᑎᓂᒃ ᑕᐃᒪᑦᑕᐃᓐᓇᐅᑉᓗᑎᒃ ᑐᓗᖅᑕᕈᑏᑦ ᐊᒻᒪᓗ ᐱᔪᓐᓇᐃᓪᓕᒍᑏᑦ,” ᑕᐃᒪᓐᓇ ᐅᖃᖅᖢᓂ ᓛᒻ.

“ᐃᓄᖕᒥᒃ ᐳᑭᖅᑕᓕᙳᕈᒪᔪᒥᒃ ᓴᖅᑭᑦᑐᖃᖅᓯᒪᙱᑦᑐᖅ ᑕᐃᒪᙵᓂ 2003-ᒥ.”

ᒪᒃᑯᒃᑐᕐᔪᐊᒥᒃ ᐳᑭᖅᑕᓕᖃᓚᐅᖅᑐᒍᑦ ᖃᒪᓂ’ᑐᐊᕐᒥ ᐊᑎᖓ ᑎᒥᑦᑐᕆ ᒪᓚᑰᕝ − ᒥᐊᓂᖅᓯᔨᒋᓚᐅᖅᑖᖓ ᐳᑭᖅᑕᓕᙳᓵᖅᑎᓪᓗᒍ ᑕᐃᑉᓱᒪᓂᑐᖃᐅᓕᖅᑐᖅ − ᐃᑲᔪᖅᑎᒋᓯᒪᔭᕋ ᓄᑖᖅ ᐃᑲᔫᑎ ᐱᒋᐊᕈᑕᐅᖁᑉᓗᒍ ᐊᒻᒪᓗ ᑕᐃᕕᑎ ᐊᒡᓘᒃᑲᖅ ᑲᒪᔨᐅᖏᓐᓇᖅᑐᖅ ᓴᓇᔨᒃᓴᖅᑖᕈᑎᒃᓴᓂᒃ.

ᕿᒥᕐᕈᓚᐅᕋᑉᑭᑦ ᐱᓕᕆᐊᕆᓚᐅᖅᓯᒪᔭᖅᐳᑦ ᑕᐃᓱᒪᓂᑐᖃᖅ, 2001-ᒥ ᐊᒻᒪᓗ 2002-ᒥ, ᓴᓇᔨᑖᑦᑎᐊᓚᐅᖅᓯᒪᔪᒍᑦ ᐃᓄᖕᓂᒃ ᐳᑭᖅᑕᓕᙳᓚᐅᖅᑐᓂᒃ, ᐊᒻᒪᓗ ᖃᐅᔨᓚᐅᖅᑐᖓ ᐃᑲᔪᖅᑕᐅᖃᑦᑕᓚᐅᕐᒪᑕ ᐳᑭᖅᑕᓕᙳᖅᓴᓂᒃᑯᑦ ᐊᓕᓚᔪᒃᑯᑦ ᖃᐅᔨᓴᖅᑕᐅᑎᓪᓗᒋᑦ ᐊᔪᙱᓐᓂᕆᔭᖏᓐᓂᒃ, ᑕᒪᓐᓇ ᑕᒡᕙ ᑐᓗᖅᑕᕈᑕᐅᒐᔪᒃᑐᖅ ᐃᓄᐃᑦ ᑕᒡᕘᓇ ᑐᓗᖅᑕᕈᑎᖃᕋᔪᖕᒪᑕ ᖄᖏᖅᓯᔪᓐᓇᐃᓪᓕᖃᑦᑕᕐᓂᕐᒧᑦ ᐊᓯᐊᓄᑦ ᓅᑉᐸᓪᓕᐊᔪᓐᓇᖁᑉᓗᒋᑦ ᖃᐅᔨᓴᖅᑕᐅᔾᔪᑎᓄᑦ.”

ᓛᒻ ᐅᖃᖅᖢᓂ ᓴᓇᔭᒃᓴᖅᑖᖅᑎᑦᑎᒍᑏᑦ 2001-ᒥ ᐊᒻᒪᓗ 2002-ᒥ ᑲᔪᓯᔪᓐᓇᖅᓯᓚᐅᕐᒪᑕ ᖄᖏᖅᓯᔪᓐᓇᙱᒃᑲᓗᐊᖅᐸᑕ ᐳᑭᖅᑕᓕᙳᖅᓴᓂᕐᒧᑦ ᐊᓕᓚᔪᒃᑯᑦ ᖃᐅᔨᓴᕈᑎᒥᒃ, ᐊᒻᒪᓗ ᖄᖏᖅᓯᓗᒃᑖᓚᐅᖅᖢᑎᒃ ᑕᒪᐃᓐᓂᒃ ᐊᓯᖏᓐᓂᒃ ᐳᑭᖅᑕᓕᒃᑯᓐᓂᒃ.

ᐅᖃᖅᖢᓂ ᐅᑉᓗᒥᐅᓕᖅᑐᖅ ᐊᖓᔪᖅᑳᕆᔭᐅᔪᑦ ᐳᑭᖅᑕᓕᒃᑯᓐᓂᒃ ᖁᔭᓈᖅᓯᓇᔭᙱᑦᑐᑦ ᓄᑖᓂᒃ ᐳᑭᖅᑕᓕᒃᓴᓂᒃ ᐳᑭᖅᑕᓕᙳᕋᓱᖕᓂᐊᕐᓗᓂ ᐊᓕᓚᔪᒃᑯᑦ ᖃᐅᔨᓴᕈᑎᒥᒃ, ᑕᐃᒪᐃᒻᒪᑦ ᓄᑖᒥᒃ ᖃᓄᖅᑑᕈᑎᒥᒃ ᓇᓂᓯᔭᕆᐊᖃᓚᐅᖅᑐᒍᑦ ᖁᕝᕙᖅᐸᓪᓕᐊᔪᓐᓇᖁᑉᓗᒋᑦ.

“ᑕᐃᒪᐃᒻᒪᑦ ᓄᑖᒥᒃ ᐃᓕᓐᓂᐊᕈᑎᒥᒃ ᓴᖅᑭᑦᑎᓚᐅᖅᑐᒍᑦ ᐃᖃᓗᖕᓂᒃ ᐅᑭᐅᖅ. ᓂᕆᐅᓚᐅᕋᓗᐊᖅᑐᒍᑦ ᐊᕙᑎᓂᒃ ᐃᓄᖕᓂᒃ ᐳᑭᖅᑕᓕᙳᖅᓴᔪᒪᓇᔭᖅᑐᓂᒃ ᐊᑎᓕᐅᕋᔭᖅᑐᓂᒃ ᐊᒻᒪᓗ ᐊᑎᓕᐅᖅᑐᖃᓕᓚᐅᖅᑐᖅ 11-ᓂᒃ.

“ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᑦ ᐋᖅᑭᒃᓱᐃᑎᓚᐅᖅᑕᖅᐳᑦ ᐃᑲᔫᑎᒥᒃ ᐃᑲᔪᕈᒪᓗᐊᖅᖢᒋᑦ ᒪᒃᑯᒃᑐᑦ ᐳᑭᖅᑕᓕᙳᕈᒪᔪᑦ ᖄᖏᖅᓯᔪᓐᓇᖁᑉᓗᒋᑦ ᐊᓕᓚᔪᒃᑯᑦ ᖃᐅᔨᓴᕈᑎᒥᒃ.

“ᑕᒪᕐᒥᒃ ᖄᖏᖅᓯᓚᐅᙱᑦᑐᑦ ᐊᓕᓚᔪᒃᑯᑦ ᖃᐅᔨᓴᕈᑎᒥᒃ ᓯᕗᓪᓕᖅᐹᒃᑯᑦ ᑎᑎᕋᕋᒥᒃ ᑭᓯᐊᓂ, ᐃᑲᔫᑎᒃᑯᑦ ᐱᓕᕆᒃᑲᓐᓂᐊᕐᔪᒃᖢᑎᒃ ᐊᒻᒪᓗ ᐃᓕᓐᓂᐊᖅᑎᑕᐅᒃᑲᓐᓂᐊᕐᔪᒃᖢᑎᒃ, ᑕᒪᕐᒥᒃ ᖄᖏᖅᓯᓕᓚᐅᖅᑐᑦ.

“ᑕᐃᒪᐃᒻᒪᑦ ᐅᒃᐱᕈᓱᒃᑐᒍᑦ ᑕᒪᓐᓇ ᐃᓕᓐᓂᐊᕈᑎ ᐃᓕᓐᓂᐊᖅᑕᐅᒃᑲᓐᓂᓕᖅᐸᑦ, ᑕᐃᒪᓐᓇᑦᑕᐅᖅ ᐱᐊᓂᒃᑐᖃᕐᓂᐊᖅᑐᖅ.”

ᓛᒻ ᐅᖃᖅᖢᓂ ᖃᑉᓯᑲᓪᓚᑦ ᐳᑭᖅᑕᓕᙳᕋᓱᒍᒪᓚᐅᖅᑐᑦ ᓄᖅᑲᓚᐅᕐᒪᑕ ᐊᔾᔨᒌᙱᑦᑑᑕᐅᔪᓂᒃ ᐱᔾᔪᑎᖃᖅᖢᑎᒃ, ᐊᒻᒪᓗ ᒪᕐᕉᓕᖅᑑᒃ ᐅᑕᖅᑭᔫᒃ ᐱᓕᕆᕝᕕᖕᒥ ᓴᓇᒋᐅᖅᓴᓂᕐᒧᑦ ᖄᖏᖅᓯᔪᓐᓇᕋᔭᕐᒪᖔᕐᒥᒃ.

ᐅᖃᖅᖢᓂ ᑕᒪᕐᒥᒃ ᒪᕐᕉᔫᒃ, ᐊᑕᐅᓯᖅ ᐊᖑᑎ ᐊᒻᒪᓗ ᐱᖃᑎᖓ ᐊᕐᓇᖅ, ᑭᕙᓪᓕᕐᒥᐅᑕᐅᔫᒃ, ᐊᒻᒪᓗ ᑕᐃᒪᑐᕉᖅ ᐃᑲᔫᑎ ᐃᓕᓐᓂᐊᕈᑎ ᑲᖏᖅᖠᓂᕐᒦᓐᓂᐊᖅᐸᑦ ᑕᐃᒪᒃᑲᓐᓂᐅᓂᐊᖅᐳᑦ ᐃᓄᐃᑦ ᐱᔫᒥᒍᓱᒐᔭᖅᑐᑦ ᑕᒪᑐᒥᙵ.

“ᐃᓕᓐᓂᐊᕈᑎ ᐱᕙᓪᓕᐊᑎᑕᐅᒋᐊᕐᓂᐊᖅᑐᖅ ᑕᖅᑭᐅᔪᒥ ᐅᖓᑖᓂᓘᓐᓃᑦ, ᖃᑉᓰᓐᓇᐅᑉᓗᑎᒃ ᐃᓕᓐᓂᐊᕈᒪᔪᑦ, ᑕᐃᒪᑐᖅ ᒪᕐᕉᒃ ᐃᓕᓐᓂᐊᖅᑑᒃ ᑲᔪᓯᑦᑎᐊᕈᓐᓇᕐᓂᐊᖅᐴᒃ ᐅᑭᐊᒃᓵᖅ ᐱᒋᐊᓕᓵᖅᑎᓪᓗᒍ.

“ᐳᔾᔫᑦ ᑯᓱᒐᖅ, ᐃᓕᓐᓂᐊᖅᑎᑦᑎᔨᐅᓚᐅᖅᑐᖅ ᓯᕗᓪᓕᖅᐹᒥ ᐃᓕᓐᓂᐊᕈᑎᒥᒃ ᐋᖅᑭᒃᓱᖅᑕᐅᓯᒪᔪᒥᒃ ᓄᓇᕗᒥ ᐅᖃᐅᓯᓕᕆᔨᒃᑯᑦ ᑲᑎᒪᔨᖏᓐᓄᑦ, ᐃᓕᓐᓂᐊᖅᑎᑦᑎᓂᐊᕐᒥᔪᖅ ᑲᖏᖅᖠᓂᕐᒥ ᐊᒻᒪᓗ ᐃᑐᕆᔭᓇ ᑯᓱᒐᖅ ᐃᓚᐅᖃᑕᐅᓪᓚᕆᖕᓂᐊᖅᑐᖅᑕᐅᖅ.

“ᑕᒪᓐᓇ ᑲᔪᓯᔪᓐᓇᕋᔭᙱᑦᑐᖅ ᐃᑲᔪᖅᑐᖅᑕᐅᙱᒃᑯᑉᑕ ᓄᓇᕗᒥ ᑐᙵᕕᒃᑯᑦ ᑎᒥᖓᓄᑦ, ᑮᓇᐅᔭᓕᖅᓯᓚᐅᕐᒪᑕ ᑕᒪᐃᓐᓂᖅᑲᔭᖅ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦᑕ ᐃᓄᓕᕆᔨᒃᑯᖏᑦ ᐃᑲᔪᓪᓚᕆᓚᐅᕐᒥᔪᑦ ᑮᓇᐅᔭᖅᑖᖅᑎᑦᑎᓯᒪᑉᓗᑎᒃ.

“ᑮᓇᐅᔭᖅᓯᐅᕆᐊᖃᓚᐅᕋᑉᑕ ᐊᓯᖏᓐᓂᒃ, ᑕᐃᒪᐃᒻᒪᑦ ᐃᑲᔪᓚᐅᙱᑉᐸᑕ ᑕᒪᓐᓇ ᑲᔪᓯᓇᔭᓚᐅᙱᑦᑐᖅ.

“ᖃᐅᔨᓇᓱᒃᑐᒍᑦ ᐳᑭᖅᑕᓕᒃᑯᑦ ᑮᓇᐅᔭᓕᖅᓯᓯᒪᔪᓐᓇᕐᓂᐊᕐᒪᖔᑕ ᑕᒪᓐᓇ ᑲᔪᓯᔪᓐᓇᖁᑉᓗᒍ ᑭᓯᐊᓂ ᑕᐃᒪᐃᓐᓂᐊᖅᑑᔭᙱᑦᑐᖅ, ᑕᐃᒪᐃᒻᒪᑦ ᕿᓃᓐᓇᕐᓂᐊᖅᑐᒍᑦ ᑕᒪᓐᓇ ᑲᔪᓰᓐᓇᖃᑦᑕᖁᓗᒍ ᐊᕐᕌᒍᑕᒫᒃᑯᑦ, ᐊᒻᒪᓗ, ᑕᐃᒪᑐᖅ, ᐃᓕᓐᓂᐊᕈᒪᔪᑦ ᐊᒥᓱᙳᒃᑲᓐᓂᕐᓂᐊᖅᐳᑦ.”