Skip to content

EDITORIAL: ᒫᓐᓇᐅᔪᒥ ᐱᓪᓚᕆᐅᙱᑦᑐᒧᑦ ᐊᐅᓪᓛᕐᓇᕐᓂᐅᙱᓚᖅ

ᕿᑲᕐᓇᐅᔪᒥ ᐊᕐᕌᒎᑉ ᐃᓚᖓᓐᓂ ᑎᑭᑉᐸᓪᓕᐊᑎᓪᓗᒍ ᐊᒻᒪ ᖁᕕᐊᓱᒡᕕᒃᓯᐅᑎᓂ ᓴᖅᑭᑉᐸᓪᓕᐊᓪᓗᑎᒃ ᐴᖅᓯᒪᑯᑖᒃᑐᓂ ᐃᒡᓘᑉ ᖁᓕᖓᓂ, ᐅᓇ ᑐᑭᖃᒐᔪᒃᐳᖅ ᐊᐅᓪᓛᕐᓂᐅᔪᒥ ᖃᓪᓗᓈᑦ ᓄᓇᖓᓐᓄᑦ ᐊᒥᓱᓄᑦ ᐃᖅᑲᓇᐃᔭᖅᑎᐅᔪᓄᑦ ᓄᓇᕗᒻᒥ ᐳᓚᕋᕐᓂᕐᒧᑦ ᐃᓚᒥᓂᑦ ᐊᒻᒪᓗ ᕚᑕᓖᖏᓐᓂ ᓴᙱᒃᓴᖅᑎᕆᓂᐅᔪᒧᑦ. ᐅᓇ ᐱᓗᐊᖅᑐᒥ ᓱᓕᓂᐅᕗᖅ ᐃᓕᓴᐃᔨᓄᑦ ᓄᓇᕗᒻᒥ, ᐊᒥᓱᑦ ᑎᑭᑉᐸᒃᑐᓂ ᖃᓪᓗᓈᑦ ᓄᓇᖓᓐᓂ ᕿᓂᖅᑐᓂ ᑐᑭᖃᕐᓂᖅᓴᐅᔪᓂ ᐃᖅᑲᓇᐃᔮᖃᕐᓂᕐᒧᑦ.

ᐃᓚᖏᑦ ᓄᓇᕗᒻᒦᓚᐅᑲᒋᐊᖅᑐᑐᐃᓐᓇᓲᖑᕗᑦ ᐊᒻᒪ ᓇᒧᙵᐅᕈᓘᔭᖅᐸᒡᓗᑎᒃ ᐊᒻᒪ ᐊᓯᖏᑦ ᓄᓇᑖᕈᒪᓕᓲᖑᕗᑦ ᐅᑭᐅᖅᑕᖅᑐᒥ, ᑭᓯᐊᓂ ᐱᕕᒃᓴᖃᖅᑎᑕᐅᓂᐅᔪᒥ ᑲᑎᖃᑎᖃᒃᑲᓐᓂᕐᓂᕐᒥ ᐃᓚᖏᓐᓂ ᑭᒃᑯᓕᒫᑦ, ᑕᐃᒃᑯᐊᓘᓐᓃᑦ ᐃᓅᓯᒪᔪᓂ ᐱᕈᖅᓴᓯᒪᓪᓗᑎᒡᓗ ᐅᑭᐅᖅᑕᖅᑐᒥ, ᑕᑯᔪᓐᓇᖅᐸᖓ ᐱᒻᒪᕆᐅᓂᖓᓂ.

ᑭᓯᐊᓂ ᑕᒪᑐᒪᓂ ᐊᕐᕌᒎᔪᒥ ᐊᕐᕌᒎᓯᒪᕗᖅ ᐊᔾᔨᒋᙱᑕᖓᓂ ᓇᓗᓇᙱᑦᑐᓄᑦ ᐱᔾᔪᑕᐅᔪᓄᑦ. ᑕᐃᒪᙵᓂ ᓴᖅᑭᓐᓂᐅᔪᒥ ᓄᕙᒡᔪᐊᕐᓇᖅ-19–ᒥ ᓱᒃᑲᔪᒥ ᐱᓕᕆᓂᖃᑲᐅᖅᑐᓚᐅᖅᐳᑦ ᐊᒻᒪ ᒪᑐᕋᐃᓪᓗᑎᒃ ᐊᐅᓪᓛᕐᓂᐅᔪᒥ ᐃᓗᐊᓄᑦ ᐊᒻᒪ ᓯᓚᑖᓄᑦ ᓄᓇᕗᒻᒥ ᐊᒻᒪᓗ ᐅᐸᒃᑕᐅᑦᑕᐃᓕᒪᓂᐅᔪᒥ ᒪᓕᒃᑕᐅᔭᕆᐊᓕᖕᓂ ᐊᒻᒪ ᐅᖓᓯᒌᒋᐊᖃᕐᓂᐅᔪᓂ ᐃᓕᓯᒪᔪᓂ ᑕᐃᒪᙵᓂ ᐱᒋᐊᕐᓂᖓᓂ. 

ᐃᓱᒪᒋᔭᖃᑦᑎᐊᕐᓂᐅᔪᒥ ᑐᕌᒐᖃᖅᓯᒪᕗᖅ, ᐃᓱᒪᒋᔭᖃᖅᖢᓂ ᐱᑕᖃᐃᓐᓇᕐᓂᖓᓂ ᐊᓂᖅᑎᕆᓂᕐᓄᑦ ᐋᓐᓂᐊᕐᓂᐅᔪᓂ ᓄᓇᕗᒻᒥ ᐃᓚᖃᖅᑐᒥ ᐱᐅᙱᓗᐊᖅᑐᓂ ᐊᒻᒪ ᐸᖕᒥᐅᒐᔪᒃᑐᓂ ᐃᒡᓗᒋᔭᐅᔪᓄᑦ ᐃᓄᓕᒫᓄᑦ ᐃᒡᓗᖁᑎᖏᓐᓄᑦ. ᑭᓯᐊᓂ ᓂᕆᐅᒃᑐᖃᓗᐊᙱᓚᖅ ᑭᓇᑐᐃᓐᓇᒥᒃ ᐊᒥᓱᓄᑦ ᖃᓐᓂᒻᒪᓐᓇᐅᔪᒥ ᐊᑯᓂᐅᑎᒋᓂᐊᕐᓂᖓᓂ ᑕᐃᒪᐃᓐᓂᖓᓄᑦ.

ᐃᓅᓯᖅ ᐃᖏᕐᕋᐃᓐᓇᕆᐊᖃᖅᐳᖅ. ᐃᓄᐃᑦ ᖃᓪᓗᓈᑦ ᓄᓇᖓᓐᓄᐊᕆᐊᖃᖃᑦᑕᖅᐳᑦ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᐅᔪᒧᑦ ᐅᕝᕙᓘᓐᓃᑦ ᐊᓯᖏᑦ ᐅᑭᐅᖅᑕᖅᑐᓕᐊᕆᐊᖃᓲᖑᕗᑦ ᐱᓕᕆᓂᕐᒥ ᐱᓪᓚᕆᐅᔪᓄᑦ ᐱᓕᕆᓂᐅᔪᓄᑦ.

ᐃᓕᓐᓂᐊᕐᓂᓕᕆᔨᒃᑯᓐᓂ ᒥᓂᔅᑕᖓ ᑕᐃᕕᑦ ᔪᐊᓇᓯ, ᑭᓯᐊᓂ, ᑕᑯᙱᓚᖅ ᐃᓕᓴᐃᔨᐅᔪᓂ ᕿᑲᕆᐊᕐᓂᐊᕐᓂᖏᓐᓂ ᖃᓪᓗᓈᑦ ᓄᓇᖓᓐᓂ ᐃᒪᐃᓐᓂᖓᓄᑦ "ᐱᓪᓚᕆᐅᓂᖓᓂ."

ᒪᓕᒃᑐᒥ ᐃᓱᒪᓕᐊᖑᓂᐅᓚᐅᖅᑐᒥ ᐊᕐᕌᒎᑉ ᐱᒋᐊᕐᓂᐸᓗᐊᓂ ᖃᐃᖁᔨᓂᐅᔪᒥ ᑕᒪᒃᑭᓂ ᐃᓕᓴᐃᔨᐅᔪᓂ ᓄᓇᕘᑉ ᓯᓚᑖᓃᑦᑐᓂ ᐅᑎᕐᓂᖏᓐᓄᑦ ᓄᓇᕗᒻᒧᑦ ᐱᓕᕆᔭᖅᑐᕐᓗᑎᒃ ᐱᓕᕆᐊᒃᓴᒥᓂᑦ ᐅᐸᒃᓯᒪᓗᑎᒃ, ᔪᐊᓇᓯ ᐊᔾᔨᐸᓗᐊᓂ ᐅᖃᐅᔾᔨᕗᖅ ᐃᓕᓴᐃᔨᐅᔪᓂ ᒫᓐᓇ "ᐃᓱᒪᒃᓴᖅᓯᐅᕆᙱᓐᓂᖓᓂ ᐃᓕᓴᐃᔨᐅᔪᓂ ᐱᓕᕆᓂᖏᓐᓂ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᕕᐅᔪᓂᑦ." ᑐᑭᖃᖅᑐᒥ ᐃᓕᓴᐃᔨᒥᒃ ᐊᐅᓪᓚᕈᓂ ᖃᓪᓗᓈᑦ ᓄᓇᖓᓐᓄᑦ ᐳᓚᕋᕐᓂᕐᒧᑦ ᐃᓚᖏᓐᓂ, ᐅᐸᒃᑕᐅᑦᑕᐃᓕᒪᔭᕆᐊᖃᕋᔭᖅᐳᖅ ᐅᓪᓗᓄᑦ 14–ᓄᑦ ᓇᖕᒥᓂᖅ ᕿᑲᕐᓂᕆᔭᖏᓐᓂ ᐊᑯᓂᐅᓂᖓᓂ ᐊᒻᒪᓗ ᓂᕆᐅᒋᔭᐅᓪᓗᑎᒃ ᐃᖅᑲᓇᐃᔭᕆᐊᓛᕐᓂᖏᓐᓂ ᐱᒋᐊᕐᓂᐅᔪᒥ ᐊᕐᕌᒎᔪᒥ.

ᓄᓇᕗᒻᒥ ᐃᓕᓴᐃᔨᓄᑦ ᑲᑐᔾᔨᖃᑎᒌᖑᔪᓄᑦ ᐊᖓᔪᖅᑳᖓ ᔮᓐ ᕚᓐᔪᐊᐃ, ᐃᑲᔪᖅᓱᐃᒐᓗᐊᖅᑎᓪᓗᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᒥᓂᔅᑕᖓᓂ ᔪᐊᔾ ᕼᐃᒃᔅᒥ ᖃᐃᖁᔨᓂᐅᔪᒥ ᐱᓪᓚᕆᐅᙱᑦᑐᒥ ᐊᐅᓪᓛᕐᓂᖃᖁᔨᓇᓂ, ᐅᖃᖅᓯᒪᕗᖅ ᑐᒃᓯᕋᕐᓂᐅᔪᓂ ᐊᑐᕈᓐᓇᕐᓂᐅᔪᒥ ᐅᐸᒃᑕᐅᑦᑕᐃᓕᒪᓂᐅᔪᒥ ᐃᓱᒪᒃᓴᖅᓯᐅᕆᔭᐅᓪᓗᐊᖅᐳᑦ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ ᐃᓕᓴᐃᔨᐅᔪᓄᑦ.

"ᑕᒪᒃᑭᐅᒪᔪᒥ ‘ᐋᒃᑳᕐᓂᕐᒧᑦ' ᑭᐅᓂᐅᔪᒥ ᕿᑲᓚᐅᑲᖕᓂᕐᒧᑦ ᑐᒃᓯᕋᕐᓂᐅᔪᓂ ᐃᓚᒋᔭᑦᑎᓐᓂ ᖁᕕᐊᓱᒡᕕᖕᒥ ᓄᖅᑲᖓᓚᐅᑲᖕᓂᐅᔪᒥ ᓈᒻᒪᙱᓚᖅ ᑐᕌᒐᒃᓴᐅᓂᖓᓂ," ᕚᓐᔪᐊᐃ ᐅᖃᓚᐅᖅᐳᖅ.

ᐃᓱᒪᓕᐅᕆᓂᐅᔪᑦ ᑕᐃᑯᖓ ᐊᑲᐅᙱᓕᐅᕈᑕᐅᔪᒧᑦ ᐋᖅᑭᒃᑕᐅᓪᓗᐊᓚᐅᖅᑎᓪᓗᒋᑦ ᓴᖑᑎᑕᒃᓴᐅᙱᓪᓗᓂ ᑕᖅᑭᐅᓚᐅᖅᑐᒥ, ᐃᓕᓴᐃᔨᐅᔪᑦ ᓵᙵᓂᐊᖅᑐᒃᓴᐅᕗᑦ ᐊᔪᕐᓇᖅᑐᓂ ᐃᓱᒪᓕᐅᕆᓂᐅᓂᐊᖅᑐᓂ. ᖁᕕᐊᓱᒡᕕᖕᒥ ᕿᑲᕐᓂᐅᔪᒥ ᐱᓇᓱᐊᕈᓯᐸᓗᖕᓂ ᐱᖓᓱᓂᑦ, ᐃᒻᒥᓂᒃ–ᐅᐸᒃᑕᐅᑦᑕᐃᓕᒪᓂᐅᔪᑦ ᐱᓇᓱᐊᕈᓯᕐᓂ ᒪᕐᕉᓪᓗᓂ ᐊᒻᒪ ᐅᓪᓗᐸᓗᖕᒥ ᒪᕐᕉᖕᓂᓪᓘᓐᓃᑦ ᐊᐅᓪᓛᕐᓂᖃᖅᖢᓂ ᑕᒪᒃᑭᓄᑦ ᑕᐅᕗᖓ ᐅᑎᒧᓪᓗ, ᐃᓕᓴᐃᔨᐅᔪᑦ ᐊᑐᕆᐊᖃᕋᔭᖅᐳᑦ ᐅᓪᓗᓂ 16–ᓂ ᕿᑲᕐᓂᐅᔪᒥ ᑕᓪᓕᒪᓄᑦ ᐅᓪᓗᓂ ᐃᓚᒥᓃᑦᑐᓐᓇᑐᐃᓐᓇᕋᔭᖅᖢᑎᒃ.

ᐅᓇ ᑎᓕᐅᕈᑎᕐᔪᐊᖑᓇᔭᖅᐳᖅ ᑕᐃᒃᑯᓄᖓ ᖁᕕᐊᑦᑐᓄᑦ ᑲᑎᒃᑲᓐᓂᓛᕐᓂᖏᓐᓄᑦ ᓇᒡᓕᒋᔭᒥᓂᑦ ᐊᒻᒪ ᐃᓚᒋᐊᖅᓯᕗᖅ ᖄᒃᑲᓐᓂᐅᔪᒥ ᐊᔪᕐᓇᕐᓂᐅᔪᒥ ᐃᖅᑲᓇᐃᔮᖑᔪᒧᑦ ᐊᒻᒪᓗ ᐊᕐᕌᓂᐅᓂᐊᖅᑐᒥ ᐃᓕᓴᐃᔨᒃᓴᖅᓯᐅᕐᓂᕐᒥ ᐱᓕᕆᓂᐅᔪᒥ, ᑭᓯᐊᓂ ᐱᔭᕆᐊᖃᖅᑑᕗᖅ ᐱᓕᕆᓂᐅᔪᒥ.

ᓄᑖᓂ ᖃᓄᐃᓐᓂᐅᔪᓂ ᓴᖅᑭᑉᐸᓪᓕᐊᑐᐃᓐᓇᖅᑐᓂ ᓄᓇᕘᑉ ᐃᓗᐊᓂ ᑭᒡᓕᒋᔭᖏᓐᓄᑦ ᑐᕌᖓᓂᖃᓪᓚᕆᒃᑐᓂ ᐊᐅᓪᓛᕐᓂᕐᒧᑦ, ᒪᑐᐃᖅᓯᓂᕐᒥ ᐃᓄᒋᐊᒃᑐᓄᑦ ᐊᕙᓗᓂᑦ ᐃᓱᒪᓂᑦᑎᐊᕙᐅᙱᑦᑐᑦᓴᐅᕗᖅ, ᐊᒻᒪᓗ ᐃᓱᒪᒋᔭᖃᕐᓂᐅᔪᖅ ᐅᖃᐅᓯᐅᖃᑕᐅᔪᒥ ᓄᓇᕗᒻᒥᐅᓂ ᖁᕐᓗᖅᑑᒥ ᐊᕐᕕᐊᓄᑦ ᐸᖕᓂᖅᑑᒧᑦ. 

ᐊᑲᐅᓇᔭᙱᓐᓂᕗᖅ ᐊᒥᓱᓄᑦ ᐊᓯᖏᓐᓄᑦ ᓴᓇᔨᐅᔪᓄᑦ ᓄᓇᕗᓕᐊᖅᐸᒃᑐᓄᑦ ᐃᖅᑲᓇᐃᔭᕆᐊᖅᖢᑎᒃ ᐊᒻᒪ ᐊᖏᕐᕋᓕᐊᕆᓪᓗᓂᔾᔪᒃ. ᒐᕙᒪᒃᑯᑦ ᓱᑲᑎᕆᒃᑲᓐᓂᕆᐊᖃᕈᑎᒃ ᓂᕈᒥᐊᒐᖏᓐᓂ ᖃᒃᓱᖓᐅᑎᖏᓐᓂ ᐊᒻᒪ ᐊᑭᓖᑲᑕᒍᓐᓃᕐᓗᑎᒃ ᐅᐸᒃᑕᐅᑦᑕᐃᓕᒪᓂᐅᔪᓂ ᐅᕙᙶᖅᑐᓂ ᐱᓪᓚᕆᐅᙱᑦᑐᒧᑦ ᐊᐅᓪᓛᕐᓂᐅᔪᒥ, ᐃᓕᓴᐃᔩᑦ ᐊᔾᔨᒋᔭᐅᙱᑦᑑᓪᓗᐊᙱᓚᑦ.

ᐅᖃᐅᓯᐅᓂᐅᔪᖅ ᐃᒪᐃᓕᖓᓂᖓᓂ: "ᐅᕙᓃᑦᑐᐃᓐᓇᐅᕗᒍᑦ ᑲᑎᙵᓪᓗᑕ."